Chapter 157

महादेव उवाच। दुग्धेश्वरसमीपे तु तीर्थं चातीवपावनम् । रम्यं तत्पिप्पलादस्य नाम्ना वै प्रथितं भुवि १। यत्र कृत्वा तपः पूर्वं मातुर्वचनतो मुनिः । उत्पादयामास कृत्यां वडवानलसम्मिताम् २। पितुरानृण्यमन्विच्छन्दधीचस्य महात्मनः । तत्र स्नात्वा च पीत्वा च ब्रह्महत्यां व्यपोहति ३। साभ्रमत्यास्तटे गुप्तं पिप्पलादं सुरेश्वरम् । तत्र स्नात्वा तु भो देवि मुक्तिभागी भवेन्नरः ४। आरोपणं पिप्पलानां कर्त्तव्यं विधिपूर्वकम् । कृते सति महादेवि मुच्यते कर्मबंधनात् ५। पार्वत्युउवाच। किमर्थं सा तु कृत्या वै उत्पन्ना तां निबोधय । तया वै कृत्यया पूर्वं किं कृतं वद मे प्रभो ६। येन पुत्रेण सा नीता पितुरानृण्यकारणात् ७। महादेव उवाच। दाधीचो ऋषिवर्योऽसौ ह्यागतस्तपकारणात् । अत्र तेन महत्तप्तमृषिणा परमात्मना ८। तत्र कोलासुरो नाम विघ्नार्थं वै समागतः । तेन विघ्नं बहुतरं कृतं वै नात्र संशयः ९। तद्दृष्टं तु सुपुत्रेण कहोडेन च धीमता । कृत्या ह्युत्पादिता तत्र हननार्थं सुरेश्वरि १०। तया वै निहतो दैत्यः कोलो नाम महासुरः । तस्मात्तीर्थं महज्जातं कलौ गुप्तं तु पार्वति ११।

mahādeva uvāca| dugdheśvarasamīpe tu tīrthaṃ cātīvapāvanam | ramyaṃ tatpippalādasya nāmnā vai prathitaṃ bhuvi 1| yatra kṛtvā tapaḥ pūrvaṃ māturvacanato muniḥ | utpādayāmāsa kṛtyāṃ vaḍavānalasammitām 2| piturānṛṇyamanvicchandadhīcasya mahātmanaḥ | tatra snātvā ca pītvā ca brahmahatyāṃ vyapohati 3| sābhramatyāstaṭe guptaṃ pippalādaṃ sureśvaram | tatra snātvā tu bho devi muktibhāgī bhavennaraḥ 4| āropaṇaṃ pippalānāṃ karttavyaṃ vidhipūrvakam | kṛte sati mahādevi mucyate karmabaṃdhanāt 5| pārvatyuuvāca| kimarthaṃ sā tu kṛtyā vai utpannā tāṃ nibodhaya | tayā vai kṛtyayā pūrvaṃ kiṃ kṛtaṃ vada me prabho 6| yena putreṇa sā nītā piturānṛṇyakāraṇāt 7| mahādeva uvāca| dādhīco ṛṣivaryo'sau hyāgatastapakāraṇāt | atra tena mahattaptamṛṣiṇā paramātmanā 8| tatra kolāsuro nāma vighnārthaṃ vai samāgataḥ | tena vighnaṃ bahutaraṃ kṛtaṃ vai nātra saṃśayaḥ 9| taddṛṣṭaṃ tu suputreṇa kahoḍena ca dhīmatā | kṛtyā hyutpāditā tatra hananārthaṃ sureśvari 10| tayā vai nihato daityaḥ kolo nāma mahāsuraḥ | tasmāttīrthaṃ mahajjātaṃ kalau guptaṃ tu pārvati 11|