Padas 361–375

कै तुम सों छूटैं लरि ऊधो कै रहिए गहि मौन। एक हम जरैं जरे पर जारत, बोलहु कुबची कौन? एक अंग मिले दोऊ कारे, काको मन पतियाए? तुम सी होय सो तुम सों बोलै, लीने जोगहि आए॥ जा काहू कों जोग चाहिए सो लै भस्म लगावै। जिन्ह उर ध्यान नंदनंदन को तिन्ह क्यों निर्गुन भावै? कहौ सँदेस सूर के प्रभु को, यह निर्गुन अँधियारो। अपनो बोयो आप लूनिए, तुम आपुहि निरवारो

kai tuma soṃ chūṭaiṃ lari ūdho kai rahie gahi mauna| eka hama jaraiṃ jare para jārata, bolahu kubacī kauna? eka aṃga mile doū kāre, kāko mana patiyāe? tuma sī hoya so tuma soṃ bolai, līne jogahi āe|| jā kāhū koṃ joga cāhie so lai bhasma lagāvai| jinha ura dhyāna naṃdanaṃdana ko tinha kyoṃ nirguna bhāvai? kahau sa~desa sūra ke prabhu ko, yaha nirguna a~dhiyāro| apano boyo āpa lūnie, tuma āpuhi niravāro

ऐसो, माई! एक कोद को हेतु। जैसे बसन कुसुँभ-रंग मिलि कै नेकुचटक पुनि सेत॥ जैसे करनि किसान बापुरो नौ नौ बाहैं देत। एतेहू पै नीर निठुर भयो उमगि आय सब लेत॥ सब गोपी भाखैं ऊधो सों, सुनियो बात सचेत। सूरदास प्रभु जन तें बिछुरें ज्यों कृत राई रेत

aiso, māī! eka koda ko hetu| jaise basana kusu~bha-raṃga mili kai nekucaṭaka puni seta|| jaise karani kisāna bāpuro nau nau bāhaiṃ deta| etehū pai nīra niṭhura bhayo umagi āya saba leta|| saba gopī bhākhaiṃ ūdho soṃ, suniyo bāta saceta| sūradāsa prabhu jana teṃ bichureṃ jyoṃ kṛta rāī reta

मधुकर, मन सुनि जोग डरै। तुमहू चतुर कहावत अति ही इतो न समुझि परै॥ और सुमन जो अनेक सुगंधित, सीतल रुचि सो करै। क्यों तू कोकनद बनहिं सरै औ और सबै अनरै? दिनकर महाप्रतापपुंज-वर, सबको तेज हरै। क्यों न चकोर छाँड़ि मृग-अंकहि वाको ध्यान करै? उलटोइ ज्ञान सबै उपदेसत, सुनि सुनि जीय जरै। जंबू-वृक्ष कहौ क्यों, लंपट! फलवर अंब फरै॥ मुक्ता अवधि मराल प्रान है जौ लगि ताहि चरै। निघटत निपट, सूर, ज्यों जल बिनु व्याकुल मीन मरै

madhukara, mana suni joga ḍarai| tumahū catura kahāvata ati hī ito na samujhi parai|| aura sumana jo aneka sugaṃdhita, sītala ruci so karai| kyoṃ tū kokanada banahiṃ sarai au aura sabai anarai? dinakara mahāpratāpapuṃja-vara, sabako teja harai| kyoṃ na cakora chā~r̤i mṛga-aṃkahi vāko dhyāna karai? ulaṭoi jñāna sabai upadesata, suni suni jīya jarai| jaṃbū-vṛkṣa kahau kyoṃ, laṃpaṭa! phalavara aṃba pharai|| muktā avadhi marāla prāna hai jau lagi tāhi carai| nighaṭata nipaṭa, sūra, jyoṃ jala binu vyākula mīna marai

बिरचि मन बहुरि राच्यो आय। टूटी जुरै बहुत जतनन करि तऊ दोष नहिं जाय॥ कपट हेतु को प्रीति निरंतर नोइ चोखाई गाय। दूध फटे जैसे भइ काँजी, कौन स्वाद करि खाय? केरा पास ज्यों बेर निरंतर हालत दुख दै जाय। स्वाति-बूँद ज्यों परे फनिक-मुख परत बिषै ह्वै जाय॥ ऐसी केती तुम जौ उनकी कहौ बनाय बनाय। सूरजदास दिगंबर-पुर में कहा रजक-व्यौसाय

biraci mana bahuri rācyo āya| ṭūṭī jurai bahuta jatanana kari taū doṣa nahiṃ jāya|| kapaṭa hetu ko prīti niraṃtara noi cokhāī gāya| dūdha phaṭe jaise bhai kā~jī, kauna svāda kari khāya? kerā pāsa jyoṃ bera niraṃtara hālata dukha dai jāya| svāti-bū~da jyoṃ pare phanika-mukha parata biṣai hvai jāya|| aisī ketī tuma jau unakī kahau banāya banāya| sūrajadāsa digaṃbara-pura meṃ kahā rajaka-vyausāya

कहत कत परदेसी की बात? मंदिर-अरध-अवधि बदि हम सों, हरि-अहार चलि जात॥ ससि-रिपु बरष सूर-रिपु युग वर, हर-रिपु किए फिरै घात। मघ-पंचक लै गए स्यामघन, आय बनी यह बात॥ नखत, बेद, ग्रह जोरि अर्द्ध करि को बरजै हम खात। सूरदास प्रभु तुमहिं मिलन कों कर मीड़ति पछितात

kahata kata paradesī kī bāta? maṃdira-aradha-avadhi badi hama soṃ, hari-ahāra cali jāta|| sasi-ripu baraṣa sūra-ripu yuga vara, hara-ripu kie phirai ghāta| magha-paṃcaka lai gae syāmaghana, āya banī yaha bāta|| nakhata, beda, graha jori arddha kari ko barajai hama khāta| sūradāsa prabhu tumahiṃ milana koṃ kara mīr̤ati pachitāta

उधो! मन माने की बात। दाख छुहारा छाँड़ि अमृत-फल विष-कीरा विष खात। जौ चकोर को दै कपूर कोउ तजि अंगार अघात? मधुप करत घर कोरि काठ में बँधत कमल के पात॥ ज्यों पतंग हित जानि आपनो दीपक सों लपटात। सूरदास जाको मन जासों सोई ताहि सुहात॥३३६॥

udho! mana māne kī bāta| dākha chuhārā chā~r̤i amṛta-phala viṣa-kīrā viṣa khāta| jau cakora ko dai kapūra kou taji aṃgāra aghāta? madhupa karata ghara kori kāṭha meṃ ba~dhata kamala ke pāta|| jyoṃ pataṃga hita jāni āpano dīpaka soṃ lapaṭāta| sūradāsa jāko mana jāsoṃ soī tāhi suhāta||336||

कर-कंकन तें भुज-टाँड़ भई। मधुवन चलत स्याम मनमोहन आवन-अवधि जो निकट दई॥ जोहति पंथ मनावति संकर बासर निसि मोहिं गनत गई। पाती लिखत बिरह तन व्याकुल कागर ह्वै गयो नीरमई॥ ऊधो! मुख के बचनन कहियो हरि सों सूल नितप्रतिहि नई। सूरदास प्रभु तुम्हरे दरस को बियोगिनि बिकल भई

kara-kaṃkana teṃ bhuja-ṭā~r̤a bhaī| madhuvana calata syāma manamohana āvana-avadhi jo nikaṭa daī|| johati paṃtha manāvati saṃkara bāsara nisi mohiṃ ganata gaī| pātī likhata biraha tana vyākula kāgara hvai gayo nīramaī|| ūdho! mukha ke bacanana kahiyo hari soṃ sūla nitapratihi naī| sūradāsa prabhu tumhare darasa ko biyogini bikala bhaī

फूल बिनन नहिं जाउँ सखी री! हरि बिन कैसे बीनौं फूल। सुन री, सखी! मोहिं रामदोहाई फूल लगत तिरसूल॥ वे जो देखियत राते राते फूलन फूली डार। हरि बिन फूल झार से लागत झरि झरि परत अँगार॥ कैसे कै पनघट जाउँ सखी री! डोलौं सरिता-तीर। भरि भरि जमुना उमड़ि चली है इन नैनन के नीर॥ इन नैनन के नीर सखी री! सेज भई घरनाउ। चाहति हौं याही पै चढ़िकै स्याम-मिलन कों जाउँ॥ प्रान हमारे बिन हरि प्यारे रहे अधरन पर आय। सूरदास के प्रभु सों सजनी कौन कहै समुझाय?

phūla binana nahiṃ jāu~ sakhī rī! hari bina kaise bīnauṃ phūla| suna rī, sakhī! mohiṃ rāmadohāī phūla lagata tirasūla|| ve jo dekhiyata rāte rāte phūlana phūlī ḍāra| hari bina phūla jhāra se lāgata jhari jhari parata a~gāra|| kaise kai panaghaṭa jāu~ sakhī rī! ḍolauṃ saritā-tīra| bhari bhari jamunā umar̤i calī hai ina nainana ke nīra|| ina nainana ke nīra sakhī rī! seja bhaī gharanāu| cāhati hauṃ yāhī pai car̤hikai syāma-milana koṃ jāu~|| prāna hamāre bina hari pyāre rahe adharana para āya| sūradāsa ke prabhu soṃ sajanī kauna kahai samujhāya?

ऊधो जू! मैं तिहारे चरनन लागौं बारक या ब्रज करबि भाँवरी। निसि न नींद आवै, दिन न भोजन भावै, मग जोवत भई दृष्टि झाँवरी॥ बहै बृंदावन स्याम सघन बन, बहै सुभग सरि साँवरी। एक स्याम बिनु स्याम न भावै सुधि न रही जैसे बकत बावरी॥ लाज छाँड़ि हम उतहिं आवती चलि न सकति आवै बिरह-ताँवरी। सूरदास प्रभु बेगि दरस दीजै होय है जग में कीरति रावरी

ūdho jū! maiṃ tihāre caranana lāgauṃ bāraka yā braja karabi bhā~varī| nisi na nīṃda āvai, dina na bhojana bhāvai, maga jovata bhaī dṛṣṭi jhā~varī|| bahai bṛṃdāvana syāma saghana bana, bahai subhaga sari sā~varī| eka syāma binu syāma na bhāvai sudhi na rahī jaise bakata bāvarī|| lāja chā~r̤i hama utahiṃ āvatī cali na sakati āvai biraha-tā~varī| sūradāsa prabhu begi darasa dījai hoya hai jaga meṃ kīrati rāvarī

ऊधो! जबहिं जाव गोकुलमनि आगे पैयाँ लागन कहियो। अब मोहिं बिपति परी दर्सन बिनु, सहि न सकत तन दारुन दहियो॥ सरदचंद मोहिं बैरि महा भयो, अनिल सहि न परै किहि बिधि रहियो? सूर स्याम बिनु गृह बन सूनो, बिन मोहन काको मुख चहियो?

ūdho! jabahiṃ jāva gokulamani āge paiyā~ lāgana kahiyo| aba mohiṃ bipati parī darsana binu, sahi na sakata tana dāruna dahiyo|| saradacaṃda mohiṃ bairi mahā bhayo, anila sahi na parai kihi bidhi rahiyo? sūra syāma binu gṛha bana sūno, bina mohana kāko mukha cahiyo?

मेरे मन इतनी सूल रही। वै बतियाँ छतियाँ लिखि राखीं जे नँदलाल कही॥ एक दिवस मेरे गृह आए मैं ही मथति दही। देखि तिन्हैं मैं मान कियो सखि सो हरि गुसा गही॥ सोचति अति पछिताति राधिका मुर्छित धरनि ढही। सूरदास प्रभु के बिछुरे तें बिथा न जाति सही

mere mana itanī sūla rahī| vai batiyā~ chatiyā~ likhi rākhīṃ je na~dalāla kahī|| eka divasa mere gṛha āe maiṃ hī mathati dahī| dekhi tinhaiṃ maiṃ māna kiyo sakhi so hari gusā gahī|| socati ati pachitāti rādhikā murchita dharani ḍhahī| sūradāsa prabhu ke bichure teṃ bithā na jāti sahī

देखौ माधव की मित्राई। आई उघरि कनक-कलई ज्यों दै निज गये दगाई॥ हम जाने हरि हितू हमारे उनके चित्त ठगाई। छाँड़ी सुरति सबै ब्रजकुल की निठुर लोग बिलमाई॥ प्रेम निबाहिं कहा वै जानैं साँचेई अहिराई। सूरदास बिरहिनी बिकल-मति कर मींजै पछिताई

dekhau mādhava kī mitrāī| āī ughari kanaka-kalaī jyoṃ dai nija gaye dagāī|| hama jāne hari hitū hamāre unake citta ṭhagāī| chā~r̤ī surati sabai brajakula kī niṭhura loga bilamāī|| prema nibāhiṃ kahā vai jānaiṃ sā~ceī ahirāī| sūradāsa birahinī bikala-mati kara mīṃjai pachitāī

मैं जान्यो मोको माधव हित है कियो। अति आदर अलि ज्यों मिलि कमलहि मुख-मकरंद लियो॥ बरु वह भली पूतना जाको पय-संग प्रान पियो। मनमधु अँचै निपट सूने तन यह दुख अधिक दियो॥ देखि अचेत अमृत-अवलोकनि, चलि जु सींचि हियो। सूरदास प्रभु वा अधार के नाते परत जियो

maiṃ jānyo moko mādhava hita hai kiyo| ati ādara ali jyoṃ mili kamalahi mukha-makaraṃda liyo|| baru vaha bhalī pūtanā jāko paya-saṃga prāna piyo| manamadhu a~cai nipaṭa sūne tana yaha dukha adhika diyo|| dekhi aceta amṛta-avalokani, cali ju sīṃci hiyo| sūradāsa prabhu vā adhāra ke nāte parata jiyo

अब या तनहि राखि का कीजै? सुनि री सखी! स्यामसुंदर बिन बाटि बिषम बिष पीजै॥ कै गिरिए गिरि चढ़िकै, सजनी, कैस्वकर सीस सिव दीजै। कै दहिए दारुन दावानल, कै तो जाय जमुन धँसि लीजै॥ दुसह वियोग बिरह माधव के कौन दिनहिं दिन छीजै? सूरदास प्रीतम बिन राधे सोचि सोचि मनही मन खीजै

aba yā tanahi rākhi kā kījai? suni rī sakhī! syāmasuṃdara bina bāṭi biṣama biṣa pījai|| kai girie giri car̤hikai, sajanī, kaisvakara sīsa siva dījai| kai dahie dāruna dāvānala, kai to jāya jamuna dha~si lījai|| dusaha viyoga biraha mādhava ke kauna dinahiṃ dina chījai? sūradāsa prītama bina rādhe soci soci manahī mana khījai

यशोदा का वचन उद्धव प्रति सँदेसो देवकी सों कहियो॥ हौं तो धाय तिहारे सुत की कृपा करत ही रहियो॥ उबटन तेल और तातो जल देखत ही भजि जाते। जोइ जोइ माँगत सोइ सोइ देती करम करम करि न्हाते॥ तुम तौ टेव जानतिहि ह्वैहौ तऊ मोहिं कहि आवै। प्रात उठत मेरे लाल लड़ैतेहि माखन-रोटी भावै॥ अब यह सूर मोहिं निसिबासर बड़ो रहत जिय सोच। अब मेरे अलक-लड़ैते लालन ह्वै हैं करत सँकोच

yaśodā kā vacana uddhava prati sa~deso devakī soṃ kahiyo|| hauṃ to dhāya tihāre suta kī kṛpā karata hī rahiyo|| ubaṭana tela aura tāto jala dekhata hī bhaji jāte| joi joi mā~gata soi soi detī karama karama kari nhāte|| tuma tau ṭeva jānatihi hvaihau taū mohiṃ kahi āvai| prāta uṭhata mere lāla lar̤aitehi mākhana-roṭī bhāvai|| aba yaha sūra mohiṃ nisibāsara bar̤o rahata jiya soca| aba mere alaka-lar̤aite lālana hvai haiṃ karata sa~koca