Chapter 18

मांधातोवाच - कृष्णायाः पटलं पुण्यं कामदं पद्धतिं तथा । वद मां मुनिशार्दूल त्वं साक्षात् ज्ञानशेवधिः ॥ १ ॥ सौभरिरुवाच - पटलं पद्धतिं वक्ष्ये यमुनाया महामते । कृत्वा श्रुत्वाऽथ जप्त्वा वा जीवन्मुक्तो भवेन्नरः ॥ २ ॥ प्रणवं पूर्वमुद्‍धृत्य मायाबीजं ततः परम् । रमाबीजं ततः कृत्वा कामबीजं विधानतः ॥ ३ ॥ कालिन्दीति चतुर्थ्यंते देवीपदमतः परम् । नमः पश्चात्संविधार्य जपेन्मन्त्रमिमं नरः ॥ ४ ॥ जप्त्वैकादशलक्षाणि मंत्रसिद्धिर्भवेद्‌भुवि । जनैः प्रार्थ्याश्च ये कामाः सर्वे प्राप्याः स्वतश्च ते ॥ ५ ॥ विधाय षोडशदलं पद्मं सिंहासने शुभे । कर्णिकायां च कालिंदीं न्यसेच्छ्रीकृष्णसंयुताम् ॥ ६ ॥ जाह्नवीं विरजां कृष्णां चन्द्रभागां सरस्वतीम् । गोमतीं कौशिकीं वेणीं सिंधुं गोदावरीं तथा ॥ ७ ॥ वेदस्मृतिं वेत्रवतीं शतद्रुं सरयूं तथा । पूजयेन् मानवश्रेष्ठ ऋषिकुल्यां ककुद्मिनीम् ॥ ८ ॥ पृथक्पृथक् तद्दलेषु नामोच्चार्य विधानतः । वृन्दावनं गोवर्द्धनं वृन्दां च तुलसीं तथा । चतुर्दिक्षु विधायाशु पूजयेन्नामभिः पृथक् ॥ ९ ॥ ॐनमो भगवत्यै कलिन्दनन्दिन्यै सूर्यकन्यकायै यमभगिन्यै श्रीकृष्णप्रियायै यूथीभूतायै स्वाहा । अनेन मंत्रेण आवाहनादि षोडशोपचारान् समाहित उपाहरेत् ॥ १० ॥ इत्येव पटलं विद्धि तुभ्यं वक्ष्यामि पद्धतिम् । यावत्संपूर्णतां याति पुरश्चरणमेव हि ॥ ११ ॥ तावद्‌ भवेद् ब्रह्मचारी जपेन्मौनव्रती द्विजः । यवभोजी भूमिशायी पत्रभुग् जितमानसः ॥ १२ ॥ कामं क्रोधं तथा लोभं मोहं द्वेषं विसृज्य सः । भक्त्या परमया राजन् वर्तमानस्तु देशकः ॥ १३ ॥ ब्राह्मे मुहूर्ते उत्थाय ध्यात्वा देवीं कलिंदजाम् । अरुणोदयवेलायां नद्यां स्नानं समाचरेत् ॥ १४ ॥ माध्याह्ने चापि संध्यायां संध्यावन्दनतत्परः । सप्तमे नियमे राजन् कालिन्दीतीरमास्थितः ॥ १५ ॥ दशलक्षं ब्राह्मणानां सपुत्राणां महात्मनाम् । पूजयित्वा गन्धपुष्पैर्दत्वा तेभ्यः सुभोजनम् ॥ १६ ॥ वस्त्रभूषणसौवर्णपात्राणि प्रस्फुरंति च । दक्षिणाश्च शुभा दद्यात्ततः सिद्धिर्भवेत् खलु ॥ १७ ॥ इति ते पद्धतिः प्रोक्ता मया राजन् महमते । कुरु त्वं नियमं सर्वं किं भूयः श्रोतुमिच्छसि ॥ १८ ॥ इति श्रीगर्गसंहितायां माधुर्यखण्डे श्रीनारदबहुलाश्वसंवादे श्रीसौभरिमांधातृसंवादे पटलपद्धतिवर्णनं नामाष्टादशोऽध्यायः ॥ १८ ॥ हरिः ॐ तत्सच्छ्रीकृष्णार्पणमस्तु ॥

māṃdhātovāca - kṛṣṇāyāḥ paṭalaṃ puṇyaṃ kāmadaṃ paddhatiṃ tathā | vada māṃ muniśārdūla tvaṃ sākṣāt jñānaśevadhiḥ || 1 || saubhariruvāca - paṭalaṃ paddhatiṃ vakṣye yamunāyā mahāmate | kṛtvā śrutvā'tha japtvā vā jīvanmukto bhavennaraḥ || 2 || praṇavaṃ pūrvamud‍dhṛtya māyābījaṃ tataḥ param | ramābījaṃ tataḥ kṛtvā kāmabījaṃ vidhānataḥ || 3 || kālindīti caturthyaṃte devīpadamataḥ param | namaḥ paścātsaṃvidhārya japenmantramimaṃ naraḥ || 4 || japtvaikādaśalakṣāṇi maṃtrasiddhirbhaved‌bhuvi | janaiḥ prārthyāśca ye kāmāḥ sarve prāpyāḥ svataśca te || 5 || vidhāya ṣoḍaśadalaṃ padmaṃ siṃhāsane śubhe | karṇikāyāṃ ca kāliṃdīṃ nyasecchrīkṛṣṇasaṃyutām || 6 || jāhnavīṃ virajāṃ kṛṣṇāṃ candrabhāgāṃ sarasvatīm | gomatīṃ kauśikīṃ veṇīṃ siṃdhuṃ godāvarīṃ tathā || 7 || vedasmṛtiṃ vetravatīṃ śatadruṃ sarayūṃ tathā | pūjayen mānavaśreṣṭha ṛṣikulyāṃ kakudminīm || 8 || pṛthakpṛthak taddaleṣu nāmoccārya vidhānataḥ | vṛndāvanaṃ govarddhanaṃ vṛndāṃ ca tulasīṃ tathā | caturdikṣu vidhāyāśu pūjayennāmabhiḥ pṛthak || 9 || oṃnamo bhagavatyai kalindanandinyai sūryakanyakāyai yamabhaginyai śrīkṛṣṇapriyāyai yūthībhūtāyai svāhā | anena maṃtreṇa āvāhanādi ṣoḍaśopacārān samāhita upāharet || 10 || ityeva paṭalaṃ viddhi tubhyaṃ vakṣyāmi paddhatim | yāvatsaṃpūrṇatāṃ yāti puraścaraṇameva hi || 11 || tāvad‌ bhaved brahmacārī japenmaunavratī dvijaḥ | yavabhojī bhūmiśāyī patrabhug jitamānasaḥ || 12 || kāmaṃ krodhaṃ tathā lobhaṃ mohaṃ dveṣaṃ visṛjya saḥ | bhaktyā paramayā rājan vartamānastu deśakaḥ || 13 || brāhme muhūrte utthāya dhyātvā devīṃ kaliṃdajām | aruṇodayavelāyāṃ nadyāṃ snānaṃ samācaret || 14 || mādhyāhne cāpi saṃdhyāyāṃ saṃdhyāvandanatatparaḥ | saptame niyame rājan kālindītīramāsthitaḥ || 15 || daśalakṣaṃ brāhmaṇānāṃ saputrāṇāṃ mahātmanām | pūjayitvā gandhapuṣpairdatvā tebhyaḥ subhojanam || 16 || vastrabhūṣaṇasauvarṇapātrāṇi prasphuraṃti ca | dakṣiṇāśca śubhā dadyāttataḥ siddhirbhavet khalu || 17 || iti te paddhatiḥ proktā mayā rājan mahamate | kuru tvaṃ niyamaṃ sarvaṃ kiṃ bhūyaḥ śrotumicchasi || 18 || iti śrīgargasaṃhitāyāṃ mādhuryakhaṇḍe śrīnāradabahulāśvasaṃvāde śrīsaubharimāṃdhātṛsaṃvāde paṭalapaddhativarṇanaṃ nāmāṣṭādaśo'dhyāyaḥ || 18 || hariḥ oṃ tatsacchrīkṛṣṇārpaṇamastu ||