Padas 121–135

ऊधो! प्रीति न मरन बिचारै। प्रीति पतंग जरै पावक परि, जरत अंग नहिं टारै॥ प्रीति परेवा उड़त गगन चढ़ि गिरत न आप सम्हारै। प्रीति मधुप केतकी-कुसुम बसि कंटक आपु प्रहारै॥ प्रीति जानु जैसे पय पानी जानि अपनपो जारै। प्रीति कुरंग नादरस, लुब्धक तानि तानि सर मारै॥ प्रीति जान जननी सुत-कारन को न अपनपो हारै? सूर स्याम सोँ प्रीति गोपिन की कहु कैसे निरुवारै

ūdho! prīti na marana bicārai| prīti pataṃga jarai pāvaka pari, jarata aṃga nahiṃ ṭārai|| prīti parevā ur̤ata gagana car̤hi girata na āpa samhārai| prīti madhupa ketakī-kusuma basi kaṃṭaka āpu prahārai|| prīti jānu jaise paya pānī jāni apanapo jārai| prīti kuraṃga nādarasa, lubdhaka tāni tāni sara mārai|| prīti jāna jananī suta-kārana ko na apanapo hārai? sūra syāma so~ prīti gopina kī kahu kaise niruvārai

ऊधो! जाहु तुम्हैं हम जाने। स्याम तुम्हैं ह्याँ नाहिं पठाए तुम हौ बीच भुलाने॥ ब्रजवासिन सौँ जोग कहत हौ, बातहु कहन न जाने। बड़ लागै न विवेक तुम्हारो ऐसे नए अयाने॥ हमसोँ कही लई सो सहिकै जिय गुनि लेहु अपाने॥ कहँ अबला कहँ दसा दिगंबर सँमुख करौ, पहिचाने॥ सांच कहौ तुमको अपनी सौं बूझति बात निदाने। सूर स्याम जब तुम्हैं पठाए तब नेकहु मुसुकाने?

ūdho! jāhu tumhaiṃ hama jāne| syāma tumhaiṃ hyā~ nāhiṃ paṭhāe tuma hau bīca bhulāne|| brajavāsina sau~ joga kahata hau, bātahu kahana na jāne| bar̤a lāgai na viveka tumhāro aise nae ayāne|| hamaso~ kahī laī so sahikai jiya guni lehu apāne|| kaha~ abalā kaha~ dasā digaṃbara sa~mukha karau, pahicāne|| sāṃca kahau tumako apanī sauṃ būjhati bāta nidāne| sūra syāma jaba tumhaiṃ paṭhāe taba nekahu musukāne?

ऊधो! स्यामसखा तुम सांचे। कै करि लियो स्वांग बीचहि तें, वैसेहि लागत कांचे। जैसी कही हमहिं आवत ही औरनि कही पछिताते। अपनो पति तजि और बतावत महिमानी कछु खाते॥ तुरत गौन कीजै मधुबन को यहां कहां यह ल्याए? सूर सुनत गोपिन की बानी उद्धव सीस नवाए

ūdho! syāmasakhā tuma sāṃce| kai kari liyo svāṃga bīcahi teṃ, vaisehi lāgata kāṃce| jaisī kahī hamahiṃ āvata hī aurani kahī pachitāte| apano pati taji aura batāvata mahimānī kachu khāte|| turata gauna kījai madhubana ko yahāṃ kahāṃ yaha lyāe? sūra sunata gopina kī bānī uddhava sīsa navāe

ऊधोजू! देखे हौ ब्रज जात। जाय कहियो स्याम सों या विरह को उत्पात॥ नयनन कछु नहिं सूझई, कछु श्रवन सुनत न बात। स्याम बिन आंसुवन बूड़त दुसह धुनि भइ बात॥ आइए तो आइए, जिय बहुरि सरीर समात। सूर के प्रभु बहुरि मिलिहौ पाछे हू पछितात

ūdhojū! dekhe hau braja jāta| jāya kahiyo syāma soṃ yā viraha ko utpāta|| nayanana kachu nahiṃ sūjhaī, kachu śravana sunata na bāta| syāma bina āṃsuvana būr̤ata dusaha dhuni bhai bāta|| āie to āie, jiya bahuri sarīra samāta| sūra ke prabhu bahuri milihau pāche hū pachitāta

ऊधो! बेगि मधुबन जाहु। जोग लेहु संभारि अपनो बेंचिए जहँ लाहु॥ हम बिरहिनी नारि हरि बिनु कौन करै निबाहु? तहां दीजै मूर पूजै, नफा कछु तुम खाहु॥ जौ नहीं ब्रज में बिकानो नगरनारि बिसाहु। सूर वै सब सुनत लैहैं जिय कहा पछिताहु

ūdho! begi madhubana jāhu| joga lehu saṃbhāri apano beṃcie jaha~ lāhu|| hama birahinī nāri hari binu kauna karai nibāhu? tahāṃ dījai mūra pūjai, naphā kachu tuma khāhu|| jau nahīṃ braja meṃ bikāno nagaranāri bisāhu| sūra vai saba sunata laihaiṃ jiya kahā pachitāhu

ऊधो! कछु कछु समुझि परी। तुम जो हमको जोग लाए भली करनि करी॥ एक बिरह जरि रहीं हरि के, सुनत अतिहि जरी। जाहु जनि अब लोन लावहु देखि तुमहिं डरी॥ जोग-पाती दई तुम कर बड़े जान हरी। आनि आस निरास कीन्ही, सूर सुनि हहरी

ūdho! kachu kachu samujhi parī| tuma jo hamako joga lāe bhalī karani karī|| eka biraha jari rahīṃ hari ke, sunata atihi jarī| jāhu jani aba lona lāvahu dekhi tumahiṃ ḍarī|| joga-pātī daī tuma kara bar̤e jāna harī| āni āsa nirāsa kīnhī, sūra suni haharī

ऊधो! सुनत तिहारे बोल। ल्याए हरि-कुसलात धन्य तुम घर घर पार्यो गोल॥ कहन देहु कह करै हमारो बरि उड़ि जैहै झोल। आवत ही याको पहिंचान्यो निपटहि ओछो तोल॥ जिनके सोचन रही कहिबे तें, ते बहु गुननि अमोल। जानी जाति सूर हम इनकी बतचल चंचल लोल

ūdho! sunata tihāre bola| lyāe hari-kusalāta dhanya tuma ghara ghara pāryo gola|| kahana dehu kaha karai hamāro bari ur̤i jaihai jhola| āvata hī yāko pahiṃcānyo nipaṭahi ocho tola|| jinake socana rahī kahibe teṃ, te bahu gunani amola| jānī jāti sūra hama inakī batacala caṃcala lola

ऐसी बात कहौ जनि ऊधो! ज्यों त्रिदोष उपजे जक लागति, निकसत बचन न सूधो॥ आपन तौ उपचार करौ कछु तब औरन सिख देहु। मेरे कहे बनाय न राखौ थिर कै कतहूँ गेहु॥ जौ तुम पद्मपराग छांड़िकै करहु ग्राम-बसबास। तौ हम सूर यहौ करि देखैं निमिष छांड़हीं पास

aisī bāta kahau jani ūdho! jyoṃ tridoṣa upaje jaka lāgati, nikasata bacana na sūdho|| āpana tau upacāra karau kachu taba aurana sikha dehu| mere kahe banāya na rākhau thira kai katahū~ gehu|| jau tuma padmaparāga chāṃr̤ikai karahu grāma-basabāsa| tau hama sūra yahau kari dekhaiṃ nimiṣa chāṃr̤ahīṃ pāsa

ऊधो! जानि परे सयान। नारियन को जोग लाए, भले जान सुजान॥ निगम हूँ नहिं पार पायो कहत जासों ज्ञान। नयनत्रिकुटी जोरि संगम जेहि करत अनुमान॥ पवन धरि रबि-तन निहारत, मनहिं राख्यो मारि। सूर सो मन हाथ नाहीं गयो संग बिसारि

ūdho! jāni pare sayāna| nāriyana ko joga lāe, bhale jāna sujāna|| nigama hū~ nahiṃ pāra pāyo kahata jāsoṃ jñāna| nayanatrikuṭī jori saṃgama jehi karata anumāna|| pavana dhari rabi-tana nihārata, manahiṃ rākhyo māri| sūra so mana hātha nāhīṃ gayo saṃga bisāri

ऊधो! मन नहिं हाथ हमारे। रथ चढ़ाय हरि संग गए लै मथुरा जबै सिधारे॥ नातरु कहा जोग हम छांड़हि अति रुचि कै तुम ल्याए। हम तौ झकति स्याम की करनी, मन लै जोग पठाए॥ अजहूँ मन अपनो हम पावैं तुमतें होय तो होय। सूर, सपथ हमैं कोटि तिहारी कहौ करैंगी सोय

ūdho! mana nahiṃ hātha hamāre| ratha car̤hāya hari saṃga gae lai mathurā jabai sidhāre|| nātaru kahā joga hama chāṃr̤ahi ati ruci kai tuma lyāe| hama tau jhakati syāma kī karanī, mana lai joga paṭhāe|| ajahū~ mana apano hama pāvaiṃ tumateṃ hoya to hoya| sūra, sapatha hamaiṃ koṭi tihārī kahau karaiṃgī soya

ऊधो! जोग सुन्यो हम दुर्लभ। आपु कहत हम सुनत अचंभित जानत हौ जिय सुल्लभ॥ रेख न रूप बरन जाके नहिं ताकौं हमैं बतावत। अपनी कहौ दरस वैसे को तुम कबहूँ हौ पावत? मुरली अधर धरत है सो, पुनि गोधन बन बन चारत? नैन बिसाल भौंह बंकट करि देख्यो कबहूँ निहारत? तन त्रिभंग करि नटवर वपु धरि पीतांबर तेहि सोहत। सूर स्याम ज्यों देत हमें सुख, त्यों तुमकौं सोउ मोहत

ūdho! joga sunyo hama durlabha| āpu kahata hama sunata acaṃbhita jānata hau jiya sullabha|| rekha na rūpa barana jāke nahiṃ tākauṃ hamaiṃ batāvata| apanī kahau darasa vaise ko tuma kabahū~ hau pāvata? muralī adhara dharata hai so, puni godhana bana bana cārata? naina bisāla bhauṃha baṃkaṭa kari dekhyo kabahū~ nihārata? tana tribhaṃga kari naṭavara vapu dhari pītāṃbara tehi sohata| sūra syāma jyoṃ deta hameṃ sukha, tyoṃ tumakauṃ sou mohata

ऊधो! हम-लायक सिख दीजैं। यह उपदेस अगिनि तें तातो, कहा कौन विधि कीजैं? तुमहीं कहौ यहाँ इतनिन में सीखनहारी को है? जोगी जती रहित माया तें तिनकौं यह मत सोहै॥ जो कपूर चंदन तन लेपत तेहि विभूति क्यों छाजै? सूर कहौ सोभा क्यों पावै आँख आँधरी आँजै

ūdho! hama-lāyaka sikha dījaiṃ| yaha upadesa agini teṃ tāto, kahā kauna vidhi kījaiṃ? tumahīṃ kahau yahā~ itanina meṃ sīkhanahārī ko hai? jogī jatī rahita māyā teṃ tinakauṃ yaha mata sohai|| jo kapūra caṃdana tana lepata tehi vibhūti kyoṃ chājai? sūra kahau sobhā kyoṃ pāvai ā~kha ā~dharī ā~jai

ऊधो! कहा कथत बिपरीति? जुवतिन जोग सिखावन आए यह तौ उलटी रीति॥ जोतत धेनु, दुहत पय वृष को, करत लगे जो अनीति। चक्रवाक ससि को क्यों जाने? रवि चकोर कहँ प्रीति? पाहन तरै, काठ जो बूड़े, तौ हम मानैं नीति। सूर स्याम-प्रति-अंग माधुरी रही गोपिका जीति

ūdho! kahā kathata biparīti? juvatina joga sikhāvana āe yaha tau ulaṭī rīti|| jotata dhenu, duhata paya vṛṣa ko, karata lage jo anīti| cakravāka sasi ko kyoṃ jāne? ravi cakora kaha~ prīti? pāhana tarai, kāṭha jo būr̤e, tau hama mānaiṃ nīti| sūra syāma-prati-aṃga mādhurī rahī gopikā jīti

ऊधो! जुबतिन ओर निहारौ। तब यह जोग-मोट हम आगे धरि हिय समुझि बिचारौ॥ जे कच स्याम आपने कर करि नितहि सुगंध रचाए। तिनकौं तुम जो विभूति घोरिकै जटा लगावन आए॥ जेहि मुख मृगमद मलयज उबटति, छन छन धोवति माँजति। तेहि मुख कहत खेह लपटावन सो कैसे हम भ्राजति? लोचन आँजि स्याम-ससि दरसति तबहीं ये दमकाति। सूर तिनहैं तुम रवि दरसावत यह सुनि सुनि करुआति

ūdho! jubatina ora nihārau| taba yaha joga-moṭa hama āge dhari hiya samujhi bicārau|| je kaca syāma āpane kara kari nitahi sugaṃdha racāe| tinakauṃ tuma jo vibhūti ghorikai jaṭā lagāvana āe|| jehi mukha mṛgamada malayaja ubaṭati, chana chana dhovati mā~jati| tehi mukha kahata kheha lapaṭāvana so kaise hama bhrājati? locana ā~ji syāma-sasi darasati tabahīṃ ye damakāti| sūra tinahaiṃ tuma ravi darasāvata yaha suni suni karuāti

ऊधो! इन नयनन अंजन देहु। आनहु क्यों न स्याम रँग काजर जासौं जुर्यो सनेहु॥ तपति रहति निसि-बासर, मधुकर! नहिं सुहात तन गेहु। जैसे मीन मरत जल बिछुरत, कहा कहौं दुख एहु॥ सब विधि बाँधि ठानि कै राख्यो खरि कपूर कोरेहु। बारक मिलवहु स्याम सूर प्रभु, क्यों न सुजस जग लेहु?

ūdho! ina nayanana aṃjana dehu| ānahu kyoṃ na syāma ra~ga kājara jāsauṃ juryo sanehu|| tapati rahati nisi-bāsara, madhukara! nahiṃ suhāta tana gehu| jaise mīna marata jala bichurata, kahā kahauṃ dukha ehu|| saba vidhi bā~dhi ṭhāni kai rākhyo khari kapūra korehu| bāraka milavahu syāma sūra prabhu, kyoṃ na sujasa jaga lehu?