Chapter 142

श्रीमहादेव उवाच। कंबुतीर्थे नरः स्नात्वा कृत्वा वा पितृतर्पणम् । अर्चयेद्देवदेवेशं नारायणमनामयम् १। दत्त्वा दानानि विधिवद् ब्रह्मणेभ्यो विधानतः । विष्णुलोकमवाप्नोति तीर्थस्यास्य प्रभावतः २। अत्र राजर्षिणा पूर्वं विश्वामित्रेण धीमता । तपस्तप्तं विशेषेण प्रजाकामेन सुंदरि ३। वायुभक्षो निराहारो यत्रासीदनिलाशनः । विष्णुपूजापरो नित्यं विष्णुध्यानपरायणः ४। तपसानेन संजातः प्रजाकाममवाप्तवान् । प्रजाकामो नरो यश्च कंबुतीर्थं हि गच्छति ५। स प्रजां लभते नित्यं सत्यं सत्यं वरानने ६। इति कंबुतीर्थमाहात्म्यम् । ततो गच्छेत्सुरश्रेष्ठे तीर्थं नाम कपीश्वरम् । संनिधौ रक्तसिंहस्य महापातकनाशनम् ७। बध्यमाने पुरा सेतौ रामरावणविग्रहे । गृहीत्वा पर्वतश्रेष्ठं विशेषात्कपिभिः कृतम् ८। नाम्ना कपीश्वरादित्यं चक्रुस्तीर्थमनुत्तमम् । यत्र तीर्थे नरः स्नात्वा कृत्वा वा पितृतर्पणम् ९। दृष्ट्वा कपीश्वरादित्यं मुच्यते ब्रह्महत्यया । तत्र स्नानं प्रकर्तव्यं चैत्राष्टम्यां विशेषतः १०। हनुमत्प्रमुखैस्तत्र स्नातं यत्र दिनत्रयम् । कपितीर्थप्रभावोऽयं भवत्यै समुदीरितः ११। अस्मिंस्तीर्थे नरः स्नात्वा पूजयित्वा कपीश्वरम् । रूपवान्बहुभोगश्च जायते नात्र संशयः १२। बलं वांछति यो लोको धर्मं वा पुत्रमेव च । सर्वं स तु लभेन्नित्यं कपितीर्थप्रभावतः १३। इति श्रीपाद्मेमहापुराणे पंचपंचाशत्साहस्र्यां संहितायामुत्तरखंडे उमामहेश्वर। संवादे कपितीर्थमाहात्म्यं नाम द्विचत्वारिंशदधिकशततमोऽध्यायः १४२।

śrīmahādeva uvāca| kaṃbutīrthe naraḥ snātvā kṛtvā vā pitṛtarpaṇam | arcayeddevadeveśaṃ nārāyaṇamanāmayam 1| dattvā dānāni vidhivad brahmaṇebhyo vidhānataḥ | viṣṇulokamavāpnoti tīrthasyāsya prabhāvataḥ 2| atra rājarṣiṇā pūrvaṃ viśvāmitreṇa dhīmatā | tapastaptaṃ viśeṣeṇa prajākāmena suṃdari 3| vāyubhakṣo nirāhāro yatrāsīdanilāśanaḥ | viṣṇupūjāparo nityaṃ viṣṇudhyānaparāyaṇaḥ 4| tapasānena saṃjātaḥ prajākāmamavāptavān | prajākāmo naro yaśca kaṃbutīrthaṃ hi gacchati 5| sa prajāṃ labhate nityaṃ satyaṃ satyaṃ varānane 6| iti kaṃbutīrthamāhātmyam | tato gacchetsuraśreṣṭhe tīrthaṃ nāma kapīśvaram | saṃnidhau raktasiṃhasya mahāpātakanāśanam 7| badhyamāne purā setau rāmarāvaṇavigrahe | gṛhītvā parvataśreṣṭhaṃ viśeṣātkapibhiḥ kṛtam 8| nāmnā kapīśvarādityaṃ cakrustīrthamanuttamam | yatra tīrthe naraḥ snātvā kṛtvā vā pitṛtarpaṇam 9| dṛṣṭvā kapīśvarādityaṃ mucyate brahmahatyayā | tatra snānaṃ prakartavyaṃ caitrāṣṭamyāṃ viśeṣataḥ 10| hanumatpramukhaistatra snātaṃ yatra dinatrayam | kapitīrthaprabhāvo'yaṃ bhavatyai samudīritaḥ 11| asmiṃstīrthe naraḥ snātvā pūjayitvā kapīśvaram | rūpavānbahubhogaśca jāyate nātra saṃśayaḥ 12| balaṃ vāṃchati yo loko dharmaṃ vā putrameva ca | sarvaṃ sa tu labhennityaṃ kapitīrthaprabhāvataḥ 13| iti śrīpādmemahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvara| saṃvāde kapitīrthamāhātmyaṃ nāma dvicatvāriṃśadadhikaśatatamo'dhyāyaḥ 142|