Chapter 35

बहुलाश्व उवाच - अहो अत्यद्‌भुतं युद्धं मुने प्राद्युम्निना कृतम् ॥ वृके हते महादैत्ये किं बभूव रणे पुनः ॥१॥ श्रीनारद उवाच - वृकदैत्यं हतं वीक्ष्य कालनाभो महासुरः ॥ क्रोडारूढो रणं प्रागद्धनुष्टंकारयन्मुहुः ॥२॥ अक्रूरं बाणविंशत्या गदं च दशभिः शरैः ॥ अर्जुनं दशभिर्बाणैर्युयुधानं च पञ्चभिः ॥३॥ दशभिः कृतवर्माणं कार्ष्णिं बाणशतेन वै ॥ अनिरुद्धं च विंशत्या दीप्तिमंतं च पञ्चभिः ॥४॥ सांबं च शतबाणैश्च विव्याध समरेऽसुरः ॥ तद्‌बाणैर्व्याकुला वीरा बभूवुर्घटिकाद्वयम् ॥५॥ हयाश्च पञ्चतां प्राप्ताश्चूर्णीभूता रणांगणे ॥ तद्धस्तलाघवं दृष्ट्वा प्रसन्नो रुक्मिणीसुतः ॥६॥ कालनाभं साधुपदैः पूजयामास संगरे ॥ प्रद्युम्नः स्वं धनुर्नीत्वा बाणमेकं समादधे ॥७॥ कोदण्डमुक्तो विशिखस्तत्क्रोडं दीर्घरूपिणम् ॥ समुन्नीय भ्रामयित्वा स्वर्लोके लक्षयोजनम् ॥८॥ आकाशात्पातयामास समुद्रे भीमनादिनि ॥ प्रद्युम्नो भगवान्साक्षाद्‌द्वितीयं बाणमादधे ॥९॥ सोऽपि बाणः समुन्नीय कालनाभं महाबलम् ॥ भ्रामयन्पातयामास चंद्रावत्यां बलात्पुरि ॥१०॥ कालनाभः प्रपतितः किंचिद्‍व्याकुलमानसः ॥ गृहीत्वाऽथ गदां गुर्वीं लक्षभारविनिर्मिताम् ॥११॥ रणं प्राप्तो यदुबलं पोथयामास दैत्यराट् ॥ गजान् रथान्हयान् वीरान् गदया वज्रकल्पया ॥१२॥ पातयामास वेगेन महावातो यथा तरून् ॥ कांश्चित्कराभ्यां प्रोन्नीय चिक्षेप गगने बलात् ॥१३॥ अंबरात्ते निपेतुः कौ राजन् वर्षोपला इव ॥ तदा गदां समादाय सांबो जांबवतीसुतः ॥१४॥ तताड मूर्ध्नि तं दैत्यं कालनाभं महासुरम् ॥ तयोर्युद्धमभूद्घोरं गदाभ्यां रणमण्डले ॥१५॥ विस्फुलिंगान्क्षरंत्यौ द्वे गदे चूर्णीबभूवतुः ॥ अन्ये गदे समादाय तस्थतुः संगरे च तौ ॥१६॥ कालनाभस्तदा प्राह सांबं जांबवतीसुतम् ॥ एकेनापि प्रहारेण हन्मि त्वां नात्र संशयः ॥१७॥ पूर्वं प्रहार कुरु मे इति साम्बोऽवदद्‌रणे ॥ कालनाभोऽथ गदया सांबमूर्ध्नि तताड ह ॥१८॥ गदोपरि गदां नीत्वा सांबो जांबवतीसुतः ॥ जघान गदया दैत्यं कालनाभमुरःस्थले ॥१९॥ गदया भिन्नहृदय उद्वमन् रुधिरं मुखात् ॥ व्यसुः पपात भूपृष्ठे वज्राहत इवाचलः ॥२०॥ अभूज्जयजयारावः साधुवादः सतां नृप ॥ देवदुन्दुभयो नेदुर्नरदुन्दुभयस्तथा ॥२१॥ सांबसेनोपरि सुराः पुष्पवर्षं प्रचक्रिरे ॥ विद्याधर्यश्च गंधर्वा ननृतुश्च जगुर्मुदा ॥२२॥

bahulāśva uvāca - aho atyad‌bhutaṃ yuddhaṃ mune prādyumninā kṛtam || vṛke hate mahādaitye kiṃ babhūva raṇe punaḥ ||1|| śrīnārada uvāca - vṛkadaityaṃ hataṃ vīkṣya kālanābho mahāsuraḥ || kroḍārūḍho raṇaṃ prāgaddhanuṣṭaṃkārayanmuhuḥ ||2|| akrūraṃ bāṇaviṃśatyā gadaṃ ca daśabhiḥ śaraiḥ || arjunaṃ daśabhirbāṇairyuyudhānaṃ ca pañcabhiḥ ||3|| daśabhiḥ kṛtavarmāṇaṃ kārṣṇiṃ bāṇaśatena vai || aniruddhaṃ ca viṃśatyā dīptimaṃtaṃ ca pañcabhiḥ ||4|| sāṃbaṃ ca śatabāṇaiśca vivyādha samare'suraḥ || tad‌bāṇairvyākulā vīrā babhūvurghaṭikādvayam ||5|| hayāśca pañcatāṃ prāptāścūrṇībhūtā raṇāṃgaṇe || taddhastalāghavaṃ dṛṣṭvā prasanno rukmiṇīsutaḥ ||6|| kālanābhaṃ sādhupadaiḥ pūjayāmāsa saṃgare || pradyumnaḥ svaṃ dhanurnītvā bāṇamekaṃ samādadhe ||7|| kodaṇḍamukto viśikhastatkroḍaṃ dīrgharūpiṇam || samunnīya bhrāmayitvā svarloke lakṣayojanam ||8|| ākāśātpātayāmāsa samudre bhīmanādini || pradyumno bhagavānsākṣād‌dvitīyaṃ bāṇamādadhe ||9|| so'pi bāṇaḥ samunnīya kālanābhaṃ mahābalam || bhrāmayanpātayāmāsa caṃdrāvatyāṃ balātpuri ||10|| kālanābhaḥ prapatitaḥ kiṃcid‍vyākulamānasaḥ || gṛhītvā'tha gadāṃ gurvīṃ lakṣabhāravinirmitām ||11|| raṇaṃ prāpto yadubalaṃ pothayāmāsa daityarāṭ || gajān rathānhayān vīrān gadayā vajrakalpayā ||12|| pātayāmāsa vegena mahāvāto yathā tarūn || kāṃścitkarābhyāṃ pronnīya cikṣepa gagane balāt ||13|| aṃbarātte nipetuḥ kau rājan varṣopalā iva || tadā gadāṃ samādāya sāṃbo jāṃbavatīsutaḥ ||14|| tatāḍa mūrdhni taṃ daityaṃ kālanābhaṃ mahāsuram || tayoryuddhamabhūdghoraṃ gadābhyāṃ raṇamaṇḍale ||15|| visphuliṃgānkṣaraṃtyau dve gade cūrṇībabhūvatuḥ || anye gade samādāya tasthatuḥ saṃgare ca tau ||16|| kālanābhastadā prāha sāṃbaṃ jāṃbavatīsutam || ekenāpi prahāreṇa hanmi tvāṃ nātra saṃśayaḥ ||17|| pūrvaṃ prahāra kuru me iti sāmbo'vadad‌raṇe || kālanābho'tha gadayā sāṃbamūrdhni tatāḍa ha ||18|| gadopari gadāṃ nītvā sāṃbo jāṃbavatīsutaḥ || jaghāna gadayā daityaṃ kālanābhamuraḥsthale ||19|| gadayā bhinnahṛdaya udvaman rudhiraṃ mukhāt || vyasuḥ papāta bhūpṛṣṭhe vajrāhata ivācalaḥ ||20|| abhūjjayajayārāvaḥ sādhuvādaḥ satāṃ nṛpa || devadundubhayo nedurnaradundubhayastathā ||21|| sāṃbasenopari surāḥ puṣpavarṣaṃ pracakrire || vidyādharyaśca gaṃdharvā nanṛtuśca jagurmudā ||22||