Padas 61–75

रहु रे, मधुकर! मधुमतवारे। कहा करौं निर्गुन लै कै हौं जीवहु कान्ह हमारे॥ लोटत नीच परागपंक में पचत, न आपु सम्हारे। बारम्बार सरक मदिरा की अपरस कहा उघारे॥ तुम जानत हमहूँ वैसी हैं जैसे कुसुम तिहारे। घरी पहर सबको बिलमावत जेते आवत कारे॥ सुन्दरस्याम कमलदल-लोचन जसुमति-नँद-दुलारे। सूर स्याम को सर्बस अर्प्यो अब कापै हम लेहिं उधारे

rahu re, madhukara! madhumatavāre| kahā karauṃ nirguna lai kai hauṃ jīvahu kānha hamāre|| loṭata nīca parāgapaṃka meṃ pacata, na āpu samhāre| bārambāra saraka madirā kī aparasa kahā ughāre|| tuma jānata hamahū~ vaisī haiṃ jaise kusuma tihāre| gharī pahara sabako bilamāvata jete āvata kāre|| sundarasyāma kamaladala-locana jasumati-na~da-dulāre| sūra syāma ko sarbasa arpyo aba kāpai hama lehiṃ udhāre

काहे को रोंकत मारग सूधो? सुनहु, मधुप! निर्गुन-कंटक तें राजपंथ क्यों रूँधो? कै तुम सिखै पठाए कुब्जा, कै कहीं स्यामघन जू धौं। बेद पुरान सुमृति सब ढ़ूँढ़ौ जुवतिन जोग कहूँ धौं? ताको कहा परेखो कीजै जानत छाछ न दूधो। सूर मूर अक्रूर गए लै ब्याज निबेरत ऊधो

kāhe ko roṃkata māraga sūdho? sunahu, madhupa! nirguna-kaṃṭaka teṃ rājapaṃtha kyoṃ rū~dho? kai tuma sikhai paṭhāe kubjā, kai kahīṃ syāmaghana jū dhauṃ| beda purāna sumṛti saba r̤hū~r̤hau juvatina joga kahū~ dhauṃ? tāko kahā parekho kījai jānata chācha na dūdho| sūra mūra akrūra gae lai byāja niberata ūdho

बातन सब कोऊ समुझावै। जेहि बिधि मिलन मिलैं वै माधव सो बिधि कोउ न वतावै॥ जद्यपि जतन अनेक रचीं पचि और अनत बिरमावै। तद्यपि हठी हमारे नयना और न देखे भावै॥ बासर-निसा प्रानबल्लभ तजि रसना और न गावै। सूरदास प्रभु प्रेमहिं लगि करि कहिए जो कहि आवै

bātana saba koū samujhāvai| jehi bidhi milana milaiṃ vai mādhava so bidhi kou na vatāvai|| jadyapi jatana aneka racīṃ paci aura anata biramāvai| tadyapi haṭhī hamāre nayanā aura na dekhe bhāvai|| bāsara-nisā prānaballabha taji rasanā aura na gāvai| sūradāsa prabhu premahiṃ lagi kari kahie jo kahi āvai

निर्गुन कौन देस को बासी? मधुकर! हँसि समुझाय, सौंह दै बूझति साँच, न हाँसी॥ को है जनक, जननि को कहियत, कौन नारि, को दासी? कैसो बरन भेस है कैसो केहि रस में अभिलासी॥ पावैगो पुनि कियो आपनो जो रे! कहैगो गाँसी। सुनत मौन ह्वै रह्यो ठग्यो सो सूर सबै मति नासी

nirguna kauna desa ko bāsī? madhukara! ha~si samujhāya, sauṃha dai būjhati sā~ca, na hā~sī|| ko hai janaka, janani ko kahiyata, kauna nāri, ko dāsī? kaiso barana bhesa hai kaiso kehi rasa meṃ abhilāsī|| pāvaigo puni kiyo āpano jo re! kahaigo gā~sī| sunata mauna hvai rahyo ṭhagyo so sūra sabai mati nāsī

नाहिंन रह्यो मन में ठौर। नंदनंदन अछत, कैसे आनिए उर और? चलत, चितवत, दिवस जागत, सपन सोवत राति। हृदय तें वह स्याम मूरति छन न इत उत जाति॥ कहत कथा अनेक ऊधो लोक-लाभ दिखाय। कहा करौं तन प्रेम-पूरन घट न सिंधु समाय॥ स्याम गात सरोज-आनन ललित अति मृदु हास। सूर ऐसे रूप-कारन मरत लोचन प्यास

nāhiṃna rahyo mana meṃ ṭhaura| naṃdanaṃdana achata, kaise ānie ura aura? calata, citavata, divasa jāgata, sapana sovata rāti| hṛdaya teṃ vaha syāma mūrati chana na ita uta jāti|| kahata kathā aneka ūdho loka-lābha dikhāya| kahā karauṃ tana prema-pūrana ghaṭa na siṃdhu samāya|| syāma gāta saroja-ānana lalita ati mṛdu hāsa| sūra aise rūpa-kārana marata locana pyāsa

ब्रजजन सकल स्याम-ब्रतधारी॥ बिन गोपाल और नहिं जानत आन कहैं व्यभिचारी॥ जोग-मोट सिर बोझ आनि कै कत तुम घोष उतारी? इतनी दूरि जाहु चलि कासी जहाँ बिकति है प्यारी॥ यह सँदेस नहिं सुन तिहारो, है मण्डली अनन्य हमारी। जो रसरीति करी हरि हमसों सो कत जात बिसारी? महामुक्ति कोऊ नहिं बूझै, जदपि पदारथ चारी। सूरदास स्वामी मनमोहन मूरति की बलिहारी

brajajana sakala syāma-bratadhārī|| bina gopāla aura nahiṃ jānata āna kahaiṃ vyabhicārī|| joga-moṭa sira bojha āni kai kata tuma ghoṣa utārī? itanī dūri jāhu cali kāsī jahā~ bikati hai pyārī|| yaha sa~desa nahiṃ suna tihāro, hai maṇḍalī ananya hamārī| jo rasarīti karī hari hamasoṃ so kata jāta bisārī? mahāmukti koū nahiṃ būjhai, jadapi padāratha cārī| sūradāsa svāmī manamohana mūrati kī balihārī

कहति कहा ऊधो सों बौरी। जाको सुनत रहे हरि के ढिग स्यामसखा यह सो री! कहा कहत री! मैं पत्यात री नहीँ सुनी कहनावत। हमको जोग सिखावन आयो, यह तेरे मन आवत? करनी भली भलेई जानै, कपट कुटिल की खानि। हरि को सखा नहीँ री माई! यह मन निसचय जानि॥ कहाँ रास-रस कहाँ जोग-जप? इतनो अँतर भाखत। सूर सबै तुम कत भइँ बौरी याकी पति जो राखत

kahati kahā ūdho soṃ baurī| jāko sunata rahe hari ke ḍhiga syāmasakhā yaha so rī! kahā kahata rī! maiṃ patyāta rī nahī~ sunī kahanāvata| hamako joga sikhāvana āyo, yaha tere mana āvata? karanī bhalī bhaleī jānai, kapaṭa kuṭila kī khāni| hari ko sakhā nahī~ rī māī! yaha mana nisacaya jāni|| kahā~ rāsa-rasa kahā~ joga-japa? itano a~tara bhākhata| sūra sabai tuma kata bhai~ baurī yākī pati jo rākhata

ऐसेई जन दूत कहावत। मोको एक अचंभो आवत यामेँ ये कह पावत? बचन कठोर कहत, कहि दाहत, अपनी महत गँवावत। ऐसी परकृति परति छाँह की जुवतिन ज्ञान बुझावत॥ आपुन निलज रहत नखसिख लौं एते पर पुनि गावत। सूर करत परसँसा अपनी, हारेहु जीति कहावत

aiseī jana dūta kahāvata| moko eka acaṃbho āvata yāme~ ye kaha pāvata? bacana kaṭhora kahata, kahi dāhata, apanī mahata ga~vāvata| aisī parakṛti parati chā~ha kī juvatina jñāna bujhāvata|| āpuna nilaja rahata nakhasikha lauṃ ete para puni gāvata| sūra karata parasa~sā apanī, hārehu jīti kahāvata

प्रकृति जोई जाके अंग परी। स्वान-पूँछ कोटिक जो लागै सूधि न काहु करी॥ जैसे काग भच्छ नहिं छाँड़ै जनमत जौन घरी। धोये रंग जात कहु कैसे ज्यों कारी कमरी? ज्यों अहि डसत उदर नहिं पूरत ऐसी धरनि धरी। सूर होउ सो होउ सोच नहिं, तैसे हैं एउ री

prakṛti joī jāke aṃga parī| svāna-pū~cha koṭika jo lāgai sūdhi na kāhu karī|| jaise kāga bhaccha nahiṃ chā~r̤ai janamata jauna gharī| dhoye raṃga jāta kahu kaise jyoṃ kārī kamarī? jyoṃ ahi ḍasata udara nahiṃ pūrata aisī dharani dharī| sūra hou so hou soca nahiṃ, taise haiṃ eu rī

तौ हम मानैं बात तुम्हारी। अपनो ब्रह्म दिखावहु ऊधो मुकुट-पितांबरधारी॥ भजिहैं तब ताको सब गोपी सहि रहिहैं बरु गारी। भूत समान बतावत हमको जारहु स्याम बिसारी॥ जे मुख सदा सुधा अँचवत हैं ते विष क्यों अधिकारी? सूरदास प्रभु एक अंग पर रीझि रहीं ब्रजनारी

tau hama mānaiṃ bāta tumhārī| apano brahma dikhāvahu ūdho mukuṭa-pitāṃbaradhārī|| bhajihaiṃ taba tāko saba gopī sahi rahihaiṃ baru gārī| bhūta samāna batāvata hamako jārahu syāma bisārī|| je mukha sadā sudhā a~cavata haiṃ te viṣa kyoṃ adhikārī? sūradāsa prabhu eka aṃga para rījhi rahīṃ brajanārī

यहै सुनत ही नयन पराने। जबहीं सुनत बात तुव मुख की रोवत रमत ढराने॥ बारँबार स्यामघन धन तें भाजत फिरन लुकाने। हमकों नहिं पतियात तबहिं तें जब ब्रज आपु समाने॥ नातरु यहौ काछ हम काछति वै यह जानि छपाने। सूर दोष हमरै सिर धरिहौ तुम हौ बड़े सयाने

yahai sunata hī nayana parāne| jabahīṃ sunata bāta tuva mukha kī rovata ramata ḍharāne|| bāra~bāra syāmaghana dhana teṃ bhājata phirana lukāne| hamakoṃ nahiṃ patiyāta tabahiṃ teṃ jaba braja āpu samāne|| nātaru yahau kācha hama kāchati vai yaha jāni chapāne| sūra doṣa hamarai sira dharihau tuma hau bar̤e sayāne

नयननि वहै रूप जौ देख्यो। तौ ऊधो यह जोबन जग को साँचु सफल करि लेख्यो॥ लोचन चारु चपल खंजन, मनरँजन हृदय हमारे। रुचिर कमल मृग मीन मनोहर स्वेत अरुन अरु कारे॥ रतन जटित कुंडल श्रवननि वर, गंड कपोलनि झाँई। मनु दिनकर-प्रतिबिंब मुकुट महँ ढूँढ़त यह छबि पाई॥ मुरली अधर विकट भौंहैं करि ठाढ़े होत त्रिभंग। मुकुट माल उर नीलसिखर तें धँसि धरनी ज्यों गंग॥ और भेस को कहै बरनि सब अँग अँग केसरि खौर। देखत बनै, कहत रसना सो सूर बिलोकत और

nayanani vahai rūpa jau dekhyo| tau ūdho yaha jobana jaga ko sā~cu saphala kari lekhyo|| locana cāru capala khaṃjana, manara~jana hṛdaya hamāre| rucira kamala mṛga mīna manohara sveta aruna aru kāre|| ratana jaṭita kuṃḍala śravanani vara, gaṃḍa kapolani jhā~ī| manu dinakara-pratibiṃba mukuṭa maha~ ḍhū~r̤hata yaha chabi pāī|| muralī adhara vikaṭa bhauṃhaiṃ kari ṭhār̤he hota tribhaṃga| mukuṭa māla ura nīlasikhara teṃ dha~si dharanī jyoṃ gaṃga|| aura bhesa ko kahai barani saba a~ga a~ga kesari khaura| dekhata banai, kahata rasanā so sūra bilokata aura

नयनन नंदनंदन ध्यान। तहाँ लै उपदेस दीजै जहाँ निरगुन ज्ञान॥ पानिपल्लव-रेख गनि गुन-अवधि बिधि-बंधान। इते पर कहि कटुक बचनन हनत जैसे प्रान॥ चंद्र कोटि प्रकास मुख, अवतंस कोटिक भान। कोटि मन्मथ वारि छबि पर, निरखि दीजित दान॥ भृकुटि कोटि कुदंड रुचि अवलोकनी सँधान। कोटि बारिज बंक नयन कटाच्छ कोटिक बान॥ कंबु ग्रीवा रतनहार उदार उर मनि जान। आजानुबाहु उदार अति कर पद्म सुधानिधान॥ स्याम तन पटपीत की छवि करै कौन बखान? मनहु निर्तत नील घन में तड़ित अति दुतिमान॥ रासरसिक गोपाल मिलि मधु अधर करती पान। सूर ऐसे रूप बिनु कोउ कहा रच्छक आन?

nayanana naṃdanaṃdana dhyāna| tahā~ lai upadesa dījai jahā~ niraguna jñāna|| pānipallava-rekha gani guna-avadhi bidhi-baṃdhāna| ite para kahi kaṭuka bacanana hanata jaise prāna|| caṃdra koṭi prakāsa mukha, avataṃsa koṭika bhāna| koṭi manmatha vāri chabi para, nirakhi dījita dāna|| bhṛkuṭi koṭi kudaṃḍa ruci avalokanī sa~dhāna| koṭi bārija baṃka nayana kaṭāccha koṭika bāna|| kaṃbu grīvā ratanahāra udāra ura mani jāna| ājānubāhu udāra ati kara padma sudhānidhāna|| syāma tana paṭapīta kī chavi karai kauna bakhāna? manahu nirtata nīla ghana meṃ tar̤ita ati dutimāna|| rāsarasika gopāla mili madhu adhara karatī pāna| sūra aise rūpa binu kou kahā racchaka āna?

देन आए ऊधो मत नीको। आवहु री! सब सुनहु सयानी, लेहु न जस को टीको॥ तजन कहत अंबर आभूषन, गेह नेह सब ही को। सीस जटा, सब अंग भस्म, अति सिखवत निर्गुन फीको॥ मेरे जान यहै जुबतिन को देत फिरत दुख पी को। तेहि सर-पंजर भए स्याम तन, अब न गहत डर जी को॥ जाकी प्रकृति परी प्रानन सों, सोच न पोच भलो को। जैसे सूर ब्याल डसि माजत का सुख परत श्रमी को

dena āe ūdho mata nīko| āvahu rī! saba sunahu sayānī, lehu na jasa ko ṭīko|| tajana kahata aṃbara ābhūṣana, geha neha saba hī ko| sīsa jaṭā, saba aṃga bhasma, ati sikhavata nirguna phīko|| mere jāna yahai jubatina ko deta phirata dukha pī ko| tehi sara-paṃjara bhae syāma tana, aba na gahata ḍara jī ko|| jākī prakṛti parī prānana soṃ, soca na poca bhalo ko| jaise sūra byāla ḍasi mājata kā sukha parata śramī ko

प्रीति करि दीन्हीं गरे छुरी। जैसे बधिक चुगाय कपट कन पाछे करत बुरी॥ मुरली मधुर चोप करि काँपो मोरचंद टटवारी। बंक बिलोकनि लूक लागि बस सकी न तनहिं सम्हारी॥ तरफत छाँड़ि चले मधुबन को फिरि के लई न सार। सूरदास वा कलप-तरोबर फेरि न बैठी डार

prīti kari dīnhīṃ gare churī| jaise badhika cugāya kapaṭa kana pāche karata burī|| muralī madhura copa kari kā~po moracaṃda ṭaṭavārī| baṃka bilokani lūka lāgi basa sakī na tanahiṃ samhārī|| taraphata chā~r̤i cale madhubana ko phiri ke laī na sāra| sūradāsa vā kalapa-tarobara pheri na baiṭhī ḍāra