Chapter 2

सूत उवाच- तदादाय महात्माऽसौ निर्जगाम त्वरान्वितः । पितृभक्त्या तपोभिश्च सत्यार्जवबलेन सः १। धर्ममाकृष्टवांश्चैव धर्मशर्मा ततस्तदा । समाकृष्टस्तु वै धर्मस्तपसा तस्य धीमतः २। धर्मशर्माणमायातं इदं वचनमब्रवीत् । कस्मात्त्वया समाहूतो धर्मशर्मन्समागतः ३। तन्मे कथय कार्यं त्वं तत्करोमि न संशयः । धर्मशर्मोवाच- यद्यस्ति गुरुशुश्रूषा यदि निष्ठाऽचलं तपः ४। तेन सत्येन मे धर्म वेदशर्मा स जीवतु । धर्म उवाच- दमशौचेन सत्येन तपसा तव सुव्रत ५। पितृभक्त्या तव भ्राता वेदशर्मा महाभुजः । पुनरेव महात्मासौ जीवनं च लभिष्यति ६। तपसानेन तुष्टोस्मि पितृभक्त्या महामते । वरं वरय भद्रं ते दुर्लभं धर्मवित्तमैः ७। एवमाकर्णितं तेन सुवाक्यं धर्मशर्मणा । वैवस्वतं महात्मानं समुवाच महायशाः ८। देहि मे त्वचलां भक्तिं पितुः पादार्हणे पुनः । धर्मे रतिं तथा मोक्षं सुप्रसन्नो यदा मम ९। तमुवाच ततो धर्मो मत्प्रसादाद्भविष्यति । एवमुक्ते महावाक्ये वेदशर्मा तदोत्थितः १०। प्रसुप्तवन्महाप्राज्ञो धर्मशर्माणमब्रवीत् । क्व सा देवी गता भ्रातः क्व स तातो भवेदिति ११। समासेन समाख्यातं यथा पित्रा नियोजितः । समाज्ञाय ततो हृष्टो धर्मशर्मा तमब्रवीत् १२। ममाद्यैव महाभाग शिरसा जीवितेन च । संमुखी भव वै भ्रातः कोन्यो मे त्वादृशो भुवि १३। भ्रातरं चैवमाभाष्य उत्सुकः पितरं प्रति । गमनाय मतिं चक्रे भ्रात्रा च धर्मशर्मणा १४। द्वावेतौ तु गतौ तत्र पितरं हृष्टमानसौ । द्वाभ्यां तत्र समास्थाय शिवशर्माणमुत्तमम् १५। धर्मशर्मा तदोवाच पितरं दीप्तिसंयुतम् । ममाद्यैव महाभाग तपसा जीवितेन च १६। वेदशर्मा समानीतस्तं पुत्रं प्रगृहाण भोः । शिवशर्मा ततो हृष्टो भक्तिं विज्ञाय तस्य च १७। न किंचिदब्रवीत्तं तु पुनश्चिंतामुपेयिवान् । पुरतो विनयेनापि वर्तमानं महामतिम् १८। विष्णुशर्माणमाभाषीद्वत्स मे वचनं कुरु । इंद्रलोकं व्रजस्वाद्य तस्मादानय चामृतम् १९। अनया कान्तया सार्द्धं स्थातुमिच्छामि सांप्रतम् । सागराद्यत्समुत्पन्नममृतं व्याधिनाशनम् २०। साधुनेच्छति मामेषा यथैनां तु लभाम्यहम् । तथा कुरुष्व शीघ्रं त्वमन्यथान्यं प्रयास्यति २१। वृद्धं ज्ञात्वावमन्येत इयं बाला सुरूपिणी । अद्य देव्यानया सार्द्धं प्रियया भुवनत्रये २२। निर्दोषो व्याधिनिर्मुक्तो यथा तात भवाम्यहम् । तथा कुरुष्व मे वत्स मद्भक्तोसि यदा भुवि २३। एवमाकर्ण्य तद्वाक्यं पितुस्तस्य महात्मनः । विष्णुशर्मा तदोवाच पितरं दीप्ततेजसम् २४। सर्वमेतत्करिष्यामि भवतः सुखमुत्तमम् । एवमाभाष्य धर्मात्मा विष्णुशर्मा महामतिः २५। पितरं तं नमस्कृत्य पुनः कृत्वा प्रदक्षिणम् । बलेन महता सोपि तपसा नियमेन च २६। अंतरिक्षगतश्चासीद्गच्छमानस्य धीमतः । स महावायुवेगेन ऐंद्रं संप्रतिगच्छति २७। इति श्रीपद्मपुराणे भूमिखंडे शिवशर्मचरिते द्वितीयोऽध्यायः २।

sūta uvāca- tadādāya mahātmā'sau nirjagāma tvarānvitaḥ | pitṛbhaktyā tapobhiśca satyārjavabalena saḥ 1| dharmamākṛṣṭavāṃścaiva dharmaśarmā tatastadā | samākṛṣṭastu vai dharmastapasā tasya dhīmataḥ 2| dharmaśarmāṇamāyātaṃ idaṃ vacanamabravīt | kasmāttvayā samāhūto dharmaśarmansamāgataḥ 3| tanme kathaya kāryaṃ tvaṃ tatkaromi na saṃśayaḥ | dharmaśarmovāca- yadyasti guruśuśrūṣā yadi niṣṭhā'calaṃ tapaḥ 4| tena satyena me dharma vedaśarmā sa jīvatu | dharma uvāca- damaśaucena satyena tapasā tava suvrata 5| pitṛbhaktyā tava bhrātā vedaśarmā mahābhujaḥ | punareva mahātmāsau jīvanaṃ ca labhiṣyati 6| tapasānena tuṣṭosmi pitṛbhaktyā mahāmate | varaṃ varaya bhadraṃ te durlabhaṃ dharmavittamaiḥ 7| evamākarṇitaṃ tena suvākyaṃ dharmaśarmaṇā | vaivasvataṃ mahātmānaṃ samuvāca mahāyaśāḥ 8| dehi me tvacalāṃ bhaktiṃ pituḥ pādārhaṇe punaḥ | dharme ratiṃ tathā mokṣaṃ suprasanno yadā mama 9| tamuvāca tato dharmo matprasādādbhaviṣyati | evamukte mahāvākye vedaśarmā tadotthitaḥ 10| prasuptavanmahāprājño dharmaśarmāṇamabravīt | kva sā devī gatā bhrātaḥ kva sa tāto bhavediti 11| samāsena samākhyātaṃ yathā pitrā niyojitaḥ | samājñāya tato hṛṣṭo dharmaśarmā tamabravīt 12| mamādyaiva mahābhāga śirasā jīvitena ca | saṃmukhī bhava vai bhrātaḥ konyo me tvādṛśo bhuvi 13| bhrātaraṃ caivamābhāṣya utsukaḥ pitaraṃ prati | gamanāya matiṃ cakre bhrātrā ca dharmaśarmaṇā 14| dvāvetau tu gatau tatra pitaraṃ hṛṣṭamānasau | dvābhyāṃ tatra samāsthāya śivaśarmāṇamuttamam 15| dharmaśarmā tadovāca pitaraṃ dīptisaṃyutam | mamādyaiva mahābhāga tapasā jīvitena ca 16| vedaśarmā samānītastaṃ putraṃ pragṛhāṇa bhoḥ | śivaśarmā tato hṛṣṭo bhaktiṃ vijñāya tasya ca 17| na kiṃcidabravīttaṃ tu punaściṃtāmupeyivān | purato vinayenāpi vartamānaṃ mahāmatim 18| viṣṇuśarmāṇamābhāṣīdvatsa me vacanaṃ kuru | iṃdralokaṃ vrajasvādya tasmādānaya cāmṛtam 19| anayā kāntayā sārddhaṃ sthātumicchāmi sāṃpratam | sāgarādyatsamutpannamamṛtaṃ vyādhināśanam 20| sādhunecchati māmeṣā yathaināṃ tu labhāmyaham | tathā kuruṣva śīghraṃ tvamanyathānyaṃ prayāsyati 21| vṛddhaṃ jñātvāvamanyeta iyaṃ bālā surūpiṇī | adya devyānayā sārddhaṃ priyayā bhuvanatraye 22| nirdoṣo vyādhinirmukto yathā tāta bhavāmyaham | tathā kuruṣva me vatsa madbhaktosi yadā bhuvi 23| evamākarṇya tadvākyaṃ pitustasya mahātmanaḥ | viṣṇuśarmā tadovāca pitaraṃ dīptatejasam 24| sarvametatkariṣyāmi bhavataḥ sukhamuttamam | evamābhāṣya dharmātmā viṣṇuśarmā mahāmatiḥ 25| pitaraṃ taṃ namaskṛtya punaḥ kṛtvā pradakṣiṇam | balena mahatā sopi tapasā niyamena ca 26| aṃtarikṣagataścāsīdgacchamānasya dhīmataḥ | sa mahāvāyuvegena aiṃdraṃ saṃpratigacchati 27| iti śrīpadmapurāṇe bhūmikhaṃḍe śivaśarmacarite dvitīyo'dhyāyaḥ 2|