Padas 181–195

ऊधो! अब जो कान्ह न ऐहैं। जिय जानौ अरु हृदय बिचारौ हम न इतो दुख सैहैं॥ बूझौ जाय कौन के ढोटा, का उत्तर तब दैहैं? खायो खेल्यो संग हमारे, ताको कहां बनैहैं॥ गोकुलमनि मथुरा के बासी कौ लों झूठो कैहैं। अब हम लिखि पठवन चाहति हैं वहाँ पाति नहिं पै हैं। इन गैयन चरिवा छाँड्यो है जो नहिं लाल चरै हैं। एते पै नहिं मिलत सूर प्रभु फिरि पाछे पछितैहैं

ūdho! aba jo kānha na aihaiṃ| jiya jānau aru hṛdaya bicārau hama na ito dukha saihaiṃ|| būjhau jāya kauna ke ḍhoṭā, kā uttara taba daihaiṃ? khāyo khelyo saṃga hamāre, tāko kahāṃ banaihaiṃ|| gokulamani mathurā ke bāsī kau loṃ jhūṭho kaihaiṃ| aba hama likhi paṭhavana cāhati haiṃ vahā~ pāti nahiṃ pai haiṃ| ina gaiyana carivā chā~ḍyo hai jo nahiṃ lāla carai haiṃ| ete pai nahiṃ milata sūra prabhu phiri pāche pachitaihaiṃ

ऊधो! हमैं दोउ कठिन परी। जो जीवैं तो, सुन सठ! ज्ञानी, तन तजैं रूपहरी॥ गुन गावैं तौ सुक-सनकादिक, संग धावै तौ लीला करी। आसा अवधि संतोष धरैं तौ धार्मिक ब्रज-सुन्दरी॥ स्यामा है सब सखी सुजाती पै सब बिरह-भरी। सोक-सिंधु तरिबे की नौका जिहि मुख मुरलि धरी॥ निसिदिन फिरत निरंकुस अति बड़ मातो मदन-करी। डाहैगो सब धाम सूर जो चितौ न वह केहरी

ūdho! hamaiṃ dou kaṭhina parī| jo jīvaiṃ to, suna saṭha! jñānī, tana tajaiṃ rūpaharī|| guna gāvaiṃ tau suka-sanakādika, saṃga dhāvai tau līlā karī| āsā avadhi saṃtoṣa dharaiṃ tau dhārmika braja-sundarī|| syāmā hai saba sakhī sujātī pai saba biraha-bharī| soka-siṃdhu taribe kī naukā jihi mukha murali dharī|| nisidina phirata niraṃkusa ati bar̤a māto madana-karī| ḍāhaigo saba dhāma sūra jo citau na vaha keharī

ऊधो! बहुतै दिन गए चरनकमल-बिमुख ही। दरस-हीन, दुखित दीन, छन छन विपदा सही॥ रजनी अति प्रेमपीर, गृह बन मन धरै न धीर। बासर मग जोवत, उर सरिता बही नयननीर॥ आवन की अवधि-आस सोई गनि घटत स्वास। इतो बिरह बिरहिनि क्यों सहि सकै कह सूरदास?

ūdho! bahutai dina gae caranakamala-bimukha hī| darasa-hīna, dukhita dīna, chana chana vipadā sahī|| rajanī ati premapīra, gṛha bana mana dharai na dhīra| bāsara maga jovata, ura saritā bahī nayananīra|| āvana kī avadhi-āsa soī gani ghaṭata svāsa| ito biraha birahini kyoṃ sahi sakai kaha sūradāsa?

ऊधो! कहत न कछू बनै। अधरामृत-आस्वादिनि रसना कैसे जोग भनै? जेहि लोचन अवलोके नखसिख-सुन्दर नंदतनै। ते लोचन क्यों जायँ और पथ लै पठए अपनै? रागिनि राग तरँग तान घन जे स्रुति मुरलि सुनै। ते स्रुति जोग-सँदेस कठिन कह काँकर मेलि हनै॥ सूरदास स्यामा मोहन के यह गुन बिबिध गुनै। कनकलता तें उपज न मुक्ता, षटपद! रंग चुनै

ūdho! kahata na kachū banai| adharāmṛta-āsvādini rasanā kaise joga bhanai? jehi locana avaloke nakhasikha-sundara naṃdatanai| te locana kyoṃ jāya~ aura patha lai paṭhae apanai? rāgini rāga tara~ga tāna ghana je sruti murali sunai| te sruti joga-sa~desa kaṭhina kaha kā~kara meli hanai|| sūradāsa syāmā mohana ke yaha guna bibidha gunai| kanakalatā teṃ upaja na muktā, ṣaṭapada! raṃga cunai

ऊधो! इन नयनन नेम लियो। नँदनंदन सों पतिव्रत बाँध्यो, दरसत नाहि बियो॥ इंदु चकोर, मेघ प्रति चातक जैसे धरन दियो। तैसे ये लोचन गोपालै इकटक प्रेम पियो॥ ज्ञानकुसुम लै आए ऊधो! चपल न उचित कियो। हरिमुख-कमल अमियरस सूर चाहत वहै लियो

ūdho! ina nayanana nema liyo| na~danaṃdana soṃ pativrata bā~dhyo, darasata nāhi biyo|| iṃdu cakora, megha prati cātaka jaise dharana diyo| taise ye locana gopālai ikaṭaka prema piyo|| jñānakusuma lai āe ūdho! capala na ucita kiyo| harimukha-kamala amiyarasa sūra cāhata vahai liyo

ऊधो! ब्रजरिपु बहुरि जिए। जे हमरे कारन नँदनंदन हति हति दूरि किए॥ निसि के वेष बकी है आवति अति डर करति सकंप हिए। तिन पय तें तन प्रान हमारे रबि ही छिनक छिनाय लिए॥ बन बृकरूप, अघासुर सम गृह, कितहू तौ न बितै सकिए। कोटिक कालीसम कालिंदी, दोषन सलिल न जात पिए॥ अरु ऊँचे उच्छास तृनाव्रत तिहिं सुख सकल उड़ाय दिए। केसी सकल कर्म केसव बिन, सूर सरन काकी तकिए?

ūdho! brajaripu bahuri jie| je hamare kārana na~danaṃdana hati hati dūri kie|| nisi ke veṣa bakī hai āvati ati ḍara karati sakaṃpa hie| tina paya teṃ tana prāna hamāre rabi hī chinaka chināya lie|| bana bṛkarūpa, aghāsura sama gṛha, kitahū tau na bitai sakie| koṭika kālīsama kāliṃdī, doṣana salila na jāta pie|| aru ū~ce ucchāsa tṛnāvrata tihiṃ sukha sakala ur̤āya die| kesī sakala karma kesava bina, sūra sarana kākī takie?

ऊधो! कहिए काहि सुनाए? हरि बिछुरत जेती सहियत हैं इते बिरह के घाए॥ बरु माधव मधुबन ही रहते, कत जसुदा के आए? कत प्रभु गोप-बेष ब्रज धार्यो, कत ये सुख उपजाए? कत गिरि धारि इँद्र-मद मेट्यो, कत बन रास बनाए? अब कह निठुर भए हम ऊपर लिखि लिखि जोग पठाए? परम प्रबीन सबै जानत हौ, तातें यह कहि आए। अपनी कौन कहै सुनु सूर मात-पिता बिसराए

ūdho! kahie kāhi sunāe? hari bichurata jetī sahiyata haiṃ ite biraha ke ghāe|| baru mādhava madhubana hī rahate, kata jasudā ke āe? kata prabhu gopa-beṣa braja dhāryo, kata ye sukha upajāe? kata giri dhāri i~dra-mada meṭyo, kata bana rāsa banāe? aba kaha niṭhura bhae hama ūpara likhi likhi joga paṭhāe? parama prabīna sabai jānata hau, tāteṃ yaha kahi āe| apanī kauna kahai sunu sūra māta-pitā bisarāe

ऊधो! भली करी गोपाल। आपुन तौ आवत नाहीं ह्याँ, वहाँ, रहे यहि काल॥ चन्दन चन्द हुतो तब सीतल, कोकिलसब्द रसाल। अब समीर पावक सम लागत, सब ब्रज उलटी चाल॥ हार, चीर, कंचुकि कंटक भए, तरनि तिलक भए भाल। सेज सिंह, गृह तिमिर-कंदरा, सर्प सुमन-मनिमाल। हम तौ न्याय सहैं एतो दुख बनवासी जो ग्वाल। सूरदास स्वामी सुखसागर भोगी भ्रमर भुवाल

ūdho! bhalī karī gopāla| āpuna tau āvata nāhīṃ hyā~, vahā~, rahe yahi kāla|| candana canda huto taba sītala, kokilasabda rasāla| aba samīra pāvaka sama lāgata, saba braja ulaṭī cāla|| hāra, cīra, kaṃcuki kaṃṭaka bhae, tarani tilaka bhae bhāla| seja siṃha, gṛha timira-kaṃdarā, sarpa sumana-manimāla| hama tau nyāya sahaiṃ eto dukha banavāsī jo gvāla| sūradāsa svāmī sukhasāgara bhogī bhramara bhuvāla

अपने मन सुरति करत रहिबी। ऊधो! इतनी बात स्याम सों समय पाय कहिबी॥ घोष बसत की चूक हमारी कछू न जिय गहिबी। परम दीन जदुनाथ जानिकै गुन बिचारि सहिबी॥ एकहि बार दयाल दरस दै बिरह-रासि दहिबी। सूरदास प्रभु बहुत कहा कहौं बचन-लाज बहिबी

apane mana surati karata rahibī| ūdho! itanī bāta syāma soṃ samaya pāya kahibī|| ghoṣa basata kī cūka hamārī kachū na jiya gahibī| parama dīna jadunātha jānikai guna bicāri sahibī|| ekahi bāra dayāla darasa dai biraha-rāsi dahibī| sūradāsa prabhu bahuta kahā kahauṃ bacana-lāja bahibī

उधो! नँदनंदन सों इतनी कहियो। जद्यपि ब्रज अनाथ करि छाँड़्यो तदपि बार इक चित करि रहियो॥ तिनकातोरे करौ जनि हमसों एक वास की लज्जा गहियो। गुन-औगुनन रोष नहिं कीजत दासनिदासि की इतनी सहियो॥ तुम बिन स्याम कहा हम करिहैं यह अवलंब न सपने लहियो। सूरदास प्रभु यह कहि पठई कहाँ जोग कहँ पीवन दहियो

udho! na~danaṃdana soṃ itanī kahiyo| jadyapi braja anātha kari chā~r̤yo tadapi bāra ika cita kari rahiyo|| tinakātore karau jani hamasoṃ eka vāsa kī lajjā gahiyo| guna-augunana roṣa nahiṃ kījata dāsanidāsi kī itanī sahiyo|| tuma bina syāma kahā hama karihaiṃ yaha avalaṃba na sapane lahiyo| sūradāsa prabhu yaha kahi paṭhaī kahā~ joga kaha~ pīvana dahiyo

ऊधो! हरि करि पठवत जेती। जौ मन हाथ हमारे होतो तौ कत सहती एती? हृदय कठोर कुलिस हू तें अति तामें चेत अचेती। तब उर बिच अंचल नहिं सहती, अब जमुना की रेती॥ सूरदास प्रभु तुम्हरे मिलन को, सरन देहु अब सेंती। बिन देखे मोहिं कल न परत है जाको स्रुति गावत है नेती

ūdho! hari kari paṭhavata jetī| jau mana hātha hamāre hoto tau kata sahatī etī? hṛdaya kaṭhora kulisa hū teṃ ati tāmeṃ ceta acetī| taba ura bica aṃcala nahiṃ sahatī, aba jamunā kī retī|| sūradāsa prabhu tumhare milana ko, sarana dehu aba seṃtī| bina dekhe mohiṃ kala na parata hai jāko sruti gāvata hai netī

ऊधो! यह हरि कहा करयो? राजकाज चित दियो साँवरे, गोकुल क्यों बिसरयो? जौ लौं घोष रहे तौ लौं हम संतत सेवा कीनी। बारक कबहूँ उलूखल परसे, सोई मानि जिय लीनी॥ जौ तुम कोटि करौ ब्रजनायक बहुते राजकुमारि। तौ ये नंद पिता कहाँ मिलिहैं अरु जसुमति महतारि॥ कहँ गोधन, कहँ गोप-बृंद सब, कहँ गोरस को खैबो? सूरदास अब सोई करौ जिहि होय कान्ह को ऐबो

ūdho! yaha hari kahā karayo? rājakāja cita diyo sā~vare, gokula kyoṃ bisarayo? jau lauṃ ghoṣa rahe tau lauṃ hama saṃtata sevā kīnī| bāraka kabahū~ ulūkhala parase, soī māni jiya līnī|| jau tuma koṭi karau brajanāyaka bahute rājakumāri| tau ye naṃda pitā kahā~ milihaiṃ aru jasumati mahatāri|| kaha~ godhana, kaha~ gopa-bṛṃda saba, kaha~ gorasa ko khaibo? sūradāsa aba soī karau jihi hoya kānha ko aibo

ऊधो! ऐसो काम न कीजै। एकरंग कारे तुम दोऊ घोष समेत क्यों कीजै? कठिन फेरि कै दुख अवगाहैं हम सब करी अचेत। कृत पटपर गोता मारत हौ निरे भूँड के खेत॥ तरपट काट कीटकुल जनमे, कहा भलाई जाने? फोरत बाँस गाँठि दंतन सौं बार-बार ललचाने॥ छाँड़ि कमल सौं हेतु आपनो तू कत अनतहि जाय। लंपठ, ढीठ, बहुत अपराधी कैसे मन पतिआय? यहै जु बाति कहति हौं तुमसों फिरि मति कबहूँ आवहु। एक बार समुझावहु सूरज अपनो ज्ञान सिखावहु

ūdho! aiso kāma na kījai| ekaraṃga kāre tuma doū ghoṣa sameta kyoṃ kījai? kaṭhina pheri kai dukha avagāhaiṃ hama saba karī aceta| kṛta paṭapara gotā mārata hau nire bhū~ḍa ke kheta|| tarapaṭa kāṭa kīṭakula janame, kahā bhalāī jāne? phorata bā~sa gā~ṭhi daṃtana sauṃ bāra-bāra lalacāne|| chā~r̤i kamala sauṃ hetu āpano tū kata anatahi jāya| laṃpaṭha, ḍhīṭha, bahuta aparādhī kaise mana patiāya? yahai ju bāti kahati hauṃ tumasoṃ phiri mati kabahū~ āvahu| eka bāra samujhāvahu sūraja apano jñāna sikhāvahu

ऊधो! ओरी कथा कहो। तजि जब, ज्ञान सुनैं तावत तनु, बरु गहि मौन रहो॥ जाके बिच राजत मन-परघट स्यामसल-अनुरागी। तापै रतिद्रुम रीति नयनजल सींचत निसदिन जागी॥ भीषम अलि आए भगद्यो ब्रज, कठिन जोग-रवि घेरे। सो मुरझात सूर को राखे मेह-नेह बिनु तेरे?

ūdho! orī kathā kaho| taji jaba, jñāna sunaiṃ tāvata tanu, baru gahi mauna raho|| jāke bica rājata mana-paraghaṭa syāmasala-anurāgī| tāpai ratidruma rīti nayanajala sīṃcata nisadina jāgī|| bhīṣama ali āe bhagadyo braja, kaṭhina joga-ravi ghere| so murajhāta sūra ko rākhe meha-neha binu tere?

ऊधो! साँच कहौ हम आगे। घर में कहा बचे कहु ताके प्रकट आगि के लागे॥ जा दिन तें गोपाल सिधारे स्वास-अनल तन जारयो। ऋषि-हिरदय मुखचंद मुग्ध भयो काढ़ि वाहि दै डारयो॥ एते पै तोहि सूझत नाहिन, जोग सिखावन आयो। फिरि लै जाहु सूर के प्रभु पै जिहिं हैं यहाँ पठायो

ūdho! sā~ca kahau hama āge| ghara meṃ kahā bace kahu tāke prakaṭa āgi ke lāge|| jā dina teṃ gopāla sidhāre svāsa-anala tana jārayo| ṛṣi-hiradaya mukhacaṃda mugdha bhayo kār̤hi vāhi dai ḍārayo|| ete pai tohi sūjhata nāhina, joga sikhāvana āyo| phiri lai jāhu sūra ke prabhu pai jihiṃ haiṃ yahā~ paṭhāyo