Chapter 11

बलभद्रखण्डः - एकादशोऽध्यायः बलरामस्तोत्रम् - दुर्योधन उवाच - स्तोत्रं श्रीबलदेवस्य प्राड्‌विपाक महामुने ॥ वद मां कृपया साक्षात्सर्वसिद्धिप्रदायकम् ॥१॥ प्राड्‌विपाक उवाच - स्तवराजं तु रामस्य वेदव्यासकृतं शुभम् ॥ सर्वसिद्धिप्रदं राजञ्छृणु कैवल्यदं नृणाम् ॥२॥ देवादिदेव भगवन् कामपाल नमोऽस्तु ते ॥ नमोऽनन्ताय शेषाय साक्षाद्रामाय ते नमः ॥३॥ धराधराय पूर्णाय स्वधाम्ने सीरपाणये ॥ सहस्रशिरसे नित्यं नमः संकर्षणाय ते ॥४॥ रेवतीरमण त्वं वै बलदेवाच्युताग्रजः ॥ हलायुध प्रलंबघ्न पाहि मां पुरुषोत्तम ॥५॥ बलाय बलभद्राय तालांकाय नमो नमः ॥ नीलांबराय गौराय रौहणेयाय ते नमः ॥६॥ धेनुकारिर्मुष्टिकारिः कूटारिर्बल्वलांतकः ॥ रुक्म्यरिः कूपकर्णारिः कुम्भांडारिस्त्वमेव हि ॥७॥ कालिंदीभेदनोऽसि त्वं हस्तिनापुरकर्षकः ॥ द्विविदारिर्यादवेंद्रो व्रजमंडलमंडनः ॥८॥ कंसभातृप्रहन्तसि तीर्थयात्राकरः प्रभुः ॥ दुर्योधनगुरुः साक्षात्पाहि पाहि प्रभो त्वतः ॥९॥ जय जयाच्युतदेव परात्पर स्वयमनन्तदिगंतगतश्रुत ॥ सुरमुनींद्रफणीन्द्रवराय ते मुसलिने बलिने हलिने नमः ॥१०॥ यः पठेत्सततं स्तवनं नरः स तु हरेः परमं पदमाव्रजेत् ॥ जगति सर्वबलं त्वरिमर्दनं भवति तस्य धनं स्वजनं धनम् ॥११॥ इति श्रीगर्गसंहितायां बलभद्रखण्डे बलभद्रस्तवराजवर्णनं नामैकादशोऽध्यायः ॥११॥ हरिः ॐ तत्सत् श्रीकृष्णार्पणमस्तु ॥

balabhadrakhaṇḍaḥ - ekādaśo'dhyāyaḥ balarāmastotram - duryodhana uvāca - stotraṃ śrībaladevasya prāḍ‌vipāka mahāmune || vada māṃ kṛpayā sākṣātsarvasiddhipradāyakam ||1|| prāḍ‌vipāka uvāca - stavarājaṃ tu rāmasya vedavyāsakṛtaṃ śubham || sarvasiddhipradaṃ rājañchṛṇu kaivalyadaṃ nṛṇām ||2|| devādideva bhagavan kāmapāla namo'stu te || namo'nantāya śeṣāya sākṣādrāmāya te namaḥ ||3|| dharādharāya pūrṇāya svadhāmne sīrapāṇaye || sahasraśirase nityaṃ namaḥ saṃkarṣaṇāya te ||4|| revatīramaṇa tvaṃ vai baladevācyutāgrajaḥ || halāyudha pralaṃbaghna pāhi māṃ puruṣottama ||5|| balāya balabhadrāya tālāṃkāya namo namaḥ || nīlāṃbarāya gaurāya rauhaṇeyāya te namaḥ ||6|| dhenukārirmuṣṭikāriḥ kūṭārirbalvalāṃtakaḥ || rukmyariḥ kūpakarṇāriḥ kumbhāṃḍāristvameva hi ||7|| kāliṃdībhedano'si tvaṃ hastināpurakarṣakaḥ || dvividāriryādaveṃdro vrajamaṃḍalamaṃḍanaḥ ||8|| kaṃsabhātṛprahantasi tīrthayātrākaraḥ prabhuḥ || duryodhanaguruḥ sākṣātpāhi pāhi prabho tvataḥ ||9|| jaya jayācyutadeva parātpara svayamanantadigaṃtagataśruta || suramunīṃdraphaṇīndravarāya te musaline baline haline namaḥ ||10|| yaḥ paṭhetsatataṃ stavanaṃ naraḥ sa tu hareḥ paramaṃ padamāvrajet || jagati sarvabalaṃ tvarimardanaṃ bhavati tasya dhanaṃ svajanaṃ dhanam ||11|| iti śrīgargasaṃhitāyāṃ balabhadrakhaṇḍe balabhadrastavarājavarṇanaṃ nāmaikādaśo'dhyāyaḥ ||11|| hariḥ oṃ tatsat śrīkṛṣṇārpaṇamastu ||