Chapter 36

नारद उवाच- वाराणस्यां महाराज मध्यमेशं परात्परम् । तस्मिन्स्थाने महादेवो देव्या सह महेश्वरः १। रमते भगवान्नित्यं रुद्रैश्च परिवारितः । तत्र पूर्वं हृषीकेशो विश्वात्मा देवकीसुतः २। उवास वत्सरं कृष्णः सदा पाशुपतैर्युतः । भस्मोद्धूलितसर्वांगो रुद्राध्ययनतत्परः ३। आराधयन्हरिः शंभुं कृत्वा पाशुपतंव्रतम् । तस्य ते बहवः शिष्याः ब्रह्मचर्यपरायणाः ४। लब्ध्वा तद्वदनाज्ज्ञानं दृष्टवंतो महेश्वरम् । तस्य देवो महादेवः प्रत्यक्षं नीललोहितः ५। ददौ कृष्णस्य भगवान्वरदो वरमुत्तमम् । येऽर्चयंति च गोविंदं मद्भक्ता विधिपूर्वकम् ६। तेषां तदैश्वरं ज्ञानमुत्पत्स्यति जगन्मयम् । नमस्योऽर्चयितव्यश्च ध्यातव्यो मत्परैर्जनैः ७। भविष्यंति न संदेहो मत्प्रसादाद्द्विजातयः । येऽत्र द्रक्ष्यंति देवेशं स्नात्वा देवं पिनाकिनम् ८। ब्रह्महत्यादिकं पापं तेषामाशु विनश्यति । प्राणांस्त्यक्ष्यंति ये र्मत्याः पापकर्मरता अपि ९। ते यांति तत्परं स्थानं नात्र कार्या विचारणा । धन्यास्तु खलु ते विज्ञा मंदाकिन्यां कृतोदकाः १०। अर्चयित्वा महादेवं मध्यमेश्वरमीश्वरम् । ज्ञानं दानं तपः श्राद्धं पिंडनिर्वपणं त्विह ११। एकैकशः कृतं कर्म पुनात्यासप्तमं कुलम् । सन्निहत्यामुपस्पृश्य राहुग्रस्ते दिवाकरे १२। यत्फलं लभते मर्त्त्यस्तस्माद्दशगुणं त्विह । एवमुक्तं महाराज माहात्म्यं मध्यमेश्वरे । यः शृणोति परं भक्त्या स याति परमं पदम् १३। इति श्रीपाद्मे महापुराणे स्वर्गखंडे वाराणसीमाहात्म्ये षट्त्रिंशोऽध्यायः ३६।

nārada uvāca- vārāṇasyāṃ mahārāja madhyameśaṃ parātparam | tasminsthāne mahādevo devyā saha maheśvaraḥ 1| ramate bhagavānnityaṃ rudraiśca parivāritaḥ | tatra pūrvaṃ hṛṣīkeśo viśvātmā devakīsutaḥ 2| uvāsa vatsaraṃ kṛṣṇaḥ sadā pāśupatairyutaḥ | bhasmoddhūlitasarvāṃgo rudrādhyayanatatparaḥ 3| ārādhayanhariḥ śaṃbhuṃ kṛtvā pāśupataṃvratam | tasya te bahavaḥ śiṣyāḥ brahmacaryaparāyaṇāḥ 4| labdhvā tadvadanājjñānaṃ dṛṣṭavaṃto maheśvaram | tasya devo mahādevaḥ pratyakṣaṃ nīlalohitaḥ 5| dadau kṛṣṇasya bhagavānvarado varamuttamam | ye'rcayaṃti ca goviṃdaṃ madbhaktā vidhipūrvakam 6| teṣāṃ tadaiśvaraṃ jñānamutpatsyati jaganmayam | namasyo'rcayitavyaśca dhyātavyo matparairjanaiḥ 7| bhaviṣyaṃti na saṃdeho matprasādāddvijātayaḥ | ye'tra drakṣyaṃti deveśaṃ snātvā devaṃ pinākinam 8| brahmahatyādikaṃ pāpaṃ teṣāmāśu vinaśyati | prāṇāṃstyakṣyaṃti ye rmatyāḥ pāpakarmaratā api 9| te yāṃti tatparaṃ sthānaṃ nātra kāryā vicāraṇā | dhanyāstu khalu te vijñā maṃdākinyāṃ kṛtodakāḥ 10| arcayitvā mahādevaṃ madhyameśvaramīśvaram | jñānaṃ dānaṃ tapaḥ śrāddhaṃ piṃḍanirvapaṇaṃ tviha 11| ekaikaśaḥ kṛtaṃ karma punātyāsaptamaṃ kulam | sannihatyāmupaspṛśya rāhugraste divākare 12| yatphalaṃ labhate marttyastasmāddaśaguṇaṃ tviha | evamuktaṃ mahārāja māhātmyaṃ madhyameśvare | yaḥ śṛṇoti paraṃ bhaktyā sa yāti paramaṃ padam 13| iti śrīpādme mahāpurāṇe svargakhaṃḍe vārāṇasīmāhātmye ṣaṭtriṃśo'dhyāyaḥ 36|