Padas 91–105

मधुबनियाँ लोगनि को पतिआय? मुख औरै अंतर्गत औरै पतियाँ लिखि पठवत हैं बनाय॥ ज्यों कोइलसुत काग जिआवत भाव-भगति भोजनहिं खवाय। कुहकुहाय आए बसंत ऋतु, अंत मिलै कुल अपने जाय॥ जैसे मधुकर पुहुप-बास लै फेरि न बूझै वातहु आय। सूर जहाँ लौं स्यामगात हैं तिनसों क्यों कीजिए लगाय?

madhubaniyā~ logani ko patiāya? mukha aurai aṃtargata aurai patiyā~ likhi paṭhavata haiṃ banāya|| jyoṃ koilasuta kāga jiāvata bhāva-bhagati bhojanahiṃ khavāya| kuhakuhāya āe basaṃta ṛtu, aṃta milai kula apane jāya|| jaise madhukara puhupa-bāsa lai pheri na būjhai vātahu āya| sūra jahā~ lauṃ syāmagāta haiṃ tinasoṃ kyoṃ kījie lagāya?

हरि हैं राजनीति पढ़ि आए। समुझी बात कहत मधुकर जो? समाचार कछु पाए? इक अति चतुर हुते पहिले ही, अरु करि नेह दिखाए। जानी बुद्धि बड़ी, जुवतिन को जोग सँदेस पठाए॥ भले लोग आगे के, सखि री! परहित डोलत धाए। वे अपने मन फेरि पाइए जे हैं चलत चुराए॥ ते क्यों नीति करत आपुन जे औरनि रीति छुड़ाए? राजधर्म सब भए सूर जहँ प्रजा न जायँ सताए

hari haiṃ rājanīti par̤hi āe| samujhī bāta kahata madhukara jo? samācāra kachu pāe? ika ati catura hute pahile hī, aru kari neha dikhāe| jānī buddhi bar̤ī, juvatina ko joga sa~desa paṭhāe|| bhale loga āge ke, sakhi rī! parahita ḍolata dhāe| ve apane mana pheri pāie je haiṃ calata curāe|| te kyoṃ nīti karata āpuna je aurani rīti chur̤āe? rājadharma saba bhae sūra jaha~ prajā na jāya~ satāe

जोग की गति सुनत मेरे अंग आगि बई। सुलगि सुलगि हम रही तन में फूँक आनि दई॥ जोग हमको भोग कुब्जहिं, कौने सिख सिखई? सिंह गज तजि तृनहिं खंडत सुनी बात नई॥ कर्मरेखा मिटति नाहीं जो बिधि आनि ठई। सूर हरि की कृपा जापै सकल सिद्धि भई

joga kī gati sunata mere aṃga āgi baī| sulagi sulagi hama rahī tana meṃ phū~ka āni daī|| joga hamako bhoga kubjahiṃ, kaune sikha sikhaī? siṃha gaja taji tṛnahiṃ khaṃḍata sunī bāta naī|| karmarekhā miṭati nāhīṃ jo bidhi āni ṭhaī| sūra hari kī kṛpā jāpai sakala siddhi bhaī

ऊधो! जान्यो ज्ञान तिहारो। जानै कहा राजगति-लीला अंत अहीर बिचारो॥ हम सबै अयानी, एक सयानी कुबजा सों मन मान्यो। आवत नाहिं लाज के मारे, मानहु कान्ह खिस्यान्यो॥ ऊधो जाहु बाँह धरि ल्याओ सुन्दरस्याम पियारो। ब्याहौ लाख, धरौं दस कुबरी, अंतहि कान्ह हमारो॥ सुन, री सखी! कछू नहिं कहिए माधव आवन दीजै। जबहीं मिलैं सूर के स्वामी हाँसी करि करि लीजै

ūdho! jānyo jñāna tihāro| jānai kahā rājagati-līlā aṃta ahīra bicāro|| hama sabai ayānī, eka sayānī kubajā soṃ mana mānyo| āvata nāhiṃ lāja ke māre, mānahu kānha khisyānyo|| ūdho jāhu bā~ha dhari lyāo sundarasyāma piyāro| byāhau lākha, dharauṃ dasa kubarī, aṃtahi kānha hamāro|| suna, rī sakhī! kachū nahiṃ kahie mādhava āvana dījai| jabahīṃ milaiṃ sūra ke svāmī hā~sī kari kari lījai

उर में माखनचोर गड़े। अब कैसहु निकसत नहिं ऊधो! तिरछे ह्वै जो अड़े॥ जदपि अहीर जसोदानंदन तदपि न जात छड़े। वहाँ बने जदुबंस महाकुल हमहिं न लगत बड़े॥ को बसुदेव, देवकी है को, ना जानैं औ बूझैं। सूर स्यामसुन्दर बिनु देखें और न कोऊ सूझैं

ura meṃ mākhanacora gar̤e| aba kaisahu nikasata nahiṃ ūdho! tirache hvai jo ar̤e|| jadapi ahīra jasodānaṃdana tadapi na jāta char̤e| vahā~ bane jadubaṃsa mahākula hamahiṃ na lagata bar̤e|| ko basudeva, devakī hai ko, nā jānaiṃ au būjhaiṃ| sūra syāmasundara binu dekheṃ aura na koū sūjhaiṃ

गोपालहिं कैसे कै हम देति? ऊधो की इन मीठी बातन निर्गुन कैसे लेति? अर्थ, धर्म, कामना सुनावत सब सुख मुकुति-समेति। जे व्यापकहिं बिचारत बरनत निगम कहत हैं नेति॥ ताकी भूलि गई मनसाहू देखहु जौ चित चेति। सूर स्याम तजि कौन सकत है, अलि, काकी गति एति

gopālahiṃ kaise kai hama deti? ūdho kī ina mīṭhī bātana nirguna kaise leti? artha, dharma, kāmanā sunāvata saba sukha mukuti-sameti| je vyāpakahiṃ bicārata baranata nigama kahata haiṃ neti|| tākī bhūli gaī manasāhū dekhahu jau cita ceti| sūra syāma taji kauna sakata hai, ali, kākī gati eti

उपमा एक न नैन गही। कबिजन कहत कहत चलि आए सुधि करि करि काहू न कही॥ कहे चकोर, मुख-बिधु बिनु जीवन; भँवर न, तहँ उड़ि जात। हरिमुख-कमलकोस बिछुरे तें ठाले क्यों ठहरात? खंजन मनरंजन जन जौ पै, कबहुँ नाहिं सतरात। पंख पसारि न उड़त, मंद ह्वै समर-समीप बिकात॥ आए बधन ब्याध ह्वै ऊधो, जौ मृग, क्यों न पलाय? देखत भागि बसै घन बन में जहँ कोउ संग न धाय॥ ब्रजलोचन बिनु लोचन कैसे? प्रति छिन अति दुख बाढ़त। सूरदास मीनता कछू इक, जल भरि संग न छाँड़त

upamā eka na naina gahī| kabijana kahata kahata cali āe sudhi kari kari kāhū na kahī|| kahe cakora, mukha-bidhu binu jīvana; bha~vara na, taha~ ur̤i jāta| harimukha-kamalakosa bichure teṃ ṭhāle kyoṃ ṭhaharāta? khaṃjana manaraṃjana jana jau pai, kabahu~ nāhiṃ satarāta| paṃkha pasāri na ur̤ata, maṃda hvai samara-samīpa bikāta|| āe badhana byādha hvai ūdho, jau mṛga, kyoṃ na palāya? dekhata bhāgi basai ghana bana meṃ jaha~ kou saṃga na dhāya|| brajalocana binu locana kaise? prati china ati dukha bār̤hata| sūradāsa mīnatā kachū ika, jala bhari saṃga na chā~r̤ata

हरिमुख निरखि निमेख बिसारे। ता दिन तें मनो भए दिगंबर इन नैनन के तारे॥ घूँघट-पट छांड़े बीथिन महँ अहनिसि अटत उघारे। सहज समाधि रूपरुचि इकटक टरत न टक तें टारे॥ सूर, सुमति समुझति, जिय जानति, ऊधो! बचन तिहारे। करैं कहा ये कह्यो न मानत लोचन हठी हमारे

harimukha nirakhi nimekha bisāre| tā dina teṃ mano bhae digaṃbara ina nainana ke tāre|| ghū~ghaṭa-paṭa chāṃr̤e bīthina maha~ ahanisi aṭata ughāre| sahaja samādhi rūparuci ikaṭaka ṭarata na ṭaka teṃ ṭāre|| sūra, sumati samujhati, jiya jānati, ūdho! bacana tihāre| karaiṃ kahā ye kahyo na mānata locana haṭhī hamāre

दूर करहु बीना कर धरिबो। मोहे मृग नाही रथ हाँक्यो, नाहिंन होत चंद को ढरिबो॥ बीती जाहि पै सोई जानै कठिन है प्रेम-पास को परिबो। जब तें बिछुरे कमलनयन, सखि, रहत न नयन नीर को गरिबो॥ सीतल चंद अगिनि सम लागत कहिए धीर कौन बिधि धरिबो। सूरदास प्रभु तुम्हरे दरस बिनु सब झूठो जतननि को करिबो

dūra karahu bīnā kara dharibo| mohe mṛga nāhī ratha hā~kyo, nāhiṃna hota caṃda ko ḍharibo|| bītī jāhi pai soī jānai kaṭhina hai prema-pāsa ko paribo| jaba teṃ bichure kamalanayana, sakhi, rahata na nayana nīra ko garibo|| sītala caṃda agini sama lāgata kahie dhīra kauna bidhi dharibo| sūradāsa prabhu tumhare darasa binu saba jhūṭho jatanani ko karibo

अति मलीन बृषभानुकुमारी। हरि-स्रमजल अंतर-तनु भीजे ता लालच न धुआवति सारी। अधोमुख रहति उरध नहिं चितवति ज्यों गथ हारे थकित जुआरी। छूटे चिहुर, बदन कुम्हिलाने, ज्यों नलिनी हिमकर की मारी॥ हरि-सँदेस सुनि सहज मृतक भईं, इक बिरहिनि दूजे अलि जारी। सूर स्याम बिनु यों जीवति हैं ब्रजबनिता सब स्यामदुलारी

ati malīna bṛṣabhānukumārī| hari-sramajala aṃtara-tanu bhīje tā lālaca na dhuāvati sārī| adhomukha rahati uradha nahiṃ citavati jyoṃ gatha hāre thakita juārī| chūṭe cihura, badana kumhilāne, jyoṃ nalinī himakara kī mārī|| hari-sa~desa suni sahaja mṛtaka bhaīṃ, ika birahini dūje ali jārī| sūra syāma binu yoṃ jīvati haiṃ brajabanitā saba syāmadulārī

ऊधो! तुम हौ अति बड़भागी। अपरस रहत सनेहतगा तें, नाहिंन मन अनुरागी॥ पुरइनि-पात रहत जल-भीतर ता रस देह न दागी। ज्यों जल माँह तेल की गागरि बूँद न ताके लागी॥ प्रीति-नदी में पावँ न बोस्यो, दृष्टि न रूप परागी। सूरदास अबला हम भोरी गुर चींटी ज्यों पागी

ūdho! tuma hau ati bar̤abhāgī| aparasa rahata sanehatagā teṃ, nāhiṃna mana anurāgī|| puraini-pāta rahata jala-bhītara tā rasa deha na dāgī| jyoṃ jala mā~ha tela kī gāgari bū~da na tāke lāgī|| prīti-nadī meṃ pāva~ na bosyo, dṛṣṭi na rūpa parāgī| sūradāsa abalā hama bhorī gura cīṃṭī jyoṃ pāgī

ऊधो! यह मन और न होय। पहिले ही चढ़ि रह्यो स्याम-रँग छुटत न देख्यो धोय॥ कैतव-बचन छाँड़ि हरि हमको सोइ करैं जो मूल। जोग हमैं ऐसो लागत है ज्यों तोहि चंपक फूल॥ अब क्यों मिटत हाथ की रेखा? कहौ कौन बिधि कीजै? सूर, स्याममुख आनि दिखाओ जाहि निरखि करि जीजै

ūdho! yaha mana aura na hoya| pahile hī car̤hi rahyo syāma-ra~ga chuṭata na dekhyo dhoya|| kaitava-bacana chā~r̤i hari hamako soi karaiṃ jo mūla| joga hamaiṃ aiso lāgata hai jyoṃ tohi caṃpaka phūla|| aba kyoṃ miṭata hātha kī rekhā? kahau kauna bidhi kījai? sūra, syāmamukha āni dikhāo jāhi nirakhi kari jījai

ऊधो! ना हम बिरही, ना तुम दास। कहत सुनत घट प्रान रहत हैं, हरि तजि भजहु अकास॥ बिरही मीन मरत जल बिछुरे छाँड़ि जियन की आस। दास-भाव नहिं तजत पपीहा बरु सहिं रहत पियास॥ प्रगट प्रीति दसरथ प्रतिपाली प्रीतम के बनवास। सूर स्याम सों दृढ़ब्रत कीन्हों मेटि जगत-उपहास

ūdho! nā hama birahī, nā tuma dāsa| kahata sunata ghaṭa prāna rahata haiṃ, hari taji bhajahu akāsa|| birahī mīna marata jala bichure chā~r̤i jiyana kī āsa| dāsa-bhāva nahiṃ tajata papīhā baru sahiṃ rahata piyāsa|| pragaṭa prīti dasaratha pratipālī prītama ke banavāsa| sūra syāma soṃ dṛr̤habrata kīnhoṃ meṭi jagata-upahāsa

ऊधो! कही सो बहुरि न कहियो। जौ तुम हमहिं जिवायो चाहौ अनबोले ह्वै रहियो॥ हमरे प्रान अघात होत हैं, तुम जानत हौ हाँसी। या जीवन तें मरन भलो है करवट लैबो कासी॥ जब हरि गवन कियौ पूरब लौं तब लिखि जोग पठायो। यह तन जरिकै भस्म ह्वै निबर्यौ बहुरि मसान जगायो॥ कै रे! मनोहर आनि मिलायो, कै लै चलु हम साथे। सूरदास अब मरन बन्यो है, पाप तिहारे माथे

ūdho! kahī so bahuri na kahiyo| jau tuma hamahiṃ jivāyo cāhau anabole hvai rahiyo|| hamare prāna aghāta hota haiṃ, tuma jānata hau hā~sī| yā jīvana teṃ marana bhalo hai karavaṭa laibo kāsī|| jaba hari gavana kiyau pūraba lauṃ taba likhi joga paṭhāyo| yaha tana jarikai bhasma hvai nibaryau bahuri masāna jagāyo|| kai re! manohara āni milāyo, kai lai calu hama sāthe| sūradāsa aba marana banyo hai, pāpa tihāre māthe

ऊधो! तुम अपनो जतन करौ। हित की कहत कुहित की लागै, किन बेकाज ररौ? जाय करौ उपचार आपनो, हम जो कहत हैं जी की। कछू कहत कछुवै कहि डारत, धुन देखियत नहिं नीकी। साधु होय तेहि उत्तर दीजै तुमसों मानी हारि। याही तें तुम्हैं नँदनंदनजू यहाँ पठाए टारि॥ मथुरा बेगि गहौ इन पाँयन, उपज्यौ है तन रोग। सूर सुबैद बेगि किन ढूँढ़ौ भए अर्द्धजल जोग

ūdho! tuma apano jatana karau| hita kī kahata kuhita kī lāgai, kina bekāja rarau? jāya karau upacāra āpano, hama jo kahata haiṃ jī kī| kachū kahata kachuvai kahi ḍārata, dhuna dekhiyata nahiṃ nīkī| sādhu hoya tehi uttara dījai tumasoṃ mānī hāri| yāhī teṃ tumhaiṃ na~danaṃdanajū yahā~ paṭhāe ṭāri|| mathurā begi gahau ina pā~yana, upajyau hai tana roga| sūra subaida begi kina ḍhū~r̤hau bhae arddhajala joga