Chapter 15

श्रीनारद उवाच - व्रजे शोणपुराधीशो गोपो नन्दो धनी महान् । भार्याः पञ्चसहस्राणि बभूवुस्तस्य मैथिल ॥ १ ॥ जाता मत्स्यवरात्तास्तु समुद्रे गोपकन्यकाः । तथाऽन्याश्च त्रिवाचापि पृथिव्या दोहनान्नृप ॥ २ ॥ बर्हिष्मतीपुरंध्र्यो या जाता जातिस्मराः पराः । तथाऽन्याप्सरसोऽभूवन् वरान्नारायणस्य च ॥ ३ ॥ तथा सुतलवासिन्यो वामनस्य वरात्स्त्रियः । तथा नागेन्द्रकन्याश्च जाताः शेषवरात्परात् ॥ ४ ॥ ताभ्यो दुर्वाससा दत्तं कृष्णापञ्चांगमद्‌भुतम् । तेन संपूज्य यमुनां वव्रिरे श्रीपतिं वरम् ॥ ५ ॥ एकदा श्रीहरिस्ताभिर्वृन्दारण्ये मनोहरे । यमुनानिकटे दिव्ये पुंस्कोकिलतरुव्रजे ॥ ६ ॥ मधुपध्वनिसंयुक्ते कूजत्कोकिलसारसे । मधुमासे मन्दवायौ वसन्तलतिकावृते ॥ ७ ॥ दोलोत्सवं समारेभे हरिर्मदनमोहनः । कदम्बवृक्षे रहसि कल्पवृक्षे मनोहरे ॥ ८ ॥ कालिन्दीजलकल्लोलकोलाहलसमाकुले । तद्दोलाखेलनं चक्रुः ता गोप्यः प्रेमविह्वलाः ॥ ९ ॥ राधया कीर्तिसुतया चन्द्रकोटिप्रकाशया । रेजे वृन्दावने कृष्णो यथा रत्या रतीश्वरः ॥ १० ॥ एवं प्राप्ताश्च याः सर्वाः श्रीकृष्णं नंदनंदनम् । परिपूर्णतमं साक्षात्तासां किं वर्ण्यते तपः ॥ ११ ॥ नागेन्द्रकन्या याः सर्वाः चैत्रमासे मनोहरे । बलभद्रं हरिं प्राप्ताः कृष्णातीरे तु ताः शुभा ॥ १२ ॥ इदं मया ते कथितं गोपीनां चरितं शुभम् । सर्वपापहरं पुण्यं किं भूयः श्रोतुमिच्छसि ॥ १३ ॥ श्रीबहुलाश्व उवाच - यमुनायाश्च पंचांगं दत्तं दुर्वाससा मुने । गोपीभ्यो येन गोविन्दः प्राप्तस्तद्‍ब्रूहि मां प्रभो ॥ १४ ॥ श्रीनारद उवाच - अत्रैवोदाहरन्तीममितिहासं पुरातनम् । यस्य श्रवणमात्रेण पापहानिः परा भवेत् ॥ १५ ॥ अयोध्याधिपतिः श्रीमान् मांधाता राजसत्तमः । मृगयां विचरन् प्राप्तः सौभरेराश्रमं शुभम् ॥ १६ ॥ वृन्दावने स्थितं साक्षात्कृष्णातीरे मनोहरे । नत्वा जामातरं राजा सौभरिं प्राह मानदः ॥ १७ ॥ मांधातोवाच - भगवन् सर्ववित्साक्षात्त्वं परावरवित्तमः । लोकानां तमसोऽन्धानां दिव्यसूर्य इवापरः ॥ १८ ॥ इह लोके भवेद्‌राज्यं सर्वसिद्धिसमन्वितम् । अमुत्र कृष्णसारूप्यं येन स्यात्तद्वदाशु मे ॥ १९ ॥ सौभरिरुवाच - यमुनायाश्च पञ्चागं वदिष्यामि तवाग्रतः । सर्वसिद्धिकरं शश्वत्कृष्णसारूप्यकारकम् ॥ २० ॥ यावत्सूर्य उदेति स्म यावच्च प्रतितिष्ठति । तावद्‌राज्यप्रदं चात्र श्रीकृष्णवशकारकम् ॥ २१ ॥ कवचं च स्तवं नाम्नां सहस्रं पटलं तथा । पद्धतिं सूर्यवंशेन्द्र पञ्चांगानि विदुर्बुधाः ॥ २२ ॥ इति श्रीगर्गसंहितायां माधुर्यखण्डे श्रीनारदबहुलाश्वसंवादे श्रीसौभरिमांधातृसंवादे बर्हिष्मतीपुरंध्र्यप्सरः सुतलवासिनी नागेन्द्रकन्योपाख्यानं नाम पञ्चदशोऽध्यायः ॥ १५ ॥ हरिः ॐ तत्सच्छ्रीकृष्णार्पणमस्तु ॥

śrīnārada uvāca - vraje śoṇapurādhīśo gopo nando dhanī mahān | bhāryāḥ pañcasahasrāṇi babhūvustasya maithila || 1 || jātā matsyavarāttāstu samudre gopakanyakāḥ | tathā'nyāśca trivācāpi pṛthivyā dohanānnṛpa || 2 || barhiṣmatīpuraṃdhryo yā jātā jātismarāḥ parāḥ | tathā'nyāpsaraso'bhūvan varānnārāyaṇasya ca || 3 || tathā sutalavāsinyo vāmanasya varātstriyaḥ | tathā nāgendrakanyāśca jātāḥ śeṣavarātparāt || 4 || tābhyo durvāsasā dattaṃ kṛṣṇāpañcāṃgamad‌bhutam | tena saṃpūjya yamunāṃ vavrire śrīpatiṃ varam || 5 || ekadā śrīharistābhirvṛndāraṇye manohare | yamunānikaṭe divye puṃskokilataruvraje || 6 || madhupadhvanisaṃyukte kūjatkokilasārase | madhumāse mandavāyau vasantalatikāvṛte || 7 || dolotsavaṃ samārebhe harirmadanamohanaḥ | kadambavṛkṣe rahasi kalpavṛkṣe manohare || 8 || kālindījalakallolakolāhalasamākule | taddolākhelanaṃ cakruḥ tā gopyaḥ premavihvalāḥ || 9 || rādhayā kīrtisutayā candrakoṭiprakāśayā | reje vṛndāvane kṛṣṇo yathā ratyā ratīśvaraḥ || 10 || evaṃ prāptāśca yāḥ sarvāḥ śrīkṛṣṇaṃ naṃdanaṃdanam | paripūrṇatamaṃ sākṣāttāsāṃ kiṃ varṇyate tapaḥ || 11 || nāgendrakanyā yāḥ sarvāḥ caitramāse manohare | balabhadraṃ hariṃ prāptāḥ kṛṣṇātīre tu tāḥ śubhā || 12 || idaṃ mayā te kathitaṃ gopīnāṃ caritaṃ śubham | sarvapāpaharaṃ puṇyaṃ kiṃ bhūyaḥ śrotumicchasi || 13 || śrībahulāśva uvāca - yamunāyāśca paṃcāṃgaṃ dattaṃ durvāsasā mune | gopībhyo yena govindaḥ prāptastad‍brūhi māṃ prabho || 14 || śrīnārada uvāca - atraivodāharantīmamitihāsaṃ purātanam | yasya śravaṇamātreṇa pāpahāniḥ parā bhavet || 15 || ayodhyādhipatiḥ śrīmān māṃdhātā rājasattamaḥ | mṛgayāṃ vicaran prāptaḥ saubharerāśramaṃ śubham || 16 || vṛndāvane sthitaṃ sākṣātkṛṣṇātīre manohare | natvā jāmātaraṃ rājā saubhariṃ prāha mānadaḥ || 17 || māṃdhātovāca - bhagavan sarvavitsākṣāttvaṃ parāvaravittamaḥ | lokānāṃ tamaso'ndhānāṃ divyasūrya ivāparaḥ || 18 || iha loke bhaved‌rājyaṃ sarvasiddhisamanvitam | amutra kṛṣṇasārūpyaṃ yena syāttadvadāśu me || 19 || saubhariruvāca - yamunāyāśca pañcāgaṃ vadiṣyāmi tavāgrataḥ | sarvasiddhikaraṃ śaśvatkṛṣṇasārūpyakārakam || 20 || yāvatsūrya udeti sma yāvacca pratitiṣṭhati | tāvad‌rājyapradaṃ cātra śrīkṛṣṇavaśakārakam || 21 || kavacaṃ ca stavaṃ nāmnāṃ sahasraṃ paṭalaṃ tathā | paddhatiṃ sūryavaṃśendra pañcāṃgāni vidurbudhāḥ || 22 || iti śrīgargasaṃhitāyāṃ mādhuryakhaṇḍe śrīnāradabahulāśvasaṃvāde śrīsaubharimāṃdhātṛsaṃvāde barhiṣmatīpuraṃdhryapsaraḥ sutalavāsinī nāgendrakanyopākhyānaṃ nāma pañcadaśo'dhyāyaḥ || 15 || hariḥ oṃ tatsacchrīkṛṣṇārpaṇamastu ||