Uttara-khaṇḍa · Chapter 240
Sourceश्रीमहादेव उवाच- अथ वर्षसहस्रांते सर्वलोकमहेश्वरम् । अदितिर्जनयामास वामनं विष्णुमच्युतम् १। श्रीवत्सकौस्तुभोरस्कं पूर्णेंदुसदृशद्युतिम् । सुन्दरं पुंडरीकाक्षमतिखर्वतनुं हरिम् २। वटुवेषधरं देवं सर्ववेदांगगोचरम् । मेखलाजिनदण्डादि चिह्नैरंकितमीश्वरम् ३। तं दृष्ट्वा देवताः सर्वे शतक्रतुपुरोगमाः । स्तुत्वा महर्षिभिः सार्द्धं नमश्चक्रुर्महौजसम् ४। ततः प्रसन्नो भगवान्प्रोवाच सुरसत्तमान् । वामन उवाच- किं कर्तव्यं मया चाद्य तद्ब्रवीथ सुरोत्तमाः ५। श्रीशंकर उवाच-। ततः प्रहृष्टास्त्रिदशास्तमूचुः परमेश्वरम् । देवा ऊचुः । अस्मिन्काले बलेर्यज्ञो वर्त्तते मधुसूदन ६। अप्रत्याख्यानकालोऽयं तस्य दैत्यपतेः प्रभो । याचित्वा त्रिदिवं लोकं तन्नस्त्वं दातुमर्हसि ७। शंकर उवाच- इत्युक्तास्त्रिदशैस्सर्वैराजगाम बलिं हरिः । यागदेशे समासीनमृषिभिस्सार्द्धमष्टभिः ८। अभ्यागतं तु तं दृष्ट्वा सहसोत्थाय दैत्यराट् । अभ्यागतः स्वयं विष्णुरितिहास समन्वितः ९। पूजयामास विधिना निवेश्य कुसुमासने । प्रणिपत्य नमस्कृत्य प्राह गद्गदया गिरा १०। बलिरुवाच- धन्योऽस्मि कृतकृत्योस्मि सफलं मम जीवितम् । त्वामर्च्चयित्वा विप्रेंद्र किं करोमि तव प्रियम् ११। आगतोऽसि यदर्थं त्वं मामुद्दिश्य द्विजोत्तमः । तत्प्रयच्छामि ते शीघ्रं ब्रूहि वेदविदां वर १२। शंकर उवाच- ततः प्रहृष्टमनसा तमुवाच महीपतिम् । वामन उवाच- शृणु राजेंद्र वक्ष्यामि ममागमनकारणम् १३। अग्निकुण्डस्य पृथिवीं देहि दैत्यपते मम । मम त्रिविक्रमपदां नान्यदिच्छामि मानद १४। सर्वेषामेव दानानां भूमिदानमनुत्तमम् । यो ददाति महीं राजा विप्रायाकिंचनाय वै १५। अंगुष्ठमात्रामपि वा स भवेत्पृथिवीपतिः । न भूमिदानसदृशं पवित्रमिह विद्यते १६। भूमिं यः प्रतिगृह्णाति भूमिं यश्च प्रयच्छति । उभौ तौ पुण्यकर्म्माणौ निधने स्वर्गगामिनौ १७। तस्माद्भूमिं महाराज प्रयच्छ त्रिपदीं मम । एतदल्पां महीं दातुं मा विशंक महीपते । जगत्त्रयप्रदानं तन्नाम भूप भविष्यति १८। शंकर उवाच- ततः प्रहृष्टवदनस्तथेत्याह महीपतिः । तस्मै महीप्रदानं तु कर्तुं मेने विधानतः १९। तं दृष्ट्वा दैत्यराजानं तदा तस्य पुरोहितः । उशना ह्यब्रवीद्वाक्यं मा राजन्दीयतां महीम् २०। शुक्र उवाच- एष विष्णुः परेशोऽथ देवैः संप्रार्थितो नृप । वंचयित्वा महीं सर्वां त्वत्तः प्राप्तुमिहागतः २१। तस्मान्मही न दातव्या तस्मै राजन्महात्मने । अन्यमर्थं प्रयच्छस्व वचनान्मम भूपते २२। श्रीशंकर उवाच- ततः प्रहस्य राजासौ तं गुरुं प्राह धैर्य्यतः । बलिरुवाच- प्रीतये वासुदेवस्य सर्वं पुण्यं कृतं मया २३। अद्य धन्योस्म्यहं विष्णुः स्वयमेवागतो यदि । तस्य प्रदेयमेवाद्य जीवितं च महत्सुखम् २४। तस्मादस्मै प्रयच्छामि त्रिलोकीमपि मा चिरम् । श्रीशंकर उवाच- इत्युक्त्वा भूपतिस्तस्य पादौ प्रक्षाल्य भक्तितः २५। वांच्छितां प्रददौ भूमिं वारिपूर्वं विधानतः । परिणीय नमस्कृत्य दत्वा वै दक्षिणां वसु २६। प्रोवाच तं पुनर्विप्रं प्रहृष्टेनांतरात्मना । बलिरुवाच- धन्योस्मि कृतकृत्योस्मि तव दत्वा महीं द्विज २७। यथेष्टा तव विप्रेंद्र तद्गृहाण महीमिमाम् । श्रीशंकर उवाच- तमुवाच नृपं विष्णू राजंस्तव समीपतः २८। मापयामि पदेनाद्य पृथिवीं तव पश्यतः । इत्युक्त्वा खर्वरूपं तद्विहाय परमेश्वरः २९। त्रिविक्रमवपुर्भूत्वा जग्राह पृथिवीमिमाम् । पंचाशत्कोटिविस्तीर्ण ससमुद्र महीधराम् ३०। ससागरां च सद्वीपां सदेवासुरमानुषाम् । पादेनैकेन वपुषो व्यक्रांत मधुसूदनः ३१। उवाच दैत्यराजेंद्र किं करोमीति शाश्वतः । तद्वै त्रिविक्रमं रूपमीश्वरस्य महौजसम् ३२। हितार्थमपि देवानामृषीणां च महात्मनाम् । न दृष्टमपि शक्यं स्याद्ब्रह्मणः शंकरस्य च ३३। तत्पदं पृथिवीं सर्वामाक्रम्य गिरिजे शुभे । अतिरिक्तं समभवच्छतयोजनमायतम् ३४। दिव्यचक्षुर्ददौ तस्मै दैत्यराज्ञे सनातनः । तस्मै संदर्शयामास स्वकं रूपं जनार्दनम् ३५। तद्विश्वरूपं देवस्य दृष्ट्वा दैत्येश्वरो बलि । प्रहर्षमतुलं लेभे सानंदाश्रु परिप्लुतः ३६। दृष्ट्वा देवं नमस्कृत्य स्तुत्वा स्तुतिभिरेव च । प्राह गद्गदया वाचा प्रहृष्टेनांतरात्मना ३७। बलिरुवाच- धन्योस्मि कृतकृत्योस्मि त्वां दृष्ट्वा परमेश्वरम् । लोकत्रयं त्वमेवैतद्गृहाण परमेश्वर ३८। श्रीशंकर उवाच- अथ सर्वेश्वरो विष्णुर्द्वितीयं पदमव्ययम् । ऊर्ध्वं प्रसारयामास ब्रह्मलोकांतमच्युतः ३९। सनक्षत्रग्रहोपेतं सर्वदेवसमावृतम् । पदेन परिपूर्णोऽभूदच्युतस्य शुभानने ४०। ततः पितामहो ब्रह्मचक्रपद्मादिचिह्नितम् । पादं तद्देवदेवस्य हर्षसंकुलचेतसा ४१। धन्योस्मीति वदन्ब्रह्मा गृहीत्वा स्वकमंडलुम् । भक्त्या प्रक्षालयामास तत्रसंस्थित वारिणा ४२। अक्षय्यमभवत्तोयं तस्य विष्णोः प्रभावतः । तत्तीर्थं मेरुशिखरे पपात विमलं जलम् ४३। जगतः पावनार्थं वै चतुर्दिक्षु प्रवाहितम् । सिता चालकनन्दा च चक्षुर्भद्रा यथाक्रमम् ४४। ततश्चालकनन्दा च मेरोर्दक्षिणतः स्मृता । त्रिधा नाम्ना त्रिपथगा त्रिस्रोता लोकपावनी ४५। स्वर्गे मंदाकिनी प्रोक्ता त्वधो भोगवती तथा । मध्ये वेगवती गंगा पावनार्थं नृणां शिवा ४६। तां दृष्ट्वा मेरुमध्ये तु प्रस्रवंतीं शुभानने । आत्मनः पावनार्थाय शिरसाहमधारयम् ४७। दिव्यं वर्षसहस्रं तु धृत्वा गंगाजलं शुभम् । शिवत्वमगमं देवि सर्वलोकेषु पूजितः ४८। यो वहेच्छिरसा गंगातोयं विष्णुपदोद्भवम् । प्राशयेद्वा जगत्पूज्यो भविष्यति न संशयः ४९। गंगागंगेति यो ब्रूयाद्योजनानां शतैरपि । मुच्यते सर्वपापेभ्यो विष्णुलोकं स गच्छति ५०। ततो भगीरथो राजा गौतमश्च महातपाः । तपसा पूजयित्वा मां गंगार्थं समयाचत ५१। सर्वलोकहितार्थाय तां गंगां वैष्णवीं शिवाम् । तयोरहं तामददां प्रीत्या देवि सरिद्वराम् ५२। गौतमेन समानीता गौतमी तेन कीर्त्तिता । भागीरथीति विख्याता तेन राज्ञा वृता यतः ५३। प्रसंगात्ते समाख्यातं गंगाजन्मात्यनुत्तमम् । ततो नारायणः श्रीमान्बलिं दैत्यपतिं प्रभुः ५४। रसातलं शुभं लोकं प्रददौ भक्तवत्सलः । सर्वेषां दानवानां तु नागानां यादसामपि ५५। राजानं तु बलिं चक्रे यावदाभूतसंप्लवम् । प्रतिगृह्य बलेर्लोकान्बटुवेषेण दैत्यहा ५६। महेंद्राय ददौ प्रीत्या काश्यपो विष्णुरव्ययः । ततो देवाः सगंधर्वा ऋषयश्च महौजसः ५७। तुष्टुवुः स्तुतिभिर्द्दिव्यैः पूजयामासुरच्युतम् । संक्षिप्य तन्महद्रूपं तेषां संदर्शनाय वै ५८। संपूज्यमानास्त्रिदशैरंतर्द्धानं ययौ हरिः । इत्थं सुरक्षितः शक्रो विष्णुना प्रभविष्णुना ५९। त्रैलोक्यं महदैश्वर्य्यमवाप त्रिदिवेश्वरः । एतत्ते सर्वमाख्यातं वामनं वैभवं शुभम् । शेषं यद्वैभवं देवि तद्वक्ष्यामि यथाक्रमात् ६०। इति श्रीपाद्मेमहापुराणे पंचपंचाशत्साहस्र्यां संहितायामुत्तरखंडे उमामहेश्वरसंवादे वामनप्रादुर्भावोनाम चत्वारिंशदधिकद्विशततमोऽध्यायः २४० ।
śrīmahādeva uvāca- atha varṣasahasrāṃte sarvalokamaheśvaram | aditirjanayāmāsa vāmanaṃ viṣṇumacyutam 1| śrīvatsakaustubhoraskaṃ pūrṇeṃdusadṛśadyutim | sundaraṃ puṃḍarīkākṣamatikharvatanuṃ harim 2| vaṭuveṣadharaṃ devaṃ sarvavedāṃgagocaram | mekhalājinadaṇḍādi cihnairaṃkitamīśvaram 3| taṃ dṛṣṭvā devatāḥ sarve śatakratupurogamāḥ | stutvā maharṣibhiḥ sārddhaṃ namaścakrurmahaujasam 4| tataḥ prasanno bhagavānprovāca surasattamān | vāmana uvāca- kiṃ kartavyaṃ mayā cādya tadbravītha surottamāḥ 5| śrīśaṃkara uvāca-| tataḥ prahṛṣṭāstridaśāstamūcuḥ parameśvaram | devā ūcuḥ | asminkāle baleryajño varttate madhusūdana 6| apratyākhyānakālo'yaṃ tasya daityapateḥ prabho | yācitvā tridivaṃ lokaṃ tannastvaṃ dātumarhasi 7| śaṃkara uvāca- ityuktāstridaśaissarvairājagāma baliṃ hariḥ | yāgadeśe samāsīnamṛṣibhissārddhamaṣṭabhiḥ 8| abhyāgataṃ tu taṃ dṛṣṭvā sahasotthāya daityarāṭ | abhyāgataḥ svayaṃ viṣṇuritihāsa samanvitaḥ 9| pūjayāmāsa vidhinā niveśya kusumāsane | praṇipatya namaskṛtya prāha gadgadayā girā 10| baliruvāca- dhanyo'smi kṛtakṛtyosmi saphalaṃ mama jīvitam | tvāmarccayitvā vipreṃdra kiṃ karomi tava priyam 11| āgato'si yadarthaṃ tvaṃ māmuddiśya dvijottamaḥ | tatprayacchāmi te śīghraṃ brūhi vedavidāṃ vara 12| śaṃkara uvāca- tataḥ prahṛṣṭamanasā tamuvāca mahīpatim | vāmana uvāca- śṛṇu rājeṃdra vakṣyāmi mamāgamanakāraṇam 13| agnikuṇḍasya pṛthivīṃ dehi daityapate mama | mama trivikramapadāṃ nānyadicchāmi mānada 14| sarveṣāmeva dānānāṃ bhūmidānamanuttamam | yo dadāti mahīṃ rājā viprāyākiṃcanāya vai 15| aṃguṣṭhamātrāmapi vā sa bhavetpṛthivīpatiḥ | na bhūmidānasadṛśaṃ pavitramiha vidyate 16| bhūmiṃ yaḥ pratigṛhṇāti bhūmiṃ yaśca prayacchati | ubhau tau puṇyakarmmāṇau nidhane svargagāminau 17| tasmādbhūmiṃ mahārāja prayaccha tripadīṃ mama | etadalpāṃ mahīṃ dātuṃ mā viśaṃka mahīpate | jagattrayapradānaṃ tannāma bhūpa bhaviṣyati 18| śaṃkara uvāca- tataḥ prahṛṣṭavadanastathetyāha mahīpatiḥ | tasmai mahīpradānaṃ tu kartuṃ mene vidhānataḥ 19| taṃ dṛṣṭvā daityarājānaṃ tadā tasya purohitaḥ | uśanā hyabravīdvākyaṃ mā rājandīyatāṃ mahīm 20| śukra uvāca- eṣa viṣṇuḥ pareśo'tha devaiḥ saṃprārthito nṛpa | vaṃcayitvā mahīṃ sarvāṃ tvattaḥ prāptumihāgataḥ 21| tasmānmahī na dātavyā tasmai rājanmahātmane | anyamarthaṃ prayacchasva vacanānmama bhūpate 22| śrīśaṃkara uvāca- tataḥ prahasya rājāsau taṃ guruṃ prāha dhairyyataḥ | baliruvāca- prītaye vāsudevasya sarvaṃ puṇyaṃ kṛtaṃ mayā 23| adya dhanyosmyahaṃ viṣṇuḥ svayamevāgato yadi | tasya pradeyamevādya jīvitaṃ ca mahatsukham 24| tasmādasmai prayacchāmi trilokīmapi mā ciram | śrīśaṃkara uvāca- ityuktvā bhūpatistasya pādau prakṣālya bhaktitaḥ 25| vāṃcchitāṃ pradadau bhūmiṃ vāripūrvaṃ vidhānataḥ | pariṇīya namaskṛtya datvā vai dakṣiṇāṃ vasu 26| provāca taṃ punarvipraṃ prahṛṣṭenāṃtarātmanā | baliruvāca- dhanyosmi kṛtakṛtyosmi tava datvā mahīṃ dvija 27| yatheṣṭā tava vipreṃdra tadgṛhāṇa mahīmimām | śrīśaṃkara uvāca- tamuvāca nṛpaṃ viṣṇū rājaṃstava samīpataḥ 28| māpayāmi padenādya pṛthivīṃ tava paśyataḥ | ityuktvā kharvarūpaṃ tadvihāya parameśvaraḥ 29| trivikramavapurbhūtvā jagrāha pṛthivīmimām | paṃcāśatkoṭivistīrṇa sasamudra mahīdharām 30| sasāgarāṃ ca sadvīpāṃ sadevāsuramānuṣām | pādenaikena vapuṣo vyakrāṃta madhusūdanaḥ 31| uvāca daityarājeṃdra kiṃ karomīti śāśvataḥ | tadvai trivikramaṃ rūpamīśvarasya mahaujasam 32| hitārthamapi devānāmṛṣīṇāṃ ca mahātmanām | na dṛṣṭamapi śakyaṃ syādbrahmaṇaḥ śaṃkarasya ca 33| tatpadaṃ pṛthivīṃ sarvāmākramya girije śubhe | atiriktaṃ samabhavacchatayojanamāyatam 34| divyacakṣurdadau tasmai daityarājñe sanātanaḥ | tasmai saṃdarśayāmāsa svakaṃ rūpaṃ janārdanam 35| tadviśvarūpaṃ devasya dṛṣṭvā daityeśvaro bali | praharṣamatulaṃ lebhe sānaṃdāśru pariplutaḥ 36| dṛṣṭvā devaṃ namaskṛtya stutvā stutibhireva ca | prāha gadgadayā vācā prahṛṣṭenāṃtarātmanā 37| baliruvāca- dhanyosmi kṛtakṛtyosmi tvāṃ dṛṣṭvā parameśvaram | lokatrayaṃ tvamevaitadgṛhāṇa parameśvara 38| śrīśaṃkara uvāca- atha sarveśvaro viṣṇurdvitīyaṃ padamavyayam | ūrdhvaṃ prasārayāmāsa brahmalokāṃtamacyutaḥ 39| sanakṣatragrahopetaṃ sarvadevasamāvṛtam | padena paripūrṇo'bhūdacyutasya śubhānane 40| tataḥ pitāmaho brahmacakrapadmādicihnitam | pādaṃ taddevadevasya harṣasaṃkulacetasā 41| dhanyosmīti vadanbrahmā gṛhītvā svakamaṃḍalum | bhaktyā prakṣālayāmāsa tatrasaṃsthita vāriṇā 42| akṣayyamabhavattoyaṃ tasya viṣṇoḥ prabhāvataḥ | tattīrthaṃ meruśikhare papāta vimalaṃ jalam 43| jagataḥ pāvanārthaṃ vai caturdikṣu pravāhitam | sitā cālakanandā ca cakṣurbhadrā yathākramam 44| tataścālakanandā ca merordakṣiṇataḥ smṛtā | tridhā nāmnā tripathagā trisrotā lokapāvanī 45| svarge maṃdākinī proktā tvadho bhogavatī tathā | madhye vegavatī gaṃgā pāvanārthaṃ nṛṇāṃ śivā 46| tāṃ dṛṣṭvā merumadhye tu prasravaṃtīṃ śubhānane | ātmanaḥ pāvanārthāya śirasāhamadhārayam 47| divyaṃ varṣasahasraṃ tu dhṛtvā gaṃgājalaṃ śubham | śivatvamagamaṃ devi sarvalokeṣu pūjitaḥ 48| yo vahecchirasā gaṃgātoyaṃ viṣṇupadodbhavam | prāśayedvā jagatpūjyo bhaviṣyati na saṃśayaḥ 49| gaṃgāgaṃgeti yo brūyādyojanānāṃ śatairapi | mucyate sarvapāpebhyo viṣṇulokaṃ sa gacchati 50| tato bhagīratho rājā gautamaśca mahātapāḥ | tapasā pūjayitvā māṃ gaṃgārthaṃ samayācata 51| sarvalokahitārthāya tāṃ gaṃgāṃ vaiṣṇavīṃ śivām | tayorahaṃ tāmadadāṃ prītyā devi saridvarām 52| gautamena samānītā gautamī tena kīrttitā | bhāgīrathīti vikhyātā tena rājñā vṛtā yataḥ 53| prasaṃgātte samākhyātaṃ gaṃgājanmātyanuttamam | tato nārāyaṇaḥ śrīmānbaliṃ daityapatiṃ prabhuḥ 54| rasātalaṃ śubhaṃ lokaṃ pradadau bhaktavatsalaḥ | sarveṣāṃ dānavānāṃ tu nāgānāṃ yādasāmapi 55| rājānaṃ tu baliṃ cakre yāvadābhūtasaṃplavam | pratigṛhya balerlokānbaṭuveṣeṇa daityahā 56| maheṃdrāya dadau prītyā kāśyapo viṣṇuravyayaḥ | tato devāḥ sagaṃdharvā ṛṣayaśca mahaujasaḥ 57| tuṣṭuvuḥ stutibhirddivyaiḥ pūjayāmāsuracyutam | saṃkṣipya tanmahadrūpaṃ teṣāṃ saṃdarśanāya vai 58| saṃpūjyamānāstridaśairaṃtarddhānaṃ yayau hariḥ | itthaṃ surakṣitaḥ śakro viṣṇunā prabhaviṣṇunā 59| trailokyaṃ mahadaiśvaryyamavāpa tridiveśvaraḥ | etatte sarvamākhyātaṃ vāmanaṃ vaibhavaṃ śubham | śeṣaṃ yadvaibhavaṃ devi tadvakṣyāmi yathākramāt 60| iti śrīpādmemahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvarasaṃvāde vāmanaprādurbhāvonāma catvāriṃśadadhikadviśatatamo'dhyāyaḥ 240 |
English translation
Śrī Mahādeva said :
1-5a. Then at the end of a thousand years Aditi gave birth to Vāmana , Viṣṇu , Acyuta , Hari , the lord, who was the great lord of all the worlds, who had Śrīvatsa and Kaustubha on his chest, whose lustre was like that of the full moon, who was handsome, whose eyes were like lotuses, whose body was very short, who was dressed like a lad, who could be known by means of the Vedas and the Vedāṅgas , who was marked with such signs as a girdle, a (piece of) deer-hide, and a staff. Seeing him of a great vigour, all deities led by Indra , along with great sages, praised and saluted him. Then the lord who was pleased, said to the best gods:
Vāmana said :
5b. O best gods, tell me what I should do today.
Śrī Śaṅkara said :
6a. Then the gods who were delighted, spoke to that highest lord:
The gods said :
6b-7. O Madhusūdana , Bali ’s sacrifice is going on now. O lord, this is the time for the lord of demons not to turn down (any request). Having asked for the three worlds from him, (please) give them to us.
Śaṅkara said :
8-10. Thus addressed by all gods, Viṣṇu went to Bali, seated at the place of the sacrifice along with eight sages. Seeing him having come as a guest, the king of demons suddenly got up. Seeing (as if) Viṣṇu himself had come as a guest, he, with a smile, seated him on a seat of flowers and properly honoured him. Having bowed before him and saluted him, he said in a faltering voice:
Bali said :
11-12. I am fortunate, I am blessed. My life is fruitful. O best brāhmaṇa , having honoured you, what dear to you, should I do? O best brāhmaṇa, I shall give you that for which you have come to me. O best among those who know the Vedas, speak quickly.
Śaṅkara said :
13a. Then with a delighted mind (Viṣṇu) spoke to the king:
Vāmana said :
13b-18. O best king, listen. I shaU tell you the reason for my arrival. O lord of demons, O you who remove the pride (of others, or you who respect others), give me (that much piece of) land measured by my three steps, for an enclosed place for keeping the fire-vessel. I do not desire anything else. Of all gifts, the gift of (a piece of) land is the best. That king who gives even that much piece of land measured by his thumb, to a poor brāh- maṇa , would be the lord of the world. In this world there is no other gift like that (of a piece) of land. Both of them—he who receives (a piece of) land and he who gives (a piece of) land—are meritorious and, after death, go to heaven. Therefore, O great king, give me that much piece of land measured by my three steps. O king, do not hesitate to give such a small (piece of) land. O king, that will indeed be (tantamount to) the gift of the three worlds.
Śaṅkara said :
19-20. Then the king, with his face delighted, said, “All right.” He intended to make him the gift of land in the proper way. Seeing the king of demons, his priest, Usanas , said to him (these) words, “O king, do not give him the land.”
Śukra said :
21-22. O king, this is Viṣṇu, the highest lord, who was requested by the gods. He has come here to take the entire earth after deceiving you. Therefore, land should not be given to the noble one. O king, by my word, give him some other object.
Śrī Śaṅkara said :
23a. Then having laughed the king firmly said to his preceptor:
Bali said :
23b-25a. To please Viṣṇu, I have done all meritorious acts. Today I am fortunate that Viṣṇu himself has come (to me). Today I shall very happily give (even) my life to him. Therefore, I shall give him even the three worlds.
Śrī Śaṅkara said :
25b-27a. Speaking like this, the king devoutly washed his feet and first (offering him) water, gave him the land in the proper manner. Taking him round, and having saluted him he gave him wealth as a present. With his heart delighted, he again said to the brāhmaṇa:
Bali said :
27b-28a. O brāhmaṇa, I am fortunate, I am blessed having given you land. O best brāhmaṇa, take this land as desired by you.
Śrī Śaṅkara said :
28b-35. To the king Viṣṇu said: “Near you, in your presence, I shall get the land measured with my steps.”Saying so, the highest lord abandoned his dwarfish form, and taking up the body of Viṣṇu, extending up to fifty crores (of yojanas ) he seized the earth along with the seas and mountains, along with the oceans, islands, gods, demons and human beings. With one step of his body he crossed the entire earth. Then he said: “O best among the demon-kings, what do I do now?” It was the very powerful Trivikrama -form of the lord. It was good for the well-being of even the gods and the noble sages. It would not be possible even for Brahmā or Śiva to see it. O auspicious Girijā, having occupied the entire earth, that step became a hundred yojanas long. The ancient one gave the demon-king a divine sight. He showed him his Janārdana -form.
36-37. Seeing that universal form of the god, Bali, the lord of demons, got matchless joy, and was covered with tears of joy. Seeing the god, having saluted him, having praised him with eulogies, he, with his heart delighted, spoke in a faltering voice:
Bali said :
38. Seeing you, the highest god, I am fortunate, I am blessed. O highest lord, accept these three worlds.
Śrī Śaṅkara said :
39-48. Then Viṣṇu, Acyuta, the lord of all, spread up his other immutable foot along with stars and planets, and covering all gods, up to Brahmā’s world. He was full of the foot of Acyuta, O you of an auspicious face. Then Brahmā, the grandsire, (seeing) that foot of the god of gods, which was marked with (the signs of) a disc, a lotus etc. saying, with his heart full of joy, “I am blessed,” took his pot (of water), and with devotion washed the foot with the water from it. Due to Viṣṇu’s majesty that water became inexhaustible. That pure holy water fell on the peak of Meru . For purifying the world it flowed in four streams: Sītā , Alakanandā , Cakṣu and Bhadrā in due order. Alakanandā is said to be (flowing) to the south of Meru in three streams; she, purifying the world, and having three streams is called Tripathagā . The auspicious river is called Mandākinī in heaven, Bhogavatī in nether world, and the speedy Gaṅgā in between (i.e. on the earth flowing) for purifying human beings. O you of an auspicious face, seeing her flowing over the Meru mountain, I held her on my head to purify myself. Having held (on my head) the auspicious water of Gaṅgā for a thousand divine years, I obtained bliss, and am adored in all worlds.
49-53. There is no doubt that he who would carry on his head the water of Gaṅgā rising from Viṣṇu’s foot, or would drink it, would be respected by the world. He who would utter (the words) ‘Gaṅgā, Gaṅgā’ even from (a distance of) hundred yojanas, is freed from all sins, and goes to Viṣṇu’s heaven. Then king Bhagīratha and Gautama having a great penance (to his credit) worshipped me with penance and asked for Gaṅgā. O goddess, then I affectionately gave that auspicious best river Gaṅgā, (rising from the foot) of Viṣṇu to them for the good of the entire world. Since she was brought by Gautama, she was called Gautamī . Since she was chosen by king (Bhagīratha), she was known as Bhāgīrathī .
54-60. I have in course (of the narration) told you the excellent greatness of Gaṅgā. Then that glorious lord Nārāyaṇa loving his devotees, gave the auspicious nether world to Bali, the lord of demons. He made Bali the king of all the demons, serpents and the aquatic animals till the (final) inundation (of the earth). In the guise of a lad the immutable Viṣṇu, the killer of demons, the son of Kaśyapa , affectionately gave the worlds to Indra. Then gods with gandharvas and the very powerful sages praised Viṣṇu with divine eulogies and worshipped him. For them to see his form, he contracted it; and being honoured by them Viṣṇu vanished. Viṣṇu, the mighty one, thus protected Indra well. The lord of the three worlds (i.e. Indra) obtained the three worlds and great affluence. I have thus told you the account of the auspicious splendour of Viṣṇu’s incarnation as Vāmana. The rest of the splendour I shall narrate in due order.
Complete chapter-aligned witnesses. Sanskrit Wikisource page 14766, revision 336658 (2022-04-26T00:57:27Z). English is N. A. Deshpande’s complete translation, controlled against its chapter page at https://www.wisdomlib.org/hinduism/book/the-padma-purana/d/doc365824.html and the ten-volume archival witness. The witnesses are aligned at chapter level; no unsupported verse-by-verse equivalence is asserted.