Bhūmi-khaṇḍa · Chapter 106
Sourceकुंजल उवाच- आयुभार्या महाभागा स्वर्भानोस्तनया सुतम् । अपश्यंती सुबालं तं देवोपममनौपमम् १। हाहाकारं महत्कृत्वा रुरोद वरवर्णिनी । केन मे लक्षणोपेतो हृतो बालः सुलक्षणः २। तपसा दानयज्ञैश्च नियमैर्दुष्करैः सुतः । संप्राप्तो हि मया वत्स कष्टैश्च दारुणैः पुनः ३। दत्तात्रेयेण पुण्येन संतुष्टेन महात्मना । दत्तः पुत्रो हृतः केन रुरोद करुणान्विता ४। हा पुत्र वत्स मे तात हा बालगुणमंदिर । क्वासि केनापनीतोसि मम शब्दः प्रदीयताम् ५। सोमवंशस्य सर्वस्य भूषणोसि न संशयः । केन त्वमपनीतोसि मम प्राणैः समन्वितः ६। राजसुलक्षणैर्दिव्यैः संपूर्णः कमलेक्षणः । केनाद्यापहृतो वत्सः किं करोमि क्व याम्यहम् ७। स्फुटं जानाम्यहं कर्म ह्यन्यजन्मनि यत्कृतम् । न्यासनाशः कृतः कस्य तस्मात्पुत्रो हृतो मम ८। किं वा छलं कृतं कस्य पूर्वजन्मनि पापया । कर्मणस्तस्य वै दुःखमनुभुंजामि नान्यथा ९। रत्नापहारिणी जाता पुत्ररत्नं हृतं मम । तस्माद्दैवेन मे दिव्य अनौपम्य गुणाकरः १०। किं वा वितर्कितो विप्रः कर्मणस्तस्य वै फलम् । प्राप्तं मया न संदेहः पुत्रशोकान्वितं भृशम् ११। किं वा शिशुविरोधश्च कृतो जन्मांतरे मया । तस्य पापस्य भुंजामि कर्मणः फलमीदृशम् १२। याचमानस्य चैवाग्रे वैश्वदेवस्य कर्मणः । किं वापि नार्पितं चान्नं व्याहृतीभिर्हुतं द्विजैः १३। एवं सुदेवमानाच्च स्वर्भानोस्तनया तदा । इंदुमती महाभाग शोकेन करुणाकुला १४। पतिता मूर्च्छिता शोकाद्विह्वलत्वं गता सती । निःश्वासान्मुंचमाना सा वत्सहीना यथा हि गौः १५। आयू राजा स शोकेन दुःखेन महतान्वितः । बालं श्रुत्वा हृतं तं तु धैर्यं तत्याज पार्थिवः १६। तपसश्च फलं नास्ति नास्ति दानस्य वै फलम् । यस्मादेवं हृतः पुत्रस्तस्मान्नास्ति न संशयः १७। दत्तात्रेयः प्रसादेन वरं मे दत्तवान्पुरा । अजेयं च जयोपेतं पुत्रं सर्वगुणान्वितम् १८। तस्य वरप्रदानस्य कथं विघ्नो ह्यजायत । इति चिंतापरो राजा दुःखितः प्रारुदद्भृशम् १९। इति श्रीपद्मपुराणे भूमिखंडे वेनोपाख्याने गुरुतीर्थमाहात्म्ये च्यवनचरित्रे नाहुषाख्याने षडधिकशततमोऽध्यायः १०६।
kuṃjala uvāca- āyubhāryā mahābhāgā svarbhānostanayā sutam | apaśyaṃtī subālaṃ taṃ devopamamanaupamam 1| hāhākāraṃ mahatkṛtvā ruroda varavarṇinī | kena me lakṣaṇopeto hṛto bālaḥ sulakṣaṇaḥ 2| tapasā dānayajñaiśca niyamairduṣkaraiḥ sutaḥ | saṃprāpto hi mayā vatsa kaṣṭaiśca dāruṇaiḥ punaḥ 3| dattātreyeṇa puṇyena saṃtuṣṭena mahātmanā | dattaḥ putro hṛtaḥ kena ruroda karuṇānvitā 4| hā putra vatsa me tāta hā bālaguṇamaṃdira | kvāsi kenāpanītosi mama śabdaḥ pradīyatām 5| somavaṃśasya sarvasya bhūṣaṇosi na saṃśayaḥ | kena tvamapanītosi mama prāṇaiḥ samanvitaḥ 6| rājasulakṣaṇairdivyaiḥ saṃpūrṇaḥ kamalekṣaṇaḥ | kenādyāpahṛto vatsaḥ kiṃ karomi kva yāmyaham 7| sphuṭaṃ jānāmyahaṃ karma hyanyajanmani yatkṛtam | nyāsanāśaḥ kṛtaḥ kasya tasmātputro hṛto mama 8| kiṃ vā chalaṃ kṛtaṃ kasya pūrvajanmani pāpayā | karmaṇastasya vai duḥkhamanubhuṃjāmi nānyathā 9| ratnāpahāriṇī jātā putraratnaṃ hṛtaṃ mama | tasmāddaivena me divya anaupamya guṇākaraḥ 10| kiṃ vā vitarkito vipraḥ karmaṇastasya vai phalam | prāptaṃ mayā na saṃdehaḥ putraśokānvitaṃ bhṛśam 11| kiṃ vā śiśuvirodhaśca kṛto janmāṃtare mayā | tasya pāpasya bhuṃjāmi karmaṇaḥ phalamīdṛśam 12| yācamānasya caivāgre vaiśvadevasya karmaṇaḥ | kiṃ vāpi nārpitaṃ cānnaṃ vyāhṛtībhirhutaṃ dvijaiḥ 13| evaṃ sudevamānācca svarbhānostanayā tadā | iṃdumatī mahābhāga śokena karuṇākulā 14| patitā mūrcchitā śokādvihvalatvaṃ gatā satī | niḥśvāsānmuṃcamānā sā vatsahīnā yathā hi gauḥ 15| āyū rājā sa śokena duḥkhena mahatānvitaḥ | bālaṃ śrutvā hṛtaṃ taṃ tu dhairyaṃ tatyāja pārthivaḥ 16| tapasaśca phalaṃ nāsti nāsti dānasya vai phalam | yasmādevaṃ hṛtaḥ putrastasmānnāsti na saṃśayaḥ 17| dattātreyaḥ prasādena varaṃ me dattavānpurā | ajeyaṃ ca jayopetaṃ putraṃ sarvaguṇānvitam 18| tasya varapradānasya kathaṃ vighno hyajāyata | iti ciṃtāparo rājā duḥkhitaḥ prārudadbhṛśam 19| iti śrīpadmapurāṇe bhūmikhaṃḍe venopākhyāne gurutīrthamāhātmye cyavanacaritre nāhuṣākhyāne ṣaḍadhikaśatatamo'dhyāyaḥ 106|
English translation
Kuñjala said :
1-2. The glorious wife of Āyu, Svarbhānu ’s daughter of an excellent complexion, not seeing that excellent, matchless child, resembling a god, wept, making a loud wailing: “Who has taken away may son of excellent marks, endowed with good characteristics.
3-4. I had obtained the son by penance, charity, sacrifices, and vows difficult to practise, and with hard efforts. Who has kidnapped the son given to me by the magnanimous, pious Dattātraya, (after) being pleased.” (Thus) she wept piteously.
5-9. “O son, O child, O dear child, O habitation of virtues, where are you? Who has taken you away? Talk to me. You are undoubtedly the ornament of the entire lunar dynasty. Who has taken you away, you united with my life? Who has today kidnapped my son, full of divine, good marks of a king and having lotus-like eyes? What shall I do? Where shall I go? I distinctly know the deed I did in the previous existence: I (must) have repudiated a deposit; therefore my son is kidnapped. Or did I, a sinner, cheat someone in the former existence? I am suffering a calamity due to that deed only, and not otherwise (i.e. not due to anything else).
10. I had become the snatcher of a gem. (Therefore) the gem in the form of my divine son, the mine of matchless virtues, is snatched away by destiny.
11. Or did I argue with a brāhmaṇa ? (And) is it the fruit, attended by the great grief for my son, of that act, that I have undoubtedly got?
12. Or did I obstruct a child in my previous existence? Am I getting such a fruit of that sinful deed?
13. Or did I not give the food before the rite of the offering of food to all gods accompanied by the (seven) sacred utterances, to one who had asked for it?”
14-15. Thus, O noble one, Svarbhānu’s daughter Indumatī full of tenderness due to grief, being perturbed and heaving sighs like a cow bereft of her calf, fainted.
16. That king Āyu (also) was full of great grief and sorrow. Hearing that the boy was kidnapped the king gave up courage.
17. ‘There is certainly no fruit of penance, nor is there the fruit of giving gifts, since my son has been thus kidnapped.
18-19. Through grace, Dattātreya formerly gave me a boon (in the form) of an unconquerable son, endowed with success and all virtues. How is that grant of boon impeded?’ Engrossed in thought like these, the king who was distressed, wept very much.
Complete chapter-aligned witnesses. Sanskrit Wikisource page 43144, revision 335629 (2022-04-12T03:44:31Z). English is N. A. Deshpande’s complete translation, controlled against its chapter page at https://www.wisdomlib.org/hinduism/book/the-padma-purana/d/doc365199.html and the ten-volume archival witness. The witnesses are aligned at chapter level; no unsupported verse-by-verse equivalence is asserted.