Chapter 8

श्रीव्यास उवाच - अथ स्नात्वा च कृत्वा च नित्यनैमित्तिकीं क्रियाम् ॥ पञ्चवर्णसमायुक्तं शुद्धे स्थण्डिलमण्डले ॥१॥ द्वात्रिंशद्दलसंयुक्तं कार्णिकाकेसरोज्ज्वलम् ॥ विधाय कमलं स्थाप्य विधिवद्वेदसूक्तिभिः ॥२॥ कर्णिकायां न्यसेद्‌राजन्हरेः सिंहासनं शुभम् ॥ तत्र राधां रमां स्थाप्य भूदेवीं विरजां तथा ॥३॥ तन्मध्ये स्थापयेत्साक्षाच्छ्रीकृष्णं पुरुषोत्तमम् ॥ तथाष्टदलमध्ये तु राधिकाष्टसखीः शुभाः ॥४॥ ततोऽष्टदलमध्ये तु श्रीकृष्णस्य तथा सखीन् ॥ तथा षोडशपर्णेषु सखीनां च द्वयं द्वयम् ॥५॥ कमलस्य च पार्श्वेषु शंखं चक्रं गदां तथा ॥ पद्मं च नंदकं शार्ङ्गं बाणांश्च मुसलं हलम् ॥६॥ कौस्तुभं वनमालां च श्रीवत्सं नीलमंबरम् ॥ पीतांबरं तथा वंशीं वेत्रं च स्थापयेद्‍बुधः ॥७॥ ततः पार्श्वेषु तालांकं गरुडांकं रथं तथा ॥ सुमतिं दारुकं सूतं गरुडं कुमुदं तथा ॥८॥ चंडं चैव प्रचंडं च बलं चैव महाबलम् ॥ कुमुदाक्षं बलं चैव स्थापयेद्यत्‍नतः सुधीः ॥९॥ तथा दिक्षु च दिक्पालान्संस्थाप्य च पृथक् पृथक् ॥ विष्वक्सेनं शिवं मां च विधिं दुर्गां विनायकम् ॥१०॥ नवग्रहांश्च वरुणं तथा षोडश मातृकाः ॥ तत्पद्माग्रे वीतिहोत्रं स्थंडिले स्थापयेद्‍बुधः ॥११॥ आवाहनमासनं च पाद्यमर्घ्यं विशेषतः ॥ स्नानं च मधुपर्कं च धूपं दीपं तथैव च ॥१२॥ यज्ञोपवीतं वस्त्रं च भूषणं गंधमेव च ॥ पुष्पं तथाक्षतांश्चैव नैवेद्यं च मनोहरम् ॥१३॥ आचमनं प्रदातव्यं तांबूलं दक्षिणां तथा ॥ प्रदक्षिणां प्रार्थनां च तथा नीराजनं स्मृतम् ॥१४॥ नमस्कारं ततः कुर्यात्कर्मणा च पृथक् पृथक् ॥ आवाहने तु पुष्पाणि आसने तु कुशद्वयम् ॥ पाद्ये श्यामां च दूर्वां च विष्णुक्रांतां तथैव च ॥ सौगंधिकानि पुष्पाणि अर्घ्ये योग्यानि यादव ॥१६॥ चंदनोशीरकर्पूरकुंकुमागुरुमिश्रितम् ॥ एतादृशं जलं योग्यं स्नाने राजन्महामते ॥१७॥ मधुपर्के ह्यामलकमरविंदं तथा मतम् ॥ धूपे गंधाष्टकं देयं दीपे कर्पूरमेव च ॥१८॥ यज्ञोपवीतं पीतं च वस्त्रे पीतांबरं मतम् ॥ भूषणे चैव सौवर्णं गंधे कुंकुमचन्दने ॥१९॥ तुलसीमंजरी पुष्पेऽक्षतेषु स्युस्तु तंडुलाः ॥ नैवेद्ये तु रसाः षट् च भोगा नानाविधा मताः ॥२०॥ जले गंगाजलं योग्यं यमुनाजलमेव च ॥ जातीफलं च कंकोलमंते चाचमने नृप ॥२१॥ तांबूले चोषणं त्वेला दक्षिणायां तु हाटकम् ॥ प्रदक्षिणायां भ्रमणं घृतं नीराजने गवाम् ॥२२॥ प्रार्थनायां हरेर्भक्तिः प्रेमलक्षणसंयुता ॥ नमस्कारे महाराज साष्टांगनतविग्रहः ॥२३॥ द्वादशाक्षरमंत्रेण शिखां बद्ध्वा शुचिः पुमान् ॥ उपचरान्पुरस्कृत्य श्रीमुखे संमुखो भवेत् ॥२४॥

śrīvyāsa uvāca - atha snātvā ca kṛtvā ca nityanaimittikīṃ kriyām || pañcavarṇasamāyuktaṃ śuddhe sthaṇḍilamaṇḍale ||1|| dvātriṃśaddalasaṃyuktaṃ kārṇikākesarojjvalam || vidhāya kamalaṃ sthāpya vidhivadvedasūktibhiḥ ||2|| karṇikāyāṃ nyased‌rājanhareḥ siṃhāsanaṃ śubham || tatra rādhāṃ ramāṃ sthāpya bhūdevīṃ virajāṃ tathā ||3|| tanmadhye sthāpayetsākṣācchrīkṛṣṇaṃ puruṣottamam || tathāṣṭadalamadhye tu rādhikāṣṭasakhīḥ śubhāḥ ||4|| tato'ṣṭadalamadhye tu śrīkṛṣṇasya tathā sakhīn || tathā ṣoḍaśaparṇeṣu sakhīnāṃ ca dvayaṃ dvayam ||5|| kamalasya ca pārśveṣu śaṃkhaṃ cakraṃ gadāṃ tathā || padmaṃ ca naṃdakaṃ śārṅgaṃ bāṇāṃśca musalaṃ halam ||6|| kaustubhaṃ vanamālāṃ ca śrīvatsaṃ nīlamaṃbaram || pītāṃbaraṃ tathā vaṃśīṃ vetraṃ ca sthāpayed‍budhaḥ ||7|| tataḥ pārśveṣu tālāṃkaṃ garuḍāṃkaṃ rathaṃ tathā || sumatiṃ dārukaṃ sūtaṃ garuḍaṃ kumudaṃ tathā ||8|| caṃḍaṃ caiva pracaṃḍaṃ ca balaṃ caiva mahābalam || kumudākṣaṃ balaṃ caiva sthāpayedyat‍nataḥ sudhīḥ ||9|| tathā dikṣu ca dikpālānsaṃsthāpya ca pṛthak pṛthak || viṣvaksenaṃ śivaṃ māṃ ca vidhiṃ durgāṃ vināyakam ||10|| navagrahāṃśca varuṇaṃ tathā ṣoḍaśa mātṛkāḥ || tatpadmāgre vītihotraṃ sthaṃḍile sthāpayed‍budhaḥ ||11|| āvāhanamāsanaṃ ca pādyamarghyaṃ viśeṣataḥ || snānaṃ ca madhuparkaṃ ca dhūpaṃ dīpaṃ tathaiva ca ||12|| yajñopavītaṃ vastraṃ ca bhūṣaṇaṃ gaṃdhameva ca || puṣpaṃ tathākṣatāṃścaiva naivedyaṃ ca manoharam ||13|| ācamanaṃ pradātavyaṃ tāṃbūlaṃ dakṣiṇāṃ tathā || pradakṣiṇāṃ prārthanāṃ ca tathā nīrājanaṃ smṛtam ||14|| namaskāraṃ tataḥ kuryātkarmaṇā ca pṛthak pṛthak || āvāhane tu puṣpāṇi āsane tu kuśadvayam || pādye śyāmāṃ ca dūrvāṃ ca viṣṇukrāṃtāṃ tathaiva ca || saugaṃdhikāni puṣpāṇi arghye yogyāni yādava ||16|| caṃdanośīrakarpūrakuṃkumāgurumiśritam || etādṛśaṃ jalaṃ yogyaṃ snāne rājanmahāmate ||17|| madhuparke hyāmalakamaraviṃdaṃ tathā matam || dhūpe gaṃdhāṣṭakaṃ deyaṃ dīpe karpūrameva ca ||18|| yajñopavītaṃ pītaṃ ca vastre pītāṃbaraṃ matam || bhūṣaṇe caiva sauvarṇaṃ gaṃdhe kuṃkumacandane ||19|| tulasīmaṃjarī puṣpe'kṣateṣu syustu taṃḍulāḥ || naivedye tu rasāḥ ṣaṭ ca bhogā nānāvidhā matāḥ ||20|| jale gaṃgājalaṃ yogyaṃ yamunājalameva ca || jātīphalaṃ ca kaṃkolamaṃte cācamane nṛpa ||21|| tāṃbūle coṣaṇaṃ tvelā dakṣiṇāyāṃ tu hāṭakam || pradakṣiṇāyāṃ bhramaṇaṃ ghṛtaṃ nīrājane gavām ||22|| prārthanāyāṃ harerbhaktiḥ premalakṣaṇasaṃyutā || namaskāre mahārāja sāṣṭāṃganatavigrahaḥ ||23|| dvādaśākṣaramaṃtreṇa śikhāṃ baddhvā śuciḥ pumān || upacarānpuraskṛtya śrīmukhe saṃmukho bhavet ||24||