Chapter 8

युधिष्ठिर उवाच- देवान्विक्लाव्य समरे विष्णुं स्थाप्यात्ममंदिरे । जालंधरेणाब्धिजेन यत्कृतं ब्रूहि नारद १। नारद उवाच-। शुंभादीनां तु वीराणां दत्त्वा दानं प्रसादजम् । जालंधरो जगामाथ स्वर्गं प्राप्यावलोकयत् २। हिरण्यवर्षेण जनान्भूषयंतं दिनेदिने । फलंति तरवोऽजस्रं वाजिमेधक्रतोः फलम् ३। गजवस्त्रसुवर्णानि धेनु कन्या तिलानि च । पुष्पकर्पूरतांबूल कस्तूरी कुंकुमानि च ४। ये यच्छंति महात्मानस्ते पश्यंत्यमरावतीम् । वर्षासु गृहदानेन शिशिरेऽग्निप्रदानतः ५। वादित्राणि च सर्वाणि वादयंति शिवालये । प्रपां कुर्वंति ये चैत्रे दध्योदनसमन्विताम् ६। यत्र हिंदोलपर्यंकं स्वयमांदोलयंति च । सारिकाशुकहंसाश्च भ्रमद्भ्रमरकोकिलाः ७। कुर्वंतो दूतकार्याणि यच्छंते प्रियसंगमम् । रंभा यत्र पुरे राम मेनका च तिलोत्तमा ८। सुषमा सुंदरी यत्र घृताची पुंजिकस्थली । सुकेशी सुमुखी रामा मंजुघोषा च मालिनी ९। मृगोद्भवा च सुखदा धनदंष्ट्रा तिलप्रभा । वाजिमेधफलग्राहा राजसूयफलंति याः १०। कोटिशो यत्र निःष्पापाः क्रीडंत्यप्सरसो नृप । एवं भूरिसुखे स्वर्गे स्थापयामास सिंधुजः ११। शुंभं प्राणसमं दैत्यं निशुंभं युवराजके । स्वयं जालंधरे पीठे स्वर्गादागत्य सिंधुराट् । वर्षार्बुदद्वयं राज्यं चकारात्मबलेन च १२। युधिष्ठिर उवाच-। युयुधेऽसुर संग्रामे ससुरैरपराजितः १३। ततः किमकरोद्राजा सिंधुसूनुः प्रतापवान् । तन्ममाचक्ष्व देवर्षे श्रोतुकामस्य विस्तरात् १४। नारद उवाच-। शृणु राजन्यथातथ्यं कृतसागरसूनुना । स देवान्समरे जित्वा राज्यं चक्रे ह्यकंटकम् १५। गंधर्वाश्चित्रसेनाद्याः सेवंते चासुरेश्वरम् । यज्ञभागांश्च यो भुंक्ते सर्वेषामसुरेश्वरः १६। क्षीरसागरतो देवैर्हृतं रत्नादिकं च यत् । तत्सर्वं च तथान्यच्च निर्जित्य हृतवान्बली १७। समुद्रतनये राज्यं भुवो राजन्प्रशासति । न कश्चिन्म्रियते मर्त्यो नरकं कोऽपि न व्रजेत् १८। न कलिप्रणयादन्यो न भोगादपरः क्षयः । न वंध्या दुर्भगा नारी नालंकारैर्विवर्जिता १९। कुरूपा दुर्गता दुष्टाऽयशस्या न च दृश्यते । न तत्र विधवा नारी न कश्चिन्निर्द्धनो जनः २०। दातारः संति सर्वत्र न प्रतिग्राहिणः क्वचित् । पुण्या जनाः प्रयच्छंति द्विजेभ्यो ह्यात्मनो धनम् २१। रूपयौवनशालिन्यः सीमंतिन्यो गृहे गृहे । गोक्षीरं दधिसर्पिश्च यत्र निर्जरसो जनाः २२। मंगलं तत्र सर्वेषां न क्वचिद्वधबंधनम् । शरेण न च हिंसास्ति न कश्चित्केन बाध्यते २३। ऋणं न दृश्यते राजन्धनिनः संति सर्वतः । संतुष्टाः सर्वसस्याढ्याः प्रजाः सर्वत्रपार्थिव २४। केलीक्षुदंडप्रभवश्च दुग्धरसोऽति सुस्वादुतरो गृहे नृणाम् । शुश्राव नारीनरयोर्हितं वचो न चापहर्ताध्वनि गच्छतां सदा २५। पतंत्यखंडा नभसो यतस्ततो धाराश्च कर्मारविमिश्रसर्पिषः । संमिश्रिताः शर्करया परिश्रुताः समुद्रसूनोः स्मरणान्मुखे नृणाम् २६। इति श्रीपाद्मे महापुराणे उत्तरखंडे पंचपंचाशत्सहस्र-। संहितायां युधिष्ठिरनारदसम्वादे जालंधरसौराज्यवर्णनंनामाष्टमोऽध्यायः ८।

yudhiṣṭhira uvāca- devānviklāvya samare viṣṇuṃ sthāpyātmamaṃdire | jālaṃdhareṇābdhijena yatkṛtaṃ brūhi nārada 1| nārada uvāca-| śuṃbhādīnāṃ tu vīrāṇāṃ dattvā dānaṃ prasādajam | jālaṃdharo jagāmātha svargaṃ prāpyāvalokayat 2| hiraṇyavarṣeṇa janānbhūṣayaṃtaṃ dinedine | phalaṃti taravo'jasraṃ vājimedhakratoḥ phalam 3| gajavastrasuvarṇāni dhenu kanyā tilāni ca | puṣpakarpūratāṃbūla kastūrī kuṃkumāni ca 4| ye yacchaṃti mahātmānaste paśyaṃtyamarāvatīm | varṣāsu gṛhadānena śiśire'gnipradānataḥ 5| vāditrāṇi ca sarvāṇi vādayaṃti śivālaye | prapāṃ kurvaṃti ye caitre dadhyodanasamanvitām 6| yatra hiṃdolaparyaṃkaṃ svayamāṃdolayaṃti ca | sārikāśukahaṃsāśca bhramadbhramarakokilāḥ 7| kurvaṃto dūtakāryāṇi yacchaṃte priyasaṃgamam | raṃbhā yatra pure rāma menakā ca tilottamā 8| suṣamā suṃdarī yatra ghṛtācī puṃjikasthalī | sukeśī sumukhī rāmā maṃjughoṣā ca mālinī 9| mṛgodbhavā ca sukhadā dhanadaṃṣṭrā tilaprabhā | vājimedhaphalagrāhā rājasūyaphalaṃti yāḥ 10| koṭiśo yatra niḥṣpāpāḥ krīḍaṃtyapsaraso nṛpa | evaṃ bhūrisukhe svarge sthāpayāmāsa siṃdhujaḥ 11| śuṃbhaṃ prāṇasamaṃ daityaṃ niśuṃbhaṃ yuvarājake | svayaṃ jālaṃdhare pīṭhe svargādāgatya siṃdhurāṭ | varṣārbudadvayaṃ rājyaṃ cakārātmabalena ca 12| yudhiṣṭhira uvāca-| yuyudhe'sura saṃgrāme sasurairaparājitaḥ 13| tataḥ kimakarodrājā siṃdhusūnuḥ pratāpavān | tanmamācakṣva devarṣe śrotukāmasya vistarāt 14| nārada uvāca-| śṛṇu rājanyathātathyaṃ kṛtasāgarasūnunā | sa devānsamare jitvā rājyaṃ cakre hyakaṃṭakam 15| gaṃdharvāścitrasenādyāḥ sevaṃte cāsureśvaram | yajñabhāgāṃśca yo bhuṃkte sarveṣāmasureśvaraḥ 16| kṣīrasāgarato devairhṛtaṃ ratnādikaṃ ca yat | tatsarvaṃ ca tathānyacca nirjitya hṛtavānbalī 17| samudratanaye rājyaṃ bhuvo rājanpraśāsati | na kaścinmriyate martyo narakaṃ ko'pi na vrajet 18| na kalipraṇayādanyo na bhogādaparaḥ kṣayaḥ | na vaṃdhyā durbhagā nārī nālaṃkārairvivarjitā 19| kurūpā durgatā duṣṭā'yaśasyā na ca dṛśyate | na tatra vidhavā nārī na kaścinnirddhano janaḥ 20| dātāraḥ saṃti sarvatra na pratigrāhiṇaḥ kvacit | puṇyā janāḥ prayacchaṃti dvijebhyo hyātmano dhanam 21| rūpayauvanaśālinyaḥ sīmaṃtinyo gṛhe gṛhe | gokṣīraṃ dadhisarpiśca yatra nirjaraso janāḥ 22| maṃgalaṃ tatra sarveṣāṃ na kvacidvadhabaṃdhanam | śareṇa na ca hiṃsāsti na kaścitkena bādhyate 23| ṛṇaṃ na dṛśyate rājandhaninaḥ saṃti sarvataḥ | saṃtuṣṭāḥ sarvasasyāḍhyāḥ prajāḥ sarvatrapārthiva 24| kelīkṣudaṃḍaprabhavaśca dugdharaso'ti susvādutaro gṛhe nṛṇām | śuśrāva nārīnarayorhitaṃ vaco na cāpahartādhvani gacchatāṃ sadā 25| pataṃtyakhaṃḍā nabhaso yatastato dhārāśca karmāravimiśrasarpiṣaḥ | saṃmiśritāḥ śarkarayā pariśrutāḥ samudrasūnoḥ smaraṇānmukhe nṛṇām 26| iti śrīpādme mahāpurāṇe uttarakhaṃḍe paṃcapaṃcāśatsahasra-| saṃhitāyāṃ yudhiṣṭhiranāradasamvāde jālaṃdharasaurājyavarṇanaṃnāmāṣṭamo'dhyāyaḥ 8|