Chapter 74

सुकर्मोवाच- दूतास्तु ग्रामेषु वदंति सर्वे द्वीपेषु देशेष्वथ पत्तनेषु । लोकाः शृणुध्वं नृपतेस्तदाज्ञां सर्वप्रभावैर्हरिमर्चयंतु १। दानैश्च यज्ञैर्बहुभिस्तपोभिर्धर्माभिलाषैर्यजनैर्मनोभिः । ध्यायंतु लोका मधुसूदनं तु आदेशमेवं नृपतेस्तु तस्य २। एवं सुघुष्टं सकलं तु पुण्यमाकर्ण्य तं भूमितलेषु लोकैः । तदाप्रभृत्येव यजंति विष्णुं ध्यायंति गायंति जपंति मर्त्याः ३। वेदप्रणीतैश्च सुसूक्तमंत्रैः स्तोत्रैः सुपुण्यैरमृतोपमानैः । श्रीकेशवं तद्गतमानसास्ते व्रतोपवासैर्नियमैश्च दानैः ४। विहाय दोषान्निजकायचित्तवागुद्भवान्प्रेमरताः समस्ताः । लक्ष्मीनिवासं जगतां निवासं श्रीवासुदेवं परिपूजयंति ५। इत्याज्ञातस्य भूपस्य वर्तते क्षितिमंडले । वैष्णवेनापि भावेन जनाः सर्वे जयंति ते ६। नामभिः कर्मभिर्विष्णुं यजंते ज्ञानकोविदाः । तद्ध्यानास्तद्व्यवसिता विष्णुपूजापरायणाः ७। यावद्भूमंडलं सर्वं यावत्तपति भास्करः । तावद्धि मानवा लोकाः सर्वे भागवता बभुः ८। विष्णोर्ध्यानप्रभावेण पूजास्तोत्रेण नामतः । आधिव्याधिविहीनास्ते संजाता मानवास्तदा ९। वीतशोकाश्च पुण्याश्च सर्वे चैव तपोधनाः । संजाता वैष्णवा विप्र प्रसादात्तस्य चक्रिणः १०। आमयैश्च विहीनास्ते दोषैरोषैश्च वर्जिताः । सर्वैश्वर्यसमापन्नाः सर्वरोगविवर्जिताः ११। प्रसादात्तस्य देवस्य संजाता मानवास्तदा । अमराः निर्जराः सर्वे धनधान्यसमन्विताः १२। मर्त्या विष्णुप्रसादेन पुत्रपौत्रैरलंकृताः । तेषामेव महाभाग गृहद्वारेषु नित्यदा १३। कल्पद्रुमाः सुपुण्यास्ते सर्वकामफलप्रदाः । सर्वकामदुघा गावः सचिंतामणयस्तथा १४। संति तेषां गृहे पुण्याः सर्वकामप्रदायकाः । अमरा मानवा जाताः पुत्रपौत्रैरलंकृताः १५। सर्वदोषविहीनास्ते विष्णोश्चैव प्रसादतः । सर्वसौभाग्यसंपन्नाः पुण्यमंगलसंयुताः १६। सुपुण्या दानसंपन्ना ज्ञानध्यानपरायणाः । न दुर्भिक्षं न च व्याधिर्नाकालमरणं नृणाम् १७। तस्मिञ्शासति धर्मज्ञे ययातौ नृपतौ तदा । वैष्णवा मानवाः सर्वे विष्णुव्रतपरायणाः १८। तद्ध्यानास्तद्गताः सर्वे संजाता भावतत्पराः । तेषां गृहाणि दिव्यानि पुण्यानि द्विजसत्तम १९। पताकाभिः सुशुक्लाभिः शंखयुक्तानि तानि वै । गदांकितध्वजाभिश्च नित्यं चक्रांकितानि च २०। पद्मांकितानि भासंते विमानप्रतिमानि च । गृहाणि भित्तिभागेषु चित्रितानि सुचित्रकैः २१। सर्वत्र गृहद्वारेषु पुण्यस्थानेषु सत्तमाः । वनानि संति दिव्यानि शाद्वलानि शुभानि च २२। तुलस्या च द्विजश्रेष्ठ तेषु केशवमंदिरैः । भासंते पुण्यदिव्यानि गृहाणि प्राणिनां सदा २३। सर्वत्र वैष्णवो भावो मंगलो बहु दृश्यते । शंखशब्दाश्च भूलोके मिथः स्फोटरवैः सखे २४। श्रूयंते तत्र विप्रेंद्र दोषपापविनाशकाः । शंखस्वस्तिकपद्मानि गृहद्वारेषु भित्तिषु २५। विष्णुभक्त्या च नारीभिर्लिखितानि द्विजोत्तम । गीतरागसुवर्णैश्च मूर्च्छना तानसुस्वरैः २६। गायंति केशवं लोका विष्णुध्यानपरायणाः २७। हरिं मुरारिं प्रवदंति केशवं प्रीत्या जितं माधवमेव चान्ये । श्रीनारसिंहं कमलेक्षणं तं गोविंदमेकं कमलापतिं च २८। कृष्णं शरण्यं शरणं जपंति रामं च जप्यैः परिपूजयंति । दंडप्रणामैः प्रणमंति विष्णुं तद्ध्यानयुक्ताः परवैष्णवास्ते २९। इति श्रीपद्मपुराणे भूमिखंडे वेनोपाख्याने मातापितृतीर्थवर्णने ययातिचरित्रे चतुःसप्ततितमोऽध्यायः ७४।

sukarmovāca- dūtāstu grāmeṣu vadaṃti sarve dvīpeṣu deśeṣvatha pattaneṣu | lokāḥ śṛṇudhvaṃ nṛpatestadājñāṃ sarvaprabhāvairharimarcayaṃtu 1| dānaiśca yajñairbahubhistapobhirdharmābhilāṣairyajanairmanobhiḥ | dhyāyaṃtu lokā madhusūdanaṃ tu ādeśamevaṃ nṛpatestu tasya 2| evaṃ sughuṣṭaṃ sakalaṃ tu puṇyamākarṇya taṃ bhūmitaleṣu lokaiḥ | tadāprabhṛtyeva yajaṃti viṣṇuṃ dhyāyaṃti gāyaṃti japaṃti martyāḥ 3| vedapraṇītaiśca susūktamaṃtraiḥ stotraiḥ supuṇyairamṛtopamānaiḥ | śrīkeśavaṃ tadgatamānasāste vratopavāsairniyamaiśca dānaiḥ 4| vihāya doṣānnijakāyacittavāgudbhavānpremaratāḥ samastāḥ | lakṣmīnivāsaṃ jagatāṃ nivāsaṃ śrīvāsudevaṃ paripūjayaṃti 5| ityājñātasya bhūpasya vartate kṣitimaṃḍale | vaiṣṇavenāpi bhāvena janāḥ sarve jayaṃti te 6| nāmabhiḥ karmabhirviṣṇuṃ yajaṃte jñānakovidāḥ | taddhyānāstadvyavasitā viṣṇupūjāparāyaṇāḥ 7| yāvadbhūmaṃḍalaṃ sarvaṃ yāvattapati bhāskaraḥ | tāvaddhi mānavā lokāḥ sarve bhāgavatā babhuḥ 8| viṣṇordhyānaprabhāveṇa pūjāstotreṇa nāmataḥ | ādhivyādhivihīnāste saṃjātā mānavāstadā 9| vītaśokāśca puṇyāśca sarve caiva tapodhanāḥ | saṃjātā vaiṣṇavā vipra prasādāttasya cakriṇaḥ 10| āmayaiśca vihīnāste doṣairoṣaiśca varjitāḥ | sarvaiśvaryasamāpannāḥ sarvarogavivarjitāḥ 11| prasādāttasya devasya saṃjātā mānavāstadā | amarāḥ nirjarāḥ sarve dhanadhānyasamanvitāḥ 12| martyā viṣṇuprasādena putrapautrairalaṃkṛtāḥ | teṣāmeva mahābhāga gṛhadvāreṣu nityadā 13| kalpadrumāḥ supuṇyāste sarvakāmaphalapradāḥ | sarvakāmadughā gāvaḥ saciṃtāmaṇayastathā 14| saṃti teṣāṃ gṛhe puṇyāḥ sarvakāmapradāyakāḥ | amarā mānavā jātāḥ putrapautrairalaṃkṛtāḥ 15| sarvadoṣavihīnāste viṣṇoścaiva prasādataḥ | sarvasaubhāgyasaṃpannāḥ puṇyamaṃgalasaṃyutāḥ 16| supuṇyā dānasaṃpannā jñānadhyānaparāyaṇāḥ | na durbhikṣaṃ na ca vyādhirnākālamaraṇaṃ nṛṇām 17| tasmiñśāsati dharmajñe yayātau nṛpatau tadā | vaiṣṇavā mānavāḥ sarve viṣṇuvrataparāyaṇāḥ 18| taddhyānāstadgatāḥ sarve saṃjātā bhāvatatparāḥ | teṣāṃ gṛhāṇi divyāni puṇyāni dvijasattama 19| patākābhiḥ suśuklābhiḥ śaṃkhayuktāni tāni vai | gadāṃkitadhvajābhiśca nityaṃ cakrāṃkitāni ca 20| padmāṃkitāni bhāsaṃte vimānapratimāni ca | gṛhāṇi bhittibhāgeṣu citritāni sucitrakaiḥ 21| sarvatra gṛhadvāreṣu puṇyasthāneṣu sattamāḥ | vanāni saṃti divyāni śādvalāni śubhāni ca 22| tulasyā ca dvijaśreṣṭha teṣu keśavamaṃdiraiḥ | bhāsaṃte puṇyadivyāni gṛhāṇi prāṇināṃ sadā 23| sarvatra vaiṣṇavo bhāvo maṃgalo bahu dṛśyate | śaṃkhaśabdāśca bhūloke mithaḥ sphoṭaravaiḥ sakhe 24| śrūyaṃte tatra vipreṃdra doṣapāpavināśakāḥ | śaṃkhasvastikapadmāni gṛhadvāreṣu bhittiṣu 25| viṣṇubhaktyā ca nārībhirlikhitāni dvijottama | gītarāgasuvarṇaiśca mūrcchanā tānasusvaraiḥ 26| gāyaṃti keśavaṃ lokā viṣṇudhyānaparāyaṇāḥ 27| hariṃ murāriṃ pravadaṃti keśavaṃ prītyā jitaṃ mādhavameva cānye | śrīnārasiṃhaṃ kamalekṣaṇaṃ taṃ goviṃdamekaṃ kamalāpatiṃ ca 28| kṛṣṇaṃ śaraṇyaṃ śaraṇaṃ japaṃti rāmaṃ ca japyaiḥ paripūjayaṃti | daṃḍapraṇāmaiḥ praṇamaṃti viṣṇuṃ taddhyānayuktāḥ paravaiṣṇavāste 29| iti śrīpadmapurāṇe bhūmikhaṃḍe venopākhyāne mātāpitṛtīrthavarṇane yayāticaritre catuḥsaptatitamo'dhyāyaḥ 74|