Chapter 16

मांधातोवाच - यमुनायाः कृष्णराज्ञ्याः कवचं सर्वतोऽमलम् । देहि मह्यं महाभाग धारयिष्याम्यहं सदा ॥ १ ॥ सौभरिरुवाच - यमुनायाश्च कवचं सर्वरक्षाकरं नृणाम् । चतुष्पदार्थदं साक्षाच्छृणु राजन्महामते ॥ २ ॥ कृष्णां चतुर्भुजां श्यामां पुण्डरीकदलेक्षणाम् । रथस्थां सुन्दरीं ध्यात्वा धारयेत्कवचं ततः ॥ ३ ॥ स्नातः पूर्वमुखो मौनि कृतसंध्यः कुशासने । कुशैर्बद्धशिखो विप्रः पठेद्वै स्वस्तिकासनः ॥ ४ ॥ यमुना मे शिरः पातु कृष्णा नेत्रद्वयं सदा । श्यामा भ्रूभंगदेशं च नासिकां नाकवासिनी ॥ ५ ॥ कपोलौ पातु मे साक्षात्परमानन्दरूपिणी । कृष्णवामांससंभूता पातु कर्णद्वयं मम ॥ ६ ॥ अधरौ पातु कालिन्दी चिबुकं सूर्यकन्यका । यमस्वसा कन्धरां च हृदयं मे महानदी ॥ ७ ॥ कृष्णप्रिया पातु पृष्ठं तटिनि मे भुजद्वयम् । श्रोणीतटं च सुश्रोणी कटिं मे चारुदर्शना ॥ ८ ॥ ऊरुद्वयं तु रंभोरुर्जानुनी त्वंघ्रिभेदिनी । गुल्फौ रासेश्वरी पातु पादौ पापप्रहारिणी ॥ ९ ॥ अंतर्बहिरधश्चोर्ध्वं दिशासु विदिशासु च । समंतात्पातु जगतः परिपूर्णतमप्रिया ॥ १० ॥ इदं श्रीयमुनाश्च कवचं परमाद्‌भुतम् । दशवारं पठेद्‌भक्त्या निर्धनो धनवान्भवेत् ॥ ११ ॥ त्रिभिर्मासैः पठेद्धीमान् ब्रह्मचारी मिताशनः । सर्वराज्याधिपत्यञ्च प्राप्यते नात्र संशयः ॥ १२ ॥ दशोत्तरशतं नित्यं त्रिमासावधि भक्तितः । यः पठेत्प्रयतो भूत्वा तस्य किं किं न जायते ॥ १३ ॥ यः पठेत्प्रातरुत्थाय सर्वतीर्थफलं लभेत् । अंते व्रजेत्परं धाम गोलोकं योगिदुर्लभम् ॥ १४ ॥ इति श्रीगर्गसंहितायां माधुर्यखण्डे श्रीनारदबहुलाश्वसंवादे श्रीसौभरिमांधातृसंवादे श्रीयमुनाकवचं नाम षोडशोऽध्यायः ॥ १६ ॥ हरिः ॐ तत्सच्छ्रीकृष्णार्पणमस्तु ॥

māṃdhātovāca - yamunāyāḥ kṛṣṇarājñyāḥ kavacaṃ sarvato'malam | dehi mahyaṃ mahābhāga dhārayiṣyāmyahaṃ sadā || 1 || saubhariruvāca - yamunāyāśca kavacaṃ sarvarakṣākaraṃ nṛṇām | catuṣpadārthadaṃ sākṣācchṛṇu rājanmahāmate || 2 || kṛṣṇāṃ caturbhujāṃ śyāmāṃ puṇḍarīkadalekṣaṇām | rathasthāṃ sundarīṃ dhyātvā dhārayetkavacaṃ tataḥ || 3 || snātaḥ pūrvamukho mauni kṛtasaṃdhyaḥ kuśāsane | kuśairbaddhaśikho vipraḥ paṭhedvai svastikāsanaḥ || 4 || yamunā me śiraḥ pātu kṛṣṇā netradvayaṃ sadā | śyāmā bhrūbhaṃgadeśaṃ ca nāsikāṃ nākavāsinī || 5 || kapolau pātu me sākṣātparamānandarūpiṇī | kṛṣṇavāmāṃsasaṃbhūtā pātu karṇadvayaṃ mama || 6 || adharau pātu kālindī cibukaṃ sūryakanyakā | yamasvasā kandharāṃ ca hṛdayaṃ me mahānadī || 7 || kṛṣṇapriyā pātu pṛṣṭhaṃ taṭini me bhujadvayam | śroṇītaṭaṃ ca suśroṇī kaṭiṃ me cārudarśanā || 8 || ūrudvayaṃ tu raṃbhorurjānunī tvaṃghribhedinī | gulphau rāseśvarī pātu pādau pāpaprahāriṇī || 9 || aṃtarbahiradhaścordhvaṃ diśāsu vidiśāsu ca | samaṃtātpātu jagataḥ paripūrṇatamapriyā || 10 || idaṃ śrīyamunāśca kavacaṃ paramād‌bhutam | daśavāraṃ paṭhed‌bhaktyā nirdhano dhanavānbhavet || 11 || tribhirmāsaiḥ paṭheddhīmān brahmacārī mitāśanaḥ | sarvarājyādhipatyañca prāpyate nātra saṃśayaḥ || 12 || daśottaraśataṃ nityaṃ trimāsāvadhi bhaktitaḥ | yaḥ paṭhetprayato bhūtvā tasya kiṃ kiṃ na jāyate || 13 || yaḥ paṭhetprātarutthāya sarvatīrthaphalaṃ labhet | aṃte vrajetparaṃ dhāma golokaṃ yogidurlabham || 14 || iti śrīgargasaṃhitāyāṃ mādhuryakhaṇḍe śrīnāradabahulāśvasaṃvāde śrīsaubharimāṃdhātṛsaṃvāde śrīyamunākavacaṃ nāma ṣoḍaśo'dhyāyaḥ || 16 || hariḥ oṃ tatsacchrīkṛṣṇārpaṇamastu ||