Padas 151–165

तिहारी प्रीति किधौं तरवारि? दृष्टि-धार करि मारि साँवरे घायल सब ब्रजनारि॥ रही सुखेत ठौर बृन्दाबन, रनहु न मानति हारि। बिलपति रही संभारत छन छन बदन-सुधाकर-बारि॥ सुंदरस्याम-मनोहर-मूरति रहिहौं छबिहि निहारि। रंचक सेष रही सूर प्रभु अब जनि डारौ मारि

tihārī prīti kidhauṃ taravāri? dṛṣṭi-dhāra kari māri sā~vare ghāyala saba brajanāri|| rahī sukheta ṭhaura bṛndābana, ranahu na mānati hāri| bilapati rahī saṃbhārata chana chana badana-sudhākara-bāri|| suṃdarasyāma-manohara-mūrati rahihauṃ chabihi nihāri| raṃcaka seṣa rahī sūra prabhu aba jani ḍārau māri

मधुकर! कौन मनायो मानै? अबिनासी अति अगम अगोचर कहा प्रीति-रस जानै? सिखवहु ताहि समाधि की बातें जैहैं लोग सयाने। हम अपने ब्रज ऐसेहि बसिहैं बिरह-बाय-बौराने॥ सोवत जागत सपने सौंतुख रहिहैं सो पति माने। बालकुमार किसोर को लीलासिंधु सो तामें साने॥ पर्यो जो पयनिधि बूंद अलप सो को जो अब पहिचाने? जाके तन धन प्रान सूर हरि-मुख-मुसुकानि बिकाने

madhukara! kauna manāyo mānai? abināsī ati agama agocara kahā prīti-rasa jānai? sikhavahu tāhi samādhi kī bāteṃ jaihaiṃ loga sayāne| hama apane braja aisehi basihaiṃ biraha-bāya-baurāne|| sovata jāgata sapane sauṃtukha rahihaiṃ so pati māne| bālakumāra kisora ko līlāsiṃdhu so tāmeṃ sāne|| paryo jo payanidhi būṃda alapa so ko jo aba pahicāne? jāke tana dhana prāna sūra hari-mukha-musukāni bikāne

मधुकर! ये मन बिगरि परे। समुझत नाहिं ज्ञानगीता को हरि-मुसुकानि अरे॥ बालमुकुंद-रूप-रसराचे तातें बक्र खरे। होय न सूधी स्वान पूँछि ज्यों कोटिक जतन करे॥ हरि-पद-नलिन बिसारत नाहीं सीतल उर संचरे। जोग गंभीर है अंधकूप तेहि देखत दूरि डरे॥ हरि-अनुराग सुहाग भाग भरे अमिय तें गरल गरे। सूरदास बरु ऐसेहि रहिहैं कान्हबियोग-भरे

madhukara! ye mana bigari pare| samujhata nāhiṃ jñānagītā ko hari-musukāni are|| bālamukuṃda-rūpa-rasarāce tāteṃ bakra khare| hoya na sūdhī svāna pū~chi jyoṃ koṭika jatana kare|| hari-pada-nalina bisārata nāhīṃ sītala ura saṃcare| joga gaṃbhīra hai aṃdhakūpa tehi dekhata dūri ḍare|| hari-anurāga suhāga bhāga bhare amiya teṃ garala gare| sūradāsa baru aisehi rahihaiṃ kānhabiyoga-bhare

मधुकर! जौ तुम हितू हमारे। तौ या भजन-सुधानिधि में जनि डारौ जोग-जल खारे॥ सुनु सठ रीति, सुरभि पयदायक क्यों न लेत हल फारे? जो भयभीत होत रजु देखत क्यों बढ़वत अहि कारे॥ निज कृत बूझि, बिना दसनन हति तजत धाम नहिं हारे। सो बल अछत निसा पंकज में दल-कपाट नहिं टारे॥ रे अलि, चपल मोदरस-लंपट! कतहि बकत बिन काज? सूर स्याम-छबि क्यों बिसरत है नखसिख अंग बिराज?

madhukara! jau tuma hitū hamāre| tau yā bhajana-sudhānidhi meṃ jani ḍārau joga-jala khāre|| sunu saṭha rīti, surabhi payadāyaka kyoṃ na leta hala phāre? jo bhayabhīta hota raju dekhata kyoṃ bar̤havata ahi kāre|| nija kṛta būjhi, binā dasanana hati tajata dhāma nahiṃ hāre| so bala achata nisā paṃkaja meṃ dala-kapāṭa nahiṃ ṭāre|| re ali, capala modarasa-laṃpaṭa! katahi bakata bina kāja? sūra syāma-chabi kyoṃ bisarata hai nakhasikha aṃga birāja?

मधुकर! कौन गाँव की रीति? ब्रजजुवतिन को जोग-कथा तुम कहत सबै बिपरीति॥ जा सिर फूल फुलेल मेलिकै हरि-कर ग्रंथैं छोरी। ता सिर भसम, मसान पै सेवन, जटा करत आघोरी॥ रतनजटित ताटंक बिराजत अरु कमलन की जोति। तिन स्रवनन पहिरावत मुद्रा तोहिं दया नहिं होति॥ बेसरि नाक, कंठ मनिमाला, मुखनि सार असवास। तिन मुख सिंगी कहौ बजावन, भोजन आक, पलास॥ जा तन को मृगमद घसि चंदन सूछम पट पहिराए। ता तन को रचि चीर पुरातन दै ब्रजनाथ पठाए॥ वै अबिनासी ज्ञान घटैगो यहि बिधि जोग सिखाए। करैं भोग भरिपूर सूर तहँ, जोग करैं ब्रज आए

madhukara! kauna gā~va kī rīti? brajajuvatina ko joga-kathā tuma kahata sabai biparīti|| jā sira phūla phulela melikai hari-kara graṃthaiṃ chorī| tā sira bhasama, masāna pai sevana, jaṭā karata āghorī|| ratanajaṭita tāṭaṃka birājata aru kamalana kī joti| tina sravanana pahirāvata mudrā tohiṃ dayā nahiṃ hoti|| besari nāka, kaṃṭha manimālā, mukhani sāra asavāsa| tina mukha siṃgī kahau bajāvana, bhojana āka, palāsa|| jā tana ko mṛgamada ghasi caṃdana sūchama paṭa pahirāe| tā tana ko raci cīra purātana dai brajanātha paṭhāe|| vai abināsī jñāna ghaṭaigo yahi bidhi joga sikhāe| karaiṃ bhoga bharipūra sūra taha~, joga karaiṃ braja āe

मधुकर! ये नयना पै हारे। निरखि निरखि मग कमलनयन को प्रेममगन भए भारे॥ ता दिन तें नींदौ पुनि नासी, चौंकि परत अधिकारे। सपन तुरी जागत पुनि सोई जो हैं हृदय हमारे॥ यह निगुन लै ताहि बतावो जो जानैं याके सारे। सूरदास गोपाल छाँड़ि कै चूसैं टेटी खारे

madhukara! ye nayanā pai hāre| nirakhi nirakhi maga kamalanayana ko premamagana bhae bhāre|| tā dina teṃ nīṃdau puni nāsī, cauṃki parata adhikāre| sapana turī jāgata puni soī jo haiṃ hṛdaya hamāre|| yaha niguna lai tāhi batāvo jo jānaiṃ yāke sāre| sūradāsa gopāla chā~r̤i kai cūsaiṃ ṭeṭī khāre

मधुकर! कह कारे की जाति? ज्यों जल मीन, कमल पै अलि की, त्यों नहिं इनकी प्रीति॥ कोकिल कुटिल कपट बायस छलि फिरि नहिं वहि वन जाति। तैसेहि कान्ह केलि-रस अँचयो बैठि एक ही पाँति॥ सुत-हित जोग जज्ञ ब्रत कीजत बहु बिधि नींकी भाँति। देखहु अहि मन मोहमया तजि ज्यों जननी जनि खाति॥ तिनको क्यों मन बिसमौ कीजै औगुन लौं सुख-सांति। तैसेइ सूर सुनौ जदुनंदन, बजी एकस्वर तांति

madhukara! kaha kāre kī jāti? jyoṃ jala mīna, kamala pai ali kī, tyoṃ nahiṃ inakī prīti|| kokila kuṭila kapaṭa bāyasa chali phiri nahiṃ vahi vana jāti| taisehi kānha keli-rasa a~cayo baiṭhi eka hī pā~ti|| suta-hita joga jajña brata kījata bahu bidhi nīṃkī bhā~ti| dekhahu ahi mana mohamayā taji jyoṃ jananī jani khāti|| tinako kyoṃ mana bisamau kījai auguna lauṃ sukha-sāṃti| taisei sūra sunau jadunaṃdana, bajī ekasvara tāṃti

मधुकर! ल्याए जोग-संदेसो। भली स्याम-कुसलात सुनाई, सुनतहिं भयो अंदेसो॥ आस रही जिय कबहुँ मिलन की, तुम आवत ही नासी। जुवतिन कहत जटा सिर बांधहु तो मिलिहैं अबिनासी॥ तुमको जिन गोकुलहिं पठायो ते बसुदेव-कुमार। सूर स्याम मनमोहन बिहरत ब्रज में नंददुलार

madhukara! lyāe joga-saṃdeso| bhalī syāma-kusalāta sunāī, sunatahiṃ bhayo aṃdeso|| āsa rahī jiya kabahu~ milana kī, tuma āvata hī nāsī| juvatina kahata jaṭā sira bāṃdhahu to milihaiṃ abināsī|| tumako jina gokulahiṃ paṭhāyo te basudeva-kumāra| sūra syāma manamohana biharata braja meṃ naṃdadulāra

स्याम विनोदी रे मधुबनियाँ। अब हरि गोकुल कांहे को आवहिं चाहत नवयौवनियाँ॥ वे दिन माधव भूलि बिसरि गए गोद खिलाए कनियाँ। गुहि गुहि देते नंद जसोदा तनक कांच के मनियाँ॥ दिना चारि तें पहिरन सीखे पट पीतांबर तनियाँ। सूरदास प्रभु तजी कामरी अब हरि भए चिकनियाँ

syāma vinodī re madhubaniyā~| aba hari gokula kāṃhe ko āvahiṃ cāhata navayauvaniyā~|| ve dina mādhava bhūli bisari gae goda khilāe kaniyā~| guhi guhi dete naṃda jasodā tanaka kāṃca ke maniyā~|| dinā cāri teṃ pahirana sīkhe paṭa pītāṃbara taniyā~| sūradāsa prabhu tajī kāmarī aba hari bhae cikaniyā~

ऊधो! हम ही हैं अति बौरी। सुभग कलेवर कुंकुम खौरी। गुंजमाल अरु पीत पिछौरी॥ रूप निरखि दृग लागे ढोरी। चित चुराय लयो मूरति सो, री! गहियत सो जा समय अंकोरी। याही तें बुधि कहियत बौरी॥ सूर स्याम सों कहिय कठोरी! यह उपदेस सुने तें बौरी

ūdho! hama hī haiṃ ati baurī| subhaga kalevara kuṃkuma khaurī| guṃjamāla aru pīta pichaurī|| rūpa nirakhi dṛga lāge ḍhorī| cita curāya layo mūrati so, rī! gahiyata so jā samaya aṃkorī| yāhī teṃ budhi kahiyata baurī|| sūra syāma soṃ kahiya kaṭhorī! yaha upadesa sune teṃ baurī

कहाँ लगि मानिए अपनी चूक? बिन गोपाल, ऊधो, मेरी छाती ह्वै न गई द्वै टूक॥ तन, मन, जौबन वृथा जात है ज्यों भुवंग की फूँक। हृदय अग्नि को दवा बरत है, कठिन बिरह की हूक॥ जाकी मनि हरि लई सीस तें कहा करै अहि मूक? सूरदास ब्रजबास बसीं हम मनहूँ दाहिने सूक॥

kahā~ lagi mānie apanī cūka? bina gopāla, ūdho, merī chātī hvai na gaī dvai ṭūka|| tana, mana, jaubana vṛthā jāta hai jyoṃ bhuvaṃga kī phū~ka| hṛdaya agni ko davā barata hai, kaṭhina biraha kī hūka|| jākī mani hari laī sīsa teṃ kahā karai ahi mūka? sūradāsa brajabāsa basīṃ hama manahū~ dāhine sūka||

ऊधों! जोग जानै कौन? हम अबला कह जोग जानैं जियत जाको रौन॥ जोग हमपै होय न आवै, धरि न आवै मौन। बाँधिहैं क्यों मन-पखेरू साधिहैं क्यों पौन? कहौ अंबर पहिरि कै मृगछाल ओढ़ै कौन? गुरु हमारे कूबरी-कर-मंत्र-माला जौन॥ मदनमोहन बिन हमारे परै बात न कौन? सूर प्रभु कब आयहैं वे श्याम दुख के दौन?

ūdhoṃ! joga jānai kauna? hama abalā kaha joga jānaiṃ jiyata jāko rauna|| joga hamapai hoya na āvai, dhari na āvai mauna| bā~dhihaiṃ kyoṃ mana-pakherū sādhihaiṃ kyoṃ pauna? kahau aṃbara pahiri kai mṛgachāla or̤hai kauna? guru hamāre kūbarī-kara-maṃtra-mālā jauna|| madanamohana bina hamāre parai bāta na kauna? sūra prabhu kaba āyahaiṃ ve śyāma dukha ke dauna?

फिर ब्रज बसहु गोकुलनाथ। बहुरि न तुमहिं जगाय पठवौं गोधनन के साथ॥ बरजौं न माखन खात कबहूँ, दैहौं देन लुटाय। कबहूँ न दैहौं उराहनो जसुमति के आगे जाय॥ दौरि दाम न देहुँगी, लकुटी न जसुमति-पानि। चोरी न देहुँ उघारि, किए औगुन न कहिहौं आनि॥ करिहौं न तुमसों मान हठ, हठिहौं न माँगत दान। कहिहौं न मृदु मुरली बजावन, करन तुमसों गान॥ कहिहौं न चरनन देन जावक, गुहन बेनी फूल। कहिहौं न करन सिंगार बट-तर, बसन जमुना-कूल॥ भुज भूषननयुत कंध धरिकै रास नृत्य न कराउँ। हौं संकेत-निकुंज बसिकै दूति-मुख न बुलाउँ। एक बार जु दरस दिखवहु प्रीति-पंथ बसाय। चँवर करौं, चढ़ाय आसन, नयन अंग अंग लाय॥ देहु दरसन नंदनंदन मिलन ही की आस। सूर प्रभु की कुँवर-छंबि को मरत लोचन प्यास

phira braja basahu gokulanātha| bahuri na tumahiṃ jagāya paṭhavauṃ godhanana ke sātha|| barajauṃ na mākhana khāta kabahū~, daihauṃ dena luṭāya| kabahū~ na daihauṃ urāhano jasumati ke āge jāya|| dauri dāma na dehu~gī, lakuṭī na jasumati-pāni| corī na dehu~ ughāri, kie auguna na kahihauṃ āni|| karihauṃ na tumasoṃ māna haṭha, haṭhihauṃ na mā~gata dāna| kahihauṃ na mṛdu muralī bajāvana, karana tumasoṃ gāna|| kahihauṃ na caranana dena jāvaka, guhana benī phūla| kahihauṃ na karana siṃgāra baṭa-tara, basana jamunā-kūla|| bhuja bhūṣananayuta kaṃdha dharikai rāsa nṛtya na karāu~| hauṃ saṃketa-nikuṃja basikai dūti-mukha na bulāu~| eka bāra ju darasa dikhavahu prīti-paṃtha basāya| ca~vara karauṃ, car̤hāya āsana, nayana aṃga aṃga lāya|| dehu darasana naṃdanaṃdana milana hī kī āsa| sūra prabhu kī ku~vara-chaṃbi ko marata locana pyāsa

कबहूँ सुधि करत गोपाल हमारी? पूछत नंद पिता ऊधो सों अरु जसुमति महतारी॥ कबहुँ तौ चूक परी अनजानत, कह अबके पछिताने? बासुदेव घर-भीतर आए हम अहीर नहिं जाने॥ पहिले गरग कह्यो हो हमसों, 'या देखे जनि भूलै'। सूरदास स्वामी के बिछुरे राति-दिवस उर सूलै

kabahū~ sudhi karata gopāla hamārī? pūchata naṃda pitā ūdho soṃ aru jasumati mahatārī|| kabahu~ tau cūka parī anajānata, kaha abake pachitāne? bāsudeva ghara-bhītara āe hama ahīra nahiṃ jāne|| pahile garaga kahyo ho hamasoṃ, 'yā dekhe jani bhūlai'| sūradāsa svāmī ke bichure rāti-divasa ura sūlai

भली बात सुनियत हैं आज। कोऊ कमलनयन पठयो है तन बनाय अपनो सो साज॥ बूझौ सखा कहौ कैसे कै, अब नाहीं कीबे कछु काज। कंस मारि बसुदेव गृह आने, उग्रसेन को दीनो राज॥ राजा भए कहाँ है यह सुख, सुरभि-संग बन गोप-समाज? अब जो सूर करौ कोउ कोटिक नाहिंन कान्ह रहत ब्रज आज

bhalī bāta suniyata haiṃ āja| koū kamalanayana paṭhayo hai tana banāya apano so sāja|| būjhau sakhā kahau kaise kai, aba nāhīṃ kībe kachu kāja| kaṃsa māri basudeva gṛha āne, ugrasena ko dīno rāja|| rājā bhae kahā~ hai yaha sukha, surabhi-saṃga bana gopa-samāja? aba jo sūra karau kou koṭika nāhiṃna kānha rahata braja āja