Padas 241–255

ऊधो! हमैं जोग नहिं भावै। चित में बसत स्यामघन सुन्दर, सो कैसे बिसरावै? तुम जो कही सत्य सब बातें, हमरे लेखे धूरि। या घट-भीतर सगुन निरँतर रहे स्याम भरि पूरि॥ पा लागौं कहियो मोहन सों जोग कूबरी दीजै। सूरदास प्रभु-रूप निहारैं हमरे संमुख कीजै

ūdho! hamaiṃ joga nahiṃ bhāvai| cita meṃ basata syāmaghana sundara, so kaise bisarāvai? tuma jo kahī satya saba bāteṃ, hamare lekhe dhūri| yā ghaṭa-bhītara saguna nira~tara rahe syāma bhari pūri|| pā lāgauṃ kahiyo mohana soṃ joga kūbarī dījai| sūradāsa prabhu-rūpa nihāraiṃ hamare saṃmukha kījai

ऊधो! हम न जोगपद साधे। सुन्दरस्याम सलोनो गिरिधर नँदनँदन आराधे॥ जा तन रचि रचि भूषन पहिरे भाँति भाँति के साज। ता तन को कहै भस्म चढ़ावन, आवत नाहिंन लाज॥ घट-भीतर नित बसत साँवरो मोरमुकुट सिर धारे। सूरदास चित तिन सों लाग्यो, जोगहिं कौन सँभारे?

ūdho! hama na jogapada sādhe| sundarasyāma salono giridhara na~dana~dana ārādhe|| jā tana raci raci bhūṣana pahire bhā~ti bhā~ti ke sāja| tā tana ko kahai bhasma car̤hāvana, āvata nāhiṃna lāja|| ghaṭa-bhītara nita basata sā~varo moramukuṭa sira dhāre| sūradāsa cita tina soṃ lāgyo, jogahiṃ kauna sa~bhāre?

ऊधो! कहियो यह संदेस। लोग कहत कुबजा-रस-माते, तातें तुम सकुचौ जनि लेस॥ कबहुँक इत पग धारि सिधारौ धरि हरिखँड सुबेस। हमरो मनरंजन कीन्हें तें ह्वैहौ भुवननरेस॥ जब तुम इत ठहराय रहौगे देखौगे सब देस। नहिं बैकुण्ठ अखिल ब्रह्माँडहि ब्रज बिनु, हे हृषिकेस! यह किन मंत्र दियो नंदनँदन तजि ब्रज भ्रमन-बिदेस? जसुमति जननी प्रिया राधिका देखे औरहि देस? इतनी कहत कहत स्यामा पै कछु न रह्यो अवसेस। मोहनलाल प्रबाल मृदुलमन ततछन करी सुहेस॥ को ऊधो, को दुसह बिरह-जुर, को नृपनगर-सुरेस? कैसो ज्ञान, कह्मो किन कासों, किन पठयो उपदेस? मुख मृदुछबि मुरली रव पूरित गोरज-कर्बुर केस। नट-नाटकगति बिकट लटक जब बन तें कियो प्रबेस॥ अति आतुर अकुलाय धाय पिय पोंछत नैन कुसेस। कुम्हिलानो मुखपद्म परस करि देखत छविहि बिसेस॥ सूर सोम, सनकादि, इंद्र, अज, सारद, निगम, महेस। नित्यबिहार सकल रस भ्रमगति कहि गावहिं मुख सेस

ūdho! kahiyo yaha saṃdesa| loga kahata kubajā-rasa-māte, tāteṃ tuma sakucau jani lesa|| kabahu~ka ita paga dhāri sidhārau dhari harikha~ḍa subesa| hamaro manaraṃjana kīnheṃ teṃ hvaihau bhuvananaresa|| jaba tuma ita ṭhaharāya rahauge dekhauge saba desa| nahiṃ baikuṇṭha akhila brahmā~ḍahi braja binu, he hṛṣikesa! yaha kina maṃtra diyo naṃdana~dana taji braja bhramana-bidesa? jasumati jananī priyā rādhikā dekhe aurahi desa? itanī kahata kahata syāmā pai kachu na rahyo avasesa| mohanalāla prabāla mṛdulamana tatachana karī suhesa|| ko ūdho, ko dusaha biraha-jura, ko nṛpanagara-suresa? kaiso jñāna, kahmo kina kāsoṃ, kina paṭhayo upadesa? mukha mṛduchabi muralī rava pūrita goraja-karbura kesa| naṭa-nāṭakagati bikaṭa laṭaka jaba bana teṃ kiyo prabesa|| ati ātura akulāya dhāya piya poṃchata naina kusesa| kumhilāno mukhapadma parasa kari dekhata chavihi bisesa|| sūra soma, sanakādi, iṃdra, aja, sārada, nigama, mahesa| nityabihāra sakala rasa bhramagati kahi gāvahiṃ mukha sesa

ऊधो! हरिजू हित जनाय चित चोराय लयो। ऊधो! चपल नयन चलाय अंगराग दयो॥ परम साधु सखा सुजन जदुकुल के मानि। कहौ बात प्रात एक साँची जिय जानि॥ सरद-बारिज सरिस दृग भौंह काम-कमान। क्यों जीवहिं बेधे उर लगे बिषम बान? मोहन मथुरा पै बसैं, ब्रज पठयो जोगसँदेस। क्यों न काँपी मेदिनी कहत जुवतिन ऊपदेस? तुम सयाने स्याम के देखहु जिय बिचारि। प्रीतम पति नृपति भए औ गहे वर नारि॥ कोमल कर मधुर मुरलि अधर धरे तान। पसरि सुधा पूरि रही कहा सुनै कान? मृगी मृगज-लोचनी भए उभय एक प्रकार। नाद नयनबिष-तते न जान्यो मारनहार॥ गोधन तजि गवन कियो लियो बिरद गोपाल। नीके कै कहिबी, यह भली निगम-चाल

ūdho! harijū hita janāya cita corāya layo| ūdho! capala nayana calāya aṃgarāga dayo|| parama sādhu sakhā sujana jadukula ke māni| kahau bāta prāta eka sā~cī jiya jāni|| sarada-bārija sarisa dṛga bhauṃha kāma-kamāna| kyoṃ jīvahiṃ bedhe ura lage biṣama bāna? mohana mathurā pai basaiṃ, braja paṭhayo jogasa~desa| kyoṃ na kā~pī medinī kahata juvatina ūpadesa? tuma sayāne syāma ke dekhahu jiya bicāri| prītama pati nṛpati bhae au gahe vara nāri|| komala kara madhura murali adhara dhare tāna| pasari sudhā pūri rahī kahā sunai kāna? mṛgī mṛgaja-locanī bhae ubhaya eka prakāra| nāda nayanabiṣa-tate na jānyo māranahāra|| godhana taji gavana kiyo liyo birada gopāla| nīke kai kahibī, yaha bhalī nigama-cāla

मधुकर! जानत है सब कोऊ। जैसे तुम औ मीत तुम्हारे, गुननि निपुन हौ दौऊ॥ पाके चोर, हृदय के कपटी, तुम कारे औ वोऊ। सरबसु हरत, करत अपनो सुख, कैसेहू किन होऊ॥ परम कृपन थोरे धन जीवन उबरत नाहिंन सोऊ। सूर सनेह करै जो तुमसों सो करै आप-बिगोऊ

madhukara! jānata hai saba koū| jaise tuma au mīta tumhāre, gunani nipuna hau dauū|| pāke cora, hṛdaya ke kapaṭī, tuma kāre au voū| sarabasu harata, karata apano sukha, kaisehū kina hoū|| parama kṛpana thore dhana jīvana ubarata nāhiṃna soū| sūra saneha karai jo tumasoṃ so karai āpa-bigoū

मधुकर! कहियत बहुत सयाने। तुम्हरी मति कापै बनि आवै हमरे काज अजाने। तैसोई तू, तैसो तेरो ठाकुर, एकहि बरनहि बाने। पहिले प्रीति पिवाय सुधारस पाछे जोग बखाने॥ एक समय पंकजरस वासे दिनकर अस्त न माने। सोइ सूर गति भइ ह्याँ हरि बिनु हाथ मीड़ि पछिताने

madhukara! kahiyata bahuta sayāne| tumharī mati kāpai bani āvai hamare kāja ajāne| taisoī tū, taiso tero ṭhākura, ekahi baranahi bāne| pahile prīti pivāya sudhārasa pāche joga bakhāne|| eka samaya paṃkajarasa vāse dinakara asta na māne| soi sūra gati bhai hyā~ hari binu hātha mīr̤i pachitāne

मधुकर! कहत सँदेसो सूलहु। हरिपद छाँड़ि चले तातें तुम प्रीतिप्रेम भ्रमि भूलहु॥ नहिं या उक्ति मृदुल श्रीमुख की जे तुम उर में हूलहु। बिलज न बदन होत या उचरत जो संधान न मूलहु॥ उत बड़ ठौर नगर मथुरा, इत तरनितनूजा कूलहु। उत महराज चतुर्भुज सुमिरौ, इत किसोरनँद दूलहु॥ जे तुम कही बड़ेन की बतियाँ ब्रज जन नहिं समतूलहु। सूर स्याम गोपी-सँग बिलसे कंठ धरे भुजमूलहु

madhukara! kahata sa~deso sūlahu| haripada chā~r̤i cale tāteṃ tuma prītiprema bhrami bhūlahu|| nahiṃ yā ukti mṛdula śrīmukha kī je tuma ura meṃ hūlahu| bilaja na badana hota yā ucarata jo saṃdhāna na mūlahu|| uta bar̤a ṭhaura nagara mathurā, ita taranitanūjā kūlahu| uta maharāja caturbhuja sumirau, ita kisorana~da dūlahu|| je tuma kahī bar̤ena kī batiyā~ braja jana nahiṃ samatūlahu| sūra syāma gopī-sa~ga bilase kaṃṭha dhare bhujamūlahu

मधुकर! यहाँ नहीं मन मेरो। गयो जो सँग नंदनंदन के बहुरि न कीन्हो फेरो॥ लयो नयन मुसकानि मोल है, कियो परायो चेरो। सौंप्यो जाहि भयो बस ताके, बिसर्यो बास-बसेरो॥ को समुझाय कहै सूर जो रसवस काहू केरो? मँदे पर्यो, सिधारू अनत लै, यह निर्गुन मत तेरो

madhukara! yahā~ nahīṃ mana mero| gayo jo sa~ga naṃdanaṃdana ke bahuri na kīnho phero|| layo nayana musakāni mola hai, kiyo parāyo cero| sauṃpyo jāhi bhayo basa tāke, bisaryo bāsa-basero|| ko samujhāya kahai sūra jo rasavasa kāhū kero? ma~de paryo, sidhārū anata lai, yaha nirguna mata tero

मधुकर! हमहीं कौ समझावत। बारंबार ज्ञानगाथा ब्रज अबलन आगे गावत॥ नँदनँदन बिन कपट कथा कहि कत अनरुचि उपजावत? स्रक चंदन तन में जो सुधारत कहु कैसे सचु पावत? देखु विचारि तुहीं अपने जिय नागर है जु कहावत? सब सुमनन फिरि फिरि नीरस करि काहे को कमल बँधावत? कमलनयन करकमल कमलपग कमलबदन बिरमावत। सूरदास प्रभु अलि अनुरागी काहे को और भुकावत?

madhukara! hamahīṃ kau samajhāvata| bāraṃbāra jñānagāthā braja abalana āge gāvata|| na~dana~dana bina kapaṭa kathā kahi kata anaruci upajāvata? sraka caṃdana tana meṃ jo sudhārata kahu kaise sacu pāvata? dekhu vicāri tuhīṃ apane jiya nāgara hai ju kahāvata? saba sumanana phiri phiri nīrasa kari kāhe ko kamala ba~dhāvata? kamalanayana karakamala kamalapaga kamalabadana biramāvata| sūradāsa prabhu ali anurāgī kāhe ko aura bhukāvata?

को गोपाल कहाँ को बासी, कासों है पहिंचान? तुमसों सँदेसो कौन पठाए, कहत कौन सों आनि? अपनी चाँड़ आनि उड़ि बैठ्यो भँवर भलो रस जानि। कै वह बेलि बढ़ौ कै सूखौ, तिनको कह हितहानि॥ प्रथम बेनु बन हरत हरिन-मन राग-रागिनी ठानि। जैसे बधिक बिसासि बिबस करि बधत विषम सर तानि॥ पय प्यावत पूतना हनी, छपि बालि हन्यो, बलि दानि। सूपनखा, ताड़का निपाती सूर स्याम यह बानि

ko gopāla kahā~ ko bāsī, kāsoṃ hai pahiṃcāna? tumasoṃ sa~deso kauna paṭhāe, kahata kauna soṃ āni? apanī cā~r̤a āni ur̤i baiṭhyo bha~vara bhalo rasa jāni| kai vaha beli bar̤hau kai sūkhau, tinako kaha hitahāni|| prathama benu bana harata harina-mana rāga-rāginī ṭhāni| jaise badhika bisāsi bibasa kari badhata viṣama sara tāni|| paya pyāvata pūtanā hanī, chapi bāli hanyo, bali dāni| sūpanakhā, tār̤akā nipātī sūra syāma yaha bāni

मधुकर के पठए तें तुम्हरी व्यापक न्यून परी। नगरनारि-मुखछबि-तन निरखत द्वै बतियाँ बिसरीं॥ ब्रज को नेह, अरु आप पूर्नता एकौ ना उबरी। तीजो पंथ प्रगट भयो देखियत जब भेंटी कुबरी॥ यह तौ परम साधु तुम डहक्यो, इन यह मन न धरी। जो कछु कह्यो सुनि चल्यो सीस धरि जोग-जुगुति-गठरी॥ सूरदास प्रभुता का कहिए प्रीति भली पसरी! राजमान सुख रहै कोटि पै घोष न एक घरी

madhukara ke paṭhae teṃ tumharī vyāpaka nyūna parī| nagaranāri-mukhachabi-tana nirakhata dvai batiyā~ bisarīṃ|| braja ko neha, aru āpa pūrnatā ekau nā ubarī| tījo paṃtha pragaṭa bhayo dekhiyata jaba bheṃṭī kubarī|| yaha tau parama sādhu tuma ḍahakyo, ina yaha mana na dharī| jo kachu kahyo suni calyo sīsa dhari joga-juguti-gaṭharī|| sūradāsa prabhutā kā kahie prīti bhalī pasarī! rājamāna sukha rahai koṭi pai ghoṣa na eka gharī

मधुकर! बादि बचन कत बोलत? तनक न तोहिं पत्याऊँ, कपटी अंतर-कपट न खोलत॥ तू अति चपल अलप को सगी बिकल चहूँ दिसि डोलत। मानिक काँच, कपूर कटु खली, एक संग क्यों तोलत? सूरदास यह रटत बियोगिनि दुसह दाह क्यों झोलत। अमृतरूप आनन्द अँगनिधि अनमिल अगम अमोलत

madhukara! bādi bacana kata bolata? tanaka na tohiṃ patyāū~, kapaṭī aṃtara-kapaṭa na kholata|| tū ati capala alapa ko sagī bikala cahū~ disi ḍolata| mānika kā~ca, kapūra kaṭu khalī, eka saṃga kyoṃ tolata? sūradāsa yaha raṭata biyogini dusaha dāha kyoṃ jholata| amṛtarūpa ānanda a~ganidhi anamila agama amolata

मधुकर! देखि स्याम तन तेरो। हरि-मुख की सुनि मीठी बातैं डरपत है मन मेरो॥ कहत हौं चरन छुवन रसलंपट, बरजत हौ बेकाज। परसत गात लगावत कुंकुम, इतनी में कछु लाज? बुधि बिबेक अरु बचन-चातुरी ते सब चितै चुराए। सो उनको कहो कहा बिसार्यो, लाज छाँड़ि ब्रज आए॥ अब लौं कौन हेतु गावत है हम आगे यह गीत। सूर इते सों गारि कहा है जौ पै त्रिगुन अतीत?

madhukara! dekhi syāma tana tero| hari-mukha kī suni mīṭhī bātaiṃ ḍarapata hai mana mero|| kahata hauṃ carana chuvana rasalaṃpaṭa, barajata hau bekāja| parasata gāta lagāvata kuṃkuma, itanī meṃ kachu lāja? budhi bibeka aru bacana-cāturī te saba citai curāe| so unako kaho kahā bisāryo, lāja chā~r̤i braja āe|| aba lauṃ kauna hetu gāvata hai hama āge yaha gīta| sūra ite soṃ gāri kahā hai jau pai triguna atīta?

मधुकर काके मीत भए? दिवस चारि की प्रीति-सगाई सो लै अनत गए॥ डहकत फिरत आपने स्वारथ पाखँड और ठए। चाँड़ै सरे चिन्हारी मेटी, करत हैं प्रीति नए॥ चितहि उचाटि मेलि गए रावल मन हरि हरि जु लए। सूरदास प्रभु दूत-धरम तजि बिष के बीज बए

madhukara kāke mīta bhae? divasa cāri kī prīti-sagāī so lai anata gae|| ḍahakata phirata āpane svāratha pākha~ḍa aura ṭhae| cā~r̤ai sare cinhārī meṭī, karata haiṃ prīti nae|| citahi ucāṭi meli gae rāvala mana hari hari ju lae| sūradāsa prabhu dūta-dharama taji biṣa ke bīja bae

मधुकर! कहाँ पढ़ी यह नीति? लोकबेद स्रुति-ग्रंथ-रहित सब कथा कहत विपरीत॥ जन्मभूमि ब्रज, जननि जसोदा केहि अपराध तजी? अति कुलीन गुन रूप अमित सब दासी जाय भजी॥ जोगसमाधि गूढ़ स्रुति मुनिमग क्यों समुझिहै गँवारि। जौ पै गुन-अतीत व्यापक तौ होहिं, कहा है गारि? रहु रे मधुप! कपट स्वारथ हित तजि बहु बचन बिसेखि। मन क्रम बचन बचत यहि नाते सूर स्याम तन देखि

madhukara! kahā~ par̤hī yaha nīti? lokabeda sruti-graṃtha-rahita saba kathā kahata viparīta|| janmabhūmi braja, janani jasodā kehi aparādha tajī? ati kulīna guna rūpa amita saba dāsī jāya bhajī|| jogasamādhi gūr̤ha sruti munimaga kyoṃ samujhihai ga~vāri| jau pai guna-atīta vyāpaka tau hohiṃ, kahā hai gāri? rahu re madhupa! kapaṭa svāratha hita taji bahu bacana bisekhi| mana krama bacana bacata yahi nāte sūra syāma tana dekhi