Chapter 167

अत्र तीर्थात्परं तीर्थं चंडेश इति विश्रुतम् । यत्र चंडेश्वरो देवो नित्यं तिष्ठति भूतिदः १। यं दृष्ट्वा मुच्यते पापादज्ञानादथवा कृतात् । सर्वाभिर्देवताभिश्च मिलित्वा नगरं कृतम् । चंडेश इति विख्यातं नाम्ना चैव महेश्वरि २। इति चंडेशतीर्थम् । अत्र तीर्थात्परं तीर्थं गाणपत्यं ततो भुवि । साभ्रमत्यां समीपे तु विख्यातं देवि निर्मितम् ३। तत्र स्नात्वा नरो देवि मुच्यते नात्र संशयः । मन्ये साभ्रमती तीरे जनानां हितकाम्यया ४। पृथिव्यां यानि तीर्थानि सागरांतानि यानि च । तानि सर्वाणि संत्यज्य तीर्थे वै परमाद्भुते ५। श्राद्धं करोति यस्तत्र रुद्रभक्त्या जितेंद्रियः । फलं प्राप्नोति शुद्धात्मा सर्वयज्ञसमुद्भवम् ६। पितॄनुदिश्य यत्किंचिद्गणतीर्थे प्रदीयते । तत्सर्वं जायते क्षिप्रं गणनाथप्रसादतः ७। तस्मिंस्तीर्थे नरः स्नात्वा वृषं विप्राय दापयेत् । सर्वलोकानतिक्रम्य स गच्छेत्परमां गतिम् ८। इति श्रीपाद्मे महापुराणे पंचपंचाशत्साहस्र्यां संहितायामुत्तरखंडे गणतीर्थंनाम सप्तषष्ट्यधिकशततमोऽध्यायः १६७।

atra tīrthātparaṃ tīrthaṃ caṃḍeśa iti viśrutam | yatra caṃḍeśvaro devo nityaṃ tiṣṭhati bhūtidaḥ 1| yaṃ dṛṣṭvā mucyate pāpādajñānādathavā kṛtāt | sarvābhirdevatābhiśca militvā nagaraṃ kṛtam | caṃḍeśa iti vikhyātaṃ nāmnā caiva maheśvari 2| iti caṃḍeśatīrtham | atra tīrthātparaṃ tīrthaṃ gāṇapatyaṃ tato bhuvi | sābhramatyāṃ samīpe tu vikhyātaṃ devi nirmitam 3| tatra snātvā naro devi mucyate nātra saṃśayaḥ | manye sābhramatī tīre janānāṃ hitakāmyayā 4| pṛthivyāṃ yāni tīrthāni sāgarāṃtāni yāni ca | tāni sarvāṇi saṃtyajya tīrthe vai paramādbhute 5| śrāddhaṃ karoti yastatra rudrabhaktyā jiteṃdriyaḥ | phalaṃ prāpnoti śuddhātmā sarvayajñasamudbhavam 6| pitṝnudiśya yatkiṃcidgaṇatīrthe pradīyate | tatsarvaṃ jāyate kṣipraṃ gaṇanāthaprasādataḥ 7| tasmiṃstīrthe naraḥ snātvā vṛṣaṃ viprāya dāpayet | sarvalokānatikramya sa gacchetparamāṃ gatim 8| iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe gaṇatīrthaṃnāma saptaṣaṣṭyadhikaśatatamo'dhyāyaḥ 167|