Chapter 111

कुंजल उवाच- निर्गच्छमाने समराय वीरे नहुषे हि तस्मिन्सुरराज तुल्ये । सकौतुका मंगलगीतयुक्ताः स्त्रियस्तु सर्वाः परिजग्मुरत्र १। देवतानां वरा नार्यो रंभाद्यप्सरसस्तथा । किन्नर्यः कौतुकोत्सुक्यो जगुः स्वरेण सत्तम २। गंधर्वाणां तथा नार्यो रूपालंकारसंयुताः । कौतुकाय गतास्तत्र यत्र राजा स तिष्ठति ३। पुरं महोदयं नाम हुंडस्यापि दुरात्मनः । नंदनोपवनैर्दिव्यैः सर्वत्र समलंकृतम् ४। सप्तकक्षान्वितैर्गेहैः कलशैरुपशोभितः । सपताकैर्महादंडैः शोभमानं पुरोत्तमम् ५। कैलासशिखराकारैः सोन्नतैर्दिवमास्थितैः । सर्वश्रियान्वितैर्दिव्यैर्भ्राजमानं पुरोत्तमम् ६। वनैश्चोपवनैर्दिव्यैस्तडागैः सागरोपमैः । जलपूर्णैः सुशोभैस्तु पद्मै रक्तोत्पलान्वितैः ७। प्राकारैश्च महारत्नैरट्टालकशतैरपि । परिखाभिः सुपूर्णाभिर्जलैः स्वच्छैः प्रशोभितम् ८। अन्यैश्चैव महारत्नैर्गजाश्वैश्च विराजितम् । सुनारीभिः समाकीर्णं पुरुषैश्च महाप्रभैः ९। नानाप्रभावैर्दिव्यैश्च शोभमानं महोदयम् । राजश्रेष्ठो महावीरो नहुषो ददृशे पुरम् १०। पुरप्रांते वनं दिव्यं दिव्यवृक्षैरलंकृतम् । तद्विवेश महावीरो नंदनं हि यथाऽमरः ११। रथेन सह धर्मात्मा तेन मातलिना सह । प्रविष्टः स तु राजेंद्रो वनमध्ये सरित्तटे १२। तत्र ता रूपसंयुक्ता दिव्या नार्यः समागताः । गंधर्वा गीततत्त्वज्ञा जगुर्गीतैर्नृपोत्तमम् १३। सूताश्च मागधाः सर्वे तं स्तुवंति नृपोत्तमम् । राजानमायुपुत्रं तं भ्राजमानं यथा रविम् १४। शुश्राव गीतं मधुरं नहुषः किन्नरेरितम् १५। इति श्रीपद्मपुराणे भूमिखंडे वेनोपाख्याने गुरुतीर्थमाहात्म्ये च्यवनचरित्रे नहुषाख्याने एकादशाधिकशततमोऽध्यायः १११।

kuṃjala uvāca- nirgacchamāne samarāya vīre nahuṣe hi tasminsurarāja tulye | sakautukā maṃgalagītayuktāḥ striyastu sarvāḥ parijagmuratra 1| devatānāṃ varā nāryo raṃbhādyapsarasastathā | kinnaryaḥ kautukotsukyo jaguḥ svareṇa sattama 2| gaṃdharvāṇāṃ tathā nāryo rūpālaṃkārasaṃyutāḥ | kautukāya gatāstatra yatra rājā sa tiṣṭhati 3| puraṃ mahodayaṃ nāma huṃḍasyāpi durātmanaḥ | naṃdanopavanairdivyaiḥ sarvatra samalaṃkṛtam 4| saptakakṣānvitairgehaiḥ kalaśairupaśobhitaḥ | sapatākairmahādaṃḍaiḥ śobhamānaṃ purottamam 5| kailāsaśikharākāraiḥ sonnatairdivamāsthitaiḥ | sarvaśriyānvitairdivyairbhrājamānaṃ purottamam 6| vanaiścopavanairdivyaistaḍāgaiḥ sāgaropamaiḥ | jalapūrṇaiḥ suśobhaistu padmai raktotpalānvitaiḥ 7| prākāraiśca mahāratnairaṭṭālakaśatairapi | parikhābhiḥ supūrṇābhirjalaiḥ svacchaiḥ praśobhitam 8| anyaiścaiva mahāratnairgajāśvaiśca virājitam | sunārībhiḥ samākīrṇaṃ puruṣaiśca mahāprabhaiḥ 9| nānāprabhāvairdivyaiśca śobhamānaṃ mahodayam | rājaśreṣṭho mahāvīro nahuṣo dadṛśe puram 10| puraprāṃte vanaṃ divyaṃ divyavṛkṣairalaṃkṛtam | tadviveśa mahāvīro naṃdanaṃ hi yathā'maraḥ 11| rathena saha dharmātmā tena mātalinā saha | praviṣṭaḥ sa tu rājeṃdro vanamadhye sarittaṭe 12| tatra tā rūpasaṃyuktā divyā nāryaḥ samāgatāḥ | gaṃdharvā gītatattvajñā jagurgītairnṛpottamam 13| sūtāśca māgadhāḥ sarve taṃ stuvaṃti nṛpottamam | rājānamāyuputraṃ taṃ bhrājamānaṃ yathā ravim 14| śuśrāva gītaṃ madhuraṃ nahuṣaḥ kinnareritam 15| iti śrīpadmapurāṇe bhūmikhaṃḍe venopākhyāne gurutīrthamāhātmye cyavanacaritre nahuṣākhyāne ekādaśādhikaśatatamo'dhyāyaḥ 111|