Bhūmi-khaṇḍa · Chapter 70
Sourceमातलिरुवाच- यमपीडां प्रवक्ष्यामि महातीव्रां सुदारुणाम् । भुंजंति पापिनः सर्वे क्रूरास्ते ब्रह्मघातकाः १। क्वचित्पापाः प्रपच्यंते तीव्रेण करिषाग्निना । क्वचित्सिंहैर्वृकैर्व्याघ्रैर्दंशैः कीटैश्च दारुणैः २। क्वचिन्महाजलौकोभिः क्वचिदाजगरैः पुनः । मक्षिकाभिश्च रौद्राभिः क्वचित्सर्पैर्विषोल्बणैः ३। मत्तमातंगयूथैश्च बलोत्कृष्टैः प्रमाथिभिः । पंथानमुल्लिखद्भिश्च तीक्ष्णशृंगमहावृषैः ४। महाशृंगैश्च महिषैर्दुष्टगात्रप्रबाधकैः । डाकिनीभिश्च रौद्राभिर्विकरालैश्च राक्षसैः ५। व्याधिभिश्च महाघोरैः पीड्यमाना व्रजंति ते । महातुलां समारूढा दह्यमाना दवानले ६। महावेगप्रधूतास्ते महाचंडेन वायुना । महापाषाणवर्षेण भिद्यमानाश्च सर्वतः ७। पतद्भिर्वज्रनिर्घोषैरुल्कापातैश्च दारुणैः । प्रदीप्तांगारवर्षेण हन्यमाना व्रजंति ते ८। महता पांसुवर्षेण पूर्यमाणा यमं गताः । ये नराः पापकर्माणः पापं भुंजंति दारुणम् ९। एवं पापविशेषेण पापिष्ठाः पापकारकाः । नरकं प्रतिभुंजंति बहुपीडासमाकुलम् १०। एतत्ते सर्वमाख्यातं विवेकं पुण्यपापयोः । अन्यत्किं ते प्रवक्ष्यामि धर्मशास्त्रमनुत्तमम् ११। इति श्रीपद्मपुराणे भूमिखंडे वेनोपाख्याने पितृतीर्थवर्णने ययातिचरिते सप्ततितमोऽध्यायः ७०।
mātaliruvāca- yamapīḍāṃ pravakṣyāmi mahātīvrāṃ sudāruṇām | bhuṃjaṃti pāpinaḥ sarve krūrāste brahmaghātakāḥ 1| kvacitpāpāḥ prapacyaṃte tīvreṇa kariṣāgninā | kvacitsiṃhairvṛkairvyāghrairdaṃśaiḥ kīṭaiśca dāruṇaiḥ 2| kvacinmahājalaukobhiḥ kvacidājagaraiḥ punaḥ | makṣikābhiśca raudrābhiḥ kvacitsarpairviṣolbaṇaiḥ 3| mattamātaṃgayūthaiśca balotkṛṣṭaiḥ pramāthibhiḥ | paṃthānamullikhadbhiśca tīkṣṇaśṛṃgamahāvṛṣaiḥ 4| mahāśṛṃgaiśca mahiṣairduṣṭagātraprabādhakaiḥ | ḍākinībhiśca raudrābhirvikarālaiśca rākṣasaiḥ 5| vyādhibhiśca mahāghoraiḥ pīḍyamānā vrajaṃti te | mahātulāṃ samārūḍhā dahyamānā davānale 6| mahāvegapradhūtāste mahācaṃḍena vāyunā | mahāpāṣāṇavarṣeṇa bhidyamānāśca sarvataḥ 7| patadbhirvajranirghoṣairulkāpātaiśca dāruṇaiḥ | pradīptāṃgāravarṣeṇa hanyamānā vrajaṃti te 8| mahatā pāṃsuvarṣeṇa pūryamāṇā yamaṃ gatāḥ | ye narāḥ pāpakarmāṇaḥ pāpaṃ bhuṃjaṃti dāruṇam 9| evaṃ pāpaviśeṣeṇa pāpiṣṭhāḥ pāpakārakāḥ | narakaṃ pratibhuṃjaṃti bahupīḍāsamākulam 10| etatte sarvamākhyātaṃ vivekaṃ puṇyapāpayoḥ | anyatkiṃ te pravakṣyāmi dharmaśāstramanuttamam 11| iti śrīpadmapurāṇe bhūmikhaṃḍe venopākhyāne pitṛtīrthavarṇane yayāticarite saptatitamo'dhyāyaḥ 70|
English translation
Mātali said :
1. I shall (now) tell (you) about the very poignant and very terrible torture caused by Yama (which) all the cruel, sinful killers of brāhmaṇas experience.
2-10. Sometimes the sinful ones are roasted with the fire of dry cow-dung; sometimes they are eaten up by fierce lions, wolves, tigers, gad-flies and worms. Sometimes (they are eaten up) by great leeches, or by huge cobras, and by terrible flies or sometimes by serpents with strong poison. (Sometimes they are eaten up) by great intoxicated and torturing herds of elephants, (or) by great bulls with sharp horns, scratching the path, and by buffaloes with big horns harming the bodies of the wicked, and by fierce female goblins and by terrible demons. Mounted on a great balance and being tormented by very terrible diseases and being burnt in a wild fire, they go (to Yama). They are very speedily shaken by very violent wind, and are shattered all round by the shower ofgreat (slabs of) stone, and by the terrible falls of meteors having a sound like that of thunderbolt. Being struck by the shower of burning charcoal they go (to Yama). Being filled (i.e. covered) with a great shower of dust, they go to Yama. Men who are sinful experience terrible pain. Thus, the most sinful ones, who commit sins, experience, due to their particular sin, hell, full of many tortures.
11. I have thus explained to you all the difference between merit and demerit. What other excellent branch of religious knowledge shall I explain to you?
Complete chapter-aligned witnesses. Sanskrit Wikisource page 14623, revision 335515 (2022-04-10T07:22:08Z). English is N. A. Deshpande’s complete translation, controlled against its chapter page at https://www.wisdomlib.org/hinduism/book/the-padma-purana/d/doc365162.html and the ten-volume archival witness. The witnesses are aligned at chapter level; no unsupported verse-by-verse equivalence is asserted.