Bhūmi-khaṇḍa · Chapter 117
Sourceकुंजल उवाच- नहुषः प्रियया सार्द्धं तया चैव सरंभया । ऐंद्रेणापि स दिव्येन स्यंदनेन वरेण च १। नागाह्वयं पुरं प्राप्तः सर्वशोभासमन्वितम् । दिव्यैर्मंगलकैर्युक्तं भवनैरुपशोभितम् २। हेमतोरणसंयुक्तं पताकाभिरलंकृतम् । नानावादित्रनादैश्च बंदिचारणशोभितम् ३। देवरूपोपमैः पुण्यैः पुरुषैः समलंकृतम् । नारीभिर्दिव्यरूपाभिर्गजाश्वैः स्यंदनैस्तथा ४। नानामंगलशब्दैश्च वेदध्वनिसमाकुलम् । गीतवादित्रशब्दैश्च वीणावेणुस्वनैस्ततः ५। सर्वशोभासमाकीर्णं विवेश स पुरोत्तमम् । वेदमंगलघोषैश्च ब्राह्मणैश्चैव पूजितः ६। ददृशे पितरं वीरो मातरं च सुपुण्यकाम् । हर्षेण महताविष्टः पितुः पादौ ननाम सः ७। अशोकसुंदरी सा तु तयोः पादौ पुनः पुनः । ननाम भक्त्या भावेन उभयोः सा वरानना ८। रंभा च सा ननामाथ प्रीतिं चैवाप्यदर्शयत् । नमस्कृत्वा समाभाष्य स्वगुरुं नृपनंदनः ९। अनामयं च पप्रच्छ मातरं पितरं प्रति । एवमुक्तो महाभागः सानंदपुलकोद्गमः १०। आयुरुवाच- अद्यैव व्याधयो नष्टा दुःखशोकावुभौ गतौ । भवतो दर्शनात्पुत्र सुतुष्ट्या हृष्यते जगत् ११। कृतकृत्योस्मि संजातस्त्वयि जाते महौजसि । स्ववंशोद्धरणं कृत्वा अहमेव समुद्धृतः १२। इंदुमत्युवाच- पर्वणि प्राप्य इंदोस्तु तेजो दृष्ट्वा महोदधिः । वृद्धिं याति महाभाग तथाहं तव दर्शनात् १३। वर्द्धितास्मि सुहृष्टास्मि आनंदेन समाकुला । दर्शनात्ते महाप्राज्ञ धन्या जातास्मि मानद १४। एवं संभाष्य तं पुत्रमालिंग्य तनयोत्तमम् । शिरश्चाघ्राय तस्यापि वत्सं धेनुर्यथा स्वकम् १५। अभिनंद्य सुतं प्राप्तं नहुषं देवरूपिणम् । आशीर्भिश्चार्चयद्देवी पुण्या इंदुमती तदा १६। सूत उवाच- अथासौ मातरं पुण्यां देवीमिंदुमतीं सुतः । कथयामास वृत्तांतं यथाहरणमात्मनः १७। स्वभार्यायास्तथोत्पत्तिं प्राप्तिं चैव महायशाः । हुंडेनापि यथा युद्धं हुंडस्यापि निपातनम् १८। समासेन समस्तं तदाख्यातं स्वयमेव हि । मातापित्रोर्यथा वृत्तं तयोरानंददायकम् १९। मातापितरावाकर्ण्य पुत्रस्य विक्रमोद्यमम् । हर्षेण महताविष्टौ संजातौ पूर्णमानसौ २०। नहुषो धनुरादाय इंद्रस्य स्यंदनेन वै । जिगाय पृथिवीं सर्वां सप्तद्वीपां सपत्तनाम् २१। पित्रे समर्पयामास वसुपूर्णां वसुंधराम् । पितरं हर्षयन्नित्यं दानधर्मैः सुकर्मभिः २२। पितरं याजयामास राजसूयादिभिस्तदा । महायज्ञैश्च दानैश्च व्रतैर्नियमसंयमैः २३। सुदानैर्यशसा पुण्यैर्यज्ञैः पुण्यमहोदयैः । सुसंपूर्णौ कृतौ तौ तु पितरौ चायुसूनुना २४। अथ देवाः समागत्य नागाह्वयं पुरोत्तमम् । अभ्यषिंचन्महात्मानं नहुषं वीरमर्दनम् २५। मुनिभिश्च सुसिद्धैश्च आयुना तेन भूभुजा । अभिषिंच्य स्वराज्ये तं समेतं शिवकन्यया २६। भार्यायुक्तः स्वकायेन आयु राजा महायशाः । दिवं जगाम धर्मात्मा देवैः सिद्धैः सुपूजितः २७। ऐंद्रं पदं परित्यज्य ब्रह्मलोकं गतः पुनः । हरलोकं जगामाथ मुनिभिर्देवपूजितः २८। स्वकर्मभिर्महाराजः पुत्रस्यापि सुतेजसा । हरेर्लोकं गतः पुण्यैर्निवसत्येष भूपतिः २९। पुरुषैः पुण्यकर्माख्यैरीदृशं पुण्यमुत्तमम् । जनितव्यं महाभाग किमन्यैः शोककारकैः ३०। यथा जातः स धर्मात्मा नहुषः पितृतारकः । कुलस्य धर्त्ता सर्वस्य नहुषो ज्ञानपंडितः ३१। एतत्ते सर्वमाख्यातं चरित्रं तस्य भूपतेः । अन्यत्किं ते प्रवक्ष्यामि वद पुत्र कपिंजल ३२। एवंविधं पुण्यमयं पवित्रं चरित्रमेतद्यशसा समेतम् । आयोः सुतस्यापि शृणोति मर्त्यो भोगान्स भुक्त्वैति पदं मुरारेः ३३। इति श्रीपद्मपुराणे भूमिखंडे वेनोपाख्याने गुरुतीर्थमाहात्म्ये च्यवनचरित्रे नहुषाख्याने सप्तदशाधिकशततमोऽध्यायः ११७।
kuṃjala uvāca- nahuṣaḥ priyayā sārddhaṃ tayā caiva saraṃbhayā | aiṃdreṇāpi sa divyena syaṃdanena vareṇa ca 1| nāgāhvayaṃ puraṃ prāptaḥ sarvaśobhāsamanvitam | divyairmaṃgalakairyuktaṃ bhavanairupaśobhitam 2| hematoraṇasaṃyuktaṃ patākābhiralaṃkṛtam | nānāvāditranādaiśca baṃdicāraṇaśobhitam 3| devarūpopamaiḥ puṇyaiḥ puruṣaiḥ samalaṃkṛtam | nārībhirdivyarūpābhirgajāśvaiḥ syaṃdanaistathā 4| nānāmaṃgalaśabdaiśca vedadhvanisamākulam | gītavāditraśabdaiśca vīṇāveṇusvanaistataḥ 5| sarvaśobhāsamākīrṇaṃ viveśa sa purottamam | vedamaṃgalaghoṣaiśca brāhmaṇaiścaiva pūjitaḥ 6| dadṛśe pitaraṃ vīro mātaraṃ ca supuṇyakām | harṣeṇa mahatāviṣṭaḥ pituḥ pādau nanāma saḥ 7| aśokasuṃdarī sā tu tayoḥ pādau punaḥ punaḥ | nanāma bhaktyā bhāvena ubhayoḥ sā varānanā 8| raṃbhā ca sā nanāmātha prītiṃ caivāpyadarśayat | namaskṛtvā samābhāṣya svaguruṃ nṛpanaṃdanaḥ 9| anāmayaṃ ca papraccha mātaraṃ pitaraṃ prati | evamukto mahābhāgaḥ sānaṃdapulakodgamaḥ 10| āyuruvāca- adyaiva vyādhayo naṣṭā duḥkhaśokāvubhau gatau | bhavato darśanātputra sutuṣṭyā hṛṣyate jagat 11| kṛtakṛtyosmi saṃjātastvayi jāte mahaujasi | svavaṃśoddharaṇaṃ kṛtvā ahameva samuddhṛtaḥ 12| iṃdumatyuvāca- parvaṇi prāpya iṃdostu tejo dṛṣṭvā mahodadhiḥ | vṛddhiṃ yāti mahābhāga tathāhaṃ tava darśanāt 13| varddhitāsmi suhṛṣṭāsmi ānaṃdena samākulā | darśanātte mahāprājña dhanyā jātāsmi mānada 14| evaṃ saṃbhāṣya taṃ putramāliṃgya tanayottamam | śiraścāghrāya tasyāpi vatsaṃ dhenuryathā svakam 15| abhinaṃdya sutaṃ prāptaṃ nahuṣaṃ devarūpiṇam | āśīrbhiścārcayaddevī puṇyā iṃdumatī tadā 16| sūta uvāca- athāsau mātaraṃ puṇyāṃ devīmiṃdumatīṃ sutaḥ | kathayāmāsa vṛttāṃtaṃ yathāharaṇamātmanaḥ 17| svabhāryāyāstathotpattiṃ prāptiṃ caiva mahāyaśāḥ | huṃḍenāpi yathā yuddhaṃ huṃḍasyāpi nipātanam 18| samāsena samastaṃ tadākhyātaṃ svayameva hi | mātāpitroryathā vṛttaṃ tayorānaṃdadāyakam 19| mātāpitarāvākarṇya putrasya vikramodyamam | harṣeṇa mahatāviṣṭau saṃjātau pūrṇamānasau 20| nahuṣo dhanurādāya iṃdrasya syaṃdanena vai | jigāya pṛthivīṃ sarvāṃ saptadvīpāṃ sapattanām 21| pitre samarpayāmāsa vasupūrṇāṃ vasuṃdharām | pitaraṃ harṣayannityaṃ dānadharmaiḥ sukarmabhiḥ 22| pitaraṃ yājayāmāsa rājasūyādibhistadā | mahāyajñaiśca dānaiśca vratairniyamasaṃyamaiḥ 23| sudānairyaśasā puṇyairyajñaiḥ puṇyamahodayaiḥ | susaṃpūrṇau kṛtau tau tu pitarau cāyusūnunā 24| atha devāḥ samāgatya nāgāhvayaṃ purottamam | abhyaṣiṃcanmahātmānaṃ nahuṣaṃ vīramardanam 25| munibhiśca susiddhaiśca āyunā tena bhūbhujā | abhiṣiṃcya svarājye taṃ sametaṃ śivakanyayā 26| bhāryāyuktaḥ svakāyena āyu rājā mahāyaśāḥ | divaṃ jagāma dharmātmā devaiḥ siddhaiḥ supūjitaḥ 27| aiṃdraṃ padaṃ parityajya brahmalokaṃ gataḥ punaḥ | haralokaṃ jagāmātha munibhirdevapūjitaḥ 28| svakarmabhirmahārājaḥ putrasyāpi sutejasā | harerlokaṃ gataḥ puṇyairnivasatyeṣa bhūpatiḥ 29| puruṣaiḥ puṇyakarmākhyairīdṛśaṃ puṇyamuttamam | janitavyaṃ mahābhāga kimanyaiḥ śokakārakaiḥ 30| yathā jātaḥ sa dharmātmā nahuṣaḥ pitṛtārakaḥ | kulasya dharttā sarvasya nahuṣo jñānapaṃḍitaḥ 31| etatte sarvamākhyātaṃ caritraṃ tasya bhūpateḥ | anyatkiṃ te pravakṣyāmi vada putra kapiṃjala 32| evaṃvidhaṃ puṇyamayaṃ pavitraṃ caritrametadyaśasā sametam | āyoḥ sutasyāpi śṛṇoti martyo bhogānsa bhuktvaiti padaṃ murāreḥ 33| iti śrīpadmapurāṇe bhūmikhaṃḍe venopākhyāne gurutīrthamāhātmye cyavanacaritre nahuṣākhyāne saptadaśādhikaśatatamo'dhyāyaḥ 117|
English translation
Kuñjala said :
1-10. Nahuṣa with his wife and Rambhā came in that excellent, divine chariot of Indra to the city called Nāga which was endowed with all beauty, divine auspicious objects, which was adorned with mansions, which possessed golden portals, which was beautified with banners, and with the sounds of many musical instruments, and with panegyrists and bards. It was also adorned with auspicious men resembling gods in form, with women of divine forms and, with elephants, horses and chariots. It was full of many auspicious sounds and sounds (of the recitation) of the Vedas , the sounds of music and musical instruments, and of flutes and lutes. He entered the best city full of all (kinds) of beauty. The hero honoured with the auspicious Veda recitation by brāhmaṇas saw his father and very meritorious mother. Being full of great joy, he saluted his father’s feet. That beautiful Aśokasundarī devoutly saluted the feet of both of them again and again. That Rambhā also saluted them and expressed her affection (for them). The prince having saluted his father and having talked to him inquired about the health of his mother and father. With horripilation due to joy the illustrious one (i.e. Āyu) spoke thus:
Āyu said :
11-12. On seeing you, O son, today only all (my) ailments have disappeared; both (my) grief and sorrow have gone (away); the world is delighted with great satisfaction. When you of a great prowess were born, I became blessed. Emancipating your race you have also emancipated me.
Indumatī said :
13-14. O illustrious one, as when the full moon and the new moon (day) arrives, the great ocean, seeing the lustre of the moon increases, similarly I have grown (with joy) on seeing you. I am glorified; I am very glad; I am full of joy. O you, destroyer of the pride (of your enemies), O you very wise one, on seeing you I have become blessed.
15-16. Then that auspicious queen Indumatī , having spoken like this to that son, embraced that excellent son, having smelt him on his head, as a cow smells her calf, and having greeted that son of the form of Nahuṣa, honoured him with blessings.
Sūta said :
17-19. Then that very glorious son narrated to his mother, the auspicious queen Indumatī, the account of his being kidnapped, the birth and acquisition of his wife, his battle with Huṇḍa , and the destruction of Huṇḍa. He himself told in brief all that account giving delight, to his mother and father.
20-24. The mother and father, having heard about the valour and exertion of their son, were full of great joy and their hearts were full (of delight). Taking his bow and (seated) in Indra’s chariot, Nahuṣa conquered the earth spreading over the seven islands along with towns. He presented the earth, full of wealth, to his father. Always giving joy to his father by means of good acts, he made his father perform sacrifices like Rājasūya . Āyu’s son made his parents rich by means of great sacrifices, gifts, vows, restraints and curbs, glory, meritorious and very prosperous sacrifices.
25-30. Then the gods having come to the excellent city called Nāga consecrated the noble Nahuṣa, the destroyer of heroes. The sages possessing great faculties and king Āyu consecrated him on his throne with Śiva ’s daughter. The very glorious and pious king Āyu, united with his wife, went with his own body to heaven, well honoured by gods and siddhas . Leaving the place of Indra he again went to Brahmā ’s world. Then well-honoured by sages and gods he went to Śiva’s heaven. Due to his own deeds and the great lustre of his son the great king went to Viṣṇu ’s heaven, and the king lived (there) due to his religious merit. O illustrious one, men should produce such excellent merit by (performing) meritorious acts like this, not by other acts causing grief.
31-33. I have told you all the account of that king, as to how that pious Nahuṣa became the emancipator of his father, the supporter of the entire family, and very learned. O my son Kapiñjala , tell me what other things I shall tell you. The man who listens to such pious, pure account, endowed with glory, of Āyu’s son, enjoys pleasures and obtains the place of Viṣṇu.
Complete chapter-aligned witnesses. Sanskrit Wikisource page 43154, revision 335686 (2022-04-12T19:07:08Z). English is N. A. Deshpande’s complete translation, controlled against its chapter page at https://www.wisdomlib.org/hinduism/book/the-padma-purana/d/doc365210.html and the ten-volume archival witness. The witnesses are aligned at chapter level; no unsupported verse-by-verse equivalence is asserted.