Chapter 6

षष्ठो’ध्यायः गोपाल-स्तोत्रम् श्री-नारद उवाच— नवीन-नीरद-श्यामꣳ नीलेन्दीवर-लोचनम् । बल्लवी-नन्दनꣳ वन्दे कृष्णꣳ गोपाल-रूपिणम् ॥१॥ स्फुरद्-बर्हि-दलोद्बद्ध-नील-कुञ्चित-मूर्धजम् । कदम्ब-कुसुमोद्बद्ध-वनमाला-विभूषितम् ॥२॥ गण्ड-मण्डलसꣳसर्गि-चलत्-कुञ्चित-कुन्तलम् । स्थूलꣳ मुक्ताफलोदार-हारोद्योतित-वक्षसम् ॥३॥ हेमाङ्ग-तुलाकोटि-किरीटोज्ज्वल-विग्रहम् । मन्द-मारूत-सङ्क्षोभ-चलिताम्बर-सञ्छयम् ॥४॥ रूचिरौष्ठ-पुट-न्यस्त-वꣳशी-मधुर-निःस्वनैः । लसद्-गोपालिका-चेतो मोहयन्तꣳ पुनः पुनः ॥५॥ बल्लवी-वदनाम्भोज – मधु-पान-मधु-व्रतम् । क्षोभयन्तꣳ मनस् तासाꣳ सस्मेरापाङ्ग-वीक्षणैः ॥६॥ यौवनोद्भिदेहाभिः सꣳसक्ताभिः परस्परम् । विचित्राम्बर-भूषाभिर् गोप-नारीभिर् आवृतम् ॥७॥ प्रभिन्नाञ्जन-कालिन्दी-जल-केलि-कलोत्सुकम् । योधयन्तꣳ क्वचिद् गोपान् व्याहरन्तꣳ गवाꣳ गणम् ॥८॥ कालिन्दी-जल-सꣳसर्गि-शीतलानिल-सेविते । कदम्ब-पादप-च्छाये स्थितꣳ वृन्दावने क्वचित् ॥९॥ रत्न-भूधर-सꣳलग्न-रत्नासन-परिग्रहम् । कल्प-पादप-मध्यस्थ-हेम-मण्डपिका-गतम् ॥१०॥ वसन्त-कुसुमामोद-सुरभी-कृत-दिङ्-मुखे । गोवर्धन-गिरौ रम्ये स्थितꣳ रास-रसोत्सुकम् ॥११॥ सव्य-हस्त-तल-न्यस्त-गिरि-वर्यातपत्रकम् । खण्डिताखण्डलोन्मुक्त-मुक्तासार-घनाघनम् ॥१२॥ वेणु-वाद्य-महोल्लास-कृत-हुङ्कार-निःस्वनैः । स-वत्सैर् उन्मुखैः शश्वद् गोकुलैर् अभिवीक्षितम् ॥१३॥ कृष्णम् एव तु गायद्भिस् तच्-चेष्टा-वश-वर्तिभिः । दण्ड-पाशोद्यत-करैर् गोपालै रूप-शोभितम् ॥१४॥ नारदाद्यैर् मुनि-श्रेष्ठैर् वेद-वेदाङ्ग-पारगैः । प्रीति-सुस्निग्धया वाचा स्तूयमानꣳ परात् परम् ॥१५॥ य एवꣳ चिन्तयेद् देवꣳ भक्त्या सꣳस्तौति मानवः । त्रिसन्ध्यꣳ तस्य तुष्टो’सौ ददाति वरम् ईप्सितम् ॥१६॥ राज-वल्लभताम् एति भवेत् सर्व-जन-प्रियः । अचलाꣳ श्रियम् आप्नोति स वाग्मी जायते ध्रुवम् ॥१७॥ इति श्री-नारद-पञ्चरात्रे ज्ञानामृत-सारे चतुर्थ-रात्रे गोपाल-स्तोत्रꣳ नाम षष्ठो’ध्यायः ॥६॥ …

ṣaṣṭho’dhyāyaḥ gopāla-stotram śrī-nārada uvāca— navīna-nīrada-śyāmaṁ nīlendīvara-locanam | ballavī-nandanaṁ vande kṛṣṇaṁ gopāla-rūpiṇam ||1|| sphurad-barhi-dalodbaddha-nīla-kuñcita-mūrdhajam | kadamba-kusumodbaddha-vanamālā-vibhūṣitam ||2|| gaṇḍa-maṇḍalasaṁsargi-calat-kuñcita-kuntalam | sthūlaṁ muktāphalodāra-hārodyotita-vakṣasam ||3|| hemāṅga-tulākoṭi-kirīṭojjvala-vigraham | manda-mārūta-saṅkṣobha-calitāmbara-sañchayam ||4|| rūcirauṣṭha-puṭa-nyasta-vaṁśī-madhura-niḥsvanaiḥ | lasad-gopālikā-ceto mohayantaṁ punaḥ punaḥ ||5|| ballavī-vadanāmbhoja – madhu-pāna-madhu-vratam | kṣobhayantaṁ manas tāsāṁ sasmerāpāṅga-vīkṣaṇaiḥ ||6|| yauvanodbhidehābhiḥ saṁsaktābhiḥ parasparam | vicitrāmbara-bhūṣābhir gopa-nārībhir āvṛtam ||7|| prabhinnāñjana-kālindī-jala-keli-kalotsukam | yodhayantaṁ kvacid gopān vyāharantaṁ gavāṁ gaṇam ||8|| kālindī-jala-saṁsargi-śītalānila-sevite | kadamba-pādapa-cchāye sthitaṁ vṛndāvane kvacit ||9|| ratna-bhūdhara-saṁlagna-ratnāsana-parigraham | kalpa-pādapa-madhyastha-hema-maṇḍapikā-gatam ||10|| vasanta-kusumāmoda-surabhī-kṛta-diṅ-mukhe | govardhana-girau ramye sthitaṁ rāsa-rasotsukam ||11|| savya-hasta-tala-nyasta-giri-varyātapatrakam | khaṇḍitākhaṇḍalonmukta-muktāsāra-ghanāghanam ||12|| veṇu-vādya-mahollāsa-kṛta-huṅkāra-niḥsvanaiḥ | sa-vatsair unmukhaiḥ śaśvad gokulair abhivīkṣitam ||13|| kṛṣṇam eva tu gāyadbhis tac-ceṣṭā-vaśa-vartibhiḥ | daṇḍa-pāśodyata-karair gopālai rūpa-śobhitam ||14|| nāradādyair muni-śreṣṭhair veda-vedāṅga-pāragaiḥ | prīti-susnigdhayā vācā stūyamānaṁ parāt param ||15|| ya evaṁ cintayed devaṁ bhaktyā saṁstauti mānavaḥ | trisandhyaṁ tasya tuṣṭo’sau dadāti varam īpsitam ||16|| rāja-vallabhatām eti bhavet sarva-jana-priyaḥ | acalāṁ śriyam āpnoti sa vāgmī jāyate dhruvam ||17|| iti śrī-nārada-pañcarātre jñānāmṛta-sāre caturtha-rātre gopāla-stotraṁ nāma ṣaṣṭho’dhyāyaḥ ||6|| …