Chapter 36

श्रीनारद उवाच - कालनाभेऽथ पतिते महान् कोलाहलोऽभवत् ॥ उष्ट्रारूढो महानाभो दैत्यः प्राप्तो रणाङ्गणे ॥१॥ मुखादग्निं समसृजन्मायावी दैत्यपुंगवः ॥ तेनाग्निना भूमिवृक्षा जज्वलुश्च दिशो दश ॥२॥ वीराणां कंचुकोष्णीष-कटिबन्धाङ्गरक्षकाः ॥ प्रजज्वलुर्महाराज मुञ्जपुष्पप्रतूलवत् ॥३॥ समुद्रपट्टनभवैः पीतारुणसितासितैः ॥ हरितैश्चित्रवर्णैश्च सूक्ष्मैः काश्मीरजैरपि ॥४॥ हेमरत्‍नखचद्‌भिश्च कम्बलैः सहिता गजाः ॥ प्रजज्वलुर्मृधे राजन् वृक्षैः शैला इवाग्निना ॥५॥ शिखा रत्‍नैश्चामरैश्च हारैर्हैमैः परिच्छदैः ॥ उत्पतन्तो हया युद्धे मृगा इव दवाग्निना ॥६॥ सैन्यं भयातुरं दृष्ट्वा दीप्तिमान् कृष्णनन्दनः ॥ मायावह्निप्रशांत्यर्थं पर्जन्यास्त्रं समादधे ॥७॥ बाणाद्विनिर्गता मेघाः सांवर्तकगणा इव ॥ ववृषुर्जलधाराभिर्नदन्तो भैरवं रवम् ॥८॥ आसारेण महाराज प्रावृट्‍कालोऽभवत्क्षितौ ॥ पुंस्कोकिलाः कोकिलाश्च मयूराः सारसादयः ॥९॥ मंडूकाः प्रजगुर्गीर्भिरिद्रगोपाश्च रेजिरे ॥ इन्द्रचापेन दामिन्या मैथिलेन्द्र बभौ नभः ॥१०॥ इत्थं शांतिं गते वह्नौ महानाभो महासुरः ॥ प्राहीणोन्निशितं शूलं रुषा दीप्तिमते त्वरम् ॥११॥ शूलं सर्पमिवायांतं दीप्तिमान् रोहिणीसुतः॥ चिच्छेद त्वसिना युद्धे फणिनं गरुडो यथा ॥१२॥ दशंतं चोद्‌भटं चोष्ट्रं महानाभस्य वाहनम् ॥ दीप्तिमान् स्वेन खड्गेन संजघान रणाङ्गणे ॥१३॥ द्विधाभूतः पपातोर्व्यां खड्गसंछिन्नकंधरः ॥ जगाम पञ्चतामुष्ट्रो महानाभस्य पश्यतः ॥१४॥ महानाभो महादैत्यो गजमारुह्य वेगतः ॥ शूलहस्तः पुनः प्रागान्नादयन्व्योममण्डलम् ॥१५॥ दीप्तिमानश्वमारुह्य सैन्धवं चंचलासितम् ॥ तडित्प्रभेण खड्गेन बभौ श्रीकृष्णनंदनः ॥१६॥ तुरंगं पार्ष्णिघातेन प्रोत्पतन् धरणीतलात् ॥ आरूढो गजकुंभांतं गिरिशृङ्गं यथा हरिः ॥१७॥ खड्गेन शितधारेण दीप्तिमान्कृष्णनन्दनः ॥ महानाभस्य सहसा शिरः कायादपाहरत् ॥१८॥ बाणवर्षं प्रकुर्वंतीं सेनां तस्य दुरात्मनः ॥ जघान दीप्तिमान् सिंहो गजयूथं यथासिना ॥१९॥ केचित्खड्गेनाभिहताः शेषा दैत्याः पलायिताः ॥ देवा दीप्तिमतो मूर्ध्निं पुष्पवर्षं प्रचक्रिरे ॥२०॥ जगुः किन्नरगंधर्वा ननृतुश्चाप्सरोगणाः ॥ ऋषयो मुनयो देवास्तुष्टुवुर्श्रीहरेः सुतम् ॥२१॥

śrīnārada uvāca - kālanābhe'tha patite mahān kolāhalo'bhavat || uṣṭrārūḍho mahānābho daityaḥ prāpto raṇāṅgaṇe ||1|| mukhādagniṃ samasṛjanmāyāvī daityapuṃgavaḥ || tenāgninā bhūmivṛkṣā jajvaluśca diśo daśa ||2|| vīrāṇāṃ kaṃcukoṣṇīṣa-kaṭibandhāṅgarakṣakāḥ || prajajvalurmahārāja muñjapuṣpapratūlavat ||3|| samudrapaṭṭanabhavaiḥ pītāruṇasitāsitaiḥ || haritaiścitravarṇaiśca sūkṣmaiḥ kāśmīrajairapi ||4|| hemarat‍nakhacad‌bhiśca kambalaiḥ sahitā gajāḥ || prajajvalurmṛdhe rājan vṛkṣaiḥ śailā ivāgninā ||5|| śikhā rat‍naiścāmaraiśca hārairhaimaiḥ paricchadaiḥ || utpatanto hayā yuddhe mṛgā iva davāgninā ||6|| sainyaṃ bhayāturaṃ dṛṣṭvā dīptimān kṛṣṇanandanaḥ || māyāvahnipraśāṃtyarthaṃ parjanyāstraṃ samādadhe ||7|| bāṇādvinirgatā meghāḥ sāṃvartakagaṇā iva || vavṛṣurjaladhārābhirnadanto bhairavaṃ ravam ||8|| āsāreṇa mahārāja prāvṛṭ‍kālo'bhavatkṣitau || puṃskokilāḥ kokilāśca mayūrāḥ sārasādayaḥ ||9|| maṃḍūkāḥ prajagurgīrbhiridragopāśca rejire || indracāpena dāminyā maithilendra babhau nabhaḥ ||10|| itthaṃ śāṃtiṃ gate vahnau mahānābho mahāsuraḥ || prāhīṇonniśitaṃ śūlaṃ ruṣā dīptimate tvaram ||11|| śūlaṃ sarpamivāyāṃtaṃ dīptimān rohiṇīsutaḥ|| ciccheda tvasinā yuddhe phaṇinaṃ garuḍo yathā ||12|| daśaṃtaṃ cod‌bhaṭaṃ coṣṭraṃ mahānābhasya vāhanam || dīptimān svena khaḍgena saṃjaghāna raṇāṅgaṇe ||13|| dvidhābhūtaḥ papātorvyāṃ khaḍgasaṃchinnakaṃdharaḥ || jagāma pañcatāmuṣṭro mahānābhasya paśyataḥ ||14|| mahānābho mahādaityo gajamāruhya vegataḥ || śūlahastaḥ punaḥ prāgānnādayanvyomamaṇḍalam ||15|| dīptimānaśvamāruhya saindhavaṃ caṃcalāsitam || taḍitprabheṇa khaḍgena babhau śrīkṛṣṇanaṃdanaḥ ||16|| turaṃgaṃ pārṣṇighātena protpatan dharaṇītalāt || ārūḍho gajakuṃbhāṃtaṃ giriśṛṅgaṃ yathā hariḥ ||17|| khaḍgena śitadhāreṇa dīptimānkṛṣṇanandanaḥ || mahānābhasya sahasā śiraḥ kāyādapāharat ||18|| bāṇavarṣaṃ prakurvaṃtīṃ senāṃ tasya durātmanaḥ || jaghāna dīptimān siṃho gajayūthaṃ yathāsinā ||19|| kecitkhaḍgenābhihatāḥ śeṣā daityāḥ palāyitāḥ || devā dīptimato mūrdhniṃ puṣpavarṣaṃ pracakrire ||20|| jaguḥ kinnaragaṃdharvā nanṛtuścāpsarogaṇāḥ || ṛṣayo munayo devāstuṣṭuvurśrīhareḥ sutam ||21||