Chapter 150

महादेवउवाच। जंबूतीर्थं ततो गच्छेत्स्नानार्थं पापनाशनम् । कलिकाले च यत्पुंसां स्वर्गसोपानवत्स्थितम् १। यत्र जांबवता पूर्वं दशांगे पर्वतोत्तमे । स्थापितं ऋक्षराजेशं लिगं सुरगणार्चितम् २। रामेण हि यदा पूर्वं हतो वै रावणोऽसुरः । तदा जांबवता दिक्षु भेरीघोषैः प्रघोषितम् ३। जितं वै रामचंद्रेण रावणो निहतो रणे । लब्ध्वा सीतेति संघुष्य स्नातं तीर्थवरे शुभे ४। स्थापितं तत्र लिंगं तु स्वनाम्ना तु सुरेश्वरि । तत्र स्नात्वा नरः सद्यः स्मृत्वा रामं सहानुजम् ५। जाबवंतेश्वरं स्नात्वा रुद्रलोके महीयते । यत्रयत्र हि भो देवि श्रीरामस्मरणं कृतम् । भवबंधविमोक्षो हि दृश्यते स चराचरे ६। अहं रामस्तु विज्ञेयो रामो वै रुद्र एव च । एवं ज्ञात्वा तु ते देवि न भेदो वर्तते क्वचित् ७। रामरामेति रामेति मनसा ये जपंति च । तेषां सर्वार्थसिद्धिश्च भविष्यति युगेयुगे ८। अहं हि सर्वदा देवि श्रीरामस्मरणं चरे । यं श्रुत्वा तु पुनर्देवि न भवो जायते क्वचित् ९। काश्यां हि निवसन्नित्यं श्रीरामं कमलेक्षणम् । स्मरामि सततं देवि भक्त्या च विधिपूर्वकम् १०। जांबवता तदा पूर्वं स्मृत्वा रामं सुशोभनम् । जांबवंतमिति ख्यातं प्रस्थाप्य जगतां गुरुम् ११। तत्र स्नात्वा च भुक्त्वा च कृत्वा देवस्य पूजनम् । शिवलोकमवाप्नोति यावदिंद्राश्चतुर्दश १२। अत्र हि स्नानमात्रेण यथा जांबवतो बलम् । तथा वै बलमाप्नोति श्रीविश्वेशप्रसादतः १३। अत्र गत्वा तु भूदानं पुमान्यश्च करोति वै । फलं सहस्रगुणितं जांबवंतेश दर्शनात् १४। इति श्रीपाद्मे महापुराणे पंचपंचाशत्साहस्र्यां संहितायामुत्तरखंडे उमामहेश्वरसंवादे जांबवततीर्थमाहात्म्यंनाम पंचाशदधिकशततमोऽध्यायः १५०।

mahādevauvāca| jaṃbūtīrthaṃ tato gacchetsnānārthaṃ pāpanāśanam | kalikāle ca yatpuṃsāṃ svargasopānavatsthitam 1| yatra jāṃbavatā pūrvaṃ daśāṃge parvatottame | sthāpitaṃ ṛkṣarājeśaṃ ligaṃ suragaṇārcitam 2| rāmeṇa hi yadā pūrvaṃ hato vai rāvaṇo'suraḥ | tadā jāṃbavatā dikṣu bherīghoṣaiḥ praghoṣitam 3| jitaṃ vai rāmacaṃdreṇa rāvaṇo nihato raṇe | labdhvā sīteti saṃghuṣya snātaṃ tīrthavare śubhe 4| sthāpitaṃ tatra liṃgaṃ tu svanāmnā tu sureśvari | tatra snātvā naraḥ sadyaḥ smṛtvā rāmaṃ sahānujam 5| jābavaṃteśvaraṃ snātvā rudraloke mahīyate | yatrayatra hi bho devi śrīrāmasmaraṇaṃ kṛtam | bhavabaṃdhavimokṣo hi dṛśyate sa carācare 6| ahaṃ rāmastu vijñeyo rāmo vai rudra eva ca | evaṃ jñātvā tu te devi na bhedo vartate kvacit 7| rāmarāmeti rāmeti manasā ye japaṃti ca | teṣāṃ sarvārthasiddhiśca bhaviṣyati yugeyuge 8| ahaṃ hi sarvadā devi śrīrāmasmaraṇaṃ care | yaṃ śrutvā tu punardevi na bhavo jāyate kvacit 9| kāśyāṃ hi nivasannityaṃ śrīrāmaṃ kamalekṣaṇam | smarāmi satataṃ devi bhaktyā ca vidhipūrvakam 10| jāṃbavatā tadā pūrvaṃ smṛtvā rāmaṃ suśobhanam | jāṃbavaṃtamiti khyātaṃ prasthāpya jagatāṃ gurum 11| tatra snātvā ca bhuktvā ca kṛtvā devasya pūjanam | śivalokamavāpnoti yāvadiṃdrāścaturdaśa 12| atra hi snānamātreṇa yathā jāṃbavato balam | tathā vai balamāpnoti śrīviśveśaprasādataḥ 13| atra gatvā tu bhūdānaṃ pumānyaśca karoti vai | phalaṃ sahasraguṇitaṃ jāṃbavaṃteśa darśanāt 14| iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvarasaṃvāde jāṃbavatatīrthamāhātmyaṃnāma paṃcāśadadhikaśatatamo'dhyāyaḥ 150|