Chapter 4

चतुर्थोऽध्यायः श्रीकृष्णस्तोत्रम् श्री महादेव उवाच— शृणु देवि प्रवक्ष्यामि स्तोत्रꣳ परमदुर्लभम् । यज्ज्ञात्वा न पुनर्गच्छेन्नरो निरययातनाम् ॥१॥ कवचꣳ च महेशानि त्रैलोक्यमङ्गलादिकम् । नारदाय च यत्प्रोक्तꣳ ब्रह्मपुत्रेण धीमता । सनत्कुमारेण पुरा योगीन्द्रगुरुवर्त्मना ॥२॥ श्रीनारद उवाच— प्रसीद भगवन् मह्यमज्ञानात्कुण्ठितात्मने । तवाङ्घ्रिपङ्कजरजोरागिणीꣳ भक्तिमुत्तमाम् ॥३॥ अज प्रसीद भगवन्नमितद्युतिपञ्जर । अप्रमेय प्रसीदास्मद्दुःखहन् पुरुषोत्तम ॥४॥ स्वसꣳवेद्य प्रसीदास्मदानन्दात्मन्ननामय । अचिन्त्यसार विश्वात्मन् प्रसीद परमेश्वर ॥५॥ प्रसीद तुङ्ग तुङ्गानाꣳ प्रसीद शिव शोभन । प्रसीद गुणगम्भीर गम्भीराणाꣳ महाद्युते ॥६॥ प्रसीद व्यक्त विस्तीर्ण विस्तीर्णनामगोचर । प्रसीदार्द्रार्द्रजातीनाꣳ प्रसीदान्तान्तदायिनाम् ॥७॥ गुरोर्गरीयः सर्वेश प्रसीदानन्त देहिनाम् । जय माधव मायात्मन् जय शाश्वत शङ्खभृत् ॥८॥ जय शङ्खधर श्रीमन् जय नन्दकनन्दन । जय चक्रगदापाणे जय देव जनार्दन ॥९॥ जय रत्नवराबद्धकिरीटाक्रान्तमस्तक । जय पक्षिपतिच्छायानिरुद्धार्ककरारुण ॥१०॥ नमस्ते नरकाराते नमस्ते मधुसूदन । नमस्ते ललितापाङ्ग नमस्ते नरकान्तक ॥११॥ नमः पापहरेशान नमः सर्वभयापह । नमः सम्भूतसर्वात्मन् नमः सम्भृतकौस्तुभ ॥१२॥ नमस्ते नयनातीत नमस्ते भयहारक । नमो विभिन्नवेषाय नमः श्रुतिपथातिग ॥१३॥ नमस्त्रिमूर्तिभेटेन स्वर्गस्थित्यन्तहेतवे । विष्णवे त्रिदशारातिजिष्णवे परमात्मने ॥१४॥ चक्रभिन्नारिचक्राय चक्रिणे चक्रवल्लभ । विश्वाय विश्ववन्द्याय विश्वभूतानुवर्तिने ॥१५॥ नमोऽस्तु योगिध्येयात्मन्नमोऽस्त्वध्यात्मरूपिणे । भक्तिप्रदाय भक्तानाꣳ नमस्ते भक्तिदायिने ॥१६॥ पूजनꣳ हवनꣳ चेज्या ध्यानꣳ पश्चान्नमस्क्रिया । देवेश कर्म सर्वꣳ मे भवेदाराधनꣳ तव ॥१७॥ इति हवनजपार्चाभेदतो विष्णुपूजा नियतहृदयकर्मा यस्तु मन्त्री चिराय । स खलु सकलकामान् प्राप्य कृष्णान्तरात्मा अननमृतिविमुक्तामुत्तमाꣳ भक्तिमेति ॥१८॥ गोगोपगोपिकावीतꣳ गोपालꣳ गोषु गोप्रदम् । गोपैरीड्यꣳ गोसहस्रैर्नौमि गोकुलनायकम् ॥१९॥ प्रीणयेदनया स्तुत्या जगन्नाथꣳ जगन्मयम् । धर्मार्थकाममोक्षाणामाप्तये पुरुषोत्तमम् ॥२०॥ इति श्रीनारदपञ्चरात्रे ज्ञानामृतारे चतुर्थरात्रे श्रीकृष्णस्तोत्रꣳ चतुर्थोऽध्यायः ॥४॥ …

caturtho'dhyāyaḥ śrīkṛṣṇastotram śrī mahādeva uvāca— śṛṇu devi pravakṣyāmi stotraṁ paramadurlabham | yajjñātvā na punargacchennaro nirayayātanām ||1|| kavacaṁ ca maheśāni trailokyamaṅgalādikam | nāradāya ca yatproktaṁ brahmaputreṇa dhīmatā | sanatkumāreṇa purā yogīndraguruvartmanā ||2|| śrīnārada uvāca— prasīda bhagavan mahyamajñānātkuṇṭhitātmane | tavāṅghripaṅkajarajorāgiṇīṁ bhaktimuttamām ||3|| aja prasīda bhagavannamitadyutipañjara | aprameya prasīdāsmadduḥkhahan puruṣottama ||4|| svasaṁvedya prasīdāsmadānandātmannanāmaya | acintyasāra viśvātman prasīda parameśvara ||5|| prasīda tuṅga tuṅgānāṁ prasīda śiva śobhana | prasīda guṇagambhīra gambhīrāṇāṁ mahādyute ||6|| prasīda vyakta vistīrṇa vistīrṇanāmagocara | prasīdārdrārdrajātīnāṁ prasīdāntāntadāyinām ||7|| gurorgarīyaḥ sarveśa prasīdānanta dehinām | jaya mādhava māyātman jaya śāśvata śaṅkhabhṛt ||8|| jaya śaṅkhadhara śrīman jaya nandakanandana | jaya cakragadāpāṇe jaya deva janārdana ||9|| jaya ratnavarābaddhakirīṭākrāntamastaka | jaya pakṣipaticchāyāniruddhārkakarāruṇa ||10|| namaste narakārāte namaste madhusūdana | namaste lalitāpāṅga namaste narakāntaka ||11|| namaḥ pāpahareśāna namaḥ sarvabhayāpaha | namaḥ sambhūtasarvātman namaḥ sambhṛtakaustubha ||12|| namaste nayanātīta namaste bhayahāraka | namo vibhinnaveṣāya namaḥ śrutipathātiga ||13|| namastrimūrtibheṭena svargasthityantahetave | viṣṇave tridaśārātijiṣṇave paramātmane ||14|| cakrabhinnāricakrāya cakriṇe cakravallabha | viśvāya viśvavandyāya viśvabhūtānuvartine ||15|| namo'stu yogidhyeyātmannamo'stvadhyātmarūpiṇe | bhaktipradāya bhaktānāṁ namaste bhaktidāyine ||16|| pūjanaṁ havanaṁ cejyā dhyānaṁ paścānnamaskriyā | deveśa karma sarvaṁ me bhavedārādhanaṁ tava ||17|| iti havanajapārcābhedato viṣṇupūjā niyatahṛdayakarmā yastu mantrī cirāya | sa khalu sakalakāmān prāpya kṛṣṇāntarātmā ananamṛtivimuktāmuttamāṁ bhaktimeti ||18|| gogopagopikāvītaṁ gopālaṁ goṣu gopradam | gopairīḍyaṁ gosahasrairnaumi gokulanāyakam ||19|| prīṇayedanayā stutyā jagannāthaṁ jaganmayam | dharmārthakāmamokṣāṇāmāptaye puruṣottamam ||20|| iti śrīnāradapañcarātre jñānāmṛtāre caturtharātre śrīkṛṣṇastotraṁ caturtho'dhyāyaḥ ||4|| …