Chapter 5

सूत उवाच ते गत्वा देवदेवेशं रमानाथं जगद्‌गुरुम् । विष्णुं कमलपत्राक्षं ददृशुः प्रभयान्वितम् ॥ १ ॥ स्तोत्रेण तुष्टुवुर्भक्त्या गद्‌गदस्वरसत्कृताः । देवा ऊचुः जय विष्णो रमेशाद्य महापुरुष पूर्वज ॥ २ ॥ दैत्यारे कामजनक सर्वकामफलप्रद । महावराह गोविन्द महायज्ञस्वरूपक ॥ ३ ॥ महाविष्णो ध्रुवेशाद्य जगदुत्पत्तिकारण । मत्स्यावतारे वेदानामुद्धाराधाररूपक ॥ ४ ॥ सत्यव्रत धराधीश मत्स्यरूपाय ते नमः । जयाकूपार दैत्यारे सुरकार्यसमर्पक ॥ ५ ॥ अमृताप्तिकरेशान कूर्मरूपाय ते नमः । जयादिदैत्यनाशार्थमादिसूकररूपधृक् ॥ ६ ॥ मह्युद्धारकृतोद्योगकोलरूपाय ते नमः । नारसिंहं वपुः कृत्वा महादैत्यं ददार यः ॥ ७ ॥ करजैर्वरदृप्ताङ्‌गं तस्मै नृहरये नमः । वामनं रूपमास्थाय त्रैलोक्यैश्वर्यमोहितम् ॥ ८ ॥ बलिं सञ्छलयामास तस्मै वामनरूपिणे । दुष्टक्षत्रविनाशाय सहस्रकरशत्रवे ॥ ९ ॥ रेणुकागर्भजाताय जामदग्न्याय ते नमः । दुष्टराक्षसपौलस्त्यशिरश्छेदपटीयसे ॥ १० ॥ श्रीमद्दाशरथे तुभ्यं नमोऽनन्तक्रमाय च । कंसदुर्योधनाद्यैश्च दैत्यैः पृथ्वीशलाञ्छनैः ॥ ११ ॥ भाराक्रान्तां महीं योऽसावुज्जहार महाविभुः । धर्मं संस्थापयामास पापं कृत्वा सुदूरतः ॥ १२ ॥ तस्मै कृष्णाय देवाय नमोऽस्तु बहुधा विभो । दुष्टयज्ञविघाताय पशुहिंसानिवृत्तये ॥ १३ ॥ बौद्धरूपं दधौ योऽसौ तस्मै देवाय ते नमः । म्लेच्छप्रायेऽखिले लोके दुष्टराजन्यपीडिते ॥ १४ ॥ कल्किरूपं समादध्यौ देवदेवाय ते नमः । दशावतारास्ते देव भक्तानां रक्षणाय वै ॥ १५ ॥ दुष्टदैत्यविघाताय तस्मात्त्वं सर्वदुःखहृत् । जय भक्तार्तिनाशाय धृतं नारीजलात्मसु ॥ १६ ॥ रूपं येन त्वया देव कोऽन्यस्त्वत्तो दयानिधिः । इत्येवं देवदेवेशं स्तुत्वा श्रीपीतवाससम् ॥ १७ ॥ प्रणेमुर्भक्तिसहिताः साष्टाङ्‌गं विबुधर्षभाः । तेषां स्तवं समाकर्ण्य देवः श्रीपुरुषोत्तमः ॥ १८ ॥ उवाच विबुधान्सर्वान् हर्षयच्छ्रीगदाधरः । श्रीभगवानुवाच - प्रसन्नोऽस्मि स्तवेनाहं देवास्तापं विमुञ्चथ ॥ १९ ॥ भवतां नाशयिष्यामि दुःखं परमदुःसहम् । वृणुध्वं च वरं मत्तो देवाः परमदुर्लभम् ॥ २० ॥ ददामि परमप्रीतः स्तवस्यास्य प्रसादतः । य एतत्पठते स्तोत्रं कल्य उत्थाय मानवः ॥ २१ ॥ मयि भक्तिं परां कृत्वा न तं शोकः स्पृशेत्कदा । अलक्ष्मीः कालकर्णी च नाक्रामेत्तद्‌‍गृहं सुराः ॥ २२ ॥ नोपसर्गा न वेताला न ग्रहा ब्रह्मराक्षसाः । न रोगा वातिकाः पैत्ताः श्लेष्मसम्भविनस्तथा ॥ २३ ॥ नाकालमरणं तस्य कदापि च भविष्यति । सन्ततिश्चिरकालस्था भोगाः सर्वे सुखादयः ॥ २४ ॥ सम्भविष्यन्ति तन्मर्त्यगृहे यः स्तोत्रपाठकः । किं पुनर्बहुनोक्तेन स्तोत्रं सर्वार्थसाधकम् ॥ २५ ॥ एतस्य पठनानॄणां भुक्तिमुक्ती न दूरतः । देवा भवत्सु यद्दुःखं कथ्यतां तदसंशयम् ॥ २६ ॥ नाशयामि न सन्देहश्चात्र कार्योऽणुरेव च । एवं श्रीभगवद्वाक्यं श्रुत्वा सर्वे दिवौकसः । प्रसन्नमनसः सर्वे पुनरूचुर्वृषाकपिम् ॥ २७ ॥ इति श्रीमद्देवीभागवते महापुराणेऽष्टादप्तसाहस्र्यां संहितायां दशमस्कन्धे श्रीविष्णुना देवेभ्यो वरप्रदानं नाम पञ्चमोऽध्यायः ॥ ५ ॥

sūta uvāca te gatvā devadeveśaṃ ramānāthaṃ jagad‌gurum | viṣṇuṃ kamalapatrākṣaṃ dadṛśuḥ prabhayānvitam || 1 || stotreṇa tuṣṭuvurbhaktyā gad‌gadasvarasatkṛtāḥ | devā ūcuḥ jaya viṣṇo rameśādya mahāpuruṣa pūrvaja || 2 || daityāre kāmajanaka sarvakāmaphalaprada | mahāvarāha govinda mahāyajñasvarūpaka || 3 || mahāviṣṇo dhruveśādya jagadutpattikāraṇa | matsyāvatāre vedānāmuddhārādhārarūpaka || 4 || satyavrata dharādhīśa matsyarūpāya te namaḥ | jayākūpāra daityāre surakāryasamarpaka || 5 || amṛtāptikareśāna kūrmarūpāya te namaḥ | jayādidaityanāśārthamādisūkararūpadhṛk || 6 || mahyuddhārakṛtodyogakolarūpāya te namaḥ | nārasiṃhaṃ vapuḥ kṛtvā mahādaityaṃ dadāra yaḥ || 7 || karajairvaradṛptāṅ‌gaṃ tasmai nṛharaye namaḥ | vāmanaṃ rūpamāsthāya trailokyaiśvaryamohitam || 8 || baliṃ sañchalayāmāsa tasmai vāmanarūpiṇe | duṣṭakṣatravināśāya sahasrakaraśatrave || 9 || reṇukāgarbhajātāya jāmadagnyāya te namaḥ | duṣṭarākṣasapaulastyaśiraśchedapaṭīyase || 10 || śrīmaddāśarathe tubhyaṃ namo'nantakramāya ca | kaṃsaduryodhanādyaiśca daityaiḥ pṛthvīśalāñchanaiḥ || 11 || bhārākrāntāṃ mahīṃ yo'sāvujjahāra mahāvibhuḥ | dharmaṃ saṃsthāpayāmāsa pāpaṃ kṛtvā sudūrataḥ || 12 || tasmai kṛṣṇāya devāya namo'stu bahudhā vibho | duṣṭayajñavighātāya paśuhiṃsānivṛttaye || 13 || bauddharūpaṃ dadhau yo'sau tasmai devāya te namaḥ | mlecchaprāye'khile loke duṣṭarājanyapīḍite || 14 || kalkirūpaṃ samādadhyau devadevāya te namaḥ | daśāvatārāste deva bhaktānāṃ rakṣaṇāya vai || 15 || duṣṭadaityavighātāya tasmāttvaṃ sarvaduḥkhahṛt | jaya bhaktārtināśāya dhṛtaṃ nārījalātmasu || 16 || rūpaṃ yena tvayā deva ko'nyastvatto dayānidhiḥ | ityevaṃ devadeveśaṃ stutvā śrīpītavāsasam || 17 || praṇemurbhaktisahitāḥ sāṣṭāṅ‌gaṃ vibudharṣabhāḥ | teṣāṃ stavaṃ samākarṇya devaḥ śrīpuruṣottamaḥ || 18 || uvāca vibudhānsarvān harṣayacchrīgadādharaḥ | śrībhagavānuvāca - prasanno'smi stavenāhaṃ devāstāpaṃ vimuñcatha || 19 || bhavatāṃ nāśayiṣyāmi duḥkhaṃ paramaduḥsaham | vṛṇudhvaṃ ca varaṃ matto devāḥ paramadurlabham || 20 || dadāmi paramaprītaḥ stavasyāsya prasādataḥ | ya etatpaṭhate stotraṃ kalya utthāya mānavaḥ || 21 || mayi bhaktiṃ parāṃ kṛtvā na taṃ śokaḥ spṛśetkadā | alakṣmīḥ kālakarṇī ca nākrāmettad‌‍gṛhaṃ surāḥ || 22 || nopasargā na vetālā na grahā brahmarākṣasāḥ | na rogā vātikāḥ paittāḥ śleṣmasambhavinastathā || 23 || nākālamaraṇaṃ tasya kadāpi ca bhaviṣyati | santatiścirakālasthā bhogāḥ sarve sukhādayaḥ || 24 || sambhaviṣyanti tanmartyagṛhe yaḥ stotrapāṭhakaḥ | kiṃ punarbahunoktena stotraṃ sarvārthasādhakam || 25 || etasya paṭhanānṝṇāṃ bhuktimuktī na dūrataḥ | devā bhavatsu yadduḥkhaṃ kathyatāṃ tadasaṃśayam || 26 || nāśayāmi na sandehaścātra kāryo'ṇureva ca | evaṃ śrībhagavadvākyaṃ śrutvā sarve divaukasaḥ | prasannamanasaḥ sarve punarūcurvṛṣākapim || 27 || iti śrīmaddevībhāgavate mahāpurāṇe'ṣṭādaptasāhasryāṃ saṃhitāyāṃ daśamaskandhe śrīviṣṇunā devebhyo varapradānaṃ nāma pañcamo'dhyāyaḥ || 5 ||