Padas 166–180

उधो! हम आजु भईं बड़भागी। जैसे सुमन-गंध लै आवतु पवन मधुप अनुरागी। अति आनंद बढ़्यो अँग अँग मैं, परै न यह सुख त्यागी। बिसरे सब दुख देखत तुमको स्यामसुन्दर हम लागी॥ ज्यों दर्पन मधि दृग निरखत जहँ हाथ तहाँ नहिं जाई। त्यों ही सूर हम मिलीं साँवरे बिरह-बिथा बिसराई

udho! hama āju bhaīṃ bar̤abhāgī| jaise sumana-gaṃdha lai āvatu pavana madhupa anurāgī| ati ānaṃda bar̤hyo a~ga a~ga maiṃ, parai na yaha sukha tyāgī| bisare saba dukha dekhata tumako syāmasundara hama lāgī|| jyoṃ darpana madhi dṛga nirakhata jaha~ hātha tahā~ nahiṃ jāī| tyoṃ hī sūra hama milīṃ sā~vare biraha-bithā bisarāī

पाती सखि! मधुबन तें आई। ऊधो-हाथ स्याम लिखि पठई, आय सुनौ, री माई! अपने अपने गृह तें दौरीं लै पाती उर लाई। नयनन नीर निरखि नहिं खंडित प्रेम न बिथा बुझाई॥ कहा करौं सूनो यह गोकुल हरि बिनु कछु न सुहाई। सूरदास प्रभु कौन चूक तें स्याम सुरति बिसराई?

pātī sakhi! madhubana teṃ āī| ūdho-hātha syāma likhi paṭhaī, āya sunau, rī māī! apane apane gṛha teṃ daurīṃ lai pātī ura lāī| nayanana nīra nirakhi nahiṃ khaṃḍita prema na bithā bujhāī|| kahā karauṃ sūno yaha gokula hari binu kachu na suhāī| sūradāsa prabhu kauna cūka teṃ syāma surati bisarāī?

सुनु गोपी हरि को सँदेस। करि समाधि अंतर-गति चितवौ प्रभु को यह उपदेस॥ वै अबिगत, अबिनासी, पूरन, घटघट रहे समाय। तिहि निश्चय कै ध्यावहु ऐसे सुचित कमलमन लाइ॥ यह उपाय करि बिरह तजौगी मिलै ब्रह्म तब आय। तत्त्वज्ञान बिनु मुक्ति न होई निगम सुनाबत गाय॥ सुनत सँदेस दुसह माधव के गोपीजन बिलखानी। सूर बिरह की कौन चलावै, नयन ढरत अति पानी

sunu gopī hari ko sa~desa| kari samādhi aṃtara-gati citavau prabhu ko yaha upadesa|| vai abigata, abināsī, pūrana, ghaṭaghaṭa rahe samāya| tihi niścaya kai dhyāvahu aise sucita kamalamana lāi|| yaha upāya kari biraha tajaugī milai brahma taba āya| tattvajñāna binu mukti na hoī nigama sunābata gāya|| sunata sa~desa dusaha mādhava ke gopījana bilakhānī| sūra biraha kī kauna calāvai, nayana ḍharata ati pānī

मधुकर! भली सुमति मति खोई। हाँसी होन लगी या ब्रज में जोगै राखौ गोई॥ आतमराम लखावत डोलत घटघट व्यापक जोई। चापे काँख फिरत निर्गुन को, ह्याँ गाहक नहिं कोई॥ प्रेम-बिथा सोई पै जानै जापै बीती होई। तू नीरस एती कह जानै? बूझि देखिबे ओई॥ बड़ो दूत तू, बड़े ठौर को, कहिए बुद्धि बड़ोई। सूरदास पूरीषहि षटपद! कहत फिरत है सोई

madhukara! bhalī sumati mati khoī| hā~sī hona lagī yā braja meṃ jogai rākhau goī|| ātamarāma lakhāvata ḍolata ghaṭaghaṭa vyāpaka joī| cāpe kā~kha phirata nirguna ko, hyā~ gāhaka nahiṃ koī|| prema-bithā soī pai jānai jāpai bītī hoī| tū nīrasa etī kaha jānai? būjhi dekhibe oī|| bar̤o dūta tū, bar̤e ṭhaura ko, kahie buddhi bar̤oī| sūradāsa pūrīṣahi ṣaṭapada! kahata phirata hai soī

सुनियत ज्ञानकथा अलि गात। जिहि मुख सुधा बेनुरवपूरित हरि प्रति छनहिं सुनात॥ जहँ लीलारस सखी-समाजहिं कहत कहत दिन जात। बिधिना फेरि दियो सब देखत, तहँ षटपद समुझात॥ बिद्यमान रसरास लड़ैते कत मन इत अरुझात? रूपरहित कछु बकत बदन ते मति कोउ ठग भुरवात॥ साधुबाद स्रुतिसार जानिकै उचित न मन बिसरात। नँदनंदन कर-कमलन को छबि मुख उर पर परसात॥ एक एक ते सबै सयानी ब्रजसुँदरि न सकात। सूर स्याम-रससिंधुगामिनी नहिं वह दसा हिरात

suniyata jñānakathā ali gāta| jihi mukha sudhā benuravapūrita hari prati chanahiṃ sunāta|| jaha~ līlārasa sakhī-samājahiṃ kahata kahata dina jāta| bidhinā pheri diyo saba dekhata, taha~ ṣaṭapada samujhāta|| bidyamāna rasarāsa lar̤aite kata mana ita arujhāta? rūparahita kachu bakata badana te mati kou ṭhaga bhuravāta|| sādhubāda srutisāra jānikai ucita na mana bisarāta| na~danaṃdana kara-kamalana ko chabi mukha ura para parasāta|| eka eka te sabai sayānī brajasu~dari na sakāta| sūra syāma-rasasiṃdhugāminī nahiṃ vaha dasā hirāta

ऊधो! इतनी कहियो जाय। अति कृसगात भई हैं तुम बिनु बहुत दुखारी गाय॥ जल समूह बरसत अँखियन तें, हूंकत लीने नाँव। जहाँ जहाँ गोदोहन करते ढूँढ़त सोइ सोई ठाँव॥ परति पछार खाय तेहि तेहि थल अति व्याकुल ह्वै दीन। मानहुँ सूर काढ़ि डारे हैं बारि मध्य तें मीन

ūdho! itanī kahiyo jāya| ati kṛsagāta bhaī haiṃ tuma binu bahuta dukhārī gāya|| jala samūha barasata a~khiyana teṃ, hūṃkata līne nā~va| jahā~ jahā~ godohana karate ḍhū~r̤hata soi soī ṭhā~va|| parati pachāra khāya tehi tehi thala ati vyākula hvai dīna| mānahu~ sūra kār̤hi ḍāre haiṃ bāri madhya teṃ mīna

ऊधो जोग सिखावन आए। सिंधी, भस्म, अधारी, मुद्रा लै ब्रजनाथ पठाए॥ जौपै जोग लिख्यो गोपिन को, कस रसरास खिलाए? तबहिं ज्ञान काहे न उपदेस्यो, अधर-सुधारस प्याए॥ मुरली सब्द सुनत बन गवनति सुत पति गृह बिसराए। सूरदास सँग छाँड़ि स्याम को मनहिं रहे पछिताए

ūdho joga sikhāvana āe| siṃdhī, bhasma, adhārī, mudrā lai brajanātha paṭhāe|| jaupai joga likhyo gopina ko, kasa rasarāsa khilāe? tabahiṃ jñāna kāhe na upadesyo, adhara-sudhārasa pyāe|| muralī sabda sunata bana gavanati suta pati gṛha bisarāe| sūradāsa sa~ga chā~r̤i syāma ko manahiṃ rahe pachitāe

ऊधो! लहनौ अपनो पैए। जो कछु विधना रची सो भइए आन दोष न लगैए॥ कहिए कहा जु कहत बनाई सोच हृदय पछितैए। कुब्जा बर पावै मोहन सो, हमहीं जोग बतैए॥ आज्ञा होय सोई तुम कहिबो, बिनती यहै सुनैए। सूरदास प्रभु-कृपा जानि जो दरसन सुधा पिबैए

ūdho! lahanau apano paie| jo kachu vidhanā racī so bhaie āna doṣa na lagaie|| kahie kahā ju kahata banāī soca hṛdaya pachitaie| kubjā bara pāvai mohana so, hamahīṃ joga bataie|| ājñā hoya soī tuma kahibo, binatī yahai sunaie| sūradāsa prabhu-kṛpā jāni jo darasana sudhā pibaie

ऊधो! कहा करैं लै पाती? जौ लगि नाहिं गोपालहिं देखति बिरह दहति मेरी छाती॥ निमिष एक मोहिं बिसरत नाहिंन सरद-समय की राती। मन तौ तबही तें हरि लीन्हों जब भयो मदन बराती॥ पीर पराई कह तुम जानौ तुम तो स्याम-सँघाती। सूरदास स्वामी सों तुम पुनि कहियो ठकुरसुहाती

ūdho! kahā karaiṃ lai pātī? jau lagi nāhiṃ gopālahiṃ dekhati biraha dahati merī chātī|| nimiṣa eka mohiṃ bisarata nāhiṃna sarada-samaya kī rātī| mana tau tabahī teṃ hari līnhoṃ jaba bhayo madana barātī|| pīra parāī kaha tuma jānau tuma to syāma-sa~ghātī| sūradāsa svāmī soṃ tuma puni kahiyo ṭhakurasuhātī

ऊधौ! बिरहौ प्रेमु करै। ज्यों बिनु पुट पट गहै न रंगहिं, पुट गहे रसहि परै॥ जौ आँवौ घट दहत अनल तनु तौ पुनि अमिय भरै। जौ धरि बीज देह अंकुर चिरि तौ सत फरनि फरै॥ जौ सर सहत सुभट संमुख रन तौ रबिरथहि सरै। सूर गोपाल प्रेमपथ-जल तें कोउ न दुखहिं डरै

ūdhau! birahau premu karai| jyoṃ binu puṭa paṭa gahai na raṃgahiṃ, puṭa gahe rasahi parai|| jau ā~vau ghaṭa dahata anala tanu tau puni amiya bharai| jau dhari bīja deha aṃkura ciri tau sata pharani pharai|| jau sara sahata subhaṭa saṃmukha rana tau rabirathahi sarai| sūra gopāla premapatha-jala teṃ kou na dukhahiṃ ḍarai

ऊधो! इतनी जाय कहो। सब बल्लभी कहति हरि सों ये दिन मधुपुरी रहो॥ आज काल तुमहूँ देखत हौ तपत तरनि सम चंद। सुंदरस्याम परम कोमल तनु क्यों सहि हैं नँदनंद॥ मधुर मोर पिक परुष प्रबल अति बन उपबन चढ़ि बोलत। सिंह बृकन सम गाय बच्छ ब्रज बीथिन बीथिन डोलत॥ आसन असन, बसन विष अहि सम भूषन भवन भँडार। जित तित फिरत दुसह द्रुम द्रुम प्रति धनुष लए सत मार॥ तुम तौ परम साधु कोमलमन जानत हौ सब रीति। सूर स्याम को क्यों बोलैं ब्रज बिन टारे यह ईति

ūdho! itanī jāya kaho| saba ballabhī kahati hari soṃ ye dina madhupurī raho|| āja kāla tumahū~ dekhata hau tapata tarani sama caṃda| suṃdarasyāma parama komala tanu kyoṃ sahi haiṃ na~danaṃda|| madhura mora pika paruṣa prabala ati bana upabana car̤hi bolata| siṃha bṛkana sama gāya baccha braja bīthina bīthina ḍolata|| āsana asana, basana viṣa ahi sama bhūṣana bhavana bha~ḍāra| jita tita phirata dusaha druma druma prati dhanuṣa lae sata māra|| tuma tau parama sādhu komalamana jānata hau saba rīti| sūra syāma ko kyoṃ bolaiṃ braja bina ṭāre yaha īti

जौ पै ऊधो! हिरदय माँझ हरी। तौ पै इती अवज्ञा उनपै कैसे सही परी? तबहिं दवा द्रुम दहन न पाये, अब क्यों देह जरी? सुन्दरस्याम निकसि उर तें हम सीतल क्यों न करी? इंद्र रिसाय बरस नयनन मग, घटत न एक घरी। भीजत सीत भीत तन काँपत रहे, गिरि क्यों न धरी। कर कंकन दर्पन लै दोऊ अब यहि अनख मरी। एतो मान सूर सुनि योग जु बिरहिनि बिरह धरी

jau pai ūdho! hiradaya mā~jha harī| tau pai itī avajñā unapai kaise sahī parī? tabahiṃ davā druma dahana na pāye, aba kyoṃ deha jarī? sundarasyāma nikasi ura teṃ hama sītala kyoṃ na karī? iṃdra risāya barasa nayanana maga, ghaṭata na eka gharī| bhījata sīta bhīta tana kā~pata rahe, giri kyoṃ na dharī| kara kaṃkana darpana lai doū aba yahi anakha marī| eto māna sūra suni yoga ju birahini biraha dharī

ऊधो! इतै हितूकर रहियो। या ब्रज के व्योहार जिते हैं सब हरि सों कहियो। देखि जात अपनी इन आँखिन दावानल दहियो। कहँ लौं कहौं बिथा अति लाजति यह मन को सहियो॥ कितो प्रहार करत मकरध्वज हृदय फारि चहियौ। यह तन नहिं जरि जात सूर प्रभु नयनन को बहियौ

ūdho! itai hitūkara rahiyo| yā braja ke vyohāra jite haiṃ saba hari soṃ kahiyo| dekhi jāta apanī ina ā~khina dāvānala dahiyo| kaha~ lauṃ kahauṃ bithā ati lājati yaha mana ko sahiyo|| kito prahāra karata makaradhvaja hṛdaya phāri cahiyau| yaha tana nahiṃ jari jāta sūra prabhu nayanana ko bahiyau

ऊधो! यहि ब्रज बिरह बढ़्यो। घर, बाहिर, सरिता, बन, उपबन, बल्ली, द्रुमन चढ्यो॥ बासर-रैन सधूम भयानक दिसि दिसि तिमिर मढ्यो। द्वँद करत अति प्रबल होत पुर, पय सों अनल डढ्यो॥ जरि किन होत भस्म छन महियाँ हा हरि, मँत्र पढ्यो। सूरदास प्रभु नँदनँदन बिनु नाहिंन जात कढ्यो

ūdho! yahi braja biraha bar̤hyo| ghara, bāhira, saritā, bana, upabana, ballī, drumana caḍhyo|| bāsara-raina sadhūma bhayānaka disi disi timira maḍhyo| dva~da karata ati prabala hota pura, paya soṃ anala ḍaḍhyo|| jari kina hota bhasma chana mahiyā~ hā hari, ma~tra paḍhyo| sūradāsa prabhu na~dana~dana binu nāhiṃna jāta kaḍhyo

ऊधो! तुम कहियो ऐसे गोकुल आवैं। दिन दस रहे सो भली कीनी अब जनि गहरु लगावैं॥ तुम बिनु कछु न सुहाय प्रानपति कानन भवन न भावैं। बाल बिलख, मुख गौ न चरत तृन, बछरनि छीर न प्यावैं॥ देखत अपनी आँखिन, ऊधो, हम कहि कहा जनावैं। सूर स्याम बिनु तपति रैन-दिनु हरिहि मिले सचु पावैं

ūdho! tuma kahiyo aise gokula āvaiṃ| dina dasa rahe so bhalī kīnī aba jani gaharu lagāvaiṃ|| tuma binu kachu na suhāya prānapati kānana bhavana na bhāvaiṃ| bāla bilakha, mukha gau na carata tṛna, bacharani chīra na pyāvaiṃ|| dekhata apanī ā~khina, ūdho, hama kahi kahā janāvaiṃ| sūra syāma binu tapati raina-dinu harihi mile sacu pāvaiṃ