Chapter 158

महादेव उवाच। पिप्पलादात्ततस्तीर्थे पिचुमंदार्कमुत्तमम् । तीर्थं साभ्रमती तीरे व्याधिदौर्गंध्यनाशनम् १। पुरा कोलाहले युद्धे दानवैर्निर्जिताः सुराः । वृक्षेषु विविशुस्तत्र सूक्ष्माः प्राणपरीप्सया २। तत्र बिल्वे स्थितः शंभुरश्वत्थे हरिरव्ययः । शिरीषेऽभूत्सहस्राक्षो निंबे देवः प्रभाकरः ३। एवमादि यथायोग्यं वृक्षेषु विबुधास्तथा । यावत्कोलाहलो दैत्यो विष्णुना प्रभविष्णुना ४। हतो महाहवे तावत्स्थितास्ते वृक्षमाश्रिताः । येनयेन हि यो वृक्षो विबुधेन समाश्रितः ५। स तु तन्मयतां यातस्तस्मात्तं न विनाशयेत् । इति सूर्य्यस्य विश्रामात्पिचुमंदार्कमुत्तमम् ६। तीर्थंरोगहरं स्नानात्साभ्रमत्यास्तटेऽभवत् । अत्र गत्वा विशेषेण तं रविं यदि पूजयेत् ७। पूजयित्वा सुरश्रेष्ठे लभते वांछितं फलम् । अत्र द्वादशनामानि गत्वा ये वै पठंति च ८। ते नराः पुण्यकर्माणो यावज्जीवं न संशयः । आदित्यं भास्करं भानुं रविं विश्वप्रकाशकम् ९। तीक्ष्णांशुं चैव मार्तंडं सूर्यं चैव प्रभाकरम् । विभावसुं सहस्राक्षं तथा पूषणमेव च १०। एवं द्वादशनामानि यः पठेत्प्रयतः सुधीः । धनं वै पुत्रपौत्रांश्च लभते नगनंदिनि ११। एकैकं नाम आश्रित्य योऽर्चयेत नरो भुवि । सप्तजन्मभवेद्विप्रो धनाढ्यो वेदपरागः १२। क्षत्रियो लभते राज्यं वैश्यो धनमवाप्नुयात् । शूद्रो वै लभते भक्तिं तस्मात्सूक्तं परं जपेत् १३। निंबार्कतः परं तीर्थं न भूतं न भविष्यति । अत्र स्नात्वा च पीत्वा च मुक्तिभागी भवेद्ध्रुवम् १४। इति श्रीपाद्मे महापुराणे पंचपंचाशत्साहस्र्यां संहितायां उत्तरखंडे उमामहेश्वरसंवादे निंबार्कदेवतीर्थंनामाष्टपंचाशदधिक शततमोऽध्यायः १५८।

mahādeva uvāca| pippalādāttatastīrthe picumaṃdārkamuttamam | tīrthaṃ sābhramatī tīre vyādhidaurgaṃdhyanāśanam 1| purā kolāhale yuddhe dānavairnirjitāḥ surāḥ | vṛkṣeṣu viviśustatra sūkṣmāḥ prāṇaparīpsayā 2| tatra bilve sthitaḥ śaṃbhuraśvatthe hariravyayaḥ | śirīṣe'bhūtsahasrākṣo niṃbe devaḥ prabhākaraḥ 3| evamādi yathāyogyaṃ vṛkṣeṣu vibudhāstathā | yāvatkolāhalo daityo viṣṇunā prabhaviṣṇunā 4| hato mahāhave tāvatsthitāste vṛkṣamāśritāḥ | yenayena hi yo vṛkṣo vibudhena samāśritaḥ 5| sa tu tanmayatāṃ yātastasmāttaṃ na vināśayet | iti sūryyasya viśrāmātpicumaṃdārkamuttamam 6| tīrthaṃrogaharaṃ snānātsābhramatyāstaṭe'bhavat | atra gatvā viśeṣeṇa taṃ raviṃ yadi pūjayet 7| pūjayitvā suraśreṣṭhe labhate vāṃchitaṃ phalam | atra dvādaśanāmāni gatvā ye vai paṭhaṃti ca 8| te narāḥ puṇyakarmāṇo yāvajjīvaṃ na saṃśayaḥ | ādityaṃ bhāskaraṃ bhānuṃ raviṃ viśvaprakāśakam 9| tīkṣṇāṃśuṃ caiva mārtaṃḍaṃ sūryaṃ caiva prabhākaram | vibhāvasuṃ sahasrākṣaṃ tathā pūṣaṇameva ca 10| evaṃ dvādaśanāmāni yaḥ paṭhetprayataḥ sudhīḥ | dhanaṃ vai putrapautrāṃśca labhate naganaṃdini 11| ekaikaṃ nāma āśritya yo'rcayeta naro bhuvi | saptajanmabhavedvipro dhanāḍhyo vedaparāgaḥ 12| kṣatriyo labhate rājyaṃ vaiśyo dhanamavāpnuyāt | śūdro vai labhate bhaktiṃ tasmātsūktaṃ paraṃ japet 13| niṃbārkataḥ paraṃ tīrthaṃ na bhūtaṃ na bhaviṣyati | atra snātvā ca pītvā ca muktibhāgī bhaveddhruvam 14| iti śrīpādme mahāpurāṇe paṃcapaṃcāśatsāhasryāṃ saṃhitāyāṃ uttarakhaṃḍe umāmaheśvarasaṃvāde niṃbārkadevatīrthaṃnāmāṣṭapaṃcāśadadhika śatatamo'dhyāyaḥ 158|