Padas 331–345

माधव सों न बनै मुख मोरे। जिन्ह नयनन्ह ससि स्याम बिलोक्यो ते क्यों जात तरनि सों जोरे। मुनि-मन-रमन ये जोग, कमठ तन मँदर-भार सहै क्यों, ओ रे! तरुनी-हृदय-कुमुद के बँधन कुंजर क्यों न रहत बिनु तोरे॥ नीलांबर-घनस्याम नीलमनि पैयत है क्यों धूम के भोरे। सूर भृँग कमलन के बिरही चँपक मन लागत कहुँ थोरे

mādhava soṃ na banai mukha more| jinha nayananha sasi syāma bilokyo te kyoṃ jāta tarani soṃ jore| muni-mana-ramana ye joga, kamaṭha tana ma~dara-bhāra sahai kyoṃ, o re! tarunī-hṛdaya-kumuda ke ba~dhana kuṃjara kyoṃ na rahata binu tore|| nīlāṃbara-ghanasyāma nīlamani paiyata hai kyoṃ dhūma ke bhore| sūra bhṛ~ga kamalana ke birahī ca~paka mana lāgata kahu~ thore

और सकल अँगन तें, ऊधो! अँखियाँ अधिक दुखारी। अतिहि पिराति, सिराति न कबहूँ, बहुत जतन करि हारी॥ एकटक रहति, निमेष न लावति, बिथा बिकल भइ भारी। भरि गइँ विरह-बाय-बिनु दरसन, चितवति रहति उघारी॥ रे रे अलि! गुरु ज्ञान-सलाकहि क्यों सहि सकति तुम्हारी। सूर सुअंजन आनु रूप-रस आरति हरन हमारी

aura sakala a~gana teṃ, ūdho! a~khiyā~ adhika dukhārī| atihi pirāti, sirāti na kabahū~, bahuta jatana kari hārī|| ekaṭaka rahati, nimeṣa na lāvati, bithā bikala bhai bhārī| bhari gai~ viraha-bāya-binu darasana, citavati rahati ughārī|| re re ali! guru jñāna-salākahi kyoṃ sahi sakati tumhārī| sūra suaṃjana ānu rūpa-rasa ārati harana hamārī

भूलति हौ कत मीठी बातन। ये अलि हैं उनहीं के संगी, चंचल चित्त, साँवरे गातन॥ वै मुरली धुनि कै जग मोहत, इनकी गुंज सुमन-मन-पातन। वै उठि आन आन मन रंजत, ये उड़ि अनत रंग-रस-रातन॥ वै नवतनु मानिनि गृह-बासी, ये निसिदिवस रहत जलजातन। ये षटपद, वै द्विपद चतुर्भुज, इनमें नाहिं भेद कोउ भाँतन॥ स्वारथ-निपुन सर्बरस भोगी जनि पतियाहु बिरह दुख-दातन। वै माधव, ये मधुप, सूर सुनि, इन दोउन कोऊ घटि घाट ना

bhūlati hau kata mīṭhī bātana| ye ali haiṃ unahīṃ ke saṃgī, caṃcala citta, sā~vare gātana|| vai muralī dhuni kai jaga mohata, inakī guṃja sumana-mana-pātana| vai uṭhi āna āna mana raṃjata, ye ur̤i anata raṃga-rasa-rātana|| vai navatanu mānini gṛha-bāsī, ye nisidivasa rahata jalajātana| ye ṣaṭapada, vai dvipada caturbhuja, inameṃ nāhiṃ bheda kou bhā~tana|| svāratha-nipuna sarbarasa bhogī jani patiyāhu biraha dukha-dātana| vai mādhava, ye madhupa, sūra suni, ina douna koū ghaṭi ghāṭa nā

हरि सों कहियो, हो, जैसे गोकुल आवैं। दिन दस रहे सो भली कीन्ही, अब जनि गहरु लगावैं॥ नाहिंन कछू सुहात तुमहिं बिनु, कानन भवन न भावैं। देखे जात आपनी आँखिन्ह हम कहि कहा जनावैं? बाल बिलख, मुख गउ न चरति तृन, बछरा पीवत पय नहिं धावैं। सूर स्याम बिनु रटति रैनिदिन, मिलेहि भले सचु पावैं

hari soṃ kahiyo, ho, jaise gokula āvaiṃ| dina dasa rahe so bhalī kīnhī, aba jani gaharu lagāvaiṃ|| nāhiṃna kachū suhāta tumahiṃ binu, kānana bhavana na bhāvaiṃ| dekhe jāta āpanī ā~khinha hama kahi kahā janāvaiṃ? bāla bilakha, mukha gau na carati tṛna, bacharā pīvata paya nahiṃ dhāvaiṃ| sūra syāma binu raṭati rainidina, milehi bhale sacu pāvaiṃ

सखी री! मथुरा में द्वै हँस। एक अक्रूर और ये ऊधो, जानत नीके गंस॥ ये दोउ छीर नीर पहिचानत, इनहि बधायों कंस। इनके कुल ऐसी चलि आई, सदा उजागर बंस॥ अजहूं कृपा करौ मधुबन पर जानि आपनो अंस। सूर सुयोग सिखावत अबलन्ह, सुनत होय मनभ्रंस

sakhī rī! mathurā meṃ dvai ha~sa| eka akrūra aura ye ūdho, jānata nīke gaṃsa|| ye dou chīra nīra pahicānata, inahi badhāyoṃ kaṃsa| inake kula aisī cali āī, sadā ujāgara baṃsa|| ajahūṃ kṛpā karau madhubana para jāni āpano aṃsa| sūra suyoga sikhāvata abalanha, sunata hoya manabhraṃsa

बारक कान्ह करौ किन फेरो? दरसन दै मधुबन को सिधारो, सुख इतनो बहुतेरो॥ भलेहि मिले बसुदेव देवकी जननि जनक निज कुटुँब घनेरो। केहि अवलंब रहैं हम ऊधो! देखि दुःख नँद-जसुमति केरो॥ तुम बिनु को अनाथ-प्रतिपालन, जाजरि नाव कुसँग सबेरो। गए सिंधु को पार उतारै, अब यह सूर थक्यो ब्रज-बेरो

bāraka kānha karau kina phero? darasana dai madhubana ko sidhāro, sukha itano bahutero|| bhalehi mile basudeva devakī janani janaka nija kuṭu~ba ghanero| kehi avalaṃba rahaiṃ hama ūdho! dekhi duḥkha na~da-jasumati kero|| tuma binu ko anātha-pratipālana, jājari nāva kusa~ga sabero| gae siṃdhu ko pāra utārai, aba yaha sūra thakyo braja-bero

मानौ ढरे एक ही साँचे। नखसिख कमल-नयन की सोभा एक भृगुलता-बाँचे॥ दारुजात कैसे गुन इनमें, ऊपर अन्तर स्याम। हमको धूम-गयन्द बताबत, बचन कहत निष्काम॥ ये सब असित देह धरे जेते ऐसेई, सखि! जानि। सूर एक तें एक आगरे वा मथुरा की खानि

mānau ḍhare eka hī sā~ce| nakhasikha kamala-nayana kī sobhā eka bhṛgulatā-bā~ce|| dārujāta kaise guna inameṃ, ūpara antara syāma| hamako dhūma-gayanda batābata, bacana kahata niṣkāma|| ye saba asita deha dhare jete aiseī, sakhi! jāni| sūra eka teṃ eka āgare vā mathurā kī khāni

बातैं कहत सयाने की सी। कपट तिहारो प्रगट देखियत ज्यों जल नाए सीसी॥ हौं तो कहत तिहारे हित की काहे को तू भरमत। हमहूं मया तिहारी हैं कछु, थोरी सी है मैमत॥ छाय बसाय गए सुफलकसुत नेकहु लागी बार न। सूर कृपा करि आए ऊधो तापै ढेवा डारन

bātaiṃ kahata sayāne kī sī| kapaṭa tihāro pragaṭa dekhiyata jyoṃ jala nāe sīsī|| hauṃ to kahata tihāre hita kī kāhe ko tū bharamata| hamahūṃ mayā tihārī haiṃ kachu, thorī sī hai maimata|| chāya basāya gae suphalakasuta nekahu lāgī bāra na| sūra kṛpā kari āe ūdho tāpai ḍhevā ḍārana

आए नँदनन्दन के नेव। गोकुल आय जोग बिस्तार्यो, भली तुम्हारी टेव॥ जब बृन्दाबन रास रच्यो हरि तबहि कहाँ तू हेव। अब जुवतिन को जोग सिखावत, भस्म अधारी सेव॥ हम लगि तुम क्यों यह मत ठान्यो ज्यों जोगिन को भोग। सूरदास प्रभु सुनत अधिक दुख, आतुर बिरह-बियोग

āe na~danandana ke neva| gokula āya joga bistāryo, bhalī tumhārī ṭeva|| jaba bṛndābana rāsa racyo hari tabahi kahā~ tū heva| aba juvatina ko joga sikhāvata, bhasma adhārī seva|| hama lagi tuma kyoṃ yaha mata ṭhānyo jyoṃ jogina ko bhoga| sūradāsa prabhu sunata adhika dukha, ātura biraha-biyoga

मनौ दोउ एकहि मते भए। ऊधो अरु अक्रूर बधिक दोउ ब्रज आखेट ठए॥ बचन-पास बाँधे माधव-मृग, उनरत घालि लए। इनहीं हती मृगी-गोपीजन सायक-ज्ञान हए॥ बिरह-ताप को दवा देखियत चहुं दिसि लाय दए। अब धौं कहा कियो चाहत हैं, सोचत नाहिंन ए॥ परमारथी ज्ञान उपदेसत बिरहिन प्रेम-रए। कैसे जियहि स्याम बिनु सूर चुम्बक मेघ गए

manau dou ekahi mate bhae| ūdho aru akrūra badhika dou braja ākheṭa ṭhae|| bacana-pāsa bā~dhe mādhava-mṛga, unarata ghāli lae| inahīṃ hatī mṛgī-gopījana sāyaka-jñāna hae|| biraha-tāpa ko davā dekhiyata cahuṃ disi lāya dae| aba dhauṃ kahā kiyo cāhata haiṃ, socata nāhiṃna e|| paramārathī jñāna upadesata birahina prema-rae| kaise jiyahi syāma binu sūra cumbaka megha gae

या ब्रज सगुन-दीप परगास्यो। सुनि ऊधो! भृकुटी त्रिबेदि तर निसिदिन प्रगट अभास्यो॥ सब के उर-सरवनि सनेह भरि सुमन तिली को बास्यो। गुन अनेक ते गुन, कपूर सम परिमल बारह मास्यो॥ बिरह-अगिनि अँगन सब के, नहिं बुझत परे चौमास्यो। ताके तीन फुँकैया हरि से, तुम से, पँचसरा स्यो॥ आन-भजन तृन सम परिहरि सब करतीं जोति उपास्यो। साधन भोग निरञ्जन तें रे अन्धकार तम नास्यो॥ जा दिन भयो तिहारो आवन बोलत ही उपहास्यो। रहि न सके तुम, सींक रूप ह्वै निर्गुन-काज उकास्यो॥ बाढ़ी जोति सो केस-देस लौं, टूट्या ज्ञान-मवास्यो। दुरबासना-सलभ सब जारे जे छै रहे अकास्यो॥ तुम तौ निपट निकट के बासी, सुनियत हुते खवास्यो। गोकुल कछु रस-रीति न जानत, देखत नाहिं तमास्यो॥ सूर, करम की खीर परोसो, फिरि फिरि चरत जवास्यो

yā braja saguna-dīpa paragāsyo| suni ūdho! bhṛkuṭī tribedi tara nisidina pragaṭa abhāsyo|| saba ke ura-saravani saneha bhari sumana tilī ko bāsyo| guna aneka te guna, kapūra sama parimala bāraha māsyo|| biraha-agini a~gana saba ke, nahiṃ bujhata pare caumāsyo| tāke tīna phu~kaiyā hari se, tuma se, pa~casarā syo|| āna-bhajana tṛna sama parihari saba karatīṃ joti upāsyo| sādhana bhoga nirañjana teṃ re andhakāra tama nāsyo|| jā dina bhayo tihāro āvana bolata hī upahāsyo| rahi na sake tuma, sīṃka rūpa hvai nirguna-kāja ukāsyo|| bār̤hī joti so kesa-desa lauṃ, ṭūṭyā jñāna-mavāsyo| durabāsanā-salabha saba jāre je chai rahe akāsyo|| tuma tau nipaṭa nikaṭa ke bāsī, suniyata hute khavāsyo| gokula kachu rasa-rīti na jānata, dekhata nāhiṃ tamāsyo|| sūra, karama kī khīra paroso, phiri phiri carata javāsyo

सब जल तजे प्रेम के नाते। तऊ स्वाति चातक नहिं छाँड़त प्रकट पुकारत ताते॥ समुझत मीन नीर की बातें तऊ प्रान हठि हारत। सुनत कुरङ्ग नादरस पूरन, जदपि ब्याध सर मारत॥ निमिष चकोर नयन नहिं लावत, ससि जोवत जुग बीते। कोटि पतंग जोति बपु जारे, भए न प्रेम-घट रीते॥ अब लौं नहिं बिसरीं वे बातें सँग जो करीं ब्रजराज। सुनि ऊधो! हम सूर स्याम को छाँड़ि देहिं केहि काज?

saba jala taje prema ke nāte| taū svāti cātaka nahiṃ chā~r̤ata prakaṭa pukārata tāte|| samujhata mīna nīra kī bāteṃ taū prāna haṭhi hārata| sunata kuraṅga nādarasa pūrana, jadapi byādha sara mārata|| nimiṣa cakora nayana nahiṃ lāvata, sasi jovata juga bīte| koṭi pataṃga joti bapu jāre, bhae na prema-ghaṭa rīte|| aba lauṃ nahiṃ bisarīṃ ve bāteṃ sa~ga jo karīṃ brajarāja| suni ūdho! hama sūra syāma ko chā~r̤i dehiṃ kehi kāja?

ऊधो! मन की मन ही माँझ रही। कहिए जाय कौन सों, ऊधो! नाहिंन परति सही॥ अवधि अधार आवनहि की तन, मन ही बिथा सही। चाहति हुती गुहार जहाँ तें तहँहि तें धार वही॥ अब यह दसा देखि निज नयनन सब मरजाद ढही। सूरदास प्रभु के बिछुरे तें दुसह बियोग-दही

ūdho! mana kī mana hī mā~jha rahī| kahie jāya kauna soṃ, ūdho! nāhiṃna parati sahī|| avadhi adhāra āvanahi kī tana, mana hī bithā sahī| cāhati hutī guhāra jahā~ teṃ taha~hi teṃ dhāra vahī|| aba yaha dasā dekhi nija nayanana saba marajāda ḍhahī| sūradāsa prabhu ke bichure teṃ dusaha biyoga-dahī

स्याम को यहै परेखो आवै। कत वह प्रीति चरन जावक कृत, अब कुब्जा मन भावै॥ तब कत पानि धर्यो गोबर्द्धन, कत ब्रजपतिहि छड़ावै? कत वह बेनु अधर मोहन धरि लै लै नाम बुलावै? तब कत लाड़ लड़ाय लड़ैते हँसि हँसि कण्ठ लगावै? अब वह रूप अनूप कृपा करि नयनन हू न दिखावै॥ जा मुख-सँग समीप रैनि-दिन सोइ अब जोग सिखावै। जिन मुख दए अमृत रसना भरि सो कैसे विष प्यावै? कर मीड़ति पछताति हियो भरि, क्रम क्रम मन समुझावै। सूरदास यहि भाँति बियोगिनी तातें अति दुख पावै

syāma ko yahai parekho āvai| kata vaha prīti carana jāvaka kṛta, aba kubjā mana bhāvai|| taba kata pāni dharyo gobarddhana, kata brajapatihi char̤āvai? kata vaha benu adhara mohana dhari lai lai nāma bulāvai? taba kata lār̤a lar̤āya lar̤aite ha~si ha~si kaṇṭha lagāvai? aba vaha rūpa anūpa kṛpā kari nayanana hū na dikhāvai|| jā mukha-sa~ga samīpa raini-dina soi aba joga sikhāvai| jina mukha dae amṛta rasanā bhari so kaise viṣa pyāvai? kara mīr̤ati pachatāti hiyo bhari, krama krama mana samujhāvai| sūradāsa yahi bhā~ti biyoginī tāteṃ ati dukha pāvai

सखी री! मो मन धोखे जात। ऊधो कहत, रहत हरि मधुपुरि, गत आगत न थकात॥ इत देखौं तौ आगे मधुकर मत्त-न्याय सतरात। फिरि चाहौं तौ प्राननाथ उत सुनत कथा मुसकात॥ हरि साँचे ज्ञानी सब झूठे जे निर्गुन-जस गात। सूरदास जेहि सब जग डहक्यो ते इनको डहकात

sakhī rī! mo mana dhokhe jāta| ūdho kahata, rahata hari madhupuri, gata āgata na thakāta|| ita dekhauṃ tau āge madhukara matta-nyāya satarāta| phiri cāhauṃ tau prānanātha uta sunata kathā musakāta|| hari sā~ce jñānī saba jhūṭhe je nirguna-jasa gāta| sūradāsa jehi saba jaga ḍahakyo te inako ḍahakāta