Chapter 100

विष्णुरुवाच- नर्मदायास्तटे रम्ये वटे तिष्ठति वै पिता । विज्वलोऽपि समायातः पितरं प्रणिपत्य सः १। वासुदेवाभिधानस्य स्तोत्रस्यापि महामतिः । समाचष्टे स धर्मात्मा महिमानं पितुः पुरः २। यथा विष्णुः समागत्य ददौ तस्मै वरं शुभम् । तत्सर्वं कथयामास सुप्रसन्नेन चेतसा ३। कुंजलोपि च वृत्तांतं समाकर्ण्य स भूपतेः । हर्षेण महताविष्टः पुत्रमालिंग्य विज्वलम् ४। आह पुण्यं कृतं वत्स त्वया राज्ञे महात्मने । उपकारं महापुण्यं वासुदेवस्य कीर्तनात् ५। एवमाभाष्य तं पुत्रमाशीर्भिरभिनंद्य च । पुत्रं देवसमोपेतं स्तुत्वा चैव पुनः पुनः ६। स्थितः सरित्तटे रम्ये च्यवनस्योपपश्यतः । एतत्ते सर्वमाख्यातं तेषां वृत्तं महात्मनाम् ७। वैष्णवानां महाराज अन्यत्किं ते वदाम्यहम् । वेन उवाच- अमृतं शंखपात्रेण पानार्थं मम चार्पितम् ८। तस्मात्कस्य न च श्रद्धा पातुं मर्त्यस्य भूतले । उत्तमं वैष्णवं ज्ञानं पानानामिह सर्वदा ९। त्वयैवं कथ्यमानस्य पाने तृप्तिर्न जायते । श्रोतुं हि देवदेवेश मम श्रद्धा विवर्द्धते १०। कथयस्व प्रसादान्मे कुंजलस्यापि चेष्टितम् । महात्मना किमुक्तं च चतुर्थं तनयं प्रति ११। तत्त्वं सुविस्तरादेव कृपया कथयस्व मे । श्रीभगवानुवाच- श्रूयतामभिधास्यामि चरित्रं कुंजलस्य च १२। बहुश्रेयः समायुक्तं चरित्रं च्यवनस्य च । इदं पुण्यं नरश्रेष्ठ आख्यानं पापनाशनम् १३। यः शृणोति नरो भक्त्या गोसहस्रफलं लभेत् १४। इति श्रीपद्मपुराणे भूमिखंडे वेनोपाख्याने गुरुतीर्थमाहात्म्ये च्यवनचरित्रे शततमोऽध्यायः १००।

viṣṇuruvāca- narmadāyāstaṭe ramye vaṭe tiṣṭhati vai pitā | vijvalo'pi samāyātaḥ pitaraṃ praṇipatya saḥ 1| vāsudevābhidhānasya stotrasyāpi mahāmatiḥ | samācaṣṭe sa dharmātmā mahimānaṃ pituḥ puraḥ 2| yathā viṣṇuḥ samāgatya dadau tasmai varaṃ śubham | tatsarvaṃ kathayāmāsa suprasannena cetasā 3| kuṃjalopi ca vṛttāṃtaṃ samākarṇya sa bhūpateḥ | harṣeṇa mahatāviṣṭaḥ putramāliṃgya vijvalam 4| āha puṇyaṃ kṛtaṃ vatsa tvayā rājñe mahātmane | upakāraṃ mahāpuṇyaṃ vāsudevasya kīrtanāt 5| evamābhāṣya taṃ putramāśīrbhirabhinaṃdya ca | putraṃ devasamopetaṃ stutvā caiva punaḥ punaḥ 6| sthitaḥ sarittaṭe ramye cyavanasyopapaśyataḥ | etatte sarvamākhyātaṃ teṣāṃ vṛttaṃ mahātmanām 7| vaiṣṇavānāṃ mahārāja anyatkiṃ te vadāmyaham | vena uvāca- amṛtaṃ śaṃkhapātreṇa pānārthaṃ mama cārpitam 8| tasmātkasya na ca śraddhā pātuṃ martyasya bhūtale | uttamaṃ vaiṣṇavaṃ jñānaṃ pānānāmiha sarvadā 9| tvayaivaṃ kathyamānasya pāne tṛptirna jāyate | śrotuṃ hi devadeveśa mama śraddhā vivarddhate 10| kathayasva prasādānme kuṃjalasyāpi ceṣṭitam | mahātmanā kimuktaṃ ca caturthaṃ tanayaṃ prati 11| tattvaṃ suvistarādeva kṛpayā kathayasva me | śrībhagavānuvāca- śrūyatāmabhidhāsyāmi caritraṃ kuṃjalasya ca 12| bahuśreyaḥ samāyuktaṃ caritraṃ cyavanasya ca | idaṃ puṇyaṃ naraśreṣṭha ākhyānaṃ pāpanāśanam 13| yaḥ śṛṇoti naro bhaktyā gosahasraphalaṃ labhet 14| iti śrīpadmapurāṇe bhūmikhaṃḍe venopākhyāne gurutīrthamāhātmye cyavanacaritre śatatamo'dhyāyaḥ 100|