Chapter 73

महादेव उवाच- ॐरामरक्षास्तोत्रस्य श्रीमहर्षिर्विश्वामित्रऋषिः । श्रीरामो देवता अनुष्टुप्छंदः । विष्णुप्रीत्यर्थे जपे विनियोगः १। अतसीपुष्पसंकाशं पीतवाससमच्युतम् । ध्यात्वा वै पुंडरीकाक्षं श्रीरामं विष्णुमव्ययम् २। पातु वो हृदयं रामः श्रीकंठः कंठमेव च । नाभिं पातु मखत्राता कटिं मे विश्वरक्षकः ३। करौ पातु दाशरथिः पादौ मे विश्वरूपधृक् । चक्षुषी पातु वै देव सीतापतिरनुत्तमः ४। शिखां मे पातु विश्वात्मा कर्णौ मे पातु कामदः । पार्श्वयोस्तु सुरत्राता कालकोटिदुरासदः ५। अनंतः सर्वदा पातु शरीरं विश्वनायकः । जिह्वां मे पातु पापघ्नो लोकशिक्षाप्रवर्त्तकः ६। राघवः पातु मे दंतान्केशान्रक्षतु केशवः । सक्थिनी पातु मे दत्त विजयो नाम विश्वसृक् ७। एतां रामबलोपेतां रक्षां यो वै पुमान्पठेत् । स चिरायुः सुखी विद्वान्लभते दिव्यसंपदम् ८। रक्षां करोति भूतेभ्यः सदा रक्षा तु वैष्णवी । रामेति रामभद्रेति रामचंद्रेति यः स्मरेत् ९। विमुक्तः स नरः पापान्मुक्तिं प्राप्नोति शाश्वतीम् । वसिष्ठेन इदं प्रोक्तं गुरवे विष्णुरूपिणे १०। ततो मे ब्रह्मणः प्राप्तं मयोक्तं नारदं प्रति । नारदेन तु भूर्लोके प्रापितं सुजनेष्विह ११। सुप्त्वावाथ गृहे वापि मार्गे गच्छंत एव वा । ये पठंति नरश्रेष्ठास्ते नराः पुण्यभागिनः १२। इति श्रीपाद्मे महापुराणे पंचपंचाशत्साहस्र्यां संहितायामुत्तरखंडे उमापतिनारदसंवादे रामक्षास्तोत्रंनाम त्रिसप्ततितमोऽध्यायः ७३।

mahādeva uvāca- oṃrāmarakṣāstotrasya śrīmaharṣirviśvāmitraṛṣiḥ | śrīrāmo devatā anuṣṭupchaṃdaḥ | viṣṇuprītyarthe jape viniyogaḥ 1| atasīpuṣpasaṃkāśaṃ pītavāsasamacyutam | dhyātvā vai puṃḍarīkākṣaṃ śrīrāmaṃ viṣṇumavyayam 2| pātu vo hṛdayaṃ rāmaḥ śrīkaṃṭhaḥ kaṃṭhameva ca | nābhiṃ pātu makhatrātā kaṭiṃ me viśvarakṣakaḥ 3| karau pātu dāśarathiḥ pādau me viśvarūpadhṛk | cakṣuṣī pātu vai deva sītāpatiranuttamaḥ 4| śikhāṃ me pātu viśvātmā karṇau me pātu kāmadaḥ | pārśvayostu suratrātā kālakoṭidurāsadaḥ 5| anaṃtaḥ sarvadā pātu śarīraṃ viśvanāyakaḥ | jihvāṃ me pātu pāpaghno lokaśikṣāpravarttakaḥ 6| rāghavaḥ pātu me daṃtānkeśānrakṣatu keśavaḥ | sakthinī pātu me datta vijayo nāma viśvasṛk 7| etāṃ rāmabalopetāṃ rakṣāṃ yo vai pumānpaṭhet | sa cirāyuḥ sukhī vidvānlabhate divyasaṃpadam 8| rakṣāṃ karoti bhūtebhyaḥ sadā rakṣā tu vaiṣṇavī | rāmeti rāmabhadreti rāmacaṃdreti yaḥ smaret 9| vimuktaḥ sa naraḥ pāpānmuktiṃ prāpnoti śāśvatīm | vasiṣṭhena idaṃ proktaṃ gurave viṣṇurūpiṇe 10| tato me brahmaṇaḥ prāptaṃ mayoktaṃ nāradaṃ prati | nāradena tu bhūrloke prāpitaṃ sujaneṣviha 11| suptvāvātha gṛhe vāpi mārge gacchaṃta eva vā | ye paṭhaṃti naraśreṣṭhāste narāḥ puṇyabhāginaḥ 12| iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāpatināradasaṃvāde rāmakṣāstotraṃnāma trisaptatitamo'dhyāyaḥ 73|