Chapter 110

कुंजल उवाच- आमंत्र्य स मुनीन्सर्वान्वशिष्ठं तपतांवरम् । समुत्सुको गंतुकामो नहुषो दानवं प्रति १। ततस्ते मुनयः सर्वे वशिष्ठाद्यास्तपोधनाः । आशीर्भिरभिनंद्यैनमायुपुत्रं महाबलम् २। आकाशे देवताः सर्वा जघ्नुर्वै दुंदुभीन्मुदा । पुष्पवृष्टिं प्रचक्रुस्ते नहुषस्य च मूर्धनि ३। अथ देवः सहस्राक्षः सुरैः सार्द्धं समागतः । ददौ शस्त्राणि चास्त्राणि सूर्यतेजोपमानि च ४। देवेभ्यो नृपशार्दूलो जगृहे द्विजसत्तम । तानि दिव्यानि चास्त्राणि दिव्यरूपोपमोऽभवत् ५। अथ ता देवताः सर्वाः सहस्राक्षमथाब्रुवन् । स्यंदनो दीयतामस्मै नहुषाय सुरेश्वर ६। देवानां मतमाज्ञाय वज्रपाणिः स्वसारथिम् । आहूय मातलि तं तु आदिदेश ततो द्विज ७। एनं गच्छ महात्मानमुह्यतां स्यंदनेन वै । सध्वजेन महाप्राज्ञमायुजं समरोद्यतम् ८। स चोवाच सहस्राक्षं करिष्ये तवशासनम् । एवमुक्त्वा जगामाशु ह्यायुपुत्रं रणोद्यतम् ९। राजानं प्रत्युवाचैव देवराजस्य भाषितम् । विजयी भव धर्मज्ञ रथेनानेन संगरे १०। इत्युवाच सहस्राक्षस्त्वामेव नृपतीश्वर । जहि त्वं दानवं संख्ये तं हुंडं पापचेतनम् ११। समाकर्ण्य स राजेंद्र सानंदपुलकोद्गमः । प्रसादाद्देवदेवस्य वशिष्ठस्य महात्मनः १२। दानवं सूदयिष्यामि समरे पापचेतनम् । देवानां च विशेषेण मम मायापचारितम् १३। एवमुक्ते महावाक्ये नहुषेण महात्मना । अथायातः स्वयं देवः शंखचक्रगदाधरः १४। चक्राच्चक्रं समुत्पाट्य सूर्यबिंबोपमं महत् । ज्वलता तेजसा दीप्तं सुवृत्तारं शुभावहम् १५। नहुषाय ददौ देवो हर्षेण महता किल । तस्मै शूलं ददौ शंभुः सुतीक्ष्णं तेजसान्वितम् १६। तेन शूलवरेणासौ शोभते समरोद्यतः । द्वितीयः शंकरश्चासौ त्रिपुरघ्नो यथा प्रभुः १७। ब्रह्मास्त्रं दत्तवान्ब्रह्मा वरुणः पाशमुत्तमम् । चंद्र तेजःप्रतीकाशं शंखं च नादमंगलम् १८। वज्रमिंद्रस्तथा शक्तिं वायुश्चापं समार्गणम् । आग्नेयास्त्रं तथा वह्निर्ददौ तस्मै महात्मने १९। शस्त्राण्यस्त्राणि दिव्यानि बहूनि विविधानि च । ददुर्देवा महात्मानस्तस्मै राज्ञे महौजसे २०। कुंजल उवाच- अथ आयुसुतो वीरो दैवतैः परिमानितः । आशीर्भिर्नंदितश्चापि मुनिभिस्तत्त्ववेदिभिः २१। आरुरोह रथं दिव्यं भास्वरं रत्नमालिनम् । घंटारवैः प्रणदंतं क्षुद्रघंटासमाकुलम् २२। रथेन तेन दिव्येन शुशुभे नृपनदंनः । दिविमार्गे यथा सूर्यस्तेजसा स्वेन वै किल २३। प्रतपंस्तेजसा तद्वद्दैत्यानां मस्तकेषु सः । जगाम शीघ्रं वेगेन यथा वायुः सदागतिः २४। यत्रासौ दानवः पापस्तिष्ठते स्वबलैर्युतः । तेन मातलिना सार्द्धं वाहकेन महात्मना २५।

kuṃjala uvāca- āmaṃtrya sa munīnsarvānvaśiṣṭhaṃ tapatāṃvaram | samutsuko gaṃtukāmo nahuṣo dānavaṃ prati 1| tataste munayaḥ sarve vaśiṣṭhādyāstapodhanāḥ | āśīrbhirabhinaṃdyainamāyuputraṃ mahābalam 2| ākāśe devatāḥ sarvā jaghnurvai duṃdubhīnmudā | puṣpavṛṣṭiṃ pracakruste nahuṣasya ca mūrdhani 3| atha devaḥ sahasrākṣaḥ suraiḥ sārddhaṃ samāgataḥ | dadau śastrāṇi cāstrāṇi sūryatejopamāni ca 4| devebhyo nṛpaśārdūlo jagṛhe dvijasattama | tāni divyāni cāstrāṇi divyarūpopamo'bhavat 5| atha tā devatāḥ sarvāḥ sahasrākṣamathābruvan | syaṃdano dīyatāmasmai nahuṣāya sureśvara 6| devānāṃ matamājñāya vajrapāṇiḥ svasārathim | āhūya mātali taṃ tu ādideśa tato dvija 7| enaṃ gaccha mahātmānamuhyatāṃ syaṃdanena vai | sadhvajena mahāprājñamāyujaṃ samarodyatam 8| sa covāca sahasrākṣaṃ kariṣye tavaśāsanam | evamuktvā jagāmāśu hyāyuputraṃ raṇodyatam 9| rājānaṃ pratyuvācaiva devarājasya bhāṣitam | vijayī bhava dharmajña rathenānena saṃgare 10| ityuvāca sahasrākṣastvāmeva nṛpatīśvara | jahi tvaṃ dānavaṃ saṃkhye taṃ huṃḍaṃ pāpacetanam 11| samākarṇya sa rājeṃdra sānaṃdapulakodgamaḥ | prasādāddevadevasya vaśiṣṭhasya mahātmanaḥ 12| dānavaṃ sūdayiṣyāmi samare pāpacetanam | devānāṃ ca viśeṣeṇa mama māyāpacāritam 13| evamukte mahāvākye nahuṣeṇa mahātmanā | athāyātaḥ svayaṃ devaḥ śaṃkhacakragadādharaḥ 14| cakrāccakraṃ samutpāṭya sūryabiṃbopamaṃ mahat | jvalatā tejasā dīptaṃ suvṛttāraṃ śubhāvaham 15| nahuṣāya dadau devo harṣeṇa mahatā kila | tasmai śūlaṃ dadau śaṃbhuḥ sutīkṣṇaṃ tejasānvitam 16| tena śūlavareṇāsau śobhate samarodyataḥ | dvitīyaḥ śaṃkaraścāsau tripuraghno yathā prabhuḥ 17| brahmāstraṃ dattavānbrahmā varuṇaḥ pāśamuttamam | caṃdra tejaḥpratīkāśaṃ śaṃkhaṃ ca nādamaṃgalam 18| vajramiṃdrastathā śaktiṃ vāyuścāpaṃ samārgaṇam | āgneyāstraṃ tathā vahnirdadau tasmai mahātmane 19| śastrāṇyastrāṇi divyāni bahūni vividhāni ca | dadurdevā mahātmānastasmai rājñe mahaujase 20| kuṃjala uvāca- atha āyusuto vīro daivataiḥ parimānitaḥ | āśīrbhirnaṃditaścāpi munibhistattvavedibhiḥ 21| āruroha rathaṃ divyaṃ bhāsvaraṃ ratnamālinam | ghaṃṭāravaiḥ praṇadaṃtaṃ kṣudraghaṃṭāsamākulam 22| rathena tena divyena śuśubhe nṛpanadaṃnaḥ | divimārge yathā sūryastejasā svena vai kila 23| pratapaṃstejasā tadvaddaityānāṃ mastakeṣu saḥ | jagāma śīghraṃ vegena yathā vāyuḥ sadāgatiḥ 24| yatrāsau dānavaḥ pāpastiṣṭhate svabalairyutaḥ | tena mātalinā sārddhaṃ vāhakena mahātmanā 25|