Padas 286–300

उघरि आयो परदेसी को नेहु। तब तुम 'कान्ह कान्ह' कहि टेरति फूलति ही, अब लेहु॥ काहे को तुम सर्बस अपनो हाथ पराए देहु। उन जो महा ठग मथुरा छाँड़ी, सिंधुतीर कियो गेहु॥ अब तौ तपन महा तन उपजी, बाढ्यो मन संदेहु। सूरदास बिह्वल भइँ गोपी, नयनन्ह बरस्यो मेहु

ughari āyo paradesī ko nehu| taba tuma 'kānha kānha' kahi ṭerati phūlati hī, aba lehu|| kāhe ko tuma sarbasa apano hātha parāe dehu| una jo mahā ṭhaga mathurā chā~r̤ī, siṃdhutīra kiyo gehu|| aba tau tapana mahā tana upajī, bāḍhyo mana saṃdehu| sūradāsa bihvala bhai~ gopī, nayananha barasyo mehu

हरि न मिले री माई! जन्म ऐसे ही लाग्यो जान। जोवत मग द्यौस द्यौस बीतत जुग-समान॥ चातक-पिक-बयन सखी! सुनि न परै कान। चंदन अरु चंदकिरन कोटि मनो भानु॥ जुवती सजे भूषन रन-आतुर मनो त्रान। भीषण लौं डासि मदन अर्जुन के बान॥ सोवति सर-सेज सूर, चल न चपल प्रान। दच्छिन-रबि-अवधि अटक इतनीऐ जान

hari na mile rī māī! janma aise hī lāgyo jāna| jovata maga dyausa dyausa bītata juga-samāna|| cātaka-pika-bayana sakhī! suni na parai kāna| caṃdana aru caṃdakirana koṭi mano bhānu|| juvatī saje bhūṣana rana-ātura mano trāna| bhīṣaṇa lauṃ ḍāsi madana arjuna ke bāna|| sovati sara-seja sūra, cala na capala prāna| dacchina-rabi-avadhi aṭaka itanīai jāna

तुम्हरे बिरह ब्रजनाथ अहो प्रिय! नयनन नदी बढ़ी। लीने जात निमेष-कूल दोउ एते मान चढ़ी॥ गोलक नव-नौका न सकत चलि, स्यो सरकनि बढ़ि बोरति। ऊरध स्वासु-समीर तरंगन तेज तिलक-तरु तोरति॥ कज्जल कीच कुचील किए तट अंतर अधर कपोल। रहे पथिक जो जहाँ सो तहाँ थकि हस्त चरन मुख-बोल॥ नाहिंन और उपाय रमापति बिन दरसन छन जीजै। अस्रु-सलिल बूड़त सब गोकुल सूर सुकर गहि लीजै

tumhare biraha brajanātha aho priya! nayanana nadī bar̤hī| līne jāta nimeṣa-kūla dou ete māna car̤hī|| golaka nava-naukā na sakata cali, syo sarakani bar̤hi borati| ūradha svāsu-samīra taraṃgana teja tilaka-taru torati|| kajjala kīca kucīla kie taṭa aṃtara adhara kapola| rahe pathika jo jahā~ so tahā~ thaki hasta carana mukha-bola|| nāhiṃna aura upāya ramāpati bina darasana chana jījai| asru-salila būr̤ata saba gokula sūra sukara gahi lījai

हमको सपनेहू में सोच। जा दिन तें बिछुरे नँदनँदन ता दिन तें यह पोच॥ मनो गोपाल आए मेरे घर, हँसि करि भुजा गही। कहा करौं बैरिनि भइ निंदिया, निमिष न और रही॥ ज्यों चकई प्रतिबिंब देखिकै आनंदी पिय जानि। सूर, पवन मिस निठुर बिधाता-चपल कर्यो जल आनि

hamako sapanehū meṃ soca| jā dina teṃ bichure na~dana~dana tā dina teṃ yaha poca|| mano gopāla āe mere ghara, ha~si kari bhujā gahī| kahā karauṃ bairini bhai niṃdiyā, nimiṣa na aura rahī|| jyoṃ cakaī pratibiṃba dekhikai ānaṃdī piya jāni| sūra, pavana misa niṭhura bidhātā-capala karyo jala āni

अँखियाँ अजान भईं। एक अंग अवलोकत हरि को और हुती सो गई। यों भूली ज्यों चोर भरे घर चोरी निधि न लई। बदलत भोर भयो पछितानी, कर तें छाँड़ि दई॥ ज्यों मुख परिपूरन हो त्यों ही पहिलेइ क्यों न रई। सूर सकति अति लोभ बढ्यो है, उपजति पीर नई

a~khiyā~ ajāna bhaīṃ| eka aṃga avalokata hari ko aura hutī so gaī| yoṃ bhūlī jyoṃ cora bhare ghara corī nidhi na laī| badalata bhora bhayo pachitānī, kara teṃ chā~r̤i daī|| jyoṃ mukha paripūrana ho tyoṃ hī pahilei kyoṃ na raī| sūra sakati ati lobha baḍhyo hai, upajati pīra naī

दधिसुत जात हौ वहि देस। द्वारका हैं स्यामसुंदर सकल भुवन-नरेस॥ परम सीतल अमिय-तनु तुम कहियो यह उपदेस। काज अपनो सारि, हमकों छाँड़ि रहे बिदेस॥ नंदनंदन जगतबंदन धरहु नटवर-भेस। नाथ! कैसे अनाथ छाँड़्यो कहियो सूर सँदेस

dadhisuta jāta hau vahi desa| dvārakā haiṃ syāmasuṃdara sakala bhuvana-naresa|| parama sītala amiya-tanu tuma kahiyo yaha upadesa| kāja apano sāri, hamakoṃ chā~r̤i rahe bidesa|| naṃdanaṃdana jagatabaṃdana dharahu naṭavara-bhesa| nātha! kaise anātha chā~r̤yo kahiyo sūra sa~desa

जाहि री सखी! सीख सुनि मेरी। जहाँ बसत जदुनाथ जगतमनि बारक तहाँ आउ दै फेरी॥ तू कोकिला कुलीन कुसलमति, जानति बिथा बिरहिनी केरी। उपवन बैठि बोलि मृदुबानी, बचन बिसाहि मोहिं करु चेरी॥ प्रानन के पलटे पाइय जस सेंति बिसाहु सुजस ढेरी। नाहिंन कोउ और उपकारी सब बिधि बसुधा हेरी॥ करियो प्रगट पुकार द्वार है अबलन्ह आनि अनँग अरि घेरी। ब्रज लै आउ सूर के प्रभु को गावहिं कोकिल! कीरति तेरी

jāhi rī sakhī! sīkha suni merī| jahā~ basata jadunātha jagatamani bāraka tahā~ āu dai pherī|| tū kokilā kulīna kusalamati, jānati bithā birahinī kerī| upavana baiṭhi boli mṛdubānī, bacana bisāhi mohiṃ karu cerī|| prānana ke palaṭe pāiya jasa seṃti bisāhu sujasa ḍherī| nāhiṃna kou aura upakārī saba bidhi basudhā herī|| kariyo pragaṭa pukāra dvāra hai abalanha āni ana~ga ari gherī| braja lai āu sūra ke prabhu ko gāvahiṃ kokila! kīrati terī

कोउ माई बरजै या चंदहि। करत है कोप बहुत हम्ह ऊपर, कुमुदिनि करत अनंदहि॥ कहाँ कुहू, कहँ रवि अरु तमचुर, कहाँ बलाहक कारे? चलत न चपल, रहत रथ थकि करि, बिरहिनि के तन जारे॥ निंदति सैल, उदधि, पन्नग को, सापति कमठ कठोरहिं। देति असीस जरा देवी को, राहु केतु किन जोरहि? ज्यों जलहीन मीन-तन तलफत त्योंहि तपत ब्रजबालहि। सूरदास प्रभु बेगि मिलावहु मोहन मदन-गोपालहि

kou māī barajai yā caṃdahi| karata hai kopa bahuta hamha ūpara, kumudini karata anaṃdahi|| kahā~ kuhū, kaha~ ravi aru tamacura, kahā~ balāhaka kāre? calata na capala, rahata ratha thaki kari, birahini ke tana jāre|| niṃdati saila, udadhi, pannaga ko, sāpati kamaṭha kaṭhorahiṃ| deti asīsa jarā devī ko, rāhu ketu kina jorahi? jyoṃ jalahīna mīna-tana talaphata tyoṃhi tapata brajabālahi| sūradāsa prabhu begi milāvahu mohana madana-gopālahi

जो पै कोउ मधुबन लै जाय। पतिया लिखी स्यामसुंदर को, कर-कंकन देउँ ताय॥ अब वह प्रीति कहाँ गई माधव! मिलते बेनु बजाय। नयन-नीर सारँग-रिपु भीजै दुख सो रैनि बिहाय॥ सून्य भवन मोहिं खरो डरावै, यह ऋतु मन न सुहाय। सूरदास यह समौ गए तें पुनि कह लैहैं आय?

jo pai kou madhubana lai jāya| patiyā likhī syāmasuṃdara ko, kara-kaṃkana deu~ tāya|| aba vaha prīti kahā~ gaī mādhava! milate benu bajāya| nayana-nīra sāra~ga-ripu bhījai dukha so raini bihāya|| sūnya bhavana mohiṃ kharo ḍarāvai, yaha ṛtu mana na suhāya| sūradāsa yaha samau gae teṃ puni kaha laihaiṃ āya?

हरि परदेस बहुत दिन लाए। कारी घटा देखि बादर की नैन नीर भरि आए॥ पा लागौं तुम्ह, बीर बटाऊ! कौन देस तें धाए। इतनी पतिया मेरी दीजौ जहाँ स्यामघन छाए॥ दादुर मोर पपीहा बोलत सोवत मदन जगाए। सूरदास स्वामी जो बिछुरे प्रीतम भए पराए

hari paradesa bahuta dina lāe| kārī ghaṭā dekhi bādara kī naina nīra bhari āe|| pā lāgauṃ tumha, bīra baṭāū! kauna desa teṃ dhāe| itanī patiyā merī dījau jahā~ syāmaghana chāe|| dādura mora papīhā bolata sovata madana jagāe| sūradāsa svāmī jo bichure prītama bhae parāe

आजु घन स्याम की अनुहारि। उनै आए साँवरे, ते सजनी! देखि रूप की आरि॥ इंद्रधनुष मनो नवल बसन छवि, दामिनि दसन बिचारि। जनु बगपाँति माल मोतिन की, चितवत हितहि निहारि॥ गरजत गगन, गिरा गोबिंद की सुनत नयन भरे बारि। सूरदास गुन सुमिरि स्याम के बिकल भईं ब्रजनारि

āju ghana syāma kī anuhāri| unai āe sā~vare, te sajanī! dekhi rūpa kī āri|| iṃdradhanuṣa mano navala basana chavi, dāmini dasana bicāri| janu bagapā~ti māla motina kī, citavata hitahi nihāri|| garajata gagana, girā gobiṃda kī sunata nayana bhare bāri| sūradāsa guna sumiri syāma ke bikala bhaīṃ brajanāri

हर को तिलक, हरि! चित को दहत। कहियत है उडुराज अमृतमय, तजि सुभाव मोकों बन्हि बहत॥ छपा न छीन होय, मेरी सजनी! भूमि-डसन-रिपु काधौं बसत। ससि नहिं गमन करै पच्छिम दिसि, राहु ग्रसत गहि, मोकों न गहत॥ ऐसोइ ध्यान धरत तुम, दधिसुत! मुनि महेस जैसी रहनि रहत। सूरदास प्रभु मोहन मूरति चितै जाति पै चित न सहत

hara ko tilaka, hari! cita ko dahata| kahiyata hai uḍurāja amṛtamaya, taji subhāva mokoṃ banhi bahata|| chapā na chīna hoya, merī sajanī! bhūmi-ḍasana-ripu kādhauṃ basata| sasi nahiṃ gamana karai pacchima disi, rāhu grasata gahi, mokoṃ na gahata|| aisoi dhyāna dharata tuma, dadhisuta! muni mahesa jaisī rahani rahata| sūradāsa prabhu mohana mūrati citai jāti pai cita na sahata

ए सखि! आजु की रैनि को दुख कह्यो न कछु मोपै परै। मन राखन को बेनु लियो कर, मृग थाके उडुपति न चरै॥ वाही प्राननाथ प्यारे बिनु सिव-रिपु-बान नूतन जो जरै। अति अकुलाय बिरहिनी ब्याकुल भूमि-डसन-रिपु भख न करै॥ अति आतुर ह्वै सिंह लिख्यो कर जेहि भामिनी को करुन टरै। सूरदास ससि को रथ चलि गयो, पाछे; तें रबि उदय करै

e sakhi! āju kī raini ko dukha kahyo na kachu mopai parai| mana rākhana ko benu liyo kara, mṛga thāke uḍupati na carai|| vāhī prānanātha pyāre binu siva-ripu-bāna nūtana jo jarai| ati akulāya birahinī byākula bhūmi-ḍasana-ripu bhakha na karai|| ati ātura hvai siṃha likhyo kara jehi bhāminī ko karuna ṭarai| sūradāsa sasi ko ratha cali gayo, pāche; teṃ rabi udaya karai

देखौ माई! नयनन्ह सों घन हारे। बिन ही ऋतु बरसत निसिबासर सदा सजल दोउ तारे॥ ऊरध स्वास समीर तेज अति दुख अनेक द्रुम डारे। बदन सदन करि बसे बचन-खग ऋतु पावस के मारे॥ ढरि ढरि बूँद परत कंचुकि पर मिलि अंजन सों कारे। मानहुं सिव की पर्नकुटी बिच धारा स्याम निनारे॥ सुमिरि सुमिरी गरजत निसिबासर अस्रु-सलिल के धारे। बूड़त ब्रजहि सूर को राखै बिनु गिरिवरधर प्यारे

dekhau māī! nayananha soṃ ghana hāre| bina hī ṛtu barasata nisibāsara sadā sajala dou tāre|| ūradha svāsa samīra teja ati dukha aneka druma ḍāre| badana sadana kari base bacana-khaga ṛtu pāvasa ke māre|| ḍhari ḍhari bū~da parata kaṃcuki para mili aṃjana soṃ kāre| mānahuṃ siva kī parnakuṭī bica dhārā syāma nināre|| sumiri sumirī garajata nisibāsara asru-salila ke dhāre| būr̤ata brajahi sūra ko rākhai binu girivaradhara pyāre

जौ तू नेक हू उड़ि जाहि। बिबिध बचन सुनाय बानी यहाँ रिझवत काहि॥ पतित मुख पिक परुष पसु लौं कहा इतो रिसाहि। नाहिंनै कोउ सुनत समुझत, बिकल बिरहिनि थाहि॥ राखि लेबी अवधि लौं तनु, मदन! मुख जनि खाहि। तहूँ तौ तन-दगध देख़्यो, बहुरि का समुझाहि॥ नन्दनन्दन को बिरह अति कहत बनत न ताहि। सूर प्रभु ब्रजनाथ बिनु लै मौन मोहि बिसाहि

jau tū neka hū ur̤i jāhi| bibidha bacana sunāya bānī yahā~ rijhavata kāhi|| patita mukha pika paruṣa pasu lauṃ kahā ito risāhi| nāhiṃnai kou sunata samujhata, bikala birahini thāhi|| rākhi lebī avadhi lauṃ tanu, madana! mukha jani khāhi| tahū~ tau tana-dagadha dek͟hyo, bahuri kā samujhāhi|| nandanandana ko biraha ati kahata banata na tāhi| sūra prabhu brajanātha binu lai mauna mohi bisāhi