Padas 31–45

तेरो बुरो न कोऊ मानै। रस की बात मधुप नीरस, सुनु, रसिक होत सो जानै॥ दादुर बसै निकट कमलन के जन्म न रस पहिंचानै। अलि अनुराग उड़न मन बाँध्यो कहे सुनत नहिं कानै॥ सरिता चलै मिलन सागर को कूल मूल द्रुम भानै। कायर बकै, लोह तें भाजै, लरै जो सूर बखानै

tero buro na koū mānai| rasa kī bāta madhupa nīrasa, sunu, rasika hota so jānai|| dādura basai nikaṭa kamalana ke janma na rasa pahiṃcānai| ali anurāga ur̤ana mana bā~dhyo kahe sunata nahiṃ kānai|| saritā calai milana sāgara ko kūla mūla druma bhānai| kāyara bakai, loha teṃ bhājai, larai jo sūra bakhānai

घर ही के बाढ़े रावरे। नाहिंन मीत बियोगबस परे अनवउगे अलि बावरे! भुखमरि जाय चरै नहिं तिनुका सिंह को यहै स्वभाव रे। स्रवन सुधा-मुरली के पोषे जोग-जहर न खवाव, रे! ऊधो हमहि सीख का दैहो? हरि बिनु अनत न ठाँव रे! सूरदास कहा लै कीजै थाही नदिया नाव, रे!

ghara hī ke bār̤he rāvare| nāhiṃna mīta biyogabasa pare anavauge ali bāvare! bhukhamari jāya carai nahiṃ tinukā siṃha ko yahai svabhāva re| sravana sudhā-muralī ke poṣe joga-jahara na khavāva, re! ūdho hamahi sīkha kā daiho? hari binu anata na ṭhā~va re! sūradāsa kahā lai kījai thāhī nadiyā nāva, re!

स्याममुख देखे ही परतीति। जो तुम कोटि जतन करि सिखवत जोग ध्यान की रीति॥ नाहिंन कछू सयान ज्ञान में यह हम कैसे मानैं। कहौ कहा कहिए या नभ को कैसे उर में आनैं॥ यह मन एक, एक वह मूरति, भृंगकीट सम माने। सूर सपथ दै बूझत ऊधो यह ब्रज लोग सयाने

syāmamukha dekhe hī paratīti| jo tuma koṭi jatana kari sikhavata joga dhyāna kī rīti|| nāhiṃna kachū sayāna jñāna meṃ yaha hama kaise mānaiṃ| kahau kahā kahie yā nabha ko kaise ura meṃ ānaiṃ|| yaha mana eka, eka vaha mūrati, bhṛṃgakīṭa sama māne| sūra sapatha dai būjhata ūdho yaha braja loga sayāne

लरिकाई को प्रेम, कहौ अलि, कैसे करिकै छूटत? कहाँ कहौं ब्रजनाथ-चरित अब अँतरगति यों लूटत॥ चंचल चाल मनोहर चितवनि, वह मुसुकानि मंद धुनि गावत। नटवर भेस नंदनंदन को वह बिनोद गृह बन तें आवत॥ चरनकमल की सपथ करति हौं यह सँदेस मोहिं बिष सम लागत। सूरदास मोहि निमिष न बिसरत मोहन सूरति सोवत जागत

larikāī ko prema, kahau ali, kaise karikai chūṭata? kahā~ kahauṃ brajanātha-carita aba a~taragati yoṃ lūṭata|| caṃcala cāla manohara citavani, vaha musukāni maṃda dhuni gāvata| naṭavara bhesa naṃdanaṃdana ko vaha binoda gṛha bana teṃ āvata|| caranakamala kī sapatha karati hauṃ yaha sa~desa mohiṃ biṣa sama lāgata| sūradāsa mohi nimiṣa na bisarata mohana sūrati sovata jāgata

अटपटि बात तिहारी ऊधो सुनै सो ऐसी को है? हम अहीरि अबला सठ, मधुकर! तिन्हैं जोग कैसे सोहै? बूचिहि खुभी आँधरी काजर, नकटी पहिरै बेसरि। मुँडली पाटी पारन चाहै, कोढ़ी अंगहि केसरि॥ बहिरी सों पति मतो करै सो उतर कौन पै पावै? ऐसो न्याव है ताको ऊधो जो हमैं जोग सिखावै॥ जो तुम हमको लाए कृपा करि सिर चढ़ाय हम लीन्ह। सूरदास नरियर जो बिष को करहिं बंदना कीन्ह

aṭapaṭi bāta tihārī ūdho sunai so aisī ko hai? hama ahīri abalā saṭha, madhukara! tinhaiṃ joga kaise sohai? būcihi khubhī ā~dharī kājara, nakaṭī pahirai besari| mu~ḍalī pāṭī pārana cāhai, kor̤hī aṃgahi kesari|| bahirī soṃ pati mato karai so utara kauna pai pāvai? aiso nyāva hai tāko ūdho jo hamaiṃ joga sikhāvai|| jo tuma hamako lāe kṛpā kari sira car̤hāya hama līnha| sūradāsa nariyara jo biṣa ko karahiṃ baṃdanā kīnha

बरु वै कुब्जा भलो कियो। सुनि सुनि समाचार ऊधो मो कछुक सिरात हियो॥ जाको गुन, गति, नाम, रूप हरि, हार्यो फिरि न दियो। तिन अपनो मन हरत न जान्यो हँसि हँसि लोग जियो॥ सूर तनक चंदन चढ़ाय तन ब्रजपति बस्य कियो। और सकल नागरि नारिन को दासी दाँव लियो

baru vai kubjā bhalo kiyo| suni suni samācāra ūdho mo kachuka sirāta hiyo|| jāko guna, gati, nāma, rūpa hari, hāryo phiri na diyo| tina apano mana harata na jānyo ha~si ha~si loga jiyo|| sūra tanaka caṃdana car̤hāya tana brajapati basya kiyo| aura sakala nāgari nārina ko dāsī dā~va liyo

हरि काहे के अंतर्यामी? जौ हरि मिलत नहीं यहि औसर, अवधि बतावत लामी॥ अपनी चोप जाय उठि बैठे और निरस बेकामी? सो कह पीर पराई जानै जो हरि गरुड़ागामी॥ आई उघरि प्रीति कलई सी जैसे खाटी आमी। सूर इते पर अनख मरति हैं, उधो पीवत मामी

hari kāhe ke aṃtaryāmī? jau hari milata nahīṃ yahi ausara, avadhi batāvata lāmī|| apanī copa jāya uṭhi baiṭhe aura nirasa bekāmī? so kaha pīra parāī jānai jo hari garur̤āgāmī|| āī ughari prīti kalaī sī jaise khāṭī āmī| sūra ite para anakha marati haiṃ, udho pīvata māmī

बिलग जनि मानहु, ऊधो प्यारे! वह मथुरा काजर की कोठरि जे आवहिं ते कारे॥ तुम कारे, सुफलकसुत कारे, कारे मधुप भँवारे। तिनके संग अधिक छबि उपजत कमलनैन मनिआरे॥ मानहु नील माट तें काढ़े लै जमुना ज्यों पखारे। ता गुन स्याम भई कालिंदी सूर स्याम-गुन न्यारे

bilaga jani mānahu, ūdho pyāre! vaha mathurā kājara kī koṭhari je āvahiṃ te kāre|| tuma kāre, suphalakasuta kāre, kāre madhupa bha~vāre| tinake saṃga adhika chabi upajata kamalanaina maniāre|| mānahu nīla māṭa teṃ kār̤he lai jamunā jyoṃ pakhāre| tā guna syāma bhaī kāliṃdī sūra syāma-guna nyāre

अपने स्वारथ को सब कोऊ। चुप करि रहौ, मधुप रस लंपट! तुम देखे अरु वोऊ॥ औरौ कछू सँदेस कहन को कहि पठयो किन सोऊ। लीन्हे फिरत जोग जुबतिन को बड़े सयाने दोऊ॥ तब कत मोहन रास खिलाई जो पै ज्ञान हुतोऊ? अब हमरे जिय बैठो यह पद 'होनी होउ सो होऊ'॥ मिटि गयो मान परेखो ऊधो हिरदय हतो सो होऊ। सूरदास प्रभु गोकुलनायक चित-चिंता अब खोऊ

apane svāratha ko saba koū| cupa kari rahau, madhupa rasa laṃpaṭa! tuma dekhe aru voū|| aurau kachū sa~desa kahana ko kahi paṭhayo kina soū| līnhe phirata joga jubatina ko bar̤e sayāne doū|| taba kata mohana rāsa khilāī jo pai jñāna hutoū? aba hamare jiya baiṭho yaha pada 'honī hou so hoū'|| miṭi gayo māna parekho ūdho hiradaya hato so hoū| sūradāsa prabhu gokulanāyaka cita-ciṃtā aba khoū

तुम जो कहत सँदेसो आनि। कहा करौं वा नँदनंदन सों होत नहीं हितहानि॥ जोग-जुगुति किहि काज हमारे जदपि महा सुखखानि? सने सनेह स्यामसुन्दर के हिलि मिलि कै मन मानि॥ सोहत लोह परसि पारस ज्यों सुबरन बारह बानि। पुनि वह चोप कहाँ चुम्बक ज्यों लटपटाय लपटानि॥ रूपरहित नीरासा निरगुन निगमहु परत न जानि। सूरदास कौन बिधि तासों अब कीजै पहिचानि?

tuma jo kahata sa~deso āni| kahā karauṃ vā na~danaṃdana soṃ hota nahīṃ hitahāni|| joga-juguti kihi kāja hamāre jadapi mahā sukhakhāni? sane saneha syāmasundara ke hili mili kai mana māni|| sohata loha parasi pārasa jyoṃ subarana bāraha bāni| puni vaha copa kahā~ cumbaka jyoṃ laṭapaṭāya lapaṭāni|| rūparahita nīrāsā niraguna nigamahu parata na jāni| sūradāsa kauna bidhi tāsoṃ aba kījai pahicāni?

हम तौ कान्ह केलि की भूखी। कैसे निरगुन सुनहिं तिहारो बिरहिनि बिरह-बिदूखी? कहिए कहा यहौ नहिं जानत काहि जोग है जोग। पा लागों तुमहीं सों, वा पुर बसत बावरे लोग॥ अंजन, अभरन, चीर, चारु बरु नेकु आप तन कीजै। दंड, कमंडल, भस्म, अधारी जौ जुवतिन को दीजै॥ सूर देखि दृढ़ता गोपिन की ऊधो यह ब्रत पायो। कहै 'कृपानिधि हो कृपाल हो! प्रेमै पढ़न पठायो'

hama tau kānha keli kī bhūkhī| kaise niraguna sunahiṃ tihāro birahini biraha-bidūkhī? kahie kahā yahau nahiṃ jānata kāhi joga hai joga| pā lāgoṃ tumahīṃ soṃ, vā pura basata bāvare loga|| aṃjana, abharana, cīra, cāru baru neku āpa tana kījai| daṃḍa, kamaṃḍala, bhasma, adhārī jau juvatina ko dījai|| sūra dekhi dṛr̤hatā gopina kī ūdho yaha brata pāyo| kahai 'kṛpānidhi ho kṛpāla ho! premai par̤hana paṭhāyo'

अँखिया हरि-दरसन की भूखी। कैसे रहैं रूपरसराची ये बतियाँ सुनि रूखी॥ अवधि गनत इकटक मग जोवत तब एती नहिं झूखी। अब इन जोग-सँदेसन ऊधो अति अकुलानी दूखी॥ बारक वह मुख फेरि दिखाओ दुहि पय पिवत पतूखी। सूर सिकत हठि नाव चलाओ ये सरिता हैं सूखी

a~khiyā hari-darasana kī bhūkhī| kaise rahaiṃ rūparasarācī ye batiyā~ suni rūkhī|| avadhi ganata ikaṭaka maga jovata taba etī nahiṃ jhūkhī| aba ina joga-sa~desana ūdho ati akulānī dūkhī|| bāraka vaha mukha pheri dikhāo duhi paya pivata patūkhī| sūra sikata haṭhi nāva calāo ye saritā haiṃ sūkhī

जाय कहौ बूझी कुसलात। जाके ज्ञान न होय सो मानै कही तिहारी बात॥ कारो नाम, रूप पुनि कारो, कारे अंग सखा सब गात। जौ पै भले होत कहुँ कारे तौ कत बदलि सुता लै जात॥ हमको जोग, भोग कुबजा को काके हिये समात? सूरदास सेए सो पति कै पाले जिन्ह तेही पछितात

jāya kahau būjhī kusalāta| jāke jñāna na hoya so mānai kahī tihārī bāta|| kāro nāma, rūpa puni kāro, kāre aṃga sakhā saba gāta| jau pai bhale hota kahu~ kāre tau kata badali sutā lai jāta|| hamako joga, bhoga kubajā ko kāke hiye samāta? sūradāsa see so pati kai pāle jinha tehī pachitāta

कहाँ लौं कीजै बहुत बड़ाई। अतिहि अगाध अपार अगोचर मनसा तहाँ न जाई॥ जल बिनु तरँग, भीति बिनु चित्रन, बिन चित ही चतुराई। अब ब्रज में अनरीति कछू यह ऊधो आनि चलाई॥ रूप न रेख, बदन, बपु जाके संग न सखा सहाई। ता निर्गुन सों प्रीति निरंतर क्यों निबहै, री माई? मन चुभि रही माधुरी मूरति रोम रोम अरुझाई। हौं बलि गई सूर प्रभु ताके जाके स्याम सदा सुखदाई

kahā~ lauṃ kījai bahuta bar̤āī| atihi agādha apāra agocara manasā tahā~ na jāī|| jala binu tara~ga, bhīti binu citrana, bina cita hī caturāī| aba braja meṃ anarīti kachū yaha ūdho āni calāī|| rūpa na rekha, badana, bapu jāke saṃga na sakhā sahāī| tā nirguna soṃ prīti niraṃtara kyoṃ nibahai, rī māī? mana cubhi rahī mādhurī mūrati roma roma arujhāī| hauṃ bali gaī sūra prabhu tāke jāke syāma sadā sukhadāī

काहे को गोपीनाथ कहावत? जो पै मधुकर कहत हमारे गोकुल काहे न आवत? सपने की पहिंचानि जानि कै हमहिं कलंक लगावत। जो पै स्याम कूबरी रीझे सो किन नाम धरावत? ज्यों गजराज काज के औसर औरै दसन दिखावत। कहन सुनन को हम हैं ऊधो सूर अंत बिरमावत

kāhe ko gopīnātha kahāvata? jo pai madhukara kahata hamāre gokula kāhe na āvata? sapane kī pahiṃcāni jāni kai hamahiṃ kalaṃka lagāvata| jo pai syāma kūbarī rījhe so kina nāma dharāvata? jyoṃ gajarāja kāja ke ausara aurai dasana dikhāvata| kahana sunana ko hama haiṃ ūdho sūra aṃta biramāvata