Chapter 65

ययातिरुवाच- धर्मस्य रक्षकः कायो मातले चात्मना सह । नाकमेष न प्रयाति तन्मे त्वं कारणं वद १। मातलिरुवाच- पंचानामपि भूतानां संगतिर्नास्ति भूपते । आत्मना सह वर्तंते संगत्या नैव पंच ते २। सर्वेषां तत्र संघातः कायग्रामे प्रवर्तते । जरया पीडिताः सर्वेः स्वंस्वं स्थानं प्रयांति ते ३। यथा रसाधिका पृथ्वी महाराज प्रकल्पिता । रसैः क्लिन्ना ततः पृथ्वी मृदुत्वं याति भूपते ४। भिद्यते पिपीलिकाभिर्मूषिकाभिस्तथैव च । छिद्राण्येव प्रजायंते वल्मीकाश्च महोदराः ५। तद्वत्काये प्रजायंते गंडमाला विचार्चिकाः । कृमिभिर्भिद्यमानश्च काय एष नरोत्तम ६। गुल्मास्तत्र प्रजायंते सद्यः पीडाकरास्तदा । एभिर्दोषैः समायुक्तः कायोयं नहुषात्मज । कथं प्राणसमायोगाद्दिवं याति नरेश्वर ७। काये पार्थिवभागोऽयं समानार्थं प्रतिष्ठितः । न कायः स्वर्गमायाति यथा पृथ्वी तथास्थितः ८। एतत्ते सर्वमाख्यातं दोषौघैः पार्थिवस्य यः ९। इति श्रीपद्मपुराणे भूमिखंडे वेनोपाख्याने मातापितृतीर्थ-। माहात्म्ये पंचषष्टितमोऽध्यायः ६५ ।

yayātiruvāca- dharmasya rakṣakaḥ kāyo mātale cātmanā saha | nākameṣa na prayāti tanme tvaṃ kāraṇaṃ vada 1| mātaliruvāca- paṃcānāmapi bhūtānāṃ saṃgatirnāsti bhūpate | ātmanā saha vartaṃte saṃgatyā naiva paṃca te 2| sarveṣāṃ tatra saṃghātaḥ kāyagrāme pravartate | jarayā pīḍitāḥ sarveḥ svaṃsvaṃ sthānaṃ prayāṃti te 3| yathā rasādhikā pṛthvī mahārāja prakalpitā | rasaiḥ klinnā tataḥ pṛthvī mṛdutvaṃ yāti bhūpate 4| bhidyate pipīlikābhirmūṣikābhistathaiva ca | chidrāṇyeva prajāyaṃte valmīkāśca mahodarāḥ 5| tadvatkāye prajāyaṃte gaṃḍamālā vicārcikāḥ | kṛmibhirbhidyamānaśca kāya eṣa narottama 6| gulmāstatra prajāyaṃte sadyaḥ pīḍākarāstadā | ebhirdoṣaiḥ samāyuktaḥ kāyoyaṃ nahuṣātmaja | kathaṃ prāṇasamāyogāddivaṃ yāti nareśvara 7| kāye pārthivabhāgo'yaṃ samānārthaṃ pratiṣṭhitaḥ | na kāyaḥ svargamāyāti yathā pṛthvī tathāsthitaḥ 8| etatte sarvamākhyātaṃ doṣaughaiḥ pārthivasya yaḥ 9| iti śrīpadmapurāṇe bhūmikhaṃḍe venopākhyāne mātāpitṛtīrtha-| māhātmye paṃcaṣaṣṭitamo'dhyāyaḥ 65 |