Chapter 149

महादेव उवाच। तीर्थादस्मात्परं तीर्थं मालार्कांतरतः स्थितम् । चंदनेश्वरमागच्छेदामोदस्थानमुत्तमम् १। दुःशासनस्य रुधिरं पीत्वा भीमो महाबलः । प्रतिज्ञामात्मनः सर्वां पूरयित्वा सुदारुणाम् २। कराभ्यां रुधिराक्ताभ्यां द्रौपद्याः केशबंधनम् । कृत्वा दत्त्वा द्विजातिभ्यो तीर्थयात्रां ततोऽगमत् ३। साभ्रमत्यास्तटे रम्ये गतो वै भ्रातृभिः सह । आनीतः साभ्रमत्यां यः स्वर्गाच्चंदनपादपः ४। स तु लिंगतया जातः पुण्यतीर्थप्रभावतः । तत्र स्नात्वा च पीत्वा च कृत्वा वै पितृतर्पणम् ५। न नरो निरयं गच्छेद्रुद्रलोकमवाप्नुयात् । चंदनेशं ततो दृष्ट्वा विश्वेशं लोकशंकरम् ६। पूजयेच्च यथाशक्त्या यत्र गत्वा न शोचति । यत्र कैवर्तको राजा पूजां कृत्वा ह्यनेकशः ७। स गतः शिवलोकं तं यत्र गत्वा न शोचति । मज्जंति ऋषयो यत्र यत्र देवः सनातनः ८। साक्षाद्विष्णुः परमात्मा नित्यं तिष्ठति भूतिदः । इयं साभ्रमती धन्या धन्यो विश्वेश्वरः प्रभुः ९। यत्र तीर्थान्यनेकानि जातानि भुवि पार्वति । अत्र चामर्दकीपुण्यैः फलैर्नानाविधैः शुभैः १०। कर्त्तव्यमर्घदानं च विधिना तत्र सुंदरि ११।

mahādeva uvāca| tīrthādasmātparaṃ tīrthaṃ mālārkāṃtarataḥ sthitam | caṃdaneśvaramāgacchedāmodasthānamuttamam 1| duḥśāsanasya rudhiraṃ pītvā bhīmo mahābalaḥ | pratijñāmātmanaḥ sarvāṃ pūrayitvā sudāruṇām 2| karābhyāṃ rudhirāktābhyāṃ draupadyāḥ keśabaṃdhanam | kṛtvā dattvā dvijātibhyo tīrthayātrāṃ tato'gamat 3| sābhramatyāstaṭe ramye gato vai bhrātṛbhiḥ saha | ānītaḥ sābhramatyāṃ yaḥ svargāccaṃdanapādapaḥ 4| sa tu liṃgatayā jātaḥ puṇyatīrthaprabhāvataḥ | tatra snātvā ca pītvā ca kṛtvā vai pitṛtarpaṇam 5| na naro nirayaṃ gacchedrudralokamavāpnuyāt | caṃdaneśaṃ tato dṛṣṭvā viśveśaṃ lokaśaṃkaram 6| pūjayecca yathāśaktyā yatra gatvā na śocati | yatra kaivartako rājā pūjāṃ kṛtvā hyanekaśaḥ 7| sa gataḥ śivalokaṃ taṃ yatra gatvā na śocati | majjaṃti ṛṣayo yatra yatra devaḥ sanātanaḥ 8| sākṣādviṣṇuḥ paramātmā nityaṃ tiṣṭhati bhūtidaḥ | iyaṃ sābhramatī dhanyā dhanyo viśveśvaraḥ prabhuḥ 9| yatra tīrthānyanekāni jātāni bhuvi pārvati | atra cāmardakīpuṇyaiḥ phalairnānāvidhaiḥ śubhaiḥ 10| karttavyamarghadānaṃ ca vidhinā tatra suṃdari 11|