Padas 346–360

ब्रज तें द्वै ऋतु पै न गई। पावस अरु ग्रीषम, प्रचंड, सखि! हरि बिनु अधिक भई॥ ऊरध स्वास समीर, नयन घन, सब जलजोग जुरे। बरषि जो प्रगट किए दुख दादुर हुते जे दूरि दुरे॥ बिषम बियोग दुसह दिनकर सम दिनप्रति उदय करे। हरि-बिधु बिमुख भए कहि सूर को तनताप हरे

braja teṃ dvai ṛtu pai na gaī| pāvasa aru grīṣama, pracaṃḍa, sakhi! hari binu adhika bhaī|| ūradha svāsa samīra, nayana ghana, saba jalajoga jure| baraṣi jo pragaṭa kie dukha dādura hute je dūri dure|| biṣama biyoga dusaha dinakara sama dinaprati udaya kare| hari-bidhu bimukha bhae kahi sūra ko tanatāpa hare

तुमहिं मधुप! गोपाल-दुहाई। कबहुंक स्याम करत ह्याँ को मन, किधौं निपट चित सुधि बिसराई? हम अहीरि मतिहीन बापुरी हटकत हू हठि करहिं मिताई। वै नागर मथुरा निरमोही, अँग अँग भरे कपट चतुराई॥ साँची कहहु देहु स्रवनन सुख, छाँड़हु जिया कुटिल धूताई। सूरदास प्रभु बिरद-लाज धरि मेटहु ह्याँ की नेकु हँसाई

tumahiṃ madhupa! gopāla-duhāī| kabahuṃka syāma karata hyā~ ko mana, kidhauṃ nipaṭa cita sudhi bisarāī? hama ahīri matihīna bāpurī haṭakata hū haṭhi karahiṃ mitāī| vai nāgara mathurā niramohī, a~ga a~ga bhare kapaṭa caturāī|| sā~cī kahahu dehu sravanana sukha, chā~r̤ahu jiyā kuṭila dhūtāī| sūradāsa prabhu birada-lāja dhari meṭahu hyā~ kī neku ha~sāī

बिरही कहाँ लौं आपु समारै? जब तें गंग परी हरिपद तें बहिबो नाहिं निवारै॥ नयनन तें रवि बिछुरि भँवत रहै, ससि अजहूँ तन गारै। नाभि तें बिछुरे कमल कंट भए, सिंधु भए जरि छारै॥ बैन तें बिछुरी बानि अबिधि भई बिधि ही, कौन निवारै। सूरदास सब अंग तें बिछुरी केहि बिद्या उपचारै

birahī kahā~ lauṃ āpu samārai? jaba teṃ gaṃga parī haripada teṃ bahibo nāhiṃ nivārai|| nayanana teṃ ravi bichuri bha~vata rahai, sasi ajahū~ tana gārai| nābhi teṃ bichure kamala kaṃṭa bhae, siṃdhu bhae jari chārai|| baina teṃ bichurī bāni abidhi bhaī bidhi hī, kauna nivārai| sūradāsa saba aṃga teṃ bichurī kehi bidyā upacārai

हे गोपाल गोकुल के वासी। ऐसी बातें सुनि सुनि ऊधो! लोग करत हैं हाँसी॥ मथि मथि सिंधु-सुधा सुर पीवै, असुर भए विष-आसी। इमि हति कंस, राज दै औरनि, आपु चाहि लई दासी॥ बिसरयो सूर बिरह-दुख अपनो सुनत चाल औरासी

he gopāla gokula ke vāsī| aisī bāteṃ suni suni ūdho! loga karata haiṃ hā~sī|| mathi mathi siṃdhu-sudhā sura pīvai, asura bhae viṣa-āsī| imi hati kaṃsa, rāja dai aurani, āpu cāhi laī dāsī|| bisarayo sūra biraha-dukha apano sunata cāla aurāsī

बदले को बदलो लै जाहु। उनकी एक हमारी दै, तुम सबै जनेया आहु॥ तुम तौ हमें जानि कै भोरौ, सबै सारौ दाँव। हमरी बेरि मुकरि के भागत, हिए चौगुनो चाव॥ अब तुम सखा वेगि ही जैयो, मेटहु उनको दाह। सूरदास ह्याँहार भए तें हम तुम दोउ साहु

badale ko badalo lai jāhu| unakī eka hamārī dai, tuma sabai janeyā āhu|| tuma tau hameṃ jāni kai bhorau, sabai sārau dā~va| hamarī beri mukari ke bhāgata, hie cauguno cāva|| aba tuma sakhā vegi hī jaiyo, meṭahu unako dāha| sūradāsa hyā~hāra bhae teṃ hama tuma dou sāhu

ऊधो! सूधे नेकु निहारो। हम अबलनि को सिखवन आए, सुन्यौ सयान तिहारो॥ निर्गुन कहौ; कहा कहियत है? तुम निर्गुन अति भारो। सेवत सगुन स्यामसुंदर को लहैं मुक्ति हम चारी॥ ह्वैं सालोक, सरूप, सयुज्यों, रहत समीप सदाई। सो तजि कहत और की औरै, तुम अलि! बड़े अराई॥ हम मूरख तुम बड़े चतुर हौ, बहुत कहा कहिए। वै ही काज सदा भटकत हौ, अब मारग गहिए॥ अहो अज्ञान! ज्ञान उपदेसत ज्ञानरूप हम ही। निसिदिन ध्यान सूर प्रभु को अलि! देखत जित तितहीं

ūdho! sūdhe neku nihāro| hama abalani ko sikhavana āe, sunyau sayāna tihāro|| nirguna kahau; kahā kahiyata hai? tuma nirguna ati bhāro| sevata saguna syāmasuṃdara ko lahaiṃ mukti hama cārī|| hvaiṃ sāloka, sarūpa, sayujyoṃ, rahata samīpa sadāī| so taji kahata aura kī aurai, tuma ali! bar̤e arāī|| hama mūrakha tuma bar̤e catura hau, bahuta kahā kahie| vai hī kāja sadā bhaṭakata hau, aba māraga gahie|| aho ajñāna! jñāna upadesata jñānarūpa hama hī| nisidina dhyāna sūra prabhu ko ali! dekhata jita titahīṃ

जा जा रे भौंरा! दूर दूर। रंग रूप और एकहि मूरति, मेरो मन कियो चूर चूर॥ जो लौं गरज निकट तौ लौं रहैं, काज सरै पै रहैं धूर। सूर स्याम अपनी गरजन को कलियन रस लै घूर घूर

jā jā re bhauṃrā! dūra dūra| raṃga rūpa aura ekahi mūrati, mero mana kiyo cūra cūra|| jo lauṃ garaja nikaṭa tau lauṃ rahaiṃ, kāja sarai pai rahaiṃ dhūra| sūra syāma apanī garajana ko kaliyana rasa lai ghūra ghūra

ऊधो! धनि तुम्हरो ब्यवहार। धनि वै ठाकुर, धनि वै सेवक, धनि तुम बर्तनहार॥ आम को काटि बबूर लगावत, चन्दन को कुरवार। सूर स्याम कैसे निबहैगी अन्धधुन्ध सरकार

ūdho! dhani tumharo byavahāra| dhani vai ṭhākura, dhani vai sevaka, dhani tuma bartanahāra|| āma ko kāṭi babūra lagāvata, candana ko kuravāra| sūra syāma kaise nibahaigī andhadhundha sarakāra

जाहु जाहु ऊधो! जाने हौ पहचाने हौ। जैसे हरि तैसे तुम सेवक, कपट चतुरई-साने हौ॥ निर्गुन-ज्ञान कहाँ तुम पायो, केहि सिखए ब्रज आने हौ। यह उपदेस देहु लै कुबजहि जाके रूप लुभाने हौ॥ कहँ लगि कहौं योग की बातैं, बाँचत नैन पिराने हो। सूरदास प्रभु हम हैं खोटी तुम तो बारह बाने हौ

jāhu jāhu ūdho! jāne hau pahacāne hau| jaise hari taise tuma sevaka, kapaṭa caturaī-sāne hau|| nirguna-jñāna kahā~ tuma pāyo, kehi sikhae braja āne hau| yaha upadesa dehu lai kubajahi jāke rūpa lubhāne hau|| kaha~ lagi kahauṃ yoga kī bātaiṃ, bā~cata naina pirāne ho| sūradāsa prabhu hama haiṃ khoṭī tuma to bāraha bāne hau

मधुबन सब कृतज्ञ धर्मीले। अति उदार परहित डोलत हैं, बोलत बचन सुसीले॥ प्रथम आय गोकुल सुफलकसुत लै मधुपुरिही सिधारे। वहाँ कंस ह्याँ हम दीनन को दूनो काज सँवारे॥ हरि को सिखै सिखावन हमको अब ऊधो पग धारे। ह्वाँ दासी-रति की कीरति कै, यहाँ जोग बिस्तारे॥ अब या बिरह-समुद्र सबै हम बूड़ी चहति नहीं। लीला सगुन नाव ही, सुनु अलि, तेहि अवलंब रही॥ अब, निर्गुनहि गहे जुवतीजन पारहि कहौ गई को? सूर अक्रूर छपद के मन में नाहिंन त्रास दई को

madhubana saba kṛtajña dharmīle| ati udāra parahita ḍolata haiṃ, bolata bacana susīle|| prathama āya gokula suphalakasuta lai madhupurihī sidhāre| vahā~ kaṃsa hyā~ hama dīnana ko dūno kāja sa~vāre|| hari ko sikhai sikhāvana hamako aba ūdho paga dhāre| hvā~ dāsī-rati kī kīrati kai, yahā~ joga bistāre|| aba yā biraha-samudra sabai hama būr̤ī cahati nahīṃ| līlā saguna nāva hī, sunu ali, tehi avalaṃba rahī|| aba, nirgunahi gahe juvatījana pārahi kahau gaī ko? sūra akrūra chapada ke mana meṃ nāhiṃna trāsa daī ko

ऊधो! भूलि भले भटके। कहत कही कछु बात लड़ैते तुम ताही अटके॥ देख्यो सकल सयान तिहारो, लीन्हे छरि फटके। तुमहिं दियो बहराय इतै कों, वै कुबजा सों अटके॥ लीजो जोग सँभारि आपनो जाहु तहाँ टटके। सूर, स्याम तजि कोउ न लैहे या जोगहि कटुके

ūdho! bhūli bhale bhaṭake| kahata kahī kachu bāta lar̤aite tuma tāhī aṭake|| dekhyo sakala sayāna tihāro, līnhe chari phaṭake| tumahiṃ diyo baharāya itai koṃ, vai kubajā soṃ aṭake|| lījo joga sa~bhāri āpano jāhu tahā~ ṭaṭake| sūra, syāma taji kou na laihe yā jogahi kaṭuke

जोग-सँदेसो ब्रज में लावत। थाके चरन तिहारे, ऊधो! बार बार के धावत॥ सुनिहै कथा कौन निर्गुन की, रचि पचि बात बनावत। सगुन-सुमेरु प्रगट देखियत, तुम तृन की ओट दुरावत॥ हम जानत परपंच स्याम के, बातन ही बहरावत। देखी सुनी न अब लौं कबहूँ, जल मथे माखन आवत॥ जोगी जोग-अपार सिंधु में ढूँढ़े हू नहिं पावत। ह्याँ हरि प्रगट प्रेम जसुमति के ऊखल आप बँधावत॥ चुप करि रहौ, ज्ञान ढँकि राखौ; कत हौ बिरह बढ़ावत। नंदकुमार कमलदल-लोचन कहि को जाहि न भावत? काहे को बिपरीत बात कहि सब के प्रान गँवावत। सोहै सो कित सूर अबलनि जेहि निगम नेति कहि गावत?

joga-sa~deso braja meṃ lāvata| thāke carana tihāre, ūdho! bāra bāra ke dhāvata|| sunihai kathā kauna nirguna kī, raci paci bāta banāvata| saguna-sumeru pragaṭa dekhiyata, tuma tṛna kī oṭa durāvata|| hama jānata parapaṃca syāma ke, bātana hī baharāvata| dekhī sunī na aba lauṃ kabahū~, jala mathe mākhana āvata|| jogī joga-apāra siṃdhu meṃ ḍhū~r̤he hū nahiṃ pāvata| hyā~ hari pragaṭa prema jasumati ke ūkhala āpa ba~dhāvata|| cupa kari rahau, jñāna ḍha~ki rākhau; kata hau biraha bar̤hāvata| naṃdakumāra kamaladala-locana kahi ko jāhi na bhāvata? kāhe ko biparīta bāta kahi saba ke prāna ga~vāvata| sohai so kita sūra abalani jehi nigama neti kahi gāvata?

कहा भयो हरि मथुरा गए। अब अलि! हरि कैसे सुख पावत तन द्वै भाँति भए॥ यहाँ अटक अति प्रेम पुरातन, ह्वाँ अति नेह नए। ह्वाँ सुनियत नृप-वेष, यहाँ दिन देखियत बेनु लए॥ कहा हाथ पर्यो सठ अक्रूरहिं वह ठग-ठाट ठए। अब क्यों कान्ह रहत गोकुल बिनु जोगन के सिखए॥ राजा राज करौ अपने घर माथे छत्र दए। चिरंजीव रहौ, सूर नंदसुत, जीजत मुख चितए

kahā bhayo hari mathurā gae| aba ali! hari kaise sukha pāvata tana dvai bhā~ti bhae|| yahā~ aṭaka ati prema purātana, hvā~ ati neha nae| hvā~ suniyata nṛpa-veṣa, yahā~ dina dekhiyata benu lae|| kahā hātha paryo saṭha akrūrahiṃ vaha ṭhaga-ṭhāṭa ṭhae| aba kyoṃ kānha rahata gokula binu jogana ke sikhae|| rājā rāja karau apane ghara māthe chatra dae| ciraṃjīva rahau, sūra naṃdasuta, jījata mukha citae

तुम्हारी प्रीति, ऊधो! पूरब जनम की अब तो भए मेरे तनहु के गरजी। बहुत दिनन तें बिरमि रहे हौ, संग तें बिछोहि हमहिं गए बरजी॥ जा दिन तें तुम प्रीति करी ही घटति न, बढ़ति तूल लेहु नरजी। सूरदास प्रभु तुम्हरे मिलन बिनु तन भयो ब्योंत, बिरह भयो दरजी

tumhārī prīti, ūdho! pūraba janama kī aba to bhae mere tanahu ke garajī| bahuta dinana teṃ birami rahe hau, saṃga teṃ bichohi hamahiṃ gae barajī|| jā dina teṃ tuma prīti karī hī ghaṭati na, bar̤hati tūla lehu narajī| sūradāsa prabhu tumhare milana binu tana bhayo byoṃta, biraha bhayo darajī

गोपालहि लै आवहू मनाय। अब की बेर कैसेहु करि, ऊधो! करि छल बल गहि पाय॥ दीजौ उनहिं सुसारि उरहनो संधि संधि समुझाय। जिनहिं छाँड़ि बढ़िया महँ आए ते विकल भए जदुराय॥ तुम सों कहा कहौं हो मधुकर! बातैं बहुत बनाय। बहियाँ पकरि सूर के प्रभु की, नंद की सौंह दिवाय

gopālahi lai āvahū manāya| aba kī bera kaisehu kari, ūdho! kari chala bala gahi pāya|| dījau unahiṃ susāri urahano saṃdhi saṃdhi samujhāya| jinahiṃ chā~r̤i bar̤hiyā maha~ āe te vikala bhae jadurāya|| tuma soṃ kahā kahauṃ ho madhukara! bātaiṃ bahuta banāya| bahiyā~ pakari sūra ke prabhu kī, naṃda kī sauṃha divāya