Padas 226–240

ऊधो! राखिए वह बात। कहत हौ अनहद सुबानी सुनत हम चपि जात॥ जोग फल-कुष्मांड ऐसो अजामुख न समात। बारबार न भाखिए कोउ अमृत तजि बिष खात? नयन प्यासे रूप के, जल दए नाहिं अघात। सूर प्रभु मन हरि गए लै छाँड़ि तन-कुसलात

ūdho! rākhie vaha bāta| kahata hau anahada subānī sunata hama capi jāta|| joga phala-kuṣmāṃḍa aiso ajāmukha na samāta| bārabāra na bhākhie kou amṛta taji biṣa khāta? nayana pyāse rūpa ke, jala dae nāhiṃ aghāta| sūra prabhu mana hari gae lai chā~r̤i tana-kusalāta

ऊधो! बात तिहारी जानी। आए हौ ब्रज को बिन काजहि, दहत हृदय कटु बानी॥ जो पै स्याम रहत घट तौ कत बिरह-बिथा न परानी? झूठी बातनि क्यों मन मानत चलमति, अलप गियानी॥ जोग-जुगुति की नीति अगम हम ब्रजवासिनि कह जाने? सिखवहु जाय जहाँ नटनागर रहत प्रेम लपटाने॥ दासी घेरि रहे हरि, तुम ह्याँ गढ़ि गढ़ि कहत बनाई। निपट निलज्ज अजहुँ न चलत उठि, कहत सूर समुझाई

ūdho! bāta tihārī jānī| āe hau braja ko bina kājahi, dahata hṛdaya kaṭu bānī|| jo pai syāma rahata ghaṭa tau kata biraha-bithā na parānī? jhūṭhī bātani kyoṃ mana mānata calamati, alapa giyānī|| joga-juguti kī nīti agama hama brajavāsini kaha jāne? sikhavahu jāya jahā~ naṭanāgara rahata prema lapaṭāne|| dāsī gheri rahe hari, tuma hyā~ gar̤hi gar̤hi kahata banāī| nipaṭa nilajja ajahu~ na calata uṭhi, kahata sūra samujhāī

ऊधो! राखति हौं पति तेरी। ह्याँ तें जाहु, दुर आगे तें देखत आँखि बरति हैं मेरी॥ तुम जो कहत गोपाल सत्य है, देखहु आय न कुब्जा घेरी। ते तौ तैसेई दोउ बने हैं, वै अहीर वह कँस की चेरी॥ तुम सारिखे बसीठ पठाए, कहा कहौं उनकी मति फेरी। सूरदास प्रभु तुम्हरे मिलन को ग्वालिनि कै सँग जोवति हेरी

ūdho! rākhati hauṃ pati terī| hyā~ teṃ jāhu, dura āge teṃ dekhata ā~khi barati haiṃ merī|| tuma jo kahata gopāla satya hai, dekhahu āya na kubjā gherī| te tau taiseī dou bane haiṃ, vai ahīra vaha ka~sa kī cerī|| tuma sārikhe basīṭha paṭhāe, kahā kahauṃ unakī mati pherī| sūradāsa prabhu tumhare milana ko gvālini kai sa~ga jovati herī

ऊधो! बेदबचन परमान। कमल मुख पर नयन-खंजन देखिहैं क्यों आन? श्री-निकेत-समेत सब गुन, सकल-रूप-निधान। अधर-सुधा पिवाय बिछुरे पठै दीनो ज्ञान॥ दूरि नहीं दयाल सब घट कहत एक समान। निकसि क्यों न गोपाल बोधत दुखिन के दुख जान? रूप-रेख न देखिए, बिन स्वाद सब्द भुलान। ईखदंडहि डारि हरिगुन, गहत पानि बिषान॥ बीतराग सुजान जोगिन, भक्तजनन निवास। निगम-बानी मेटिकै क्यों कहै सूरदास?

ūdho! bedabacana paramāna| kamala mukha para nayana-khaṃjana dekhihaiṃ kyoṃ āna? śrī-niketa-sameta saba guna, sakala-rūpa-nidhāna| adhara-sudhā pivāya bichure paṭhai dīno jñāna|| dūri nahīṃ dayāla saba ghaṭa kahata eka samāna| nikasi kyoṃ na gopāla bodhata dukhina ke dukha jāna? rūpa-rekha na dekhie, bina svāda sabda bhulāna| īkhadaṃḍahi ḍāri hariguna, gahata pāni biṣāna|| bītarāga sujāna jogina, bhaktajanana nivāsa| nigama-bānī meṭikai kyoṃ kahai sūradāsa?

ऊधो! अब चित भए कठोर। पूरब प्रीति बिसारी गिरिधर नवतन राचे और॥ जा दिन तें मधुपुरी सिधारे धीरज रह्यो न मोर। जन्म जन्म की दासी तुम्हरी नागर नंदकिसोर॥ चितवनि-बान लगाए मोहन निकसे उर वहि ओर। सूरदास प्रभु कबहिं मिलौगे, कहाँ रहे रनछोर?

ūdho! aba cita bhae kaṭhora| pūraba prīti bisārī giridhara navatana rāce aura|| jā dina teṃ madhupurī sidhāre dhīraja rahyo na mora| janma janma kī dāsī tumharī nāgara naṃdakisora|| citavani-bāna lagāe mohana nikase ura vahi ora| sūradāsa prabhu kabahiṃ milauge, kahā~ rahe ranachora?

ऊधो! अब नहिं स्याम हमारे। मधुबन बसत बदलि से गे वे, माधव मधुप तिहारे॥ इतनिहि दूरि भए कछु औरै, जोय जोय मगु हारे। कपटी कुटिल काक कोकिल ज्यों अन्त भए उड़ि न्यारे॥ रस लै भँवर जाय स्वारथ-हित प्रीतम चितहिं बिसारे। सूरदास तिनसों कह कहिए जे तन हूँ मन कारे

ūdho! aba nahiṃ syāma hamāre| madhubana basata badali se ge ve, mādhava madhupa tihāre|| itanihi dūri bhae kachu aurai, joya joya magu hāre| kapaṭī kuṭila kāka kokila jyoṃ anta bhae ur̤i nyāre|| rasa lai bha~vara jāya svāratha-hita prītama citahiṃ bisāre| sūradāsa tinasoṃ kaha kahie je tana hū~ mana kāre

ऊधो! पा लागौं भले आए। तुम देखे जनु माधव देखे, तुम त्रयताप नसाए॥ नँद जसोदा नातो टूटो बेद पुरानन गाए। हम अहीरि, तुम अहिर नाम तजि निर्गुन नाम लखाए॥ तब यहि घोष खेल बहु खेले ऊखल भुजा बँधाए। सूरदास प्रभु यहै सूल जिय बहुरि न चरन दिखाए

ūdho! pā lāgauṃ bhale āe| tuma dekhe janu mādhava dekhe, tuma trayatāpa nasāe|| na~da jasodā nāto ṭūṭo beda purānana gāe| hama ahīri, tuma ahira nāma taji nirguna nāma lakhāe|| taba yahi ghoṣa khela bahu khele ūkhala bhujā ba~dhāe| sūradāsa prabhu yahai sūla jiya bahuri na carana dikhāe

ऊधो! निरगुन कहत हौ तुमहीं अब धौं लेहु। सगुन मूरति नंदनन्दन हमहिं आनि सु देहु॥ अगम पन्थ परम कठिन गवन तहाँ नाहिं। सनकादिक भूलि परे अबला कहँ जाहिं? पञ्चतत्त्व प्रकृति कहो अपर कैसे जानि? मन बच क्रम कहत सूर बैरनि की बानि

ūdho! niraguna kahata hau tumahīṃ aba dhauṃ lehu| saguna mūrati naṃdanandana hamahiṃ āni su dehu|| agama pantha parama kaṭhina gavana tahā~ nāhiṃ| sanakādika bhūli pare abalā kaha~ jāhiṃ? pañcatattva prakṛti kaho apara kaise jāni? mana baca krama kahata sūra bairani kī bāni

ऊधो! और कछू कहिबे को? सीऊ कहि डारौ पा लागैं, हम सब सुनि सहिबे को॥ यह उपदेस आज लौं मैं, सखि, स्रवन सुन्यो नहिं देख्यो। नीरस कटुक तपत जीवनगत, चाहत मन उर लेख्यो! बसत स्याम निकसत न एक पल हिये मनोहर ऐन। या कहँ यहाँ ठौर नाहीं, लै राखौ जहाँ सुचैन॥ हम सब सखि गोपाल-उपासिनि हमसों बातैं छाँड़ि। सूर मधुप! लै राखु मधुपुरी कुबजा के घर गाड़ि

ūdho! aura kachū kahibe ko? sīū kahi ḍārau pā lāgaiṃ, hama saba suni sahibe ko|| yaha upadesa āja lauṃ maiṃ, sakhi, sravana sunyo nahiṃ dekhyo| nīrasa kaṭuka tapata jīvanagata, cāhata mana ura lekhyo! basata syāma nikasata na eka pala hiye manohara aina| yā kaha~ yahā~ ṭhaura nāhīṃ, lai rākhau jahā~ sucaina|| hama saba sakhi gopāla-upāsini hamasoṃ bātaiṃ chā~r̤i| sūra madhupa! lai rākhu madhupurī kubajā ke ghara gār̤i

ऊधो! कहियो सबै सोहती। जाहि ज्ञान सिखवन तुम आए सो कहौं ब्रज में कोय ती? अंतहु सीख सुनहुगे हमरी कहियत बात बिचारि। फुरत न बचन कछू कहिबे को, रहे प्रीति सों हारि॥ देखियत हौ करुना की मूरति, सुनियत हौ परपीरक। सोय करौ ज्यों मिटै हृदय को दाह परै उर सीरक॥ राजपंथ तें टारि बतावत उरझ कुबील कुपैंड़ो। सूरदास समाय कहाँ लौं अज के बदन कुम्हैड़ो?

ūdho! kahiyo sabai sohatī| jāhi jñāna sikhavana tuma āe so kahauṃ braja meṃ koya tī? aṃtahu sīkha sunahuge hamarī kahiyata bāta bicāri| phurata na bacana kachū kahibe ko, rahe prīti soṃ hāri|| dekhiyata hau karunā kī mūrati, suniyata hau parapīraka| soya karau jyoṃ miṭai hṛdaya ko dāha parai ura sīraka|| rājapaṃtha teṃ ṭāri batāvata urajha kubīla kupaiṃr̤o| sūradāsa samāya kahā~ lauṃ aja ke badana kumhair̤o?

ऊधो! तुमहुं सुनौ इक बात। जो तुम करत सिखावन सो हमैं नाहिंन नेकु सुहात॥ ससि-दरसन बिनु मलिन कुमोदिनि ज्यों रवि बिनु जल जात। त्यों हम कमलनयन बिन देखे तलफि तलफि मुरझात॥ घँसि चँदन घनसार सजे तन ते क्यों भस्म भरात? रहे स्रवन मुरलीधर सों रत, सिंगी सुनत डरात॥ अबलनि आनि जोग उपदेसत नाहिंन नेकु लजात। जिन पायो हरि परस सुधारस ते कैसे कटु खात? अवधि-आस गनि गनि जीवति हैं, अब नहिं प्रान खटात। सूर स्याम हम निपट बिसारी ज्यों तरु जीरन पात

ūdho! tumahuṃ sunau ika bāta| jo tuma karata sikhāvana so hamaiṃ nāhiṃna neku suhāta|| sasi-darasana binu malina kumodini jyoṃ ravi binu jala jāta| tyoṃ hama kamalanayana bina dekhe talaphi talaphi murajhāta|| gha~si ca~dana ghanasāra saje tana te kyoṃ bhasma bharāta? rahe sravana muralīdhara soṃ rata, siṃgī sunata ḍarāta|| abalani āni joga upadesata nāhiṃna neku lajāta| jina pāyo hari parasa sudhārasa te kaise kaṭu khāta? avadhi-āsa gani gani jīvati haiṃ, aba nahiṃ prāna khaṭāta| sūra syāma hama nipaṭa bisārī jyoṃ taru jīrana pāta

ऊधो! अँखियाँ अति अनुरागी। इकटक मग जोवति अरु रोवति, भूलेहु पलक न लागी॥ बिन पावस पावस ऋतु आई देखत हौ बिदमान। अब धौं कहा कियो चाहत हौ? छाँड़हु नीरस ज्ञान॥ सुनु प्रिय सखा स्यामसुन्दर के जानत सकल सुभाव। जैसे मिलैं सूर प्रभु हमको सो कछु करहु उपाव

ūdho! a~khiyā~ ati anurāgī| ikaṭaka maga jovati aru rovati, bhūlehu palaka na lāgī|| bina pāvasa pāvasa ṛtu āī dekhata hau bidamāna| aba dhauṃ kahā kiyo cāhata hau? chā~r̤ahu nīrasa jñāna|| sunu priya sakhā syāmasundara ke jānata sakala subhāva| jaise milaiṃ sūra prabhu hamako so kachu karahu upāva

ऊधो! कहत कही नहिं जाय। मदनगोपाल लाल के बिछुरत प्रान रहे मुरझाय॥ अब स्यंदन चढ़ि गवन कियो इत फिरि चितयो गोपाल। तबहीं परम कृतज्ञ सबै उठि सँग लगीं ब्रजबाल॥ अब यह औरै सृष्टि बिरह की बकति बाय-बौरानो। तिनसों कहा देत फिरि उत्तर? तुम हौ पूरन ज्ञानी॥ अब सो मान घटै, का कीजै? ज्यों उपजै परतीति। सूरदास कछु बरनि न आवै कठिन बिरह की रीति

ūdho! kahata kahī nahiṃ jāya| madanagopāla lāla ke bichurata prāna rahe murajhāya|| aba syaṃdana car̤hi gavana kiyo ita phiri citayo gopāla| tabahīṃ parama kṛtajña sabai uṭhi sa~ga lagīṃ brajabāla|| aba yaha aurai sṛṣṭi biraha kī bakati bāya-baurāno| tinasoṃ kahā deta phiri uttara? tuma hau pūrana jñānī|| aba so māna ghaṭai, kā kījai? jyoṃ upajai paratīti| sūradāsa kachu barani na āvai kaṭhina biraha kī rīti

ऊधो! यह मन अधिक कठोर। निकसि न गयो कुँभ काँचे ज्यों बिछुरत नँदकिसोर॥ हम कछु प्रीति-रीति नहिं जानी तब ब्रजनाथ तजी। हमरे प्रेम न उनको, ऊधो! सब रस-रीति लजी॥ हमतें भली जलचरी बपुरी अपनो नेम निबाहैं। जल तें बिछुरत ही तन त्यागैं जल ही जल को चाहैं। अचरज एक भयो सुनो, ऊधो! जल बिनु मीन जियो। सूरदास प्रभु आवन कहि गए मन बिस्वास कियो

ūdho! yaha mana adhika kaṭhora| nikasi na gayo ku~bha kā~ce jyoṃ bichurata na~dakisora|| hama kachu prīti-rīti nahiṃ jānī taba brajanātha tajī| hamare prema na unako, ūdho! saba rasa-rīti lajī|| hamateṃ bhalī jalacarī bapurī apano nema nibāhaiṃ| jala teṃ bichurata hī tana tyāgaiṃ jala hī jala ko cāhaiṃ| acaraja eka bhayo suno, ūdho! jala binu mīna jiyo| sūradāsa prabhu āvana kahi gae mana bisvāsa kiyo

उधो! होत कहा समुझाए? चित चुभि रही साँवरी मूरति, जोग कहा तुम लाए? पा लागौं कहियो हरिजू सों दरस देहु इक बेर। सूरदास प्रभु सों बिनती करि यहै सुनैयो टेर

udho! hota kahā samujhāe? cita cubhi rahī sā~varī mūrati, joga kahā tuma lāe? pā lāgauṃ kahiyo harijū soṃ darasa dehu ika bera| sūradāsa prabhu soṃ binatī kari yahai sunaiyo ṭera