Padas 316–330

निसिदिन बरसत नैन हमारे। सदा रहति पावस ऋतु हम पै जब तें स्याम सिधारे॥ दृग अंजन लागत नहिं कबहूँ, उर-कपोल भए कारे। कंचुकि नहिं सूखत सुनु सजनी! उर-बिच बहत पनारे॥ सूरदास प्रभु अंबु बढ्यो है, गोकुल लेहु उबारे। कहँ लौं कहौं स्यामघन सुन्दर बिकल होत अति भारे

nisidina barasata naina hamāre| sadā rahati pāvasa ṛtu hama pai jaba teṃ syāma sidhāre|| dṛga aṃjana lāgata nahiṃ kabahū~, ura-kapola bhae kāre| kaṃcuki nahiṃ sūkhata sunu sajanī! ura-bica bahata panāre|| sūradāsa prabhu aṃbu baḍhyo hai, gokula lehu ubāre| kaha~ lauṃ kahauṃ syāmaghana sundara bikala hota ati bhāre

आछे कमल कोस-रस लोभी द्वै अलि सोच करे। कनक बेलि औ नवदल के ढिग बसते उझकि परे॥ कबहुँक पच्छ सकोचि मौन ह्वै अंबुप्रवाह झरे। कबहुँक कंपित चकित निपट ह्वै लोलुपता बिसरे॥ बिधु-मंडल के बीच बिराजत अंमृत अंग भरे । एतेउ जतन बचत नहिं तलफत बिनु मुख सुर उचरे॥ कीर, कमठ, कोकिला उरग-कुल देखत ध्यान धरे। आपुन क्यों न पधारौ सूर प्रभु, देखे कह बिगरे

āche kamala kosa-rasa lobhī dvai ali soca kare| kanaka beli au navadala ke ḍhiga basate ujhaki pare|| kabahu~ka paccha sakoci mauna hvai aṃbupravāha jhare| kabahu~ka kaṃpita cakita nipaṭa hvai lolupatā bisare|| bidhu-maṃḍala ke bīca birājata aṃmṛta aṃga bhare | eteu jatana bacata nahiṃ talaphata binu mukha sura ucare|| kīra, kamaṭha, kokilā uraga-kula dekhata dhyāna dhare| āpuna kyoṃ na padhārau sūra prabhu, dekhe kaha bigare

सबन अबध, सुंदरी बधै जनि। मुक्तामाल, अनंग! गंग नहिं, नवसत साजे अर्थ-स्यामघन॥ भाल तिलक उडुपति न होय यह, कबरि-ग्रँथि अहिपति न सहस-फन। नहिं बिभूति दधिसुत न भाल जड़! यह मृगमद चंदन-चर्चित तन॥ न गजचर्म यह असित कँचुकी, देखि बिचारि कहाँ नंदीगन। सूरदास प्रभु तुम्हरे दरस बिनु बरबस काम करत हठ हम सन

sabana abadha, suṃdarī badhai jani| muktāmāla, anaṃga! gaṃga nahiṃ, navasata sāje artha-syāmaghana|| bhāla tilaka uḍupati na hoya yaha, kabari-gra~thi ahipati na sahasa-phana| nahiṃ bibhūti dadhisuta na bhāla jar̤a! yaha mṛgamada caṃdana-carcita tana|| na gajacarma yaha asita ka~cukī, dekhi bicāri kahā~ naṃdīgana| sūradāsa prabhu tumhare darasa binu barabasa kāma karata haṭha hama sana

कोकिल! हरि को बोल सुनाव। मधुबन तें उपटारि स्याम कहँ या ब्रज लै कै आव॥ जाचक सरनहि देत सयाने तन, मन, धन, सब साज। सुजस बिकात बचन के बदले, क्यों न बिसाहत आज॥ कीजै कछु उपकार परायो यहै सयानो काज। सूरदास प्रभु कहु या अवसर बन बन वसँत बिराज

kokila! hari ko bola sunāva| madhubana teṃ upaṭāri syāma kaha~ yā braja lai kai āva|| jācaka saranahi deta sayāne tana, mana, dhana, saba sāja| sujasa bikāta bacana ke badale, kyoṃ na bisāhata āja|| kījai kachu upakāra parāyo yahai sayāno kāja| sūradāsa prabhu kahu yā avasara bana bana vasa~ta birāja

कहाँ रह्यो, माई! नंद को मोहन। वह मूरति जिय तें नहिं बिसरति गयो सकल-जग-सोहन॥ कान्ह बिना गेसुत को चारै, को ल्यावै भरि दोहन? माखन खात संग ग्वालन के, और सखा सब गोहन॥ ज्यों-ज्यों सुरति करति हौं, सखि री! त्यों त्यों अधिक मनमोहन। सूरदास स्वामी के बिछुरे क्यों जीबहिं इन छोहन

kahā~ rahyo, māī! naṃda ko mohana| vaha mūrati jiya teṃ nahiṃ bisarati gayo sakala-jaga-sohana|| kānha binā gesuta ko cārai, ko lyāvai bhari dohana? mākhana khāta saṃga gvālana ke, aura sakhā saba gohana|| jyoṃ-jyoṃ surati karati hauṃ, sakhi rī! tyoṃ tyoṃ adhika manamohana| sūradāsa svāmī ke bichure kyoṃ jībahiṃ ina chohana

परम चतुर सुन्दर सुख सागर तन को प्रिय प्रतिहार। रूप-लकुटरोके रहतो, सखि! अनुदिन नंदकुमार॥ अब ता बिनु उर-भवन भयो है सिव-रिपु को संचार। दुख आवत मन, हटक न मानत, सूनो देखि अगार॥ असुस-उसासजात अँतर तें करत न सकुच बिचार॥ निसा निमेष-कपाट लगे बिनु ससि सत सत सर मार॥ यह गति मेरी भई है हरि बिनु नाहिं कछू परिहार। सूरदास प्रभु बेगि मिलहु तुम नागर नँदकुमार

parama catura sundara sukha sāgara tana ko priya pratihāra| rūpa-lakuṭaroke rahato, sakhi! anudina naṃdakumāra|| aba tā binu ura-bhavana bhayo hai siva-ripu ko saṃcāra| dukha āvata mana, haṭaka na mānata, sūno dekhi agāra|| asusa-usāsajāta a~tara teṃ karata na sakuca bicāra|| nisā nimeṣa-kapāṭa lage binu sasi sata sata sara māra|| yaha gati merī bhaī hai hari binu nāhiṃ kachū parihāra| sūradāsa prabhu begi milahu tuma nāgara na~dakumāra

ऐसो सुनियत हैं द्वै सावन। वहै बात फिरि फिरि सालति है स्याम कह्यो है आवन॥ तब तो प्रीति करी, अब लागीं अपनो कीयो पावन। यहि दुख सखी निकसि उत जैये जिते सुनै कोउ नावँ न। एकहि बेर तजी हम्ह, लागे मथुरा नेह बढ़ावन। सूर सुरति कत होति हमारी, लागीं नीकीभावन

aiso suniyata haiṃ dvai sāvana| vahai bāta phiri phiri sālati hai syāma kahyo hai āvana|| taba to prīti karī, aba lāgīṃ apano kīyo pāvana| yahi dukha sakhī nikasi uta jaiye jite sunai kou nāva~ na| ekahi bera tajī hamha, lāge mathurā neha bar̤hāvana| sūra surati kata hoti hamārī, lāgīṃ nīkībhāvana

कहा होत अब के पछताने? खेलत खात हँसत अंग-संग रहि, हम न स्याम-गुन जाने॥ को बसुदेव, कौन की थाती, को है साखि जबहिं उन आने। सो बतराय देहु, ऊधो! हमें तुम्हूँ तौ अति निपट सयाने॥ यह नहिं कथा काक कोकिल की, कपट रंग मन माहिं समाने। सूर, समय ऋतुराज बिराजे मिले जाय निज कुल पहिचाने

kahā hota aba ke pachatāne? khelata khāta ha~sata aṃga-saṃga rahi, hama na syāma-guna jāne|| ko basudeva, kauna kī thātī, ko hai sākhi jabahiṃ una āne| so batarāya dehu, ūdho! hameṃ tumhū~ tau ati nipaṭa sayāne|| yaha nahiṃ kathā kāka kokila kī, kapaṭa raṃga mana māhiṃ samāne| sūra, samaya ṛturāja birāje mile jāya nija kula pahicāne

बिनु माधव राधा-तन, सजनी! सब बिपरीत भई। गई छपाय छपाकर की छबि, रही कलंकमई॥ लोचनहू तें सरद-सारसे सुछबि निचोय लई। आँच लगे च्योनो सोनो ज्यों त्यों तन-धातु हुई॥ कदली-दल सी पीठि मनोहर, सो जनु उलटि गई। संपति सब हरि हरी, सूर प्रभु, बिपदा दई दई

binu mādhava rādhā-tana, sajanī! saba biparīta bhaī| gaī chapāya chapākara kī chabi, rahī kalaṃkamaī|| locanahū teṃ sarada-sārase suchabi nicoya laī| ā~ca lage cyono sono jyoṃ tyoṃ tana-dhātu huī|| kadalī-dala sī pīṭhi manohara, so janu ulaṭi gaī| saṃpati saba hari harī, sūra prabhu, bipadā daī daī

कराव रे, सारंग! स्यामहिं सुरति कराव। प्रौढ़े होहिं जहाँ नंदनंदन ऊँची टेर सुनाव॥ गयो ग्रीषम, पावस ऋतु आई, सब काहू चित चाव। उन बिनु ब्रजबासी यों सोहत ज्यों करिया बिनु नाव॥ तेरो कहो मानिहैं मोहन, पाँय लागि लै आव। अब की बेर सूर के प्रभु को नैनन आनि दिखाव

karāva re, sāraṃga! syāmahiṃ surati karāva| praur̤he hohiṃ jahā~ naṃdanaṃdana ū~cī ṭera sunāva|| gayo grīṣama, pāvasa ṛtu āī, saba kāhū cita cāva| una binu brajabāsī yoṃ sohata jyoṃ kariyā binu nāva|| tero kaho mānihaiṃ mohana, pā~ya lāgi lai āva| aba kī bera sūra ke prabhu ko nainana āni dikhāva

सखी री! हरि आवैं केहि हेत? वै राजा तुम ग्वाल, बुलावत यहै परेखो लेत॥ अब सिर छत्र कनक-मनि राजै, मोरचंद नहिं भावत। सुनि ब्रजराज पीठि दै बैठत, जदुकुल-बिरद बुलावत॥ द्वारपाल प्रति पौरि बिराजत, दासी सहस अपार। गोकुल गाय-दुहन-दुख कब लौं, सूर, सहैं सुकुमार

sakhī rī! hari āvaiṃ kehi heta? vai rājā tuma gvāla, bulāvata yahai parekho leta|| aba sira chatra kanaka-mani rājai, moracaṃda nahiṃ bhāvata| suni brajarāja pīṭhi dai baiṭhata, jadukula-birada bulāvata|| dvārapāla prati pauri birājata, dāsī sahasa apāra| gokula gāya-duhana-dukha kaba lauṃ, sūra, sahaiṃ sukumāra

परम सुखद सिसुता को नेहु। सो जनि तजहु दूर के बासे, सुनहु, सुजान! जानि गति येहु॥ भँवर, भुजंग, काक अरु कोकिल जनि पतियाहु चितै तुम देहु। ऊधो अरु अक्रूर क्रूरकृत उपवन कुटिल किए रचि गेहु॥ येहै बिनती लिखी कृपानिधि सो आदर करि लेहु। सूरदास प्रभु क्यों न मिलहु अब तौ तन मन फागुन के मेहु

parama sukhada sisutā ko nehu| so jani tajahu dūra ke bāse, sunahu, sujāna! jāni gati yehu|| bha~vara, bhujaṃga, kāka aru kokila jani patiyāhu citai tuma dehu| ūdho aru akrūra krūrakṛta upavana kuṭila kie raci gehu|| yehai binatī likhī kṛpānidhi so ādara kari lehu| sūradāsa prabhu kyoṃ na milahu aba tau tana mana phāguna ke mehu

बिनु धर वह उपराग गह्यो। ना जानौं यह राहु उमापति कित हौं सोध लह्यो॥ ताके बीच नीच नयनन में अंजन-रूप रह्यो। बिरह-सिंधु-बल पाय प्रगट भयो नाहिन परत कह्यो॥ दुसह दसन-दुख दलि नैनन जल परस न परत सह्यो। मानहूँ स्रवत सुधा अंतर तें, उर पर जात बह्यो॥ अब मुखससि ऐसों लागत ज्यों बिनु माखनहिं मह्यो। सूर दरस-हरि दान दिए बिनु सुख-प्रकास निबह्यो

binu dhara vaha uparāga gahyo| nā jānauṃ yaha rāhu umāpati kita hauṃ sodha lahyo|| tāke bīca nīca nayanana meṃ aṃjana-rūpa rahyo| biraha-siṃdhu-bala pāya pragaṭa bhayo nāhina parata kahyo|| dusaha dasana-dukha dali nainana jala parasa na parata sahyo| mānahū~ sravata sudhā aṃtara teṃ, ura para jāta bahyo|| aba mukhasasi aisoṃ lāgata jyoṃ binu mākhanahiṃ mahyo| sūra darasa-hari dāna die binu sukha-prakāsa nibahyo

गोपालहि बालक ही तें टेव। जानति नाहिं कौन पै सीखे चोरी के छल-छेव॥ माखन-दूध धर्यो जब खाते सहि रहती करि कानि। अब क्यों सही परति, सुनि सजनी! मनमानिक की हानि॥ कहियो, मधुप! सँदेस स्याम सों राजनीति समुझाय। अजहूँ तजत नाहिं वा लोभै, जुगुत नहीं जदुराय॥ बुधि बिबेक सरबस या ब्रज को लै जो रहे मुसकाय। सूरदास प्रभु के गुन अबगुन कहिए कासों जाय

gopālahi bālaka hī teṃ ṭeva| jānati nāhiṃ kauna pai sīkhe corī ke chala-cheva|| mākhana-dūdha dharyo jaba khāte sahi rahatī kari kāni| aba kyoṃ sahī parati, suni sajanī! manamānika kī hāni|| kahiyo, madhupa! sa~desa syāma soṃ rājanīti samujhāya| ajahū~ tajata nāhiṃ vā lobhai, juguta nahīṃ jadurāya|| budhi bibeka sarabasa yā braja ko lai jo rahe musakāya| sūradāsa prabhu ke guna abaguna kahie kāsoṃ jāya

जदपि मैं बहुतै जतन करे। तदपि, मधुप! हरि-प्रिया जानि कै काहु न प्रान हरे॥ सौरभ-युत सुमनन लै निज कर संतत सेज धरे। सनमुख होति सरद-ससि, सजनी! तऊ न अङ्ग जरे॥ चातक मोर कोकिला मधुकर सुर सुनि स्रवन भरे। सादर ह्वै निरखति रतिपति को नैक न पलक परे॥ निसिदिन रटति नंदनँदन, या उर तें छिन न टरे। अति आतुर चतुरंग चमू सजि अनँग न सर सँचरे॥ जानति नाहिं कौन गुन या तन जातें सबै डरे। सूरदास सकुचन श्रीपति के सुभटन बल बिसरे

jadapi maiṃ bahutai jatana kare| tadapi, madhupa! hari-priyā jāni kai kāhu na prāna hare|| saurabha-yuta sumanana lai nija kara saṃtata seja dhare| sanamukha hoti sarada-sasi, sajanī! taū na aṅga jare|| cātaka mora kokilā madhukara sura suni sravana bhare| sādara hvai nirakhati ratipati ko naika na palaka pare|| nisidina raṭati naṃdana~dana, yā ura teṃ china na ṭare| ati ātura caturaṃga camū saji ana~ga na sara sa~care|| jānati nāhiṃ kauna guna yā tana jāteṃ sabai ḍare| sūradāsa sakucana śrīpati ke subhaṭana bala bisare