Padas 211–225

ऊधो! तुम सब साथी भोरे। मेरे कहे बिलग मानौगे, कोटि कुटिल लै जोरे॥ वै अक्रूर क्रूर कृत तिनके, रीते भरे, भरे गहि ढोरे। वै घनस्याम, स्याम अंतरमन, स्याम काम महँ बोरे॥ ये मधुकर दुति निर्गुन गुनते, देखे फटकि पछोरे। सूरदास कारन संगति के कहा पूजियत गोरे?

ūdho! tuma saba sāthī bhore| mere kahe bilaga mānauge, koṭi kuṭila lai jore|| vai akrūra krūra kṛta tinake, rīte bhare, bhare gahi ḍhore| vai ghanasyāma, syāma aṃtaramana, syāma kāma maha~ bore|| ye madhukara duti nirguna gunate, dekhe phaṭaki pachore| sūradāsa kārana saṃgati ke kahā pūjiyata gore?

ऊधो! समुझावै सो बैरनि। रे मधुकर! निसिदिन मरियतु है कान्ह कुँवर-औसेरनि॥ चित चुभि रही मोहनी मूरति, चपल दृगन की हेरनि। तन मन लियो चुराय हमारो वा मुरली की टेरनि॥ बिसरति नाहिं सुभग तन-सोभा पीताम्बर की फेरनि। कहत न बनै काँध लकुटी धरि छबि बन गायन घेरनि॥ तुम प्रबीन, हम बिरहि, बतावत आँखि मूँदि भटभेरनि॥ जिहि उर बसत स्यामघन सो क्यों परै मुक्ति के झेरनि। तुम हमको कहँ लाए, ऊधो! जोग-दुखन के ढेरनि। सूर रसिक बिन क्यों जीवत हैं निर्गुन कठिन करेरनि?

ūdho! samujhāvai so bairani| re madhukara! nisidina mariyatu hai kānha ku~vara-auserani|| cita cubhi rahī mohanī mūrati, capala dṛgana kī herani| tana mana liyo curāya hamāro vā muralī kī ṭerani|| bisarati nāhiṃ subhaga tana-sobhā pītāmbara kī pherani| kahata na banai kā~dha lakuṭī dhari chabi bana gāyana gherani|| tuma prabīna, hama birahi, batāvata ā~khi mū~di bhaṭabherani|| jihi ura basata syāmaghana so kyoṃ parai mukti ke jherani| tuma hamako kaha~ lāe, ūdho! joga-dukhana ke ḍherani| sūra rasika bina kyoṃ jīvata haiṃ nirguna kaṭhina karerani?

ऊधो! स्यामहिं तुम लै आओ। ब्रजजन-चातक प्यास मरत हैं, स्वातिबूँद बरसाओ॥ घोष-सरोज भए हैं संपुट, दिनमनि ह्वै बिगसाओ। ह्याँ तें जाव बिलम्ब करौ जनि, हमरी दसा सुनाओ॥ जौ ऊधो हरि यहाँ न आवैं, हमको तहाँ बुलाओ। सूरदास प्रभु वेगि मिलाए संतन में जस पाओ

ūdho! syāmahiṃ tuma lai āo| brajajana-cātaka pyāsa marata haiṃ, svātibū~da barasāo|| ghoṣa-saroja bhae haiṃ saṃpuṭa, dinamani hvai bigasāo| hyā~ teṃ jāva bilamba karau jani, hamarī dasā sunāo|| jau ūdho hari yahā~ na āvaiṃ, hamako tahā~ bulāo| sūradāsa prabhu vegi milāe saṃtana meṃ jasa pāo

ऊधोजू! जोग तबहिं हम जान्यो। जा दिन तें सुफलकसुत के संग रथ ब्रजनाथ पलान्यो॥ जा दिन तैं सब छोह-मोह मिटि सुत-पति-हेत भुलान्यो। तजि माया संसारसार की ब्रजबनितन ब्रत ठान्यो॥ नयन मुँदे, मुख रहे मौन धरि, तन तपि तेज सुखान्यो। नंदनँदन-मुख मुरलीधारी, यहै रूप उर आन्यो॥ सोउ सँजोग जिहि भूलैं हम कहि तुमहूँ जोग बखान्यो। ब्रह्मा पचि पचि मुए प्रान तजि तऊ न तिहि पहिंचान्यो॥ कहौ सु जोग कहा लै कीजै? निर्गुन परत न जान्यो। सूर वहै निज रूप स्याम को उर माहिं समान्यो

ūdhojū! joga tabahiṃ hama jānyo| jā dina teṃ suphalakasuta ke saṃga ratha brajanātha palānyo|| jā dina taiṃ saba choha-moha miṭi suta-pati-heta bhulānyo| taji māyā saṃsārasāra kī brajabanitana brata ṭhānyo|| nayana mu~de, mukha rahe mauna dhari, tana tapi teja sukhānyo| naṃdana~dana-mukha muralīdhārī, yahai rūpa ura ānyo|| sou sa~joga jihi bhūlaiṃ hama kahi tumahū~ joga bakhānyo| brahmā paci paci mue prāna taji taū na tihi pahiṃcānyo|| kahau su joga kahā lai kījai? nirguna parata na jānyo| sūra vahai nija rūpa syāma ko ura māhiṃ samānyo

ऊधो! वै सुख अबै कहाँ? छन छन नयनन निरखति जो मुख, फिरि मन जात तहाँ॥ मुख मुरली, सिर मोरपखौआ उर घुँघुचिन को हारु। आगे धेनु रेतु तन-मण्डित तिरछी चितवनि चारु॥ राति-द्यौस तब संग आपने, खेलत, बोलत, खात। सूरदास यह प्रभुता चितवत कहि न सकति वह बात

ūdho! vai sukha abai kahā~? chana chana nayanana nirakhati jo mukha, phiri mana jāta tahā~|| mukha muralī, sira morapakhauā ura ghu~ghucina ko hāru| āge dhenu retu tana-maṇḍita tirachī citavani cāru|| rāti-dyausa taba saṃga āpane, khelata, bolata, khāta| sūradāsa yaha prabhutā citavata kahi na sakati vaha bāta

कहि, ऊधो! हरि गए तजि मथुरा कौन बड़ाई पाई। भुवन चतुर्दस की बिभूति वह, नृप की जूठि पराई॥ जो यह काज करै ताको सेवक स्रुति पढ़ै बताई। सेवत सेवत जन्म घटावत करत फिरत निठुराई॥ तुम तौ परम साधु अन्तरहित जनि कछु कहौ बनाई। सूर स्याम मन कहा बिचार्यो, कौन ठगौरी लाई?

kahi, ūdho! hari gae taji mathurā kauna bar̤āī pāī| bhuvana caturdasa kī bibhūti vaha, nṛpa kī jūṭhi parāī|| jo yaha kāja karai tāko sevaka sruti par̤hai batāī| sevata sevata janma ghaṭāvata karata phirata niṭhurāī|| tuma tau parama sādhu antarahita jani kachu kahau banāī| sūra syāma mana kahā bicāryo, kauna ṭhagaurī lāī?

ऊधो! जाय बहुरि सुनि आवहु कहा कह्यो है नंदकुमार। यह न होय उपदेस स्याम को कहत लगावन छार॥ निर्गुन-ज्योति कहा उन पाई सिखवत बारम्बार। काल्हिहि करत हुते हमरे अँग अपने हाथ सिंगार॥ ब्याकुल भए गोपालहि बिछुरे गयो गुनज्ञान सँभार। तातें ज्यों भावै त्यों बकत हौ, नाही दोष तुम्हार॥ बिरह सहन को हम सिरजी हैं, पाहन हृदय हमार। सूरदास अन्तरगति मोहन जीवन-प्रान-अधार

ūdho! jāya bahuri suni āvahu kahā kahyo hai naṃdakumāra| yaha na hoya upadesa syāma ko kahata lagāvana chāra|| nirguna-jyoti kahā una pāī sikhavata bārambāra| kālhihi karata hute hamare a~ga apane hātha siṃgāra|| byākula bhae gopālahi bichure gayo gunajñāna sa~bhāra| tāteṃ jyoṃ bhāvai tyoṃ bakata hau, nāhī doṣa tumhāra|| biraha sahana ko hama sirajī haiṃ, pāhana hṛdaya hamāra| sūradāsa antaragati mohana jīvana-prāna-adhāra

ऊधो! कह मत दीन्हो हमहिं गोपाल? आवहु री सखि! सब मिलि सोचैं ज्यों पावैं नँदलाल॥ घर बाहर तें बोलि लेहु सब जावदेक ब्रजबाल। कमलासन बैठहु री माई! मूँदहु नयन बिसाल॥ षट्पद कही सोऊ करि देखी, हाथ कछू नहिं आई। सुन्दरस्याम कमलदललोचन नेकु न देत दिखाई॥ फिरि भईं मगन बिरहसागर में काहुहि सुधि न रही। पूरन प्रेम देखि गोपिन को मधुकर मौन गही॥ कहुं धुनि सुनि स्रवननि चातक की प्रान पलटि तब आए। सूर सु अबकै टेरि पपीहै बिरहिन मृतक जिवाए

ūdho! kaha mata dīnho hamahiṃ gopāla? āvahu rī sakhi! saba mili socaiṃ jyoṃ pāvaiṃ na~dalāla|| ghara bāhara teṃ boli lehu saba jāvadeka brajabāla| kamalāsana baiṭhahu rī māī! mū~dahu nayana bisāla|| ṣaṭpada kahī soū kari dekhī, hātha kachū nahiṃ āī| sundarasyāma kamaladalalocana neku na deta dikhāī|| phiri bhaīṃ magana birahasāgara meṃ kāhuhi sudhi na rahī| pūrana prema dekhi gopina ko madhukara mauna gahī|| kahuṃ dhuni suni sravanani cātaka kī prāna palaṭi taba āe| sūra su abakai ṭeri papīhai birahina mṛtaka jivāe

उधो! ते कि चतुर पद पावत? जे नहिं जानैं पीर पराई हैं सर्वज्ञ कहावत॥ जो पै मीन नीर तें बिछुरै को करि जतन जियावत? प्यासे प्रान जात हैं जल बिनु सुधासमुद्र बतावत॥ हम बिरहिनी स्यामसुन्दर की तुम निर्गुनहिं जनावत। ये दृग-मधुप सुमन सब परिहरि कमलबदन-रस भावत॥ कहि पठवत संदेसनि मधुकर! कत बकवाद बढ़ावत? करो न कुटिल निठुर चित-अन्तर सूरदास कवि गावत

udho! te ki catura pada pāvata? je nahiṃ jānaiṃ pīra parāī haiṃ sarvajña kahāvata|| jo pai mīna nīra teṃ bichurai ko kari jatana jiyāvata? pyāse prāna jāta haiṃ jala binu sudhāsamudra batāvata|| hama birahinī syāmasundara kī tuma nirgunahiṃ janāvata| ye dṛga-madhupa sumana saba parihari kamalabadana-rasa bhāvata|| kahi paṭhavata saṃdesani madhukara! kata bakavāda bar̤hāvata? karo na kuṭila niṭhura cita-antara sūradāsa kavi gāvata

ऊधो! भली करी अब आए। विधि-कुलाल कीने काँचे घट ते तुम आनि पकाए॥ रंग दियो हो कान्ह साँवरे, अँग अँग चित्र बनाए। गलन न पाए नयन-नीर तें अवधि अटा जो छाए॥ ब्रज करि अँवाँ, जोग करि ईंधन सुरति-अगिनि सुलगाए। फूँक उसास, बिरह परजारनि, दरसन-आस फिराए॥ भए सँपूरन भरे प्रेम-जल, छुवन न काहू पाए। राजकाज तें गए सूर सुनि, नंदनंदन कर लाए

ūdho! bhalī karī aba āe| vidhi-kulāla kīne kā~ce ghaṭa te tuma āni pakāe|| raṃga diyo ho kānha sā~vare, a~ga a~ga citra banāe| galana na pāe nayana-nīra teṃ avadhi aṭā jo chāe|| braja kari a~vā~, joga kari īṃdhana surati-agini sulagāe| phū~ka usāsa, biraha parajārani, darasana-āsa phirāe|| bhae sa~pūrana bhare prema-jala, chuvana na kāhū pāe| rājakāja teṃ gae sūra suni, naṃdanaṃdana kara lāe

ऊधो! कुलिस भई यह छाती। मेरो मन रसिक लग्यो नँदलालहि, झखत रहत दिनराती॥ तजि ब्रजलोक, पिता अरु जननी, कंठ लाय गए काती। ऐसे निठुर भए हरि हमको कबहुँ न पठई पाती॥ पिय पिय कहत रहत जिय मेरो ह्वै चातक की जाती। सूरदास प्रभु प्रानहिं राखहु ह्वै कै बूँद-सवाती

ūdho! kulisa bhaī yaha chātī| mero mana rasika lagyo na~dalālahi, jhakhata rahata dinarātī|| taji brajaloka, pitā aru jananī, kaṃṭha lāya gae kātī| aise niṭhura bhae hari hamako kabahu~ na paṭhaī pātī|| piya piya kahata rahata jiya mero hvai cātaka kī jātī| sūradāsa prabhu prānahiṃ rākhahu hvai kai bū~da-savātī

ऊधो! कहु मधुबन की रीति। राजा ह्वै ब्रजनाथ तिहारे कहा चलावत नीति? निसि-लौं करत दाह दिनकर ज्यों हुतो सदा ससि सीति। पुरवा पवन कह्यो नहिं मानत गए सहज बपु जीति॥ कुब्जा-काज कंस को मार्यो, भई निरंतर प्रीति। सूर बिरह ब्रज भलो न लागत जहाँ ब्याह तहँ गीति

ūdho! kahu madhubana kī rīti| rājā hvai brajanātha tihāre kahā calāvata nīti? nisi-lauṃ karata dāha dinakara jyoṃ huto sadā sasi sīti| puravā pavana kahyo nahiṃ mānata gae sahaja bapu jīti|| kubjā-kāja kaṃsa ko māryo, bhaī niraṃtara prīti| sūra biraha braja bhalo na lāgata jahā~ byāha taha~ gīti

ऊधो! काल-चाल चौरासी। मन हरि मदनगोपाल हमारो बोलत बोल उदासी॥ एते पै हम जोग करहिं क्यों लै अबिगत अबिनासी। गुप्त गोपाल करी बनलीला हम लूटी सुखरासी॥ लोचन उमगि चलत हरि के हित बिन देखे बरिसा सी। रसना सूर स्याम के रस बिनु चातकहू तें प्यासी

ūdho! kāla-cāla caurāsī| mana hari madanagopāla hamāro bolata bola udāsī|| ete pai hama joga karahiṃ kyoṃ lai abigata abināsī| gupta gopāla karī banalīlā hama lūṭī sukharāsī|| locana umagi calata hari ke hita bina dekhe barisā sī| rasanā sūra syāma ke rasa binu cātakahū teṃ pyāsī

ऊधो! सरद समयहू आयो। बहुतै दिवस रटत चातक तकि तेउ स्वाति-जल पायो॥ कबहुँक ध्यान धरत उर-अन्तर मुख मुरली लै गावत। सो रसरास पुलिन जमुना की ससि देखे सुधि आवत॥ जासों लगन-प्रीति अन्तरगत औगुन गुन करि भावत। हमसों कपट, लोक-डर तातें सूर सनेह जनावत

ūdho! sarada samayahū āyo| bahutai divasa raṭata cātaka taki teu svāti-jala pāyo|| kabahu~ka dhyāna dharata ura-antara mukha muralī lai gāvata| so rasarāsa pulina jamunā kī sasi dekhe sudhi āvata|| jāsoṃ lagana-prīti antaragata auguna guna kari bhāvata| hamasoṃ kapaṭa, loka-ḍara tāteṃ sūra saneha janāvata

ऊधो! कौन कुदिन छाँड़्यो हो गोकुल। बहुरि न आए फिरि या ब्रज में, बिछुर्यो तबहिं मिल्यो अब सो कुल॥ गरग-बचन समुझे अब मधुबन-कथा-प्रसंग सुन्यो हो जो कुल। सूर भये अब त्रिभुवन के पति नातो ज्ञाति लहे अब निज कुल

ūdho! kauna kudina chā~r̤yo ho gokula| bahuri na āe phiri yā braja meṃ, bichuryo tabahiṃ milyo aba so kula|| garaga-bacana samujhe aba madhubana-kathā-prasaṃga sunyo ho jo kula| sūra bhaye aba tribhuvana ke pati nāto jñāti lahe aba nija kula