Padas 136–150

ऊधो! भली करी तुम आए। ये बातें कहि कहि या दुख में ब्रज के लोग हँसाए॥ कौन काज बृंदावन को सुख, दही-मात की छाक? अब वे कान्ह कूबरी राँचे बने एक ही ताक॥ मोर मुकुट मुरली पीतांबर, पठवौं सोज हमारी। अपनी जटाजूट अरु मुद्रा लीजे भस्म अधारी॥ वै तौ बड़े, सखा तुम उनके, तुमकौं सुगम अनीति। सूर सबै मति भली स्याम की जमुना-जल सौं प्रीति

ūdho! bhalī karī tuma āe| ye bāteṃ kahi kahi yā dukha meṃ braja ke loga ha~sāe|| kauna kāja bṛṃdāvana ko sukha, dahī-māta kī chāka? aba ve kānha kūbarī rā~ce bane eka hī tāka|| mora mukuṭa muralī pītāṃbara, paṭhavauṃ soja hamārī| apanī jaṭājūṭa aru mudrā līje bhasma adhārī|| vai tau bar̤e, sakhā tuma unake, tumakauṃ sugama anīti| sūra sabai mati bhalī syāma kī jamunā-jala sauṃ prīti

ऊधो! बूझति गुपुत तिहारी। सब काहू के मन की जानत बाँधे मूरि फिरत ठगवारी॥ पीत ध्वजा उनके पीतांबर, लाल ध्वजा कुब्जा व्यभिचारी। सत की ध्वजा स्वेत ब्रज ऊपर अजस हेतु ऊधो! सो प्यारी॥ उनके प्रेम-प्रीति मनरंजन, पै ह्याँ सकल सीलब्रतधारी। सूर बचन मिथ्या, लंगराई ये दोऊ ऊधो की न्यारी

ūdho! būjhati guputa tihārī| saba kāhū ke mana kī jānata bā~dhe mūri phirata ṭhagavārī|| pīta dhvajā unake pītāṃbara, lāla dhvajā kubjā vyabhicārī| sata kī dhvajā sveta braja ūpara ajasa hetu ūdho! so pyārī|| unake prema-prīti manaraṃjana, pai hyā~ sakala sīlabratadhārī| sūra bacana mithyā, laṃgarāī ye doū ūdho kī nyārī

ऊधो! मन माने की बात। जरत पतंग दीप में जैसे, औ फिरि फिरि लपटात॥ रहत चकोर पुहुमि पर, मधुकर! ससि अकास भरमात। ऐसो ध्यान धरो हरिजू पै छन इत उत नहिं जात॥ दादुर रहत सदा जल-भीतर कमलहिं नहिं नियरात। काठ फोरि घर कियो मधुप पै बंधे अंबुज के पात॥ बरषा बरसत निसिदिन, ऊधो! पुहुमी पूरि अघात। स्वाति-बूंद के काज पपीहा छन छन रटत रहात॥ सेहि न खात अमृतफल भोजन तोमरि को ललचात। सूर कृस्न कुबरी रीझे गोपिन देखि लजात

ūdho! mana māne kī bāta| jarata pataṃga dīpa meṃ jaise, au phiri phiri lapaṭāta|| rahata cakora puhumi para, madhukara! sasi akāsa bharamāta| aiso dhyāna dharo harijū pai chana ita uta nahiṃ jāta|| dādura rahata sadā jala-bhītara kamalahiṃ nahiṃ niyarāta| kāṭha phori ghara kiyo madhupa pai baṃdhe aṃbuja ke pāta|| baraṣā barasata nisidina, ūdho! puhumī pūri aghāta| svāti-būṃda ke kāja papīhā chana chana raṭata rahāta|| sehi na khāta amṛtaphala bhojana tomari ko lalacāta| sūra kṛsna kubarī rījhe gopina dekhi lajāta

ऊधो! खरिऐ जरी हरि के सूलन की। कुंज कलोल करे बन ही बन सुधि बिसरी वा भूलन की। ब्रज हम दौरि आँक भरि लीन्ही देखि छाँह नव मूलन की॥ अब वह प्रीति कहाँ लौं बरनौं वा जमुना के कूलन की॥ वह छवि छाकि रहे दोउ लोचन बहियां गहि बन झूलन की। खटकति है वह सूर हिये मों माल दई मोहिं फूलन की

ūdho! khariai jarī hari ke sūlana kī| kuṃja kalola kare bana hī bana sudhi bisarī vā bhūlana kī| braja hama dauri ā~ka bhari līnhī dekhi chā~ha nava mūlana kī|| aba vaha prīti kahā~ lauṃ baranauṃ vā jamunā ke kūlana kī|| vaha chavi chāki rahe dou locana bahiyāṃ gahi bana jhūlana kī| khaṭakati hai vaha sūra hiye moṃ māla daī mohiṃ phūlana kī

मधुकर! हम न होहिं वे बेली। जिनको तुम तजि भजत प्रीति बिनु करत कुसुमरस-केली॥ बारे तें बलबीर बढ़ाई पोसी प्याई पानी। बिन पिय-परस प्रात उठि फूलन होत सदा हित-हानी॥ ये बल्ली बिहरत बृंदावन अरुझीं स्याम-तमालहिं। प्रेमपुष्प-रस-बास हमारे बिलसत मधुप गोपालहिं॥ जोग-समीर धीर नहिं डोलत, रूपडार-ढिग लागी। सूर पराग न तजत हिये तें कमल-नयन-अनुरागी

madhukara! hama na hohiṃ ve belī| jinako tuma taji bhajata prīti binu karata kusumarasa-kelī|| bāre teṃ balabīra bar̤hāī posī pyāī pānī| bina piya-parasa prāta uṭhi phūlana hota sadā hita-hānī|| ye ballī biharata bṛṃdāvana arujhīṃ syāma-tamālahiṃ| premapuṣpa-rasa-bāsa hamāre bilasata madhupa gopālahiṃ|| joga-samīra dhīra nahiṃ ḍolata, rūpaḍāra-ḍhiga lāgī| sūra parāga na tajata hiye teṃ kamala-nayana-anurāgī

मधुकर! स्याम हमारे ईस। जिनको ध्यान धरे उर-अंतर आनहिं नए न उन बिंन सीस॥ जोगिन जाय जोग उपदेसौ जिनके मन दस बीस। एकै मन, एकै वह मूरति, नित बितवत दिन तीस॥ काहे निर्गुन-ज्ञान आपुनो जित तित डारत खीस। सूर प्रभू नंदनंदन हैं उनतें को जगदीस?

madhukara! syāma hamāre īsa| jinako dhyāna dhare ura-aṃtara ānahiṃ nae na una biṃna sīsa|| jogina jāya joga upadesau jinake mana dasa bīsa| ekai mana, ekai vaha mūrati, nita bitavata dina tīsa|| kāhe nirguna-jñāna āpuno jita tita ḍārata khīsa| sūra prabhū naṃdanaṃdana haiṃ unateṃ ko jagadīsa?

मधुकर! तुम हौ स्याम-सखाई। पा लागों यह दोष बकसियो संमुख करत ढिठाई॥ कौने रंक संपदा बिलसी सोवत सपने पाई? किन सोने की उड़त चिरैया डोरी बांधि खिलाई? धाम धुआँ के कहौ कौन के बैठी कहाँ अथाई? किन अकास तें तोरि तरैयाँ आनि धरी घर, माई! बौरन की माला गुहि कौनै अपने करन बनाई? बिन जल नाव चलत किन देखी, उतरि पार को जाई? कौनै कमलनयन-ब्रत बीड़ो जोरि समाधि लगाई? सूरदास तू फिरि फिरि आवत यामें कौन बड़ाई?

madhukara! tuma hau syāma-sakhāī| pā lāgoṃ yaha doṣa bakasiyo saṃmukha karata ḍhiṭhāī|| kaune raṃka saṃpadā bilasī sovata sapane pāī? kina sone kī ur̤ata ciraiyā ḍorī bāṃdhi khilāī? dhāma dhuā~ ke kahau kauna ke baiṭhī kahā~ athāī? kina akāsa teṃ tori taraiyā~ āni dharī ghara, māī! baurana kī mālā guhi kaunai apane karana banāī? bina jala nāva calata kina dekhī, utari pāra ko jāī? kaunai kamalanayana-brata bīr̤o jori samādhi lagāī? sūradāsa tū phiri phiri āvata yāmeṃ kauna bar̤āī?

मधुकर! मन तो एकै आहि। सो तो लै हार संग सिधारे जोग सिखावत काहि? रे सठ, कुटिल-बचन, रसलंपट! अबलन तन धौं चाहि। अब काहे को देत लोन हौ बिरहअनल तन दाहि॥ परमारथ उपचार करत हौ, बिरहव्यथा नहिं जाहि। जाको राजदोष कफ ब्यापै दही खवावत ताहि॥ सुंदरस्याम-सलोनी-मूरति पूरि रही हिय माहिं। सूर ताहि तजि निर्गुन-सिंधुहि कौन सकै अवगाहि?

madhukara! mana to ekai āhi| so to lai hāra saṃga sidhāre joga sikhāvata kāhi? re saṭha, kuṭila-bacana, rasalaṃpaṭa! abalana tana dhauṃ cāhi| aba kāhe ko deta lona hau birahaanala tana dāhi|| paramāratha upacāra karata hau, birahavyathā nahiṃ jāhi| jāko rājadoṣa kapha byāpai dahī khavāvata tāhi|| suṃdarasyāma-salonī-mūrati pūri rahī hiya māhiṃ| sūra tāhi taji nirguna-siṃdhuhi kauna sakai avagāhi?

मधुकर! छाँड़ु अटपटी बातें। फिरि फिरि बार बार सोइ सिखवत हम दुख पावति जातें॥ अनुदिन देति असीस प्रांत उठि, अरु सुख सोवत न्हातें। तुम निसिदिन उर-अंतर सोचत ब्रजजुबतिन को घातें॥ पुनि पुनि तुम्हैं कहत क्यों आवै, कछु जाने यहि नाते। सूरदास जो रंगी स्यामरंग फिरि न चढ़त अब राते

madhukara! chā~r̤u aṭapaṭī bāteṃ| phiri phiri bāra bāra soi sikhavata hama dukha pāvati jāteṃ|| anudina deti asīsa prāṃta uṭhi, aru sukha sovata nhāteṃ| tuma nisidina ura-aṃtara socata brajajubatina ko ghāteṃ|| puni puni tumhaiṃ kahata kyoṃ āvai, kachu jāne yahi nāte| sūradāsa jo raṃgī syāmaraṃga phiri na car̤hata aba rāte

मधुप! रावरी पहिचानि। बास रस लै अनत बैठे पुहुप को तजि कानि॥ बाटिका बहु बिपिन जाके एक जौ कुम्हलानि। फूल फूले सघन कानन कौन तिनकी हानि? कामपावक जरति छाती लोन लाए आनि। जोग-पाती हाथ दीन्हीं बिप चढ़ायो सानि॥ सीस तें मनि हरी जिनके कौन तिनमें बानि। सूर के प्रभु निरखि हिरदय ब्रज तज्यो यह जानि

madhupa! rāvarī pahicāni| bāsa rasa lai anata baiṭhe puhupa ko taji kāni|| bāṭikā bahu bipina jāke eka jau kumhalāni| phūla phūle saghana kānana kauna tinakī hāni? kāmapāvaka jarati chātī lona lāe āni| joga-pātī hātha dīnhīṃ bipa car̤hāyo sāni|| sīsa teṃ mani harī jinake kauna tinameṃ bāni| sūra ke prabhu nirakhi hiradaya braja tajyo yaha jāni

मधुकर! स्याम हमारे चोर। मन हरि लियो माधुरी मूरति चितै नयन की कोर॥ पकर्यो तेहि हिरदय उर-अंतर प्रेम-प्रीति के जोर। गए छंड़ाय छोरि सब बंधन दै गए हँसनि अंकोर॥ सोवत तें हम उचकि परी हैं दूत मिल्यो मोहिं भोर। सूर स्याम मुसकनि मेरो सर्वस लै गए नंदकिसोर

madhukara! syāma hamāre cora| mana hari liyo mādhurī mūrati citai nayana kī kora|| pakaryo tehi hiradaya ura-aṃtara prema-prīti ke jora| gae chaṃr̤āya chori saba baṃdhana dai gae ha~sani aṃkora|| sovata teṃ hama ucaki parī haiṃ dūta milyo mohiṃ bhora| sūra syāma musakani mero sarvasa lai gae naṃdakisora

मधुकर! समुझि कहौ मुख बात। हौ मद पिए मत्त, नहिं सूझत, काहे को इतरात? बीच जो परै सत्य सो भाखै, बोलै सत्य स्वरूप। मुख देखत को न्याव न कीजै, कहा रंक कह भूप॥ कछु कहत कछुऐ मुख निकसत, परनिंदक व्यभिचारी। ब्रजजुवतिन को जोग सिखावत कीरति आनि पसारी॥ हम जान्यो सो भँवर रसभोगी जोग-जुगुति कहँ पाई? परम गुरू सिर मूँडि बापुरे करमुख छार लगाई॥ यहै अनीति बिधाता कीन्हीं तौऊ समुझत नाहीं। जो कोउ परहित कूप खनावै परै सो कूपहि माहीं॥ सूर सो वे प्रभु अंतर्यामी कासों कहौं पुकारी? तब अक्रूर अबै इन ऊधो दुहुँ मिलि छाती जारी

madhukara! samujhi kahau mukha bāta| hau mada pie matta, nahiṃ sūjhata, kāhe ko itarāta? bīca jo parai satya so bhākhai, bolai satya svarūpa| mukha dekhata ko nyāva na kījai, kahā raṃka kaha bhūpa|| kachu kahata kachuai mukha nikasata, paraniṃdaka vyabhicārī| brajajuvatina ko joga sikhāvata kīrati āni pasārī|| hama jānyo so bha~vara rasabhogī joga-juguti kaha~ pāī? parama gurū sira mū~ḍi bāpure karamukha chāra lagāī|| yahai anīti bidhātā kīnhīṃ tauū samujhata nāhīṃ| jo kou parahita kūpa khanāvai parai so kūpahi māhīṃ|| sūra so ve prabhu aṃtaryāmī kāsoṃ kahauṃ pukārī? taba akrūra abai ina ūdho duhu~ mili chātī jārī

मधुकर! हम जो कहौ करैं। पठयो है गोपाल कृपा कै आयसु तें न टरैं॥ रसना वारि फेरि नव खंड कै, दै निर्गुन के साथ। इतनी तनक बिलग जनि-मानहुँ, अँखियाँ नाहीं हाथ॥ सेवा कठिन, अपूरब दरसन कहत अबहुँ मैं फेरि। कहियो जाय सूर के प्रभु सों केरा पास ज्यों बेरि

madhukara! hama jo kahau karaiṃ| paṭhayo hai gopāla kṛpā kai āyasu teṃ na ṭaraiṃ|| rasanā vāri pheri nava khaṃḍa kai, dai nirguna ke sātha| itanī tanaka bilaga jani-mānahu~, a~khiyā~ nāhīṃ hātha|| sevā kaṭhina, apūraba darasana kahata abahu~ maiṃ pheri| kahiyo jāya sūra ke prabhu soṃ kerā pāsa jyoṃ beri

मधुकर! तौ औरनि सिख देहु। जानौगे जब लागैगो, हो, खरो कठिन है नेहु॥ मन जो तिहारो हरिचरनन-तर, तन धरि गोकुल आयो। कमलनयन के संग तें बिछुरे कहु कौने सचु पायो? ह्याँई रहौ जाहु जनि मथुरा, झूठो माया-मोहु। गोपी सूर कहत ऊधो सों हमहीं से तुम होहु

madhukara! tau aurani sikha dehu| jānauge jaba lāgaigo, ho, kharo kaṭhina hai nehu|| mana jo tihāro haricaranana-tara, tana dhari gokula āyo| kamalanayana ke saṃga teṃ bichure kahu kaune sacu pāyo? hyā~ī rahau jāhu jani mathurā, jhūṭho māyā-mohu| gopī sūra kahata ūdho soṃ hamahīṃ se tuma hohu

मधुकर! जानत नाहिंन बात। फूँकि फूँकि हियरा सुलगावत उठि न यहाँ तें जात॥ जो उर बसत जसोदानंदन निगुन कहाँ समात? कत भटकत डोलत कुसुमन को तुम हौ पातन पात? जदपि सकल बल्ली बन बिहरत जाय बसत जलजात। सूरदास ब्रज मिले बनि आवै? दासी की कुसलात

madhukara! jānata nāhiṃna bāta| phū~ki phū~ki hiyarā sulagāvata uṭhi na yahā~ teṃ jāta|| jo ura basata jasodānaṃdana niguna kahā~ samāta? kata bhaṭakata ḍolata kusumana ko tuma hau pātana pāta? jadapi sakala ballī bana biharata jāya basata jalajāta| sūradāsa braja mile bani āvai? dāsī kī kusalāta