Padas 376–387

यद्यपि मन समुझावत लोग। सूल होत नवनीत देखिकै मोहन के मुख-जोग॥ प्रात-समय उठि माखन-रोटी को बिन मांगे दैहै? को मेरे बालक कुँवर कान्ह को छन छन आगो लैहै? कहियो जाय पथिक! घर आवैं राम स्याम दोउ भैया। सूर वहाँ कत होत दुखारी जिनके मो सी मैया

yadyapi mana samujhāvata loga| sūla hota navanīta dekhikai mohana ke mukha-joga|| prāta-samaya uṭhi mākhana-roṭī ko bina māṃge daihai? ko mere bālaka ku~vara kānha ko chana chana āgo laihai? kahiyo jāya pathika! ghara āvaiṃ rāma syāma dou bhaiyā| sūra vahā~ kata hota dukhārī jinake mo sī maiyā

जो पै राखति हौ पहिंचानि। तौ बारेक मेरे मोहन को मोहिं देहु दिखाई आनि॥ तुम रानी बसुदेवगिरहिनी हम अहीर ब्रजबासी। पठै देहु मेरो लाल लड़ैतो बारों ऐसी हाँसी॥ भली करी कंसादिक मारे अवसर-काज कियो। अब इन गैयन कौन चरावै भरि भरि लेत हियो॥ खान, पान, परिधान, राजसुख केतोउ लाड़ लड़ावै। तदपि सूर मेरो यह बालक माखन ही सचु पावै

jo pai rākhati hau pahiṃcāni| tau bāreka mere mohana ko mohiṃ dehu dikhāī āni|| tuma rānī basudevagirahinī hama ahīra brajabāsī| paṭhai dehu mero lāla lar̤aito bāroṃ aisī hā~sī|| bhalī karī kaṃsādika māre avasara-kāja kiyo| aba ina gaiyana kauna carāvai bhari bhari leta hiyo|| khāna, pāna, paridhāna, rājasukha ketou lār̤a lar̤āvai| tadapi sūra mero yaha bālaka mākhana hī sacu pāvai

मो पै काहे को झुकति ब्रजनारी? काहू के भाग मों साझो नाहिंन, हरि की कृपा नियारी॥ फलन माँझ जैसे करुई तूमरि रहति जो घूरे डारी। हाथ परी जब गुनी जनन के बाजति राग दुलारी॥ यह सँदेस कुब्जा कहि पठयो अरु कीन्ही मनुहारी। तन टेढ़ी सब कोऊ जानत, परसे भइ अधिकारी॥ हौं तौ दासी कंसराय की, देखहु हृदय बिचारी। सूर स्याम करुनाकर स्वामी अपने हाथ सँवारी

mo pai kāhe ko jhukati brajanārī? kāhū ke bhāga moṃ sājho nāhiṃna, hari kī kṛpā niyārī|| phalana mā~jha jaise karuī tūmari rahati jo ghūre ḍārī| hātha parī jaba gunī janana ke bājati rāga dulārī|| yaha sa~desa kubjā kahi paṭhayo aru kīnhī manuhārī| tana ṭer̤hī saba koū jānata, parase bhai adhikārī|| hauṃ tau dāsī kaṃsarāya kī, dekhahu hṛdaya bicārī| sūra syāma karunākara svāmī apane hātha sa~vārī

[उद्धव-वचन] हौं तुम पै ब्रजनाथ पठायो। आतमज्ञान-सिखावन आयो॥ आपुहि पुरुष आपुही नारी। आपुहि बानप्रस्थ ब्रतधारी॥ आपुहि पिता, आपुही माता। आपुहि भगिनी, आपुहि भ्राता॥ आपुहि पंडित, आपुहि ज्ञानी। आपुहि राजा, आपुहि रानी॥ आपुहि धरती, आपु अकासा। आपुहि स्वामी, आपुहि दासा॥ आपुहि ग्वाल, आपुहि गाई। आपुहि आप चरावन जाई॥ आपुहि भँवर, आपुहि फूल। आतमज्ञान बिना जग भूल॥ रंक राव दूजो नहिं कोय। आपुहि आप निरंजन सोय॥ यहि प्रकार जाको मन लागे। जरा, मरन, जी तें भ्रम भागे॥ [गोपी-वचन] सुनु ऊधो! हौं कौन सयानी? तुम तौ महापुरुष बड़ज्ञानी॥ जोगी होय सो जोगहि जाने। नवधा भक्ति सदा मन माने॥ भाव-भगति हरिजन चित धारें। ज्योति-रूप शिवसनक बिचारें॥ तुम कह रचि रचि कहत सयानी। अबला हरि के रूप दिवानी॥ जात-पीर बाँझा नहिं जाने। बिनु देखे कैसे रुचि माने॥ फिरि फिरि कहे वहै सुधि आवे। स्यामरूप बिनु और न भावे॥ जोग-समाधि जोति चित लावे। परमानंद परमपद पावे॥ नवकिसोर को जबहिं निहारें। कोटि ज्योति वा छबि पै वारें॥ सजल मेघ घनस्याम-सरीर। रूप ठगी हलधर के बीर॥ सिर श्रीखंड, कुंडल, बनमाल। क्यों बिसरैं वे नयन बिसाल? मृगमद तिलक अलक घुँघरारे। उन मोहन मन हरे हमारे॥ भृकुटी बिकट, नासिका राजे। अरुन अधर मुरली कल बाजे॥ दाड़िम-दसन-दमक-दुति सोहे। मृदु मुसकानि मदन-मन मोहे॥ चारु चिबुक, उर पर गजमोती। दूरि करत उड़ुगन की जोती॥ कंकन, किंकिनि, पदिक बिराजे। चलत चरन कल नूपुर बाजे॥ बन की धातु चित्र तनु किए। वह छबि चुभि जु रही हम हिए॥ पीत बसन छबि बरनि न जाई। नखसिख सुंदर कुँवर कन्हाई॥ रूपरासि ग्वालन को संगी। कब देखें वह रूप त्रिभंगी? जो तुम हित की बात सुनावौ। मदनगोपालहि क्यों न मिलावौ? [उद्धव-वचन] ताहि भजहु किन सबै सयानी? खोजत जाहि महामुनि ज्ञानी॥ जाके रूप-रेख कछु नाहीं। नयन मूँदि चितवहु चित माहीं॥ हृदय-कमल में जोति बिराजे। अनहद नाद निरंतर बाजे॥ इड़ा पिंगला सुखमन नारी। सुन्य सहज में बसे मुरारी॥ मात पिता नहिं दारा भाई। जल थल घट घट रहे समाई॥ यहि प्रकार भव दुस्तर तरिहौ। जोग-पंथ क्रम क्रम अनुसरिहौ॥ [गोपी-वचन] यह मधुकर! मुख मूँदहु जाई। हमरे चित बित हरि यदुराई॥ ब्रजबासिनि गोपाल-उपासी। ब्रह्मज्ञान सुनि आवे हाँसी॥ अब लौं जोग कबहूँ नहिं आयो। मानो कुब्जा-रूपहि पायो॥ खोलि सुगाहक पाय दिखायो। माधव मधुकर-हाथ पठायो॥ अबला ठगी सकल ब्रज हेरी। सो ठग ठग्यो कंस की चेरी॥ राम-जनम-तपसी जदुराई। तिहि फल वधू कूबरी पाई॥ सीता-बिरह बहुत दुख पायो। अब कुबजा मिलि हियो सिरायो॥ ज्ञान निरास कहा लै कीजै। जोग-मोट दासी-सिर दीजै॥ [उद्धव-वचन] वह अच्युत अबिगत अबिनासी। त्रिगुन-रहित बपु, धरे न दासी॥ हे गोपी! सुनु बात हमारी। है वह सुन्य सुनहु ब्रजनारी॥ नहिं दासी ठकुराइनि कोई। जहाँ देखहु तहाँ ब्रह्महि सोई॥ आपुहि औरहि ब्रह्महि जाने। ब्रह्म बिना दूसर नहिं माने॥ [गोपी-वचन] बार बार ये बचन निवारो। भक्ति-बिरोधी ज्ञान तुम्हारो॥ होत कहा उपदेसे तेरे? नयन सुबस नाहीं, अलि, मेरे॥ हरिपथ जोवत निमिष न लागे। कृष्ण-बियोगिनि निसिदिन जागे॥ नंदनंदन के देखे जीवें। रुचि वह रूप, पवन नहिं पीवें॥ जब हरि आवें तब सुख पावें। मोहन मूरति निरखि सिरावें॥ दुसह बचन अलि हमहिं न भावे। जोगकथा ओढ़ें कि दसावें?॥ [उद्धव-वचन] ऊधो कहैं, धन्य ब्रजबाल। जिनके सरबस मदनगोपाल॥ वह मत त्याग्यो, यह मति आई। तुम्हरे दरस भगति मैं पाई॥ तुम मम गुरु मैं दास तुम्हारो। भगति सुनाय जगत निस्तारो॥ भ्रमरगीत जे सुनें सुनावें। प्रेमभक्ति सो प्रानी पावें॥ सूरदास गोपी बड़भागी। हरिदरसन को ठगौरी लागी

[uddhava-vacana] hauṃ tuma pai brajanātha paṭhāyo| ātamajñāna-sikhāvana āyo|| āpuhi puruṣa āpuhī nārī| āpuhi bānaprastha bratadhārī|| āpuhi pitā, āpuhī mātā| āpuhi bhaginī, āpuhi bhrātā|| āpuhi paṃḍita, āpuhi jñānī| āpuhi rājā, āpuhi rānī|| āpuhi dharatī, āpu akāsā| āpuhi svāmī, āpuhi dāsā|| āpuhi gvāla, āpuhi gāī| āpuhi āpa carāvana jāī|| āpuhi bha~vara, āpuhi phūla| ātamajñāna binā jaga bhūla|| raṃka rāva dūjo nahiṃ koya| āpuhi āpa niraṃjana soya|| yahi prakāra jāko mana lāge| jarā, marana, jī teṃ bhrama bhāge|| [gopī-vacana] sunu ūdho! hauṃ kauna sayānī? tuma tau mahāpuruṣa bar̤ajñānī|| jogī hoya so jogahi jāne| navadhā bhakti sadā mana māne|| bhāva-bhagati harijana cita dhāreṃ| jyoti-rūpa śivasanaka bicāreṃ|| tuma kaha raci raci kahata sayānī| abalā hari ke rūpa divānī|| jāta-pīra bā~jhā nahiṃ jāne| binu dekhe kaise ruci māne|| phiri phiri kahe vahai sudhi āve| syāmarūpa binu aura na bhāve|| joga-samādhi joti cita lāve| paramānaṃda paramapada pāve|| navakisora ko jabahiṃ nihāreṃ| koṭi jyoti vā chabi pai vāreṃ|| sajala megha ghanasyāma-sarīra| rūpa ṭhagī haladhara ke bīra|| sira śrīkhaṃḍa, kuṃḍala, banamāla| kyoṃ bisaraiṃ ve nayana bisāla? mṛgamada tilaka alaka ghu~gharāre| una mohana mana hare hamāre|| bhṛkuṭī bikaṭa, nāsikā rāje| aruna adhara muralī kala bāje|| dār̤ima-dasana-damaka-duti sohe| mṛdu musakāni madana-mana mohe|| cāru cibuka, ura para gajamotī| dūri karata ur̤ugana kī jotī|| kaṃkana, kiṃkini, padika birāje| calata carana kala nūpura bāje|| bana kī dhātu citra tanu kie| vaha chabi cubhi ju rahī hama hie|| pīta basana chabi barani na jāī| nakhasikha suṃdara ku~vara kanhāī|| rūparāsi gvālana ko saṃgī| kaba dekheṃ vaha rūpa tribhaṃgī? jo tuma hita kī bāta sunāvau| madanagopālahi kyoṃ na milāvau? [uddhava-vacana] tāhi bhajahu kina sabai sayānī? khojata jāhi mahāmuni jñānī|| jāke rūpa-rekha kachu nāhīṃ| nayana mū~di citavahu cita māhīṃ|| hṛdaya-kamala meṃ joti birāje| anahada nāda niraṃtara bāje|| ir̤ā piṃgalā sukhamana nārī| sunya sahaja meṃ base murārī|| māta pitā nahiṃ dārā bhāī| jala thala ghaṭa ghaṭa rahe samāī|| yahi prakāra bhava dustara tarihau| joga-paṃtha krama krama anusarihau|| [gopī-vacana] yaha madhukara! mukha mū~dahu jāī| hamare cita bita hari yadurāī|| brajabāsini gopāla-upāsī| brahmajñāna suni āve hā~sī|| aba lauṃ joga kabahū~ nahiṃ āyo| māno kubjā-rūpahi pāyo|| kholi sugāhaka pāya dikhāyo| mādhava madhukara-hātha paṭhāyo|| abalā ṭhagī sakala braja herī| so ṭhaga ṭhagyo kaṃsa kī cerī|| rāma-janama-tapasī jadurāī| tihi phala vadhū kūbarī pāī|| sītā-biraha bahuta dukha pāyo| aba kubajā mili hiyo sirāyo|| jñāna nirāsa kahā lai kījai| joga-moṭa dāsī-sira dījai|| [uddhava-vacana] vaha acyuta abigata abināsī| triguna-rahita bapu, dhare na dāsī|| he gopī! sunu bāta hamārī| hai vaha sunya sunahu brajanārī|| nahiṃ dāsī ṭhakurāini koī| jahā~ dekhahu tahā~ brahmahi soī|| āpuhi aurahi brahmahi jāne| brahma binā dūsara nahiṃ māne|| [gopī-vacana] bāra bāra ye bacana nivāro| bhakti-birodhī jñāna tumhāro|| hota kahā upadese tere? nayana subasa nāhīṃ, ali, mere|| haripatha jovata nimiṣa na lāge| kṛṣṇa-biyogini nisidina jāge|| naṃdanaṃdana ke dekhe jīveṃ| ruci vaha rūpa, pavana nahiṃ pīveṃ|| jaba hari āveṃ taba sukha pāveṃ| mohana mūrati nirakhi sirāveṃ|| dusaha bacana ali hamahiṃ na bhāve| jogakathā or̤heṃ ki dasāveṃ?|| [uddhava-vacana] ūdho kahaiṃ, dhanya brajabāla| jinake sarabasa madanagopāla|| vaha mata tyāgyo, yaha mati āī| tumhare darasa bhagati maiṃ pāī|| tuma mama guru maiṃ dāsa tumhāro| bhagati sunāya jagata nistāro|| bhramaragīta je suneṃ sunāveṃ| premabhakti so prānī pāveṃ|| sūradāsa gopī bar̤abhāgī| haridarasana ko ṭhagaurī lāgī

माधव जू! मैं अति सचु पायो। अपने जानि संदेस-ब्याज करि ब्रजजन-मिलन पठायो॥ छमा करो तौ करौं बीनती जो उत देखि हौं आयो। श्रीमुख ज्ञानपंथ जो उचरयो तिन पै कछु न सुहायो॥ सकल निगम-सिद्धांत जन्म-श्रम स्यामा सहज सुनायो। नहिं श्रुति, सेष, महेस, प्रजापति जो रस गोपिन गायो॥ कटुक कथा लागी मोहिं अपनी, वा रस-सिंधु समायो। जे उत तुम देखे और भाँति मैं, सकल तृषाहि बुझायो॥ तुम्हरी अकथ-कथा तुम जानो हम जन नाहिं बसायो। सूरदास सुंदर पद निरखत नयनन नीर बहायो

mādhava jū! maiṃ ati sacu pāyo| apane jāni saṃdesa-byāja kari brajajana-milana paṭhāyo|| chamā karo tau karauṃ bīnatī jo uta dekhi hauṃ āyo| śrīmukha jñānapaṃtha jo ucarayo tina pai kachu na suhāyo|| sakala nigama-siddhāṃta janma-śrama syāmā sahaja sunāyo| nahiṃ śruti, seṣa, mahesa, prajāpati jo rasa gopina gāyo|| kaṭuka kathā lāgī mohiṃ apanī, vā rasa-siṃdhu samāyo| je uta tuma dekhe aura bhā~ti maiṃ, sakala tṛṣāhi bujhāyo|| tumharī akatha-kathā tuma jāno hama jana nāhiṃ basāyo| sūradāsa suṃdara pada nirakhata nayanana nīra bahāyo

दिन दस घोष चलहु गोपाल। गैयन को अवसेर मिटावहु भेंटहु भुज भरि ग्वाल॥ नाचत नहीं मोर वा दिन तें आए बरषा-काल। मृग दूबरे दरस तुम्हरे बिनु सुनत न बेनु रसाल॥ बृंदाबन भावतो तुम्हारो देखहु स्याम तमाल। सूरदास मैया जसुमति के फिरि आवहु नंदलाल

dina dasa ghoṣa calahu gopāla| gaiyana ko avasera miṭāvahu bheṃṭahu bhuja bhari gvāla|| nācata nahīṃ mora vā dina teṃ āe baraṣā-kāla| mṛga dūbare darasa tumhare binu sunata na benu rasāla|| bṛṃdābana bhāvato tumhāro dekhahu syāma tamāla| sūradāsa maiyā jasumati ke phiri āvahu naṃdalāla

अब अति पंगु भयो मन मेरो। गयो तहाँ निर्गुन कहिबे को, भयो सगुन को चेरो॥ अति अज्ञान कहत कहि आयो दूत भयो वहि केरो। निज जन जानि जतन तें तिनसों कीन्हो नेह घनेरो॥ मैं कछु कही ज्ञानगाथा तें नेकु न दरसति नेरो। सूर मधुप उठि चल्यो मधुपुरी बोरि जोग को बेरो

aba ati paṃgu bhayo mana mero| gayo tahā~ nirguna kahibe ko, bhayo saguna ko cero|| ati ajñāna kahata kahi āyo dūta bhayo vahi kero| nija jana jāni jatana teṃ tinasoṃ kīnho neha ghanero|| maiṃ kachu kahī jñānagāthā teṃ neku na darasati nero| sūra madhupa uṭhi calyo madhupurī bori joga ko bero

माधव! सुनौ ब्रज को नेम। बूझि हम षट मास देख्यो गोपिकन को प्रेम॥ हृदय तें नहिं टरत उनके स्याम राम समेत। अस्रु-सलिल-प्रवाह उर पर अरघ नयनन देत॥ चीर अंचल, कलस कुच, मनो पानि पदुम चढ़ाय। प्रगट लीला देखि, हरि के कर्म, उठतीं गाय॥ देह गेह-समेत अर्पन कमललोचन-ध्यान। सूर उनके भजन आगे लगै फीको ज्ञान

mādhava! sunau braja ko nema| būjhi hama ṣaṭa māsa dekhyo gopikana ko prema|| hṛdaya teṃ nahiṃ ṭarata unake syāma rāma sameta| asru-salila-pravāha ura para aragha nayanana deta|| cīra aṃcala, kalasa kuca, mano pāni paduma car̤hāya| pragaṭa līlā dekhi, hari ke karma, uṭhatīṃ gāya|| deha geha-sameta arpana kamalalocana-dhyāna| sūra unake bhajana āge lagai phīko jñāna

कहँ लौं कहिए ब्रज की बात। सुनहु स्याम! तुम बिनु उन लोगन जैसे दिवस बिहात॥ गोपी, ग्वाल, गाय, गोसुत सब मलिनबदन, कृसगात। परम दीन जनु सिसिर-हेम-हत अंबुजगन बिनु पात॥ जो कोउ आवत देखति हैं सब मिलि बूझति कुसलात। चलन न देत प्रेम-आतुर उर, कर चरनन लपटात॥ पिक, चातक बन बसन न पावहिं, बायस बलिहि न खात। सूर स्याम संदेसन के डर पथिक न वा मग जात

kaha~ lauṃ kahie braja kī bāta| sunahu syāma! tuma binu una logana jaise divasa bihāta|| gopī, gvāla, gāya, gosuta saba malinabadana, kṛsagāta| parama dīna janu sisira-hema-hata aṃbujagana binu pāta|| jo kou āvata dekhati haiṃ saba mili būjhati kusalāta| calana na deta prema-ātura ura, kara caranana lapaṭāta|| pika, cātaka bana basana na pāvahiṃ, bāyasa balihi na khāta| sūra syāma saṃdesana ke ḍara pathika na vā maga jāta

उन में पाँच दिवस जो बसिये। नाथ! तिहारी सौं जिय उमगत, फेरि अपनपो कस ये? वह लीला बिनोद गोपिन के देखे ही बनि आवै। मोको बहुरि कहाँ वैसो सुख, बड़भागी सो पावै॥ मनसि, बचन, कर्मना, कहत हौं नाहिंन कछु अब राखी। सूर काढ़ि डार्यो हौं ब्रज तें दूध-माँझ की माखी

una meṃ pā~ca divasa jo basiye| nātha! tihārī sauṃ jiya umagata, pheri apanapo kasa ye? vaha līlā binoda gopina ke dekhe hī bani āvai| moko bahuri kahā~ vaiso sukha, bar̤abhāgī so pāvai|| manasi, bacana, karmanā, kahata hauṃ nāhiṃna kachu aba rākhī| sūra kār̤hi ḍāryo hauṃ braja teṃ dūdha-mā~jha kī mākhī

चित दै सुनौ, स्याम प्रबीन! हरि तिहारे बिरह राधे मैं जो देखी छीन। कहन को संदेस सुंदरि गवन मो तन कीन॥ छुटी छुद्रावलि, चरन अरुझे, गिरी बलहीन। बहुरि उठी सँभारि, सुभट ज्यों परम साहस कीन॥ बिन देखे मनमोहन मुखरो सब सुख उनको दीन। सूर हरि के चरन-अंबुज रहीं आसा-लीन

cita dai sunau, syāma prabīna! hari tihāre biraha rādhe maiṃ jo dekhī chīna| kahana ko saṃdesa suṃdari gavana mo tana kīna|| chuṭī chudrāvali, carana arujhe, girī balahīna| bahuri uṭhī sa~bhāri, subhaṭa jyoṃ parama sāhasa kīna|| bina dekhe manamohana mukharo saba sukha unako dīna| sūra hari ke carana-aṃbuja rahīṃ āsā-līna

माधव! यह ब्रज को ब्योहार। मेरो कह्यो पवन को भुस भयो, गावत नंदकुमार॥ एक ग्वारि गोधन लै रेंगति, एक लकुट कर लेति। एक मंडली करि बैठारति, छाक बांटि कै देति॥ एक ग्वारि नटवर बहु लीला, एक कर्म-गुन गावति। कोटि भांति कै मैं समुझाई नेकु न उर में ल्यावति॥ निसिबासर ये ही ब्रत सब ब्रत दिन दिन नूतन प्रीति। सूर सकल फीको लागत है देखत वह रसरीति

mādhava! yaha braja ko byohāra| mero kahyo pavana ko bhusa bhayo, gāvata naṃdakumāra|| eka gvāri godhana lai reṃgati, eka lakuṭa kara leti| eka maṃḍalī kari baiṭhārati, chāka bāṃṭi kai deti|| eka gvāri naṭavara bahu līlā, eka karma-guna gāvati| koṭi bhāṃti kai maiṃ samujhāī neku na ura meṃ lyāvati|| nisibāsara ye hī brata saba brata dina dina nūtana prīti| sūra sakala phīko lāgata hai dekhata vaha rasarīti