Chapter 44

चतुश्चत्वारिंशत्तमोऽध्यायः सुकलोवाच- स्वसैन्यं दुर्धरं दृष्ट्वा निर्जितं दुर्धरेण तम् । चुकोप भूपतिः क्रूरं दुःसहं शूकरं प्रति १। धनुरादाय वेगेन बाणं कालानलोपमम् । तस्याभिमुखमेवासौ हयेनाभिससार सः २। स यदा नृपतिं हयपृष्ठगतं वरपौरुषयुक्तममित्रहणम् । परिपश्यति शूकरयूथपतिः प्रगतोभिमुखं रणभूमितले ३। निशितेन शरेण हतो हि यदा नृपतेर्हयपादतले प्रगतः । तमिहैव विलंघ्य च वेगमनाः प्रखरेण जवेन च कोलवरः ४। व्यथितस्तुरगः सकिरिःकिटिना न हि याति क्षितौ स हि विद्धगतिः । तुरगः पतितो भुवि तुंडहतो लघुस्यंदनमेव गतो नृपतिः ५। स हि गर्जति शूकरजातिरवैरथसंस्थितकोशल येन जवैः । गदया निहतः किल भूपतिना रणमध्यगतः स हि यूथपतिः ६। परित्यज्य तनुं च स्वकां हि तदा गत एव हरेर्गृहमेव वरम् ७। कृत्वा हि युद्धं समरे हितेन राज्ञा समं शूकरराजराजः । पपात भूमौ च हतो यदा तु ववर्षिरे देववराः सुपुष्पैः ८। तस्योर्ध्वगः पुष्पचयः सुजातः संतानकानामिव सौरभश्च । सकुंकुमैश्चंदनवृष्टिमेव कुर्वंति देवाः परितुष्यमाणाः ९। विमृश्यमानः स हि तेन राज्ञा चतुर्भुजः सोपि बभूव राजन् । दिव्यांबरोभूषणदिव्यरूपः स्वतेजसा भाति दिवाकरो यथा १०। दिव्येन यानेन दिवं गतो यदा सुपूज्यमानः सुरराजदेवैः । गंधर्वराजः स बभूव भूयः पूर्वं स्वकं कायमिहैव हित्वा ११। इति श्रीपद्मपुराणे भूमिखंडे वेनोपाख्याने सुकलाचरित्रे। चतुश्चत्वारिंशत्तमोऽध्यायः ४४।

catuścatvāriṃśattamo'dhyāyaḥ sukalovāca- svasainyaṃ durdharaṃ dṛṣṭvā nirjitaṃ durdhareṇa tam | cukopa bhūpatiḥ krūraṃ duḥsahaṃ śūkaraṃ prati 1| dhanurādāya vegena bāṇaṃ kālānalopamam | tasyābhimukhamevāsau hayenābhisasāra saḥ 2| sa yadā nṛpatiṃ hayapṛṣṭhagataṃ varapauruṣayuktamamitrahaṇam | paripaśyati śūkarayūthapatiḥ pragatobhimukhaṃ raṇabhūmitale 3| niśitena śareṇa hato hi yadā nṛpaterhayapādatale pragataḥ | tamihaiva vilaṃghya ca vegamanāḥ prakhareṇa javena ca kolavaraḥ 4| vyathitasturagaḥ sakiriḥkiṭinā na hi yāti kṣitau sa hi viddhagatiḥ | turagaḥ patito bhuvi tuṃḍahato laghusyaṃdanameva gato nṛpatiḥ 5| sa hi garjati śūkarajātiravairathasaṃsthitakośala yena javaiḥ | gadayā nihataḥ kila bhūpatinā raṇamadhyagataḥ sa hi yūthapatiḥ 6| parityajya tanuṃ ca svakāṃ hi tadā gata eva harergṛhameva varam 7| kṛtvā hi yuddhaṃ samare hitena rājñā samaṃ śūkararājarājaḥ | papāta bhūmau ca hato yadā tu vavarṣire devavarāḥ supuṣpaiḥ 8| tasyordhvagaḥ puṣpacayaḥ sujātaḥ saṃtānakānāmiva saurabhaśca | sakuṃkumaiścaṃdanavṛṣṭimeva kurvaṃti devāḥ parituṣyamāṇāḥ 9| vimṛśyamānaḥ sa hi tena rājñā caturbhujaḥ sopi babhūva rājan | divyāṃbarobhūṣaṇadivyarūpaḥ svatejasā bhāti divākaro yathā 10| divyena yānena divaṃ gato yadā supūjyamānaḥ surarājadevaiḥ | gaṃdharvarājaḥ sa babhūva bhūyaḥ pūrvaṃ svakaṃ kāyamihaiva hitvā 11| iti śrīpadmapurāṇe bhūmikhaṃḍe venopākhyāne sukalācaritre| catuścatvāriṃśattamo'dhyāyaḥ 44|