Uttara-khaṇḍa · Chapter 63
Sourceयुधिष्ठिर उवाच - श्रुतानि बहुधर्माणि व्रतानि च जगत्प्रभो । एकादशीसमं किंजिच्छ्रुतं नैव जनार्दन १। पुनस्त्वेकादशीं ब्रूहि पापघ्नीं पुण्यदायिनीम् । यां कृत्वा मनुजो लोके प्राप्नुयात्परमं पदम् २। श्रीकृष्ण उवाच- शुक्ले वा यदि वा कृष्णे यदा चैकादशी भवेत् । न त्याज्या जगतीपाल मोक्षसौख्यविवर्द्धनी ३। एकादशी कलौ राजन्भवबंधविमोचनी । कामदा सर्वकामानां पापानां पापहा भुवि ४। रविवारेऽथ मांगल्ये संक्रमे वा नृपोत्तम । एकादशी सदोपोष्या पुत्रपौत्रविवर्द्धनी ५। एकादशीव्रतं क्वापि न त्याज्यं विष्णुवल्लभैः । आयुः कीर्तिप्रदं नित्यं संतानारोग्यवित्तदम् ६। मोक्षदं रूपदं राज्यं नित्यमेकादशीव्रतम् । ये कुर्वंति महीपाल श्रद्धया परया युताः ७। यथोक्तविधिना लोके ते नरा विष्णुरूपिणः । जीवन्मुक्तास्तु भूपाल दृश्यंते नात्र संशयः ८। युधिष्ठिर उवाच- जीवन्मुक्ताः कथं कृष्ण विष्णुरूपाः कथं पुनः । पापरूपाश्च दृश्यंते परं कौतूहलं हि मे ९। श्रीकृष्ण उवाच- ये च राजन्कलौ भक्त्या निर्जलं व्रतमुत्तमम् । एकादश्याः प्रकुर्वंति विधिदृष्टेन कर्मणा १०। न कथं विष्णुरूपास्ते जीवन्मुक्ताः कथं नहि । सर्वपापहरं पुण्यं व्रतमेकादशीसमम् ११। न किंचिद्विद्यते राजन्सर्वकामप्रदं नृणाम् । एकाशनं दशम्यां च नंदायां निर्जलं व्रतम् १२। पारणं चैव भद्रायां कृत्वा विष्णुसमा नराः । श्रद्धावान्यस्तु कुरुते कामदाया व्रतं शुभम् १३। वांछितं लभते सोऽपि इहलोके परत्र च । पवित्रा पावनी ह्येषा महापातकनाशिनी १४। भुक्तिमुक्तिप्रदा चैव कर्तॄणां नृपसत्तम । कामदायां विधानेन पूजयेत्पुरुषोत्तमम् १५। पुष्पधूपादिभिश्चैव नैवेद्यैर्विविधैस्तथा । कांस्य मांसमसूरांश्च चणकान्कोद्रवांस्तथा १६। शाकं मधु परान्नं च पुनर्भोजन मैथुनम् । वैष्णवो व्रतकर्त्ता च दशम्यां दश वर्जयेत् १७। द्यूतं क्रीडां तथा निद्रा तांबूलं दंतधावनम् । परापवादं पैशुन्यं स्तेयं हिंसां तथा रतिम् १८। क्रोधं च वितथं वाक्यमेकादश्यां विवर्जयेत् । कांस्यं मांसंमसूरांश्च तैलं वितथभाषणम् १९। व्यायामं च प्रवासं च पुनर्भोजनमैथुनम् । वृषपृष्ठं परान्नं च शाकं च द्वादशीदिने २०। अनेन विधिना राजन्विहिता यैश्च कामदा । रात्रौ जागरणं कृत्वा पूजितः पुरुषोत्तमः २१। सर्वपापविनिर्मुक्तास्ते यांति परमां गतिम् । पठनाच्छ्रवणाद्राजन्गोसहस्रफलं लभेत् २२। इति श्रीपाद्मे महापुराणे पंचपंचाशत्साहस्र्यां संहितायामुत्तरखण्डे उमापतिनारदसंवादे पुरुषोत्तममासस्य शुक्ला कामदानामैकादशीनाम त्रिषष्टितमोऽध्यायः ६३।
yudhiṣṭhira uvāca - śrutāni bahudharmāṇi vratāni ca jagatprabho | ekādaśīsamaṃ kiṃjicchrutaṃ naiva janārdana 1| punastvekādaśīṃ brūhi pāpaghnīṃ puṇyadāyinīm | yāṃ kṛtvā manujo loke prāpnuyātparamaṃ padam 2| śrīkṛṣṇa uvāca- śukle vā yadi vā kṛṣṇe yadā caikādaśī bhavet | na tyājyā jagatīpāla mokṣasaukhyavivarddhanī 3| ekādaśī kalau rājanbhavabaṃdhavimocanī | kāmadā sarvakāmānāṃ pāpānāṃ pāpahā bhuvi 4| ravivāre'tha māṃgalye saṃkrame vā nṛpottama | ekādaśī sadopoṣyā putrapautravivarddhanī 5| ekādaśīvrataṃ kvāpi na tyājyaṃ viṣṇuvallabhaiḥ | āyuḥ kīrtipradaṃ nityaṃ saṃtānārogyavittadam 6| mokṣadaṃ rūpadaṃ rājyaṃ nityamekādaśīvratam | ye kurvaṃti mahīpāla śraddhayā parayā yutāḥ 7| yathoktavidhinā loke te narā viṣṇurūpiṇaḥ | jīvanmuktāstu bhūpāla dṛśyaṃte nātra saṃśayaḥ 8| yudhiṣṭhira uvāca- jīvanmuktāḥ kathaṃ kṛṣṇa viṣṇurūpāḥ kathaṃ punaḥ | pāparūpāśca dṛśyaṃte paraṃ kautūhalaṃ hi me 9| śrīkṛṣṇa uvāca- ye ca rājankalau bhaktyā nirjalaṃ vratamuttamam | ekādaśyāḥ prakurvaṃti vidhidṛṣṭena karmaṇā 10| na kathaṃ viṣṇurūpāste jīvanmuktāḥ kathaṃ nahi | sarvapāpaharaṃ puṇyaṃ vratamekādaśīsamam 11| na kiṃcidvidyate rājansarvakāmapradaṃ nṛṇām | ekāśanaṃ daśamyāṃ ca naṃdāyāṃ nirjalaṃ vratam 12| pāraṇaṃ caiva bhadrāyāṃ kṛtvā viṣṇusamā narāḥ | śraddhāvānyastu kurute kāmadāyā vrataṃ śubham 13| vāṃchitaṃ labhate so'pi ihaloke paratra ca | pavitrā pāvanī hyeṣā mahāpātakanāśinī 14| bhuktimuktipradā caiva kartṝṇāṃ nṛpasattama | kāmadāyāṃ vidhānena pūjayetpuruṣottamam 15| puṣpadhūpādibhiścaiva naivedyairvividhaistathā | kāṃsya māṃsamasūrāṃśca caṇakānkodravāṃstathā 16| śākaṃ madhu parānnaṃ ca punarbhojana maithunam | vaiṣṇavo vratakarttā ca daśamyāṃ daśa varjayet 17| dyūtaṃ krīḍāṃ tathā nidrā tāṃbūlaṃ daṃtadhāvanam | parāpavādaṃ paiśunyaṃ steyaṃ hiṃsāṃ tathā ratim 18| krodhaṃ ca vitathaṃ vākyamekādaśyāṃ vivarjayet | kāṃsyaṃ māṃsaṃmasūrāṃśca tailaṃ vitathabhāṣaṇam 19| vyāyāmaṃ ca pravāsaṃ ca punarbhojanamaithunam | vṛṣapṛṣṭhaṃ parānnaṃ ca śākaṃ ca dvādaśīdine 20| anena vidhinā rājanvihitā yaiśca kāmadā | rātrau jāgaraṇaṃ kṛtvā pūjitaḥ puruṣottamaḥ 21| sarvapāpavinirmuktāste yāṃti paramāṃ gatim | paṭhanācchravaṇādrājangosahasraphalaṃ labhet 22| iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṇḍe umāpatināradasaṃvāde puruṣottamamāsasya śuklā kāmadānāmaikādaśīnāma triṣaṣṭitamo'dhyāyaḥ 63|
English translation
Yudhiṣṭhira said :
1-9. O lord of the world, I have heard about vows having many virtues. But, O Janārdana , I have heard nothing like the Ekādaśī (-vow). Again tell about the Ekādaśī(-vow) which destroys sins and gives religious merit and observing which a man would obtain the highest position in the world.
Śrīkṛṣṇa said :
O lord of the world, whether the Ekādaśī would be in the bright or the dark fortnight, it is not to be omitted, as it (gives) salvation and enhances happiness. O king, in the Kali -age, Ekādaśī frees a man from the bonds of the mundane existence, gives all desired objects, and destroys all sins on the earth. O best king, the Ekādaśī (falling) on a Sunday or a Tuesday or on the day of the passage of the Sun or a Planet through a Zodiacal sign should always be fasted on. It increases (the number of) sons and grandsons. Those to whom Viṣṇu is dear, should never give up the Ekadāśī-vow. It always gives a (long) life, fame, progeny and health. The Ekādaśī-vow always gives salvation, (handsome) form, kingdom. O king, those men who, endowed with great faith, observe it in the manner as is laid down, are of the form of Viṣṇu. O king, undoubtedly they are seen to be liberated while living.
Yudhiṣṭhira said :
O Kṛṣṇa , how is it that those who are seen to be of the form of sin (i.e. who are sinners), are liberated while living, and are of the nature of Viṣṇu? I have a great curiosity.
Śrīkrṣṇa said :
10-22. O king, how are they who in the Kali-age observe devoutly and according to the acts as are laid down in the sacred texts, the excellent Ekādaśī-vow without (drinking) water, not of the form of Viṣṇu or not liberated while living? There is no other auspicious vow like that of Ekādaśī which removes all sins and gives all desired objects to men. Having eaten once only on the Daśamī day, and observed the vow without drinking water on the Nandā (Ekādaśī day) and having broken the fast on the Bhadrā (day), men become similar to Viṣṇu. A faithful man who observes the auspicious vow of the Kāmadā (Ekādaśī) obtains his desired (objects) in this and in the next world. This (vow) is pure, purifying, and destroys great sins. O best king, this one gives pleasures and salvation to those who observe it. A man should duly worship Viṣṇu on Kāmadā with flowers, incense etc., so also with offerings of food. A devotee of Viṣṇu, who observes the vow, should avoid these ten (articles) on Daśamī: bell-metal, flesh, beans, grams, kodrava , vegetables, honey, food offered by others, eating food and sexual union. On the Ekādaśī day he should avoid gambling, sport, sleep, tāmbūla , brushing his teeth, censuring others, wickedness, harming (others) and sex, (so also he should avoid) anger, false words on the Ekādaśī day. On the Dvādaśī day he should avoid bell-metal, flesh, beans, oil, false speech, exertion, journey, food and sexual union, (mounting upon) a bull’s back, others’ food, and vegetables. O king, those who have observed the Kāmadā (Ekādaśī) in this manner, and having after keeping awake at night, worshipped Viṣṇu, are freed from all sins and go to the best position. O king, by reciting (about) or listening to this vow (a man) would obtain the fruit of (having given) a thousand cows.
Complete chapter-aligned witnesses. Sanskrit Wikisource page 44636, revision 336459 (2022-04-22T22:29:40Z). English is N. A. Deshpande’s complete translation, controlled against its chapter page at https://www.wisdomlib.org/hinduism/book/the-padma-purana/d/doc365640.html and the ten-volume archival witness. The witnesses are aligned at chapter level; no unsupported verse-by-verse equivalence is asserted.