Padas 301–315

मधुकर! जोग न होत सँदेसन। नाहिंन कोउ ब्रज में या सुनिहै कोटि जतन उपदेसन। रबि के उदय मिलन चकई को संध्या-समय अँदेस न। क्यों बन बसैं बापुरे चातक, बधिकन्ह काज बधे सन॥ नगर एक नायक बिनु सूनो, नाहिंन काज सबै सन। सूर सुभाय मिटत क्यों कारे जिहि कुल रीति डसै सन

madhukara! joga na hota sa~desana| nāhiṃna kou braja meṃ yā sunihai koṭi jatana upadesana| rabi ke udaya milana cakaī ko saṃdhyā-samaya a~desa na| kyoṃ bana basaiṃ bāpure cātaka, badhikanha kāja badhe sana|| nagara eka nāyaka binu sūno, nāhiṃna kāja sabai sana| sūra subhāya miṭata kyoṃ kāre jihi kula rīti ḍasai sana

यहि डर बहुरि न गोकुल आए। सुन री सखी! हमारी करनी समुझि मधुपुरी छाए॥ अधरातिक तें उठि बालक सब मोहिं जगै हैं आय। बिनु पदत्रान बहुरि पठवैंगी बनहिं चरावन गाय॥ सूनो भवन आनि रोकैगी चोरत दधि नवनीत। पकरि जसोदा पै लै जैहैं, नाचति गावति गीत॥ ग्वालिनि मोहिं बहुरि बाँधैंगी केते बचन लगाय। एते दुःखन सुमिरि सूर मन, बहुरि सहै को जाय

yahi ḍara bahuri na gokula āe| suna rī sakhī! hamārī karanī samujhi madhupurī chāe|| adharātika teṃ uṭhi bālaka saba mohiṃ jagai haiṃ āya| binu padatrāna bahuri paṭhavaiṃgī banahiṃ carāvana gāya|| sūno bhavana āni rokaigī corata dadhi navanīta| pakari jasodā pai lai jaihaiṃ, nācati gāvati gīta|| gvālini mohiṃ bahuri bā~dhaiṃgī kete bacana lagāya| ete duḥkhana sumiri sūra mana, bahuri sahai ko jāya

तब तें बहुरि न कोऊ आयो। वहै जो एक बार ऊधो पै कछुक सोध सो पायो॥ यहै बिचार करैं, सखि, माधव इतो गहरु क्यों लायो। गोकुलनाथ कृपा करि कबहूँ लिखियौ नाहिं पठायो॥ अवधि आस एती करि यह मन अब जैहै बौरायो। सूरदास प्रभु चातक बोल्यो, मेघन अम्बर छायो

taba teṃ bahuri na koū āyo| vahai jo eka bāra ūdho pai kachuka sodha so pāyo|| yahai bicāra karaiṃ, sakhi, mādhava ito gaharu kyoṃ lāyo| gokulanātha kṛpā kari kabahū~ likhiyau nāhiṃ paṭhāyo|| avadhi āsa etī kari yaha mana aba jaihai baurāyo| sūradāsa prabhu cātaka bolyo, meghana ambara chāyo

मेरो मन मथुराइ रह्यो। गयो जो तन तें बहुरि न आयो, लै गोपाल गह्यो॥ इन नयनन को भेद न पाया, केइ भेदिया कह्यो। राख्यो रूप चोरि चित-अन्तर, सोइ हरि सोध लह्यो॥ आए बोलत ता बिन ऊधो 'मनि दै लेहु मह्यो'। निर्गुन साँटि गीबिंदहि माँगत, क्यों दुख जात सह्यो॥ जेहि आधार आजु लौं यह तनु ऐसे ही निबह्यो। सोइ छिंड़ाय लेत सुनु सूर चाहत हृदय दह्यो

mero mana mathurāi rahyo| gayo jo tana teṃ bahuri na āyo, lai gopāla gahyo|| ina nayanana ko bheda na pāyā, kei bhediyā kahyo| rākhyo rūpa cori cita-antara, soi hari sodha lahyo|| āe bolata tā bina ūdho 'mani dai lehu mahyo'| nirguna sā~ṭi gībiṃdahi mā~gata, kyoṃ dukha jāta sahyo|| jehi ādhāra āju lauṃ yaha tanu aise hī nibahyo| soi chiṃr̤āya leta sunu sūra cāhata hṛdaya dahyo

लोग सब देत सुहाई बातें। कहतहि सुगम करत नहिं आबै, बोलि न आवत तातें॥ पहिले आगि सुनत चन्दन सी सती बहुत उमहै। समाचार ताते अरु सीरे पाछे कौन कहै॥ कहत सबै संग्राम सुगम अति कुसुमलता करवार। सूरदास सिर दिए सूरमा पाछे कौन बिचार?

loga saba deta suhāī bāteṃ| kahatahi sugama karata nahiṃ ābai, boli na āvata tāteṃ|| pahile āgi sunata candana sī satī bahuta umahai| samācāra tāte aru sīre pāche kauna kahai|| kahata sabai saṃgrāma sugama ati kusumalatā karavāra| sūradāsa sira die sūramā pāche kauna bicāra?

बिछुरत श्री ब्रजराज आज सखि! नैनन की परतीति गई। उड़ि न मिले हरि-संग बिहंगम ह्वै न गए घनस्याम-मई। यातें क्रूर कुटिल सह मेचक बृथा मीन छवि छीनि लई। रूप-रसिक लालची कहावत, सो करनी कछु तौं न भई॥ अब काहे सोचत जल मोचत, समय गए नित सूल नई। सूरदास याहीं ते जड़ भए जब तें पलकन दगा दई

bichurata śrī brajarāja āja sakhi! nainana kī paratīti gaī| ur̤i na mile hari-saṃga bihaṃgama hvai na gae ghanasyāma-maī| yāteṃ krūra kuṭila saha mecaka bṛthā mīna chavi chīni laī| rūpa-rasika lālacī kahāvata, so karanī kachu tauṃ na bhaī|| aba kāhe socata jala mocata, samaya gae nita sūla naī| sūradāsa yāhīṃ te jar̤a bhae jaba teṃ palakana dagā daī

को कहै हरि सों बात हमारी? हम तौ यह तब तें जिय जान्यौ जबै भए मधुकर अधिकारी॥ एक प्रकृति, एकै कैतव-गति, तेहि गुन अस जिय भावै। प्रगटत है नव कंज मनोहर, ब्रज किंसुक कारन कत आवै॥ कंजतीर चंपक-रस-चंचल, गति सब ही तें न्यारी। ता अलि की संगति बसि मधुपुरि सूरदास प्रभु सुरति बिसारी

ko kahai hari soṃ bāta hamārī? hama tau yaha taba teṃ jiya jānyau jabai bhae madhukara adhikārī|| eka prakṛti, ekai kaitava-gati, tehi guna asa jiya bhāvai| pragaṭata hai nava kaṃja manohara, braja kiṃsuka kārana kata āvai|| kaṃjatīra caṃpaka-rasa-caṃcala, gati saba hī teṃ nyārī| tā ali kī saṃgati basi madhupuri sūradāsa prabhu surati bisārī

हमारे स्याम चलन चहत हैं दूरि। मधुबन बसत आस ही सजनी! अब मरिहैं जो बिसूरि॥ कौने कही, कहाँ सुनि आई? केहि दिसि रथ की धूरि। संगहि सबै चलौ माधव के नातरु मरिबो झूरि। पच्छिम दिसि एक नगर द्वारका, सिन्धु रह्यो जल पूरि। सूर स्याम क्यों जीवहिं बाला, जात सजीवन मूरि

hamāre syāma calana cahata haiṃ dūri| madhubana basata āsa hī sajanī! aba marihaiṃ jo bisūri|| kaune kahī, kahā~ suni āī? kehi disi ratha kī dhūri| saṃgahi sabai calau mādhava ke nātaru maribo jhūri| pacchima disi eka nagara dvārakā, sindhu rahyo jala pūri| sūra syāma kyoṃ jīvahiṃ bālā, jāta sajīvana mūri

उती दूर तें को आवै हो। जाके हाथ सँदेस पठाऊँ सो कहि कान्ह कहाँ पावै हो॥ सिंधुकूल एक देस कहत हैं, देख्यो सुन्यो न मन धावै हो। तहाँ रच्यो नव नगर नंदसुत पुरि द्वारका कहावै हो॥ कंचन के सब भवन मनोहर, राजा रंक न तृन छावै हो। ह्वा के सब बासी लोगन को ब्रज को बसिबो नहिं भावै हो॥ बहु विधि करति बिलाप बिरहिनी बहुत उपावन चित लावै हो। कहा करौं कहँ जाउँ सूर प्रभु को मोहिं हरि पै पहुँचावै हो

utī dūra teṃ ko āvai ho| jāke hātha sa~desa paṭhāū~ so kahi kānha kahā~ pāvai ho|| siṃdhukūla eka desa kahata haiṃ, dekhyo sunyo na mana dhāvai ho| tahā~ racyo nava nagara naṃdasuta puri dvārakā kahāvai ho|| kaṃcana ke saba bhavana manohara, rājā raṃka na tṛna chāvai ho| hvā ke saba bāsī logana ko braja ko basibo nahiṃ bhāvai ho|| bahu vidhi karati bilāpa birahinī bahuta upāvana cita lāvai ho| kahā karauṃ kaha~ jāu~ sūra prabhu ko mohiṃ hari pai pahu~cāvai ho

हमैं नंदनँदन को गारो। इन्द्रकोप ब्रज बह्यो जात हो, गिरि धरि सकल उबारो॥ रामकृस्न बल बदति न काहू, निडर चरावत चारो। सगरे बिगरे को सिर ऊपर बल को बीर रखबारो॥ तब तें हम न भरोसो पायो केसि तृनाब्रत मारो। सूरदास प्रभु रङ्गभूमि में हरि जीतो, नृप हारो

hamaiṃ naṃdana~dana ko gāro| indrakopa braja bahyo jāta ho, giri dhari sakala ubāro|| rāmakṛsna bala badati na kāhū, niḍara carāvata cāro| sagare bigare ko sira ūpara bala ko bīra rakhabāro|| taba teṃ hama na bharoso pāyo kesi tṛnābrata māro| sūradāsa prabhu raṅgabhūmi meṃ hari jīto, nṛpa hāro

ऐसे माई पावस ऋतु प्रथम सुरति करि माधवजू आवै री। बरन बरन अनेक जलधर अति मनोहर बेष। यहि समय यह गगन-सोभा सबन तें सुबिसेष॥ उड़त बक, सुक-बृन्द राजत, रटत चातक मोर। बहुत भाँति चित हित-रुचि बाढ़त दामिनी घनघोर॥ धरनि-तनु तृनरोम हर्षित प्रिय समागम जानि। और द्रुम बल्ली बियोगिनी मिलीं पति पहिचानि॥ हस, पिक, सुक, सारिका अलिपुंज नाना नाद। मुदित मंगल मेघ बरसत, गत बिहंग-बिषाद॥ कुटज, कुन्द, कदम्ब, कोबिद, कर्निकार, सु कंजु। केतकी, करबीर, चिलक बसन्त-सम तरु मंजु॥ सघन तरु कलिका अलंकृत, सुकृत सुमन सुबास। निरखि नयनन्ह होत मन माधव-मिलन की आस॥ मनुज मृग पसु पच्छि परिमित औ अमित जे नाम। सुख स्वदेस बिदेस प्रीतम सकल सुमिरत धाम॥ ह्वै है न चित्त उपाय सोच न कछू परत बिचार। नाहिं ब्रजबासी बिसारत निकट नन्दकुमार॥ सुमिरि दसा दयाल सुंदर ललित गति मृदु हास। चारु लोल कपोल कुण्डल डोल बलित-प्रकास॥ बेनु कर कल गीत गावत गोपसिसु बहु पास। सुदिन कब यहि आँखि देखैं बहुरि बाल-बिलास॥ बार बारहिं सुधि रहति अति बिरह व्याकुल होति। बात-बेग सो लगै जैसो दीन दीपक ज्योति॥ सुनि बिलाप कृपाल सूर दास प्रान प्रतीति। दरस दै दुख दूरि करिहैं, सहि न सकिहैं प्रीति

aise māī pāvasa ṛtu prathama surati kari mādhavajū āvai rī| barana barana aneka jaladhara ati manohara beṣa| yahi samaya yaha gagana-sobhā sabana teṃ subiseṣa|| ur̤ata baka, suka-bṛnda rājata, raṭata cātaka mora| bahuta bhā~ti cita hita-ruci bār̤hata dāminī ghanaghora|| dharani-tanu tṛnaroma harṣita priya samāgama jāni| aura druma ballī biyoginī milīṃ pati pahicāni|| hasa, pika, suka, sārikā alipuṃja nānā nāda| mudita maṃgala megha barasata, gata bihaṃga-biṣāda|| kuṭaja, kunda, kadamba, kobida, karnikāra, su kaṃju| ketakī, karabīra, cilaka basanta-sama taru maṃju|| saghana taru kalikā alaṃkṛta, sukṛta sumana subāsa| nirakhi nayananha hota mana mādhava-milana kī āsa|| manuja mṛga pasu pacchi parimita au amita je nāma| sukha svadesa bidesa prītama sakala sumirata dhāma|| hvai hai na citta upāya soca na kachū parata bicāra| nāhiṃ brajabāsī bisārata nikaṭa nandakumāra|| sumiri dasā dayāla suṃdara lalita gati mṛdu hāsa| cāru lola kapola kuṇḍala ḍola balita-prakāsa|| benu kara kala gīta gāvata gopasisu bahu pāsa| sudina kaba yahi ā~khi dekhaiṃ bahuri bāla-bilāsa|| bāra bārahiṃ sudhi rahati ati biraha vyākula hoti| bāta-bega so lagai jaiso dīna dīpaka jyoti|| suni bilāpa kṛpāla sūra dāsa prāna pratīti| darasa dai dukha dūri karihaiṃ, sahi na sakihaiṃ prīti

चलहु धौं लै आवहिं गोपालै। पायँ पकरि कै निहुरि बिनति कहि, गहि हलधर की बाहँ बिसालै॥ बारक बहुरि आनि कै देखहिं नन्द आपने बालै। गैयन गनत गोप-गोपी-सह, सीखत बेनु रसालै॥ यद्यपि महाराज सुख-सम्पति कौन गनै मोतिन अरु लालै। तदपि सूर आकरषि लियो मन उर घुँघचिन की मालै

calahu dhauṃ lai āvahiṃ gopālai| pāya~ pakari kai nihuri binati kahi, gahi haladhara kī bāha~ bisālai|| bāraka bahuri āni kai dekhahiṃ nanda āpane bālai| gaiyana ganata gopa-gopī-saha, sīkhata benu rasālai|| yadyapi mahārāja sukha-sampati kauna ganai motina aru lālai| tadapi sūra ākaraṣi liyo mana ura ghu~ghacina kī mālai

बलैया लैहौं, हो बीर बादर! तुम्हरे रूप सम हमरे प्रीतम गए निकट जल-सागर॥ पा लागौं द्वारका सिधारौ बिरहिनि के दुखदागर। ऐसो संग सूर के प्रभु को करुनाधाम उजागर

balaiyā laihauṃ, ho bīra bādara! tumhare rūpa sama hamare prītama gae nikaṭa jala-sāgara|| pā lāgauṃ dvārakā sidhārau birahini ke dukhadāgara| aiso saṃga sūra ke prabhu ko karunādhāma ujāgara

उपमा न्याय कही अँगन की। गए मधुपुरी क्यों फिरि आवैं, सोभा कोटि अनंगन की॥ मोरमुकुट सिर सुरधनु की छबि दूरहिं तें दरसावै। जो कोउ करै कोटि कैसेहु नेकहु छुवन न पावै॥ अलक-भ्रमर भ्रमि भ्रमत सदा बन वहु-बेलीरस चाखै। कमल-कोस-बासी कहियत पै बंस-बंस अपनो मन राखै॥ कुण्डल मकर, नयन नीरज से, नासा सुक कबिकुल गावै। थिर न रहै सकुचै निसि-बस ह्वै, पंजर रहिकै बेनु सुनावै॥ भ्रूधनु प्रान-हरन, दसनावलि हीरक, अधर सुबिंब। सहज कठिन, संगति बुधि-हर्ता, तहँ कीन्हों अवलम्ब॥ भुजा प्रचंड महा-रिपु मारक अंस सो क्यों ठहराय। तामे सप्त-छिद्र- युत मुरली मनहर मन्त्र पढ़ाय

upamā nyāya kahī a~gana kī| gae madhupurī kyoṃ phiri āvaiṃ, sobhā koṭi anaṃgana kī|| moramukuṭa sira suradhanu kī chabi dūrahiṃ teṃ darasāvai| jo kou karai koṭi kaisehu nekahu chuvana na pāvai|| alaka-bhramara bhrami bhramata sadā bana vahu-belīrasa cākhai| kamala-kosa-bāsī kahiyata pai baṃsa-baṃsa apano mana rākhai|| kuṇḍala makara, nayana nīraja se, nāsā suka kabikula gāvai| thira na rahai sakucai nisi-basa hvai, paṃjara rahikai benu sunāvai|| bhrūdhanu prāna-harana, dasanāvali hīraka, adhara subiṃba| sahaja kaṭhina, saṃgati budhi-hartā, taha~ kīnhoṃ avalamba|| bhujā pracaṃḍa mahā-ripu māraka aṃsa so kyoṃ ṭhaharāya| tāme sapta-chidra- yuta muralī manahara mantra par̤hāya

बारक जाइयो मिलि माधौ। को जानै कब छूटि जायगो स्वाँस, रहै जिय साधौ॥ पहुनेहु नंद बबा के आबहु देखि लेहुँ पल आधौ। मिल ही में बिपरीत करी बिधि, होत दरस को बाधौ॥ सो सुख सिव सनकादि न पावत जो सुख गोपिन लाधो। सूरदास राधा बिलपति है हरि को रूप अगाधो

bāraka jāiyo mili mādhau| ko jānai kaba chūṭi jāyago svā~sa, rahai jiya sādhau|| pahunehu naṃda babā ke ābahu dekhi lehu~ pala ādhau| mila hī meṃ biparīta karī bidhi, hota darasa ko bādhau|| so sukha siva sanakādi na pāvata jo sukha gopina lādho| sūradāsa rādhā bilapati hai hari ko rūpa agādho