Chapter 146

महादेव उवाच । ततो गच्छेत देवेशि तीर्थं रुद्र महालयम् । केदारानुपमं साक्षाद्रुद्रेण परिनिर्मितम् १। श्राद्धं तत्रैव कर्तव्यं पितॄणां तृप्तिकारणम् । तत्र श्राद्धप्रदानेन पितरः सपितामहाः २। तृप्ताः समभिगच्छंति रुद्रस्य परमं पदम् । वृषमुत्सृजते यस्तु तत्र रुद्र महालये ३। कार्तिक्यामथ वैशाख्यां रुद्रेण सह मोदते । केदारे उदकं पीत्वा पुनर्जन्म न विद्यते ४। अत्र तु स्नानमात्रेण मुक्तिभागी न संशयः । एकस्मिन्समये देवि त्यक्त्वा कैलासमागतः ५। साभ्रमतीं महागंगां ज्ञात्वा लोकहिताय वै । तत्र स्नात्वा च पीत्वा च कृत्वा तीर्थमनुत्तमम् ६। ततोहं च स्वकं स्थानं कैलासं प्रति भामिनि । तदनंतरं महापुण्यं तीर्थं जातं महालयम् ७। रुद्र महालयमिति लोके ख्यातिं गमिष्यति । कार्तिक्यामथ वैशाख्यां ये गच्छंति सुरोत्तमे । न तेषां विद्यते दुःखं सर्वसंसारजं पुनः ८।

mahādeva uvāca | tato gaccheta deveśi tīrthaṃ rudra mahālayam | kedārānupamaṃ sākṣādrudreṇa parinirmitam 1| śrāddhaṃ tatraiva kartavyaṃ pitṝṇāṃ tṛptikāraṇam | tatra śrāddhapradānena pitaraḥ sapitāmahāḥ 2| tṛptāḥ samabhigacchaṃti rudrasya paramaṃ padam | vṛṣamutsṛjate yastu tatra rudra mahālaye 3| kārtikyāmatha vaiśākhyāṃ rudreṇa saha modate | kedāre udakaṃ pītvā punarjanma na vidyate 4| atra tu snānamātreṇa muktibhāgī na saṃśayaḥ | ekasminsamaye devi tyaktvā kailāsamāgataḥ 5| sābhramatīṃ mahāgaṃgāṃ jñātvā lokahitāya vai | tatra snātvā ca pītvā ca kṛtvā tīrthamanuttamam 6| tatohaṃ ca svakaṃ sthānaṃ kailāsaṃ prati bhāmini | tadanaṃtaraṃ mahāpuṇyaṃ tīrthaṃ jātaṃ mahālayam 7| rudra mahālayamiti loke khyātiṃ gamiṣyati | kārtikyāmatha vaiśākhyāṃ ye gacchaṃti surottame | na teṣāṃ vidyate duḥkhaṃ sarvasaṃsārajaṃ punaḥ 8|